Yohaannisi Ajuuja

4 Hakkunni gedensaanni, kune gordoho faꞌname noo waalcho laummo; umo coyishiishshannae macciishshoommo huuro, xurumbu huuro gedeete; togo yitue: “Amo kawa fuli, ikka hasiissannosi coye leellisheemmohena.” 2 Hakkiinni bayichonkonni qullaawu ayyaani dirrie; kune gordoho mitte zuufaane no; zuufaanete aanano ofollinohu no. 3 Zuufaanete aana ofollinohu dana iyyaasphiidi yinanni kinchonna serdiyooni* yinanni kincho lawanno; zuufaane doyissite dana haanja xawado kincho labbanno magani-seemo no.

4 Tenne zuufaane doyissite 24 zuufaanna no; kuri zuufaannara waajjo uddano uddidhinorinna umoho culku baꞌlatto wodhitinori 24 geerri ofolte noore laummo. 5 Zuufaanetewiinni banqo, huuronna belequ fuli; zuufaanete albaanni lamalu giirate caabbichi buwani no; kuri, lamala Maganu ayyaannara lawishshaho. 6 Zuufaanete albaanni dana kiristaali yinanni kincho lawannohu hincilaallote gedee baara lawannori no.

Zuufaanete mereeronna* zuufaanete qooxeessira albaanninna badheenni batinye illuwa noonsari shoolu heeshshote kalaqami no. 7 Umihu heeshshote kalaqami doobbiicho lawanno; layinkihu heeshshote kalaqami booto lawanno; sayikkihu heeshshote kalaqamira mannunniha lawanno albi noosi; shoolkihu heeshshote kalaqami buuwanno allamurcho lawanno. 8 Shoolunku heeshshote kalaqami mittu mittunku lee qoola afidhino; qoollate aanaanninna giddoonni illuwa woꞌmitino; insa barrano hashshano agurtukkinni, “Heeꞌrinohu, noohunna daannohu Woꞌmanka Dandaanohu Maganu Yihowa* qullaawaho, qullaawaho, qullaawaho” yitanno.

9 Kuri heeshshote kalaqami zuufaanete ofollinohuranna hegere hegerera heeꞌrannohura guweenya, ayirrinyenna galata uyitu kiiro, 10 lemiina shoolunku geerri, zuufaanete ofollinohu albaanni kumbuulte hegere hegerera heeꞌrannoha magansidhanno; hattono baꞌlattonsa zuufaanete albaanni tugge togo yitanno: 11 “Maganonke Yihowa,* baalankare kalaqoottohu ateetina, baalunkuri noohunna kalaqaminohuno ate fajjonniitina, ati guweenya, ayirrinyenna wolqa adha hasiissannohe.”