Maatewoosi Wongeella
6 “Mannu laꞌꞌaꞌnera yitine keeraanchimmate loosoꞌne insa albaanni loossinannikki gede qorophe; hakkunni kaꞌa gordu Anniꞌnewiinni mittoreno diafidhinanni. 2 Konnira, lawisiisaano mannu ayirrisansara yite xaadu minnaranna dooggate assitannohu gede, buxanete mitore* uyitinanni woyite balaxxine xurumba ufuuffinoonte. Halaale yeemmoꞌnena, insa loosinsa guma woꞌma adhite kaꞌino. 3 Ati kayinni buxanete mitore aatto woyite, qiniiticho angakki assitannore guracho angakki affoonke; 4 hatto ikkiro, buxanete mitore daheessite aa dandaatto. Dahaawinowa heeꞌre laꞌꞌanno Annikki loosikki guma aannohena.
5 “Qoleno huuccatto assidhinanni woyite lawisiisaanote gede ikkitinoonte; insa mannu laꞌꞌansara yite xaadu minnaranna halaꞌlado dooggara xaawate uurrite huucciꞌra baxxanno. Halaale yeemmoꞌnena, insa loosinsaha woꞌma guma adhite kaꞌino. 6 Ati kayinni huucciꞌratto woyite holgikkira ei; hakkiinni saanqa cufidhe dahaawinowa heeꞌranno Annakki huucciꞌri. Dahaawinowa heeꞌre laꞌꞌanno Annikki loosikki guma aannohena. 7 Huuccatto assidhinanni woyite, dagate gede yitinoonnita calla yitinoonte; insara, huuccatto seedissuro Maganu macciishshannoha lawannonsa. 8 Kiꞌne kayinni insa gede ikkitinoonte; korkaatuno Anniꞌne huuccidhinara albaanni nafa mayi hasiisannoꞌnero afino.
9 “Hakko daafira kiꞌne konni garinni huuccidhe:
“‘Iima heeꞌrattohu Annanke, suꞌmikki qullaawa ikko.* 10 Gashshootikki dayo. Fajjokki iima ikkitanni noonte gede, uullate aanano ikkito. 11 Techota barru sagale* uyinke; 12 ninke woleho cubbu asale gatona yineemmonte gede, ninkerano cubbinke asale gatona yiinke. 13 Bushuwiinni gatisinke* ikkinnina jifamate giddora eessitootinke.’
14 “Mannu sao gatona yitiniro, iimi Anniꞌne kiꞌne saono gatona yaannoꞌne; 15 mannu sao gatona yaa gibbiniro kayinni, iimi Anniꞌne kiꞌne saono gatona diyaannoꞌne.
16 “Xoontinanni woyite lawisiisaanote gede alba xawulushshi yitinoonte; insa mannu xoonte noota afansara yite alba bullitanno.* Halaale yeemmoꞌnena, insa loosinsa guma woꞌma adhite kaꞌino. 17 Ati kayinni xoomatto woyite umo buudhi, albano hayishshiꞌri; 18 hatto ikkiro xoomattohu mannu afahera yite ikkikkinni, dahaawinowa heeꞌranno Annikkira yite callaati. Dahaawinowa heeꞌre laꞌꞌanno Annikki loosikki guma aannohena.
19 “Bile* itte huntara, cilte baꞌaranna mooraanchu hiiqqe eꞌꞌe moorara dandaannowa uullate aana jiro duuꞌna agurre. 20 Hatteentenni bile itte huntara, cilte baꞌaranna mooraanchu hiiqqe eꞌꞌe moorara dandaannokkiwa jiro iima duuꞌne. 21 Korkaatuno wodanikki heeꞌrannohu jirokki noowaati.
22 “Mannimmate caabbichi illete. Hakko daafira illekki mitto coye illachishshinota* ikkituro, mannimmakki woꞌma waraꞌa yitanno. 23 Illekki hamashshaame* ikkituro kayinni, mannimmakki woꞌma tunsitanno. Giddokki noo xawaabbi tunsicho ikkiro, mannimmakki xiꞌmo tunsicho ikkitanno.
24 “Lamu mootichira borojjicho ikka dandaannohu dino; mitto giwe mitto baxanno, woy mitto ayirrise mitto mishanno. Kawaanni Maganoho, kaꞌaanni Jirote borojjicho ikka didandiitinanni.
25 “Konnira, heeshshoꞌne* daafira ‘Maa inteemmo?’ woy ‘Maa angeemmo?’ yitine, woy mannimmaꞌne daafira ‘Maa uddiꞌneemmo?’ yitine yaada agurre yeemmoꞌne. Heeshsho* sagale, mannimma uddano diroortanno? 26 Iimi cea seekkitine laꞌe; insa diwixidhanno, dimixxitanno, woy gootaaraho diduuꞌnitanno; ikkollana iimi Anniꞌne itisannonsa. Ikkina kiꞌne cea diroortinanni? 27 Kiꞌne giddo yaade dirisi aana mitte cigile* lexxa dandaannohu nooni? 28 Qoleno uddanote mayira yaaddinanni? Hanni dubbu daraaro lophitanno gara seekkitine laꞌe; loossanni didaafurtanno, woy disuqqidhanno; 29 Ani yeemmoꞌneti kayinni, Salamooni nafa konni baalu ayirrinyisinni tenne daraaro giddo mittete geeshsha dibiifino. 30 Kiꞌne ammana xeꞌinoꞌneri, Maganu techo leelte gaꞌa booso tugantannota dubbu muꞌro togo asse uddisiisannoha ikkiro, kiꞌne hakkiinni roorse diuddisiisannoꞌne? 31 Konnira, ‘Maa inteemmo?’ woy ‘Maa angeemmo?’ woy ‘Maa uddiꞌneemmo?’ yitine horonta yaaddinoonte. 32 Korkaatuno, konne coye baala afiꞌrate wojji yitannoti dagate. Iimi Anniꞌne kuni coyi baalu hasiisannoꞌneta afino.
33 “Konnira balaxxine Maganu Gashshootenna keeraanchimmasi hasidhe;* kore baalankare uyinanniꞌnena. 34 Hakko daafira, gaꞌara umisihu yaachishanno coyi noosina, gaꞌara horonta yaaddinoonte. Mittu mittunku barrira ikkanno geeshshi qarri noosi.