Yohaannisi Ajuuja
17 Lamala sayinna haadhe noori lamalante sokkaasine giddonni mittu daye togo yiie: “Amo; lowo wayibba aana ofoltinote batiꞌra foora mancho* aana yinoonni yoo leellisheemmohena; 2 uullate mootoolla ise ledo foortino;* uullate aana heedhannorino foorrese woyinenni dimbitino.”
3 Isino ayyaanu wolqanni halallira haaꞌre massie. Hakkiicho mitte mancho, Magano xontanno suꞌmuwa woꞌmitinohunna lamalu uminna tonne buudda noosihu duumu xiille moyichi aana ofolte noota laummo. 4 Manchono duume xiillittenna duume silo uddano uddidhe no; qoleno ise culkunni, ayirrado kinnanninna inqunni seesse no; anga tiyyiꞌnanni coyinna foorrese* batte woꞌmitinoha culku finiincho adhite no. 5 Albisera, “Batiꞌra Baabiloone, foortannorinna uullannihu tiyyiꞌnanni coyi ama” yaannohu fojote suꞌmi borreessame no. 6 Tini mancho qullaawootu mundeenninna Yesuusi naqaashshe mundeenni dimbite noota laummo.
Laummo woyite lowo geeshsha maalaꞌlummo. 7 Sokkaasinchuno togo yiie: “Mayira maalaꞌlatto? Tenne mancho fojonna ise aanaho ofoltinohu lamalu uminna tonnu buudi noosi moyichi fojo kuleemmohe: 8 Laitto moyichi bashsho nooho; xa kayinni dino; ikkollana muli yannara qiletenni fulanno; baote widirano haꞌranno. Alame xintantu yannanni kayise* suꞌmansa heeshshote maxaafi xaaxora borreessinoonnikkiri uullate aana heedhannori, moyichu bashsho noota, xa kayinni nookkitanna albillitte heeꞌrannota affanno woyite maalaꞌlitanno.
9 “Konne coye huwatate hayyo noo surre* hasiissanno: Lamalu umi, mancho aanaho ofoltinohu lamalu ilaalira lawishshaho. 10 Insano lamala mootoollaati: Ontu ubbino; mittu no; wolu qole xaara didayino; dayiro kayinni shiima yanna keeshsha hasiissannosi. 11 Bashsho noohu, xa kayinni nookki moyichi settikki mooteeti; ikkollana isi fulannohu lamalu giddonniiti; isino baote widira haꞌranno.
12 Laittoti tonne buudda, xaara gashshoote adhitinokkiri tonne mootoollara lawishshaho; ikkollana moyichu ledo mitte saate mookkara silxaane adhitanno. 13 Insara mitte hedo noonsa; hakko daafira wolqansanna silxaanensa moyichoho uyitanno. 14 Insa Geꞌrechu ledo olantanno; ikkollana Geꞌrechu gashshaasinete Gashshaanchonna mootoollate Moote ikkino daafira qeelannonsa. Isi ledo noori woshshantinori, doorantinorinna ammanantinorino qeeltanno.”
15 Isino togo yiie: “Laittoti foora mancho ofolte noo wayibba, addi addi gosara, mannira, dagaranna qaalira* lawishshaho. 16 Laittohu tonnu buudinna moyichu foora mancho gibbanno; hakkiinni afidhinore baala mulqite mullicho agurtannose; maalaseno ittanno; hattono gudisse giiratenni giirtannose. 17 Korkaatuno, Maganu qaalisi woꞌma geeshsha hedosi wonshitanno gede, ee gashshootensa moyichoho uyite mitte ikkitino hedonsa wonshitanno gede Maganu konne coye wodaninsara worino. 18 Laitto mancho uullate mootoolla aana mootimma noosihu batiꞌru katamira lawishshaho.”