Maatewoosi Wongeella

5 Yesuusi konne manna lae ilaalu iimira fuli; mare ofollihu gedensaanni, rosaanosi isiwa martu. 2 Hakkiinni Yesuusi togo yaanni rosiisinsa:

3 “Ayyaanaamittete coye goodhinori* hagiirraammaho; gordu Gashshooti insahona.

4 “Dadillitannori hagiirraammaho; shesho afidhannona.

5 “Jooguullu* hagiirraammaho; baatto ragidhannona.

6 “Keeraanchimma hudidhannorinna goodhannori hagiirraammaho; duubbannona.*

7 “Maartannori hagiirraammaho; insano maarranninsana.

8 “Xalalu wodani noonsari hagiirraammaho; Magano laꞌannona.

9 “Keere kalaqqannori hagiirraammaho; Maganu oosooti yinanninsana.

10 “Keeraanchimmate yiteenna xiimbanninsari hagiirraammaho; gordu Gashshooti insahona.

11 “Ane daafira yitineenna mannu mishiꞌnero, xiiwiꞌneronna kaphunni suꞌmaꞌne huniro, kiꞌne kayinni hagiirraammaho. 12 Gordoho afidhinanni baꞌraarshi lowoha ikkino daafira hagiidhe, tashshi yooꞌne; konni albaanni heedhino masaalaanono hatto assine xiimboonninsana.

13 “Kiꞌne uullate maxinete; maxine nyammo baꞌuro galagalte hiitto ikkite nyammo afidhanno? Gobba fushshine hunneenna mannu kakkadannota agurranna kaaꞌlitannori dino.

14 “Kiꞌne alamete caabbichoho; ilaalaho noo katama golannori dino. 15 Mannu caabbicho xawise kae, mine noorira baalaho xawanno gede leellannowa woranno ikkinnina gimboola digombisanno. 16 Hatteente gede, mannu dancha loosoꞌne lae iimi Annaꞌne ayirrisanno gede caabbichiꞌne mannu albaanni xawo.

17 “Ani Muse Seeranna Masaalaanote qaale hunammora dayommoha lawoonkeꞌne; dayommohu wonshammoraati ikkinnina hunammora diꞌꞌikkino. 18 Halaale yeemmoꞌnena, iiminna uulla sairo nafa kuni coyi baalu ikka geeshsha Seeru giddonni mitte shiimiidi fidale woy fidalete bicamme nafa woꞌmitukkinni digattanno. 19 Hakko daafira, kuri shiimmaadda hajajo giddonni mitte diigannohanna wolootuno hatto assitanno gede rosiisannoha aye manchono gordu Gashshootira shiimiidiho* yinanni; kuri hajajo wonshannohanna rosiisannoha baala kayinni, gordu Gashshootira rooriidiho* yinanni. 20 Keeraanchimmaꞌne Seeru rosiisaanotanna Farisootu keeraanchimma roora hoogguro, gordu Gashshoote horonta eꞌinannikkita kuleemmoꞌne.

21 “Albi mannira, ‘Shitooti; manna shaannohu baalu yoote mine xaꞌmamanno’ yinoonnita macciishshitinoonni. 22 Ani yeemmoꞌneti kayinni, rodiisira hanqe agurannokkihu baalu yoote mine xaꞌmamanno; qoleno rodoosi yinannikkita yee xone shollishannohu baalu Aliidi Yoo Mine* xaꞌmamanno. ‘Tidhoottokki balali kuni!’ yee xonannoha baala Gaannaamete* giira qorichi agarannosi.

23 “Kakkalo shiqishiꞌrattora kakkalote darga marte heedheenna rodiikki atera koffi yiinori qulli yiihero, 24 kakkalokki hakko kakkalote dargira albaanni worte agurte haꞌri. Balaxxe rodiikki ledo araarami; hakkiinni galagalte dagge kakkalokki shiqishiꞌri.

25 “Qahikki kassaseennahe isi ledo yoote minira hadhanni heedhe doogote rakke araarami; araarama hoogittoro kayinni qahikki daanyaho, daanyu qole yoote mini agaraanchira sayise eennahe usuru mine tugamattora dandaatto. 26 Halaale yeemmohena, mitte saante* nafa gattukkinni gudisse baaxxatto geeshsha hakkiichinni difulatto.

27 “‘Soorritooti’ yinoonnita macciishshitinoonni. 28 Ani yeemmoꞌneti kayinni, meyata lae foorate yorinohu baalu wodanisinni ise ledo soorrinoho. 29 Hakko daafira, qiniiticho illekki guficho ikkituhero fushshite huni; korkaatuno woꞌma mannimmakki Gaannaamete tungantenni, mannimmakki giddonni mitte hoogittoro woyyannohe. 30 Qiniiticho angakkino guficho ikkituhero murte huni; korkaatuno woꞌma mannimmakki Gaannaamete tungantenni, mannimmakki giddonni mitte hoogittoro woyyannohe.

31 “Qoleno ‘Minaamasi fushshe haꞌrisannohu baalu fushshe haꞌrisate woraqata oosena’ yinoonni. 32 Ani yeemmoꞌneti kayinni, foorretenni* kainohunni ikkiro ikkinnina hakkunni kaꞌa minaamasi fushshe haꞌrisannohu baalu ise soorritanno gede assanno; minaannise konni garinni fushshe haꞌrisino mancho adhannohu baaluno soorrinoho.

33 “Albi mannira, ‘Kaphunni xaartooti; Yihowara* xaꞌnootto xano wonshi’ yinoonnitano macciishshitinoonni. 34 Ani yeemmoꞌneti kayinni: Horonta xaartinoonte; gordu Maganu zuufaaneetina gordunni xaartinoonte; 35 lekkasinni kaxxinotena baattotennino xaartinoonte; bayiru Moote katamaatina Yerusaalametennino xaartinoonte. 36 Mitto dananchokki nafa waajjo woy kolishsho assa didandaattona umikkinnino xaartooti. 37 ‘Ee’ yitiniro ee, ‘Deeꞌni’ yitiniro deeꞌni calla yiiyye; korkaatuno hakkunni kaꞌi coyi bushuwiinni daannoho.

38 “‘Ille huninohura illesi hunnona; hinko hiiqqinohura hinkosi hiiqqinona’ yinoonnita macciishshitinoonni. 39 Ani yeemmoꞌneti kayinni: Bushu manchi ledo giwantinoonte; qiniiticho baqqaalla qawaadannohehura guracho baqqaallano qolisi. 40 Mittu manchi yoote minira massiheronna shamisekki adhara hasiꞌriro kootekkino ledde uyisi; 41 mittu gashshaanchi mitte kiilomeetire haꞌri yee qarrisihero ledosi lame kiilomeetire haꞌri. 42 Huucciꞌrannohehura uyi; atewiinni liqiiꞌra* hasiꞌrannohura fiile hoꞌlitootisi.

43 “‘Olliichokki baxi; baarigaarakki giwi’ yinoonnita macciishshitinoonni. 44 Ani yeemmoꞌneti kayinni: Baarigaarraꞌne baxanna xiibbannoꞌnerira huuccatto assa agurtinoonte. 45 Hatto assitiniro, iimi Anniꞌnera oososi ikkitinoonnita leellishshinanni; isi bushuullehono danchuullehono arrishsho fushshanno; keeraanoteno keeraano ikkitinokkirirano xeena gananno. 46 Baxxannoꞌnere calla baxxinanniha ikkiro maa afidhinanni? Qaraxaasine nafa dihatto assitanni no? 47 Roduuwaꞌne calla keere haadhinanniha ikkiro, wolootu assitannorinni roorinore maa assitiniyya? Dagano dihatto assitanni no? 48 Iimi Anniꞌne guuta* ikkinonte gede, kiꞌneno guuta ikka hasiissannoꞌne.