Yohaannisi Ajuuja
19 Hakkunni gedensaanni gordoho batinye sokkaasine huuro gedeeta lowo huuro macciishshummo. Insano togo yitu: “Yahi guwisse!* Gato, ayirrinyunna wolqa Maganinkete; 2 korkaatuno yoosi halaalaanchotenna keeraanchote. Qoleno foorresenni* baatto batteessitinota batiꞌra foora mancho qorichishino; duntinote borojjootisi mundeerano rabbisino.”* 3 Insano bayichonkonni layinkimeeshsho, “Yahi guwisse!* Isewiinni fultanno wiliile hegere hegerera iima higge tunnuuqqanno” yitu.
4 Qoleno 24 geerrinna shoolunku heeshshote kalaqami kumbuulte zuufaanete ofollino Magano magansidhu; hattono “Hamiiꞌni! Yahi guwisse!”* yitu.
5 Qoleno zuufanetewiinni fultinoti mitte huuro, “Iso waajjitinanni borojjisi baalu, shiimmaaddunna jajjabbu, Maganonke guwisse” yitu.
6 Lowo sokkaasine huuro gedeeta, lowo wayibba huuro gedeetanna belequ gugatto gedee huuro macciishshummo. Togo yitu: “Yahi guwisse!* Korkaatuno Woꞌmanka Dandaanno Maganinke Yihowa* moohino! 7 Geꞌrechu sarge iillitino daafiranna idayichono iseneeto qixxeessitino daafira hagiidhino; tashshi yoonke; isirano ayirrinye uyino. 8 Ee, bilicci yitannota shalaalatenni gannoonnita dancha coꞌitte uddano uddidhara uyinoonnise; shalaalatenni gannoonniti tini dancha uddano, qullaawootunniha keeraanchimmate looso leellishshanno.”
9 Isino, “Togo yite borreessi: Geꞌrechu sarge hurbaatira woshshantinori hagiirraammaho” yiie. Qoleno, “Kuni halaalaancho Maganu qaaleeti” yee kulie. 10 Anino hatte yannara magansiꞌrammosira lekkasira uwummo. Isi kayinni togo yiie: “Qorophi! Hatto assitooti! Magano magansiꞌri! Anino ate ledonna Yesuusi daafira farciꞌrate loosi noonsa roduuwikki ledo mitteenni soqqameemmo borojjichootilla. Korkaatuno masaalo coyiꞌnannihu Yesuusi daafira farciꞌrateeti.”
11 Anino gordu faꞌname nooha laummo; kuneeti waajju farashshi no. Aanasi ofollinoha, “Ammanaminohonna Halaalaanchoho” yine woshshinanni; isi yoo yaannohunna olamannohu keeraanchimmatenniiti. 12 Illesi giirate buwanooti; umisirano batinye baꞌlatto no. Iso agurranna ayino afinokki suꞌmi aanasi borreessamino. 13 Mundee kissino uddano* uddiꞌrino; suꞌmasino “Maganu Qaale” yinanni. 14 Qoleno gordu olanto waajjuulle farado guluffe hoodesi hadhanni no; insano waajjonna coꞌitte shalaalatenni gannoonnita dancha uddano uddidhe no. 15 Daga ganannoti seeda iibbitino bise afiisinni fultanno; isino siwiilu siqqonni gashshannonsa.* Qoleno lowo hanqosi leellishannoha Woꞌmanka Dandaanno Maganiha woyine huuncinanni koofficho kadanno. 16 Uddanosi aana, ee giwoodisira, “Gashshaanote Gashshaanchonna mootoollate Mooticha” yaanno suꞌmi borreessamino.
17 Qoleno mittu sokkaasinchi arrishshote mereero* uurre nooha laummo; isino lowo huuronni cance gordu mereero buubbanno cea baalanta togo yii: “Kawira amme; lowohu Maganu hurbaatira mitteenni gamba yiiyye; 18 mootoollate maala, olu hajajaano maala, jawaatu manni maala, faradunna faradaasinete maala, baalunku maala yaano borojje ikkitinokkiri maalanna borojjootu maala hattono shiimmaaddunna jajjabbu maala itte.”
19 Hakkunni gedensaanni moyichu, uullate mootoollanna olantonsa, farashshu aana ofollinohunna olantosi ledo olantara mitteenni gamba yite noore laummo. 20 Moyichuno amadami; albasiinni maalale loosinohu kaphu masaalaanchino isi ledo amadami; kuni masaalaanchi tenne maalalenni moyichu malaate adhitinorenna misilesi magansidhinore soꞌrisiisino. Insa lamenka lubbote heedheenna, ruqaꞌninohu giirate garbi giddora olli. 21 Gattinore kayinni, farashshu aana ofollinohu afiinni fultinoti seeda bise shitu. Cea baalano maalansa itte duubbu.