Yohaannisi Ajuuja
3 “Serdeesi noo songo sokkaasinchira togo yite borreessi: Lamala Maganu ayyaanna noosihunna lamala beeddakko haaꞌre noohu togo yaanno: ‘Loosokki afoommo; suꞌmira lubbotenni nootto; kayinni reyottoho. 2 Maganiꞌya albaanni loosokki woꞌmunni woꞌma umo fushshoottokkita laoommona, baqqi yii; reyara rahe nooha gate noo coyeno kaajjishiꞌri. 3 Hakko daafira, adhoottorenna macciishshoottore woꞌmanka woyite qaagi; hattono woꞌmanka woyite agadhi; maarono ei. Baqqi yaa hoogittoro kayinni, mooraanchu gede ikke dayemmo; hiittenne saatera dayemmoherono horonta diafatto.
4 “‘Ikkollana uddanonsa batteessiꞌrinokkihu boodu manni* Serdeesi ate ledo no; insa kuni coyi malinonsare ikkitino daafira waajjo uddano uddidhe ane ledo hadhanno. 5 Qeelannohuno hattonni waajjo uddano uddiꞌranno; anino suꞌmasi heeshshote maxaafi giddonni horonta feye dihuneemmo; hatteentenni Anniꞌya albaanninna sokkaasinesi albaanni suꞌmasi farciꞌreemmo. 6 Ayyaanu songuwate yaannore macca noohu macciishsho.’
7 “Filaadelfiyaho noo songo sokkaasinchira togo yite borreessi: Qullaawunna halaalaanchu, Daawiti makafachi noosihu, ayino chufannokki gede asse fanannohunna ayino fanannokki gede asse cufannohu togo yaanno: 8 ‘Loosokki afoommo; kuneeti ayino cufara dandaannokkiha faꞌnamino waalcho albakkiinni woroommo. Shiima wolqa nooheta afoommo; qaaleꞌyano agadhootto; suꞌmaꞌyano dikaadootto. 9 Kuneeti Ayihude ikkitukkinni ‘Ninke Ayihudete’ yitanni kaphitannori, Sheexaanu gaamo miilla* ikkitinori atewa dagge lekkakki albaanni kumbuultanno gede asseemmo; baxoommoheta affanno gedeno asseemmo. 10 Cincaꞌya daafira kulloonni qaale agadhoottohura,* anino uullate aana heedhannore jifate uulla woꞌmate daggannote fonqolu saatenni agareemmohe. 11 Rahe dayemmo. Ayino baꞌlattokki adhannohekki gede, woꞌmanka woyite noohere seekkite cuꞌmiꞌri.
12 “‘Qeelannoha Maganiꞌyahu qullaawu mini giddo heelliicho asseemmosi; hakkunni gedensaanni isi horonta hakkiinni difulanno; Maganiꞌya suꞌmanna gordunni Maganiꞌyawiinni dirrannoha Maganiꞌya katamiha Haaro Yerusaalame suꞌma hattono aneha haaro suꞌma aanasi borreesseemmo. 13 Ayyaanu songuwate yaannore macca noohu macciishsho.’
14 “Lodooqiyaho noo songo sokkaasinchira togo yite borreessi: Hamiiꞌni ikkinohu, ammanaminohunna halaalaanchu naqaashshe hattono Maganu kalaqami giddo umiha ikkinohu togo yaanno: 15 ‘Loosokki afoommo; woy diqiidootto, woy diꞌꞌiibbootto. Qiidoottoro woy iibboottoro danchu baino. 16 Iibbittokkinni woy qiidittokkinni mulla gammuutte nootto daafira afiiꞌyanni tufe hunammoheraati. 17 Korkaatuno “Ani dureessaho; lowo jiro duuꞌnoommo; hasiisannoeri mitturino dino” yaatto; ikkollana gadadaamo, mararsattoha, buxicho, ballichanna mullicho ikkoottota diafootto; 18 dureessa ikkatto gede giiratenni filloonni culka, uddiꞌratto gedenna teedakki diphatto gede waajjo uddano, hattono laꞌꞌa dandaatto gede illete buudhatto xagicho anewiinni hidhattora amaaleemmohe.
19 “‘Ani baxeemmoha baala borooreemmo hattono seejjeemmo. Konni daafira diinaggaawattoha ikki; maarono ei. 20 Kuneeti ani xullote uurre waalcho gangananni noommo. Ayino huuroꞌya macciishshe waalcho faniero, minisira eꞌꞌeemmo; isi ledo hurbaate iteemmo; isino ane ledo itanno. 21 Ani qeelle adhe Anniꞌya ledo zuufaanesira ofollummonte gede, qeelannoha ane ledo zuufaaneꞌyara ofollanno gede fajjeemmosi. 22 Ayyaanu songuwate yaannore macca noohu macciishsho.’”