Maatewoosi Wongeella
4 Hakkunni gedensaanni, Daawuloosi jifannosi gede qullaawu ayyaani Yesuusa halallira haaꞌre haꞌrisi. 2 Yesuusi 40 barranna 40 hashsha xoomihu gedensaanni hudiꞌri. 3 Hakkiinni Jifannohu shiqqi yee mare togo yiisi: “Hanni ati Maganu beettootiro, tini kinna daabbo ikkitanno gede hajaji.” 4 Yesuusi kayinni togo yee qoli: “‘Manchu Yihowa* afiinni fulanno qaali baalunni ikkinnina, sagaletenni calla diheeꞌranno’ yine borreessinoonni.”
5 Hakkiinni Daawuloosi iso Yerusaalamete katama massihu gedensaanni qullaawu mini guunxora* uurrise 6 togo yiisi: “Hanni ati Maganu beettootiro, kawiinni eela higge kubbite uwi; korkaatuno togo yine borreessinoonni: ‘Isi ate daafira sokkaasinesi hajajanno,’ hattono ‘Lekkakki kinchu gane gawajjannohekki gede insa angansa woroo worte irkisse kayissannohe.’” 7 Yesuusi qole, “‘Maganokki Yihowa* jiffooti’ yineno borreessinoonni” yiisi.
8 Xaano Daawuloosi Yesuusa lowo geeshsha seedino ilaali birxe haaꞌre fushshe alamete gashshoote baalanna ayirrinyensa leellishisi. 9 Hakkiinni togo yiisi: “Mitte higge kumbuulte magansiꞌrittoero, konne baala eemmohe.” 10 Yesuusino togo yiisi: “Koo Sheexaane anewiinni fafi! ‘Maganokki Yihowa* calla magansiꞌri; qullaawa soqqanshono isira calla shiqishiꞌri’ yine borreessinoonnina.” 11 Hakkunni gedensaanni Daawuloosi iso agure haꞌri; sokkaasineno dagge soqqantusi.
12 Yesuusi Yohaannisi usuraminota macciishshe, kae Galiila haꞌri. 13 Hakkiinni Naaziretetenni fule, Zaabilooninna Niftaaleemi qoqqowira baaru* mule Qifirinaahoomi yinanni katamira heeꞌra hanafi; 14 kuni ikkinohu masaalaanchu Isayyaasi togo yee coyiꞌrinori woꞌmanno gedeeti: 15 “Baarunniwa* massitanno doogo mule Yordaanoosi Lagira widoonni heedhinanniri Zaabilooninna Niftaaleemi gobba, hattono dagate Galiila! 16 Tunsote heeꞌranno manni waraꞌa yiino xawaabba lai; reyote caali gobbara heedhannorira xawaabbu xawinsa.” 17 Hatte yannanni kayise Yesuusi, “Gordu Gashshooti gambisinona maaro eꞌe” yaanni sabbaka hanafi.
18 Yesuusi Galiilu Baari* muleenni hige saꞌꞌanni heeꞌre, lame roduuwa yaano, Pheexiroosi yiniha Simooninna rodoosi Indiriyaasi afi; insa qulxuꞌme woshshaaxxitannore ikkitino daafira, woshshaado baaru giddo tugganni no. 19 Hakkiinni Yesuusi, “Ane hoode amme; ani manna woshshaaddinannire asseemmoꞌnena” yiinsa. 20 Insano hakkawoyintenni woshshaadonsa agurte hoodesi hadhu. 21 Hakkiinni shiimare sae, wole lame roduuwa yaano Zebidewoosi beetto Yaaqoobinna rodoosi Yohaannisi afi. Insa yowolote giddo heedhe anninsa Zebidewoosi ledo woshshaadonsa gophitanni noore afe woshshinsa. 22 Insano bayichonkonni, yowolono annansano hakko agurte hoodesi hadhu.
23 Hakkiinni Yesuusi xaadu minnansara rosiisanninna Maganu Gashshootiha dancha duduwo duduwanni, hattono duuchunku gari dhibbanna xisso hursanni Galiilu gobba baala tuqi. 24 Isi duduwi Sooriyu gobba baala iilli; qoleno mannu, addi addi dhibbinna buutote xisso waaddannonsare, agaaninte amaddinore, hawwunaatu noonsarenna laanshaabbinore baala isiwa abbi; isino hursinsa. 25 Hakko daafira, Galiilunni, Dikaapolisinni,* Yerusaalametenni, Yihudunninna Yordaanoosi Lagi widiidinni dayinohu lowo manni haꞌrunsisi.