Yohaannisi Ajuuja
18 Hakkunni gedensaanni, lowo silxaane noosihu wolu sokkaasinchi gordunni dirranna laummo; uullano ayirrinyisinni kainohunni xabbu. 2 Isino lowo huuronni togo yee cance coyiꞌri: “Ubbu! Batiꞌra Baabiloone ubbu! Agaanintete maꞌno, battete ayyaani baalunna* battennitinna giwissanno cea baala maaxantannowa ikkitu! 3 Daga baala foorresete* yortote* woyinenni dimbaasine ikkitino; uullate mootoollano ise ledo foortino; saala baꞌe duuꞌnitino jirosennino uullate aana heedhanno daddalaasine* durooꞌmitino.”
4 Gordunni wole huuro togo yitanna macciishshummo: “Mannaꞌya, cubbisera gutama hasidhinannikkihanna qoomamise iillaꞌnera hasidhinannikkiha ikkiro ise giddonni fulle. 5 Korkaatuno cubbise kuuso gordu geeshsha iillitino; Maganuno assitino beebba* qaagino. 6 Wolootaho assitinore assitine qollese; ee, assitinorira ero assitine qollese; karsiissino finiinchira isera ero assitine karsiisse. 7 Umisera ayirrinye uyitino deerrinninna saala baꞌe duuꞌnitino jironni qawaaxxidhe heedhino deerrinni, hakko bikkinni shettonna dadille uyiyyese. Korkaatuno ise woꞌmanka woyite wodanisenni, ‘Mootitte ikke ofolleemma; gunnitteno diꞌꞌikkoomma; dadilluno horo diamadannoe’ yitanno. 8 Qoomamise yaano reyo, dadillunna hude mitto barra daggannosehu iseraati; iseno gudisante giiratenni giirantanno; korkaatuno yoo yiinosehu Maganu Yihowa* jawaataho.
9 “Ise ledo foortinorinna* mittoreno saaltukkinni ledose qawaaxxidhe heedhinori uullate mootoolla, ise giirantanna fultanno wiliile laꞌanno woyite isera wiꞌlitanno hattono dadillunni gagaso gaꞌnitanno. 10 Qoleno insa shettose waajjite xeertote uurrite togo yitanno: ‘Ati batiꞌra katama, ati jawaata katama Baabiloone, bayisibao, bayisibao; yookki mitte saate giddo daggino!’
11 “Konni kaꞌa uduunnensa baala hidhannohu heeꞌrannokki daafira, uullate aana heedhanno daddalaasineno isera wiꞌlitanno hattono dadillitanno; 12 uduunninsano culkaho, birraho, ayirrado kinnaati, inquuti, shalaalatenni gannoonnite dancha uddanooti, duume xiillitte uddanooti, haarrete* uddanootinna duume silo uddanooti; qoleno suꞌniitanno haqqenni, daaniichu hinkonni, ayirrado haqqenni, camotenni, siwiilunninna addi addi kuula afidhino kinnanni seekkinoonni uduunne baalaho; 13 hattono qarafaho, Hindete qimameeti, hixaanaho, shittote, waajjo hixaanaati, woyinete, ejersu zayiteeti, liiqo bulleeti, sindete, laloho, geꞌreewoho, faradoho, faradi-gaarete, borojjehonna wole mannaati.* 14 Ee, halchoottati dancha laalo atewiinni* xeertidhino; danchunna baxisanno coyi baalu hige higannokkita atewiinni baino.
15 “Kuri coyibba hirtanni isenni durooꞌmitino daddalaasine shettose waajjite xeertote uurrite wiꞌlitanninna dadillitanni 16 togo yitanno: ‘Shalaalatenni gannoonnita dancha uddano, duume xiillittenna duume silo uddano uddiꞌrinohu hattono culku seesinni, ayirradda kinnanninna inqunni biifa biifaansi yiinohu batiꞌru katamira bayisibao, bayisibao; 17 korkaatuno hatti batiꞌra jiro mitte saate giddo baꞌino!’
“Markaawete hajajaano baala, baaru aana hadhannori baalu, markaawete giddo loossannori baalunna baaru aana loosidhe galtinori baalu xeertote uurrite, 18 ise giirantanna fultanno wiliile laꞌanni, ‘Konni batiꞌru katami gedeehu wolu katami mama no?’ yitanni raartu. 19 Insa umoho buko giggishshidhe wiꞌlitanninna dadillitanni togo yite raartu: ‘Bayisibao! Bayisibao! Baaru aana markaawe afidhinori baalu jirosenni durooꞌmitinoti batiꞌra Baabiloone mitte saate giddo baꞌu!’
20 “Gordo, ise baonni hagiidhi; kiꞌne qullaawootu, soqqamaasinenna masaalaanono hagiidhe; korkaatuno Maganu kiꞌne daafira yee ise aana yoosi yiino!”
21 Mittu jawaatu sokkaasinchi jawa daamma lawanno kincho kayise baaru giddora ole togo yii: “Batiꞌra katama Baabiloone togo assine wigidiinde woro qolle ollanni; ise layinkimeeshsho horo dianfanni. 22 Gingilaate gantanni faarsitanno faarsaano huuro, muuziiqa godoꞌlitannori huuro, suusullenna xurumba ufuuffannori huuro layinkimeeshsho atewa horo dimacciishshinanni. Mitteno angate ogimma noosi manchi layinkimeeshsho ate giddo diheeꞌranno. Daammu huurono layinkimeeshsho ate giddo dimacciishshinanni. 23 Konni kaꞌa layinkimeeshsho caabbichu giddokki dixawanno; idayichunna idayichote huurono layinkita ate giddo dimacciishshantanno; korkaatuno, daddalaasinekki lowo roorre noonsa mannaati; agaanintete loosikkinnino daga baala sodhino. 24 Ee, ise giddo masaalaanote, qullaawootunna uullate aana gorrinoonni manni baalu mundee anfoonni.”