Yohaannisi Ajuuja
6 Geꞌrechu lamalunku sumudi giddonni mitto tiranna laummo; qoleno shoolunku heeshshote kalaqami giddonni mittu belequ gedee huuronni “Amo!” yaanna macciishshummo. 2 Laummo woyite, kuneeti waajju farashshi no; isi aana ofollinohura digaanu noosi; baꞌlattono uyinisi; isi qeelanni fuli; qoleno qeellesi umo fushshara alba hige hadaraasi.
3 Layinki sumuda tiri woyite layinkihu heeshshote kalaqami, “Amo!” yaanna macciishshummo. 4 Wolu duumu xiille farashshino fuli; isi aana ofollinohura mannu mimmito gorranno gede, baattote aaninni keere haaꞌre hoolara fajjinisi; jawa biseno uyinisi.
5 Sayikki sumuda tiri woyite, sayikkihu heeshshote kalaqami, “Amo!” yaanna macciishshummo. Laummo woyite, kuneeti kolishshu farashshi no; isi aana ofollinohu anga keenaasincho* adhe no. 6 Shoolunku heeshshote kalaqami mereero huuro lawannorichi togo yaanna macciishshummo: “Mitte kiilo sinde mitte diinaarera,* sase kiilo hayixe mitte diinaarera; ejersu zayitenna woyineno gawajjitooti.”
7 Shoolki sumuda tiri woyite, shoolkihu heeshshote kalaqami huuro, “Amo!” yitanna macciishshummo. 8 Laummo woyite kuneeti booru farashshi no; isi aana ofollinohu suꞌma Reyo yinanni. Waammano* hoodesi hadhanni no. Reyonna waamma seeda bisenni, hudetenni, shitanno fayyanninna uullate aani moyichinni shitanno gede, baattonnite shoolki anga aana roorre uyininsa.
9 Ontikki sumuda tiri woyite, Maganu qaalinninna farcidhino coyinni kainohunni gorrinoonni manni lubbo* kakkalote dargira woroonni laummo. 10 Insano lowo huuronni, “Qullaawunna halaalaanchu, Woꞌmanka Dandaatto Mootichi, uullate aana heedhannori aana yoo yaattokkihunna mundeenkera rabbisattokkihu mamooti geeshshaati?” yite raartu. 11 Mittu mittunkura waajjo uddano uyininsa; albillitte insa gede shinanniri miillansa ikkitino borojjootinna roduuwinsa kiiro woꞌmita geeshsha, shiima yanna agartanno gedeno kullinsa.
12 Leekki sumuda tiri woyiteno laummo; baatto lowo geeshsha huxidhu; arrishshono ordatenni* gannoonnite xiddu uddano gede kolishshidhu; aganuno gudisame mundeete gedeeha ikki; 13 wolqaataame bubbe balasete haqqicho shashshaffeenna leꞌinokki laalo giggiltannohu gede, gordu beeddaheno uullate aana giggiltu. 14 Gorduno xaanxanni heeꞌnoonni xaaxo gede bayichinni kae hoꞌli; ilaallanna giddichuwa baalano darginsanni hoꞌlitu. 15 Hakkiinni baattote aani mootoolla, roorrootu, olantote hajajaano, dureeyye, wolqaataammu, borojju baalunna borojje ikkitinokkiri baalu goddate giddonna ilaallate aana noo kinna mereero maaxantu. 16 Insano ilaallanna kinna togo yitanni huuccidhu: “Aananke ubbine zuufaanete ofollinohu albinninna Geꞌrechu hanqinni maaxxenke; 17 korkaatuno hanqinsahu jawu barri dayino; ayi uurra dandaanno?”