Maatewoosi Wongeella

3 Hatte yannara Cuuaanchu Yohaannisi Yihudu gobbara halalla sabbakanni dayi. 2 “Gordu Gashshooti gambisinona maaro eꞌe” yaanni sabbaki. 3 Masaalaanchu Isayyaasi isi daafira togo yee coyiꞌrino: “Mittu manchi halalla, ‘Yihowa* doogo qixxeesse! Dooggasino taashshe’ yaanni lallawanno.” 4 Yohaannisi gaalu ordanni gannoonni uddano uddiꞌranno; halloho gogunni seekkinoonni qawatto qodhanno. Kanchafarenna dubbu malawo itanno. 5 Hatte yannara mannu Yerusaalamete kataminni, Yihudu gobba baalatenninna Yordaanoosi qooxeessira noo qoqqowi baalunni isiwa dayi; 6 isino, cubbonsa faajjete kultanna Yordaanoosi Lagira cuuinsa.*

7 Isi lowo Farisootinna Saduqooti cuuannowa dagganna lae togo yiinsa: “Kiꞌne buutete ooso, daanni noo hanqo xooqqinanni gede ayi qorophisiisiꞌne? 8 Xaate maaro eaꞌne leellishanno guma laalle. 9 ‘Anninke Abirihaamiiti’ yitinoonni daafira gattinanniha lawoonkeꞌne. Maganu tenne kinna mereerinni Abirihaamira ooso kayisa dandaannota kuleemmoꞌne. 10 Meesane haqqete hunda no. Konnira dancha guma laaltannokki haqqicho baala karre giirate giddo tunganni. 11 Hige ani maaro eꞌinoonni daafira wayinni cuueemmoꞌne; ane gedensaanni daannohu kayinni ane rooreho; ani caammasi fushshate nafa diꞌꞌikkoommoho. Isi qullaawu ayyaaninninna giiratenni cuuannoꞌne. 12 Isi woowancho* anga haaꞌre no; ayiddumme coꞌo asse feyanno; sinde gootaaraho woranno; kura kayinni xoꞌannokki giirara tuganno.”

13 Hakkiinni Yesuusi, Yohaannisi cuuasira Galiilunni kae Yordaanoosi dayi. 14 Yohaannisi kayinni, “Atewa cuuama hasiissannoehu aneeti ikkinnina ati anewa daatto?” yee hoolasira woꞌnaali. 15 Yesuusi qole, “Konni garinni Maganu fajjo baala wonsha hasiissannonkena, qarru dinona cuuiella” yiisi. Yohaannisino maahoyye yee cuuisi. 16 Yesuusi cuuamihu gedensaanni bayichonkonni wayi giddonni fuli. Hakkiinni gordu faꞌnami! Maganu ayyaanino lembooli gede ikke aanasi dirranna lai. 17 Qoleno gordunni togo yitanno huuro daggu: “Tashshi assannoehu baxeemmo Beettiꞌya isooti.”