Maatewoosi Wongeella

23 Hakkunni gedensaanni Yesuusi gamba yiino manniranna rosaanosira togo yii: 2 “Borreessaanonna Farisootu umonsa moohisse Muse darga ofoltino. 3 Hakko daafira, kultannoꞌnere baala asse; yitannore assitannokki daafira, insa assitannore kayinni assitinoonte. 4 Ayirranno duha usurte mannu qotira duhisiissanno; insa kayinni qubbichinsanni nafa kisa dihasidhanno. 5 Baalanka coye assitannohu mannu laꞌꞌansara yiteeti; lawishshaho insa quraama* gowisiisidhanno; uddanonsa qacceno seedisidhanno. 6 Jilu mine ayirrado darga ofolla, xaaddu minnara qole albaanni* ofolla baxxanno; 7 Gudumaaleho* mannu ayirrise keere haaꞌransaranna Rosiisaancho* yine woshshinansara hasidhanno. 8 Kiꞌne kayinni, Rosiisaanchiꞌne mitto ikkino daafira, ‘Rosiisaancho’ yine woshshinoonkeꞌne; kiꞌne baalunku roduuwaho. 9 Qoleno Anniꞌne mitto, isino gordoho nooha ikkino daafira uullate aana mittono anna yitine woshshitinoonte. 10 Massagaanchiꞌne mitto, isino Kiristoosi ikkino daafira massagaancho yine woshshinoonkeꞌne. 11 Isinni, mereeroꞌne rooriidiha ikkinohu soqqamaanchoꞌne ikka hasiissannosi. 12 Umosi gotti assannohu baalu shollanno; umosi heeshshi assannohu baalu kayinni ayirranno.

13 “Kiꞌne lawisiisaano borreessaanonna Farisootu, kiꞌnera aanneꞌe! Korkaatuno, mannu gordu Gashshoote eannokki gede waalcho cuffinanni; kiꞌneno dieꞌinanni, eꞌara daggannoreno hooltinanni. 14* ——

15 “Kiꞌne lawisiisaano borreessaanonna Farisootu, kiꞌnera aanneꞌe! Korkaatuno mitto mancho Ayihudete ammaꞌno widira qoꞌlate baarunna baattote aana doyitinanni; qoꞌlitinihu gedensaanni kiꞌnenni roore lame ero Gaannaame* eannoha assitinanni.

16 “Kiꞌne ballootu massagaano, kiꞌnera aanneꞌe! ‘Mittu manchi qullaawu mininni xaariro qarru dino; qullaawu mini giddo noo culkinni xaariro kayinni xaarino xaaro wonsha hasiissannosi’ yitinanni. 17 Kiꞌne gowwootunna ballootu! Culkunna culku qullaawanno gede assinohu qullaawu mini woyite hiikku rooranno? 18 Qoleno, ‘Mittu manchi kakkalote darginni xaariro qarru dino; kakkalote dargi aana noo kakkalonni xaariro kayinni xaarino xaaro wonsha hasiissannosi’ yitinanni. 19 Kiꞌne ballootu! Kakkalotenna kakkalo qullaawa assinohu kakkalote dargi woyite hiikku rooranno? 20 Hakko daafira, kakkalote darginni xaarannohu baalu kakkalote darginninna aanasi noori baalunni xaaranni no; 21 qullaawu mininni xaarannohu baaluno, qullaawu mininni calla ikkikkinni qullaawa mine heeꞌranno Maganinni xaaranni no; 22 qoleno, gordunni xaarannohu baalu Maganu zuufaanenninna tenne zuufaanera ofollinohunni xaaranni no.

23 “Kiꞌne lawisiisaano borreessaanonna Farisootu, kiꞌnera aanneꞌe! Haꞌnadunni,* malkatunninna* kemuunetenni* asaraate fushshitinanni; Seeru giddo nooha roore hasiisanno coye kayinni lashshi assitinanni; insano taashshote, maarotenna ammanamate. Asaraate fushsha hasiissannoꞌneha ikkirono, hattenne kultine kore lashshi assa dihasiissannoꞌne. 24 Kiꞌne ballootu massagaano, bookkicho ximbiibbine fushshitinanni, gaala kayinni egemmitinanni!

25 “Kiꞌne lawisiisaano borreessaanonna Farisootu, kiꞌnera aanneꞌe! Korkaatuno, kiꞌne gobbayido biiffe giddoyido xurtino birciqqonna sayine gedeereeti; giddoꞌne hafuurrenna quwa saꞌino yorto woꞌmitino. 26 Ati ballichu Farisichi, balaxxe birciqqonna sayine giddoyido hayishshi; hatto ikkiro gobbayidono biiffanno.

27 “Kiꞌne lawisiisaano borreessaanonna Farisootu, kiꞌnera aanneꞌe! Korkaatuno, giddo reyino manni miqqanna batte baala woꞌmite heedheenna gobbayido kayinni noora ganne biifinsoonni waamma labbinanni. 28 Laꞌꞌannoꞌnehura gobbayido keeraano labbinanni; giddoꞌne kayinni kaphunna bunshe* woꞌmitino.

29 “Kiꞌne lawisiisaano borreessaanonna Farisootu, kiꞌnera aanneꞌe! Korkaatuno, masaalaanote moogga seekkitinanni, keeraanote waammano* biifissinanni; 30 qoleno togo yitinanni: ‘Alba annuwanke waro heeꞌnoommoro masaalaanote mundee dunate insa ledo dikarsammeemmo.’ 31 Hakko daafira, masaalaano shituri ooso ikkitinoonnita kiꞌne umiꞌne farcidhinoonni. 32 Konnira, annuwaꞌne hanaffinore kiꞌne umo fushshe.

33 “Kiꞌne hamasu, buutete ooso, Gaannaamete* qoricha hiitto ikkitine gattinanni? 34 Konnira masaalaano, egennaammanna rosiisaano kiꞌnewa soyemmo. Insa giddo mito shitinanni, hattono haqqaho suttinanni; mito qole xaadu minnaꞌnera halangetenni gantinanni, hattono katamunni katama shorritinanni; 35 Konninni kainohunni, keeraanchu manchi Aabeeli mundeenni kayisse qullaawu mininna kakkalote dargi mereero shitinoonnihu Baraakiya beetti Zakkaariyaasi mundee geeshsha uullate aana duntinoonnite keeraanote mundee baalate xaꞌmantinanni. 36 Halaale yeemmoꞌnena, konni coyi baalunni kainohunni tini ilama qorichishantanno.

37 “Yerusaalame! Yerusaalame! Ati masaalaano shaattatinna atewa sonkoonnire kinnatenni awwaalattati, lukkicho caacurrese qoolise giddora gamba assidhannohu gede anino oosokki mitteenni gamba assammora meꞌꞌe hige hedummo! Kiꞌne kayinni dihasidhinoonni. 38 Xaate mineꞌne* kiꞌnera facci assine agurranni.* 39 Konnira kuleemmoꞌnena, ‘Yihowa* suꞌminni daannohu maassaminoho’ yitina geeshsha xaate horonta dilaꞌinannie.”