Maatewoosi Wongeella
2 Moote Heroodiisi* waro Yesuusi Yihudu katamira Beeteliheemete ilamihu gedensaanni, ayyaanto* Soojjaatinni kaꞌe Yerusaalame dagge, 2 togo yitu: “Soojjaato heeꞌne beeddakkosi laꞌne ayirrinye uyinammosira* dangoommona, ilamihu Ayihudete moote hiikko no?” 3 Moote Heroodiisinna Yerusaalamete noo manni baalu tenne macciishshiti lowo geeshsha masi. 4 Mooteno Ayihudennire kakkalaanote roorrootanna borreessaano baala gamba asse, Kiristoosi* hiikko ilamannoro xaꞌmi. 5 Insano togo yitusi: “Yihudu katamira Beeteliheemete ilamanno. Korkaatuno masaalaanchu togo yee borreessino: 6 ‘Ati Yihudu gobbara noottati Beeteliheeme, mannaꞌya Israeele allaalanno gashshaanchi atewiinni fulanno daafira, Yihudu gashshaasine mereero horo mishamoottata diꞌꞌikkatta.’”
7 Hakkiinni Heroodiisi mannu afikkinni ayyaanto isiwa woshshe, beeddakko leeltino yanna xaꞌme buuxi. 8 Insa togo yee Beeteliheeme soyi: “Hadhine qaaqqo seekkitine hasse; anino mare ayirrinye eemmosi gede affiniro daggine kulleꞌꞌe.” 9 Ayyaantono moote yiinore macciishshituhu gedensaanni fulte hadhu; hakkawoyite Soojjaato heedheenna leeltunsa beeddakko qaaqqu noowa iillite uurrita geeshsha albansaanni hadhanni no. 10 Insano beeddakko uurritinota laꞌuti hagiidhite ikkitannota hooggu. 11 Hakkiinni minira eꞌe, qaaqqu amasi Maariyaami ledo nooha affe guluphite ayirrinye uyitusi.* Hakkunni gedensaanni ogorransa fante qaaqqoho culka, hixaananna kaarbe* afansha assite uyitusi. 12 Ikkollana, Heroodiisiwa higgannokki gede Maganu haaqeetenni qorophisiisinonsa daafira, wole doogo amadde gobbansa hadhu.
13 Ayyaanto hadhuhu gedensaanni, Yihowa* sokkaasinchi haaqeetenni Yooseefira leelle togo yiisi: “Heroodiisi qaaqqo hase shaara hedinona, kaꞌe qaaqqonna amasi haadhe Gibitse xooqi; ani kulammohe geeshsha hakko heeꞌri.” 14 Hakko daafira Yooseefi kae, qaaqqonna qaaqqu ama haaꞌre hashsha Gibitse haꞌri. 15 Isi Heroodiisi reya geeshsha hakko heeꞌrino. Konni garinni, Yihowa* masaalaanchisi widoonni “Beettoꞌya Gibitsetenni woshshoommo” yee coyiꞌrino qaali woꞌmi.
16 Hakkiinni Heroodiisi ayyaanto dogginosita afe lowo geeshsha hanqi. Isi beeddakko leeltino yanna ayyaanto xaꞌme buuxino garinni, manna soye Beeteliheemetenna qooxeessisera noore lame dironna hakkunni woro ikkannonsare labballo qaaqquulle baalanka shiishiishi. 17 Hatte yannara Maganu masaalaanchu Ermiyaasi widoonni togo yee coyiꞌrino qaali woꞌmi: 18 “Raama katamira wiꞌlanna didatto macciishshini. Raaheeli oososera wiꞌlitu; oosose gooffino daafira sheshifata hooggu.”
19 Heroodiisi reyita, Yihowa* sokkaasinchi Gibitsete gobbara Yooseefira haaqeetenni leelle 20 togo yiisi: “Qaaqqo shitara hassuri* reyitinona, kaꞌe qaaqqonna amasi haadhe Israeelete gobba higi.” 21 Konni daafira, Yooseefi kae qaaqqonna qaaqqu ama haaꞌre Israeelete gobba higi. 22 Ikkirono, Arkeloosi annisi Heroodiisi darga Yihudu gobba gashshe noota macciishshe hakkiira haꞌra waajji. Qoleno Maganu haaqeetenni qorophisiisinosi daafira, agure Galiilu gobba haꞌri. 23 “Naazireticha* yinannisi” yine masaalaanote widoonni coyiꞌnoonni qaali woꞌmanno gede, isi mare Naaziretete katamira heeꞌri.