Maatewoosi Wongeella

22 Yesuusi lede togo yee lawishshunni kulinsa: 2 “Gordu Gashshooti, beettisi sargera jila jilino moote gedeeti. 3 Isi sargete jilira koyisantinore woshshitara borojjootasi soyi; insa kayinni daa dihasidhino. 4 Isino galagale wole borojjootasi togo yee soyi: ‘Woshshamino mannira, “Kuneeti sagale qixxeessoommo; handaꞌyanna coontino saadaꞌya gorroommo; baaluri qixxaawino. Hakko daafira jilaho amme yiino” yiiyye.’ 5 Insa kayinni woshshatto lashshi assite, mitu gatinsara, mitu daddalinsara hadhu; 6 wolootu kayinni borojjootasi amadde beebba assidhe shitu.

7 “Mooteno lowo geeshsha hanqe, olantosi soye shiture shee gudi; katammansano giiri. 8 Hakkiinni isi borojjootasi togo yii: ‘Jilu qixxaawino; woshshantinori kayinni tennera maltinore diꞌꞌikkitino. 9 Hakko daafira katama massitanno doogga fultine, affiniha baala jilaho woshshe.’ 10 Konni garinni, borojjootu doogga fulte bushano danchano affu manna baala gamba assitu; woshshame dayino mannino jilu mine woꞌmi.

11 “Moote wosina laꞌꞌara ei woyite, mitto sargete uddano uddiꞌrinokki mancho afi. 12 Konnira iso, ‘Jaala, sargete uddano uddiꞌrittokki hiitto ikkite eitto?’ yiisi. Manchohono yaannori baisi. 13 Hakkiinni moote soqqamaanosi togo yii: ‘Anganna lekka usurtine gobba tunsichoho fushshitine tugge. Hakkiicho wiꞌlona, hinkono gaꞌmiꞌrona.’

14 “Woshshaminohu lowoho, dooraminohu kayinni shiimaho.”

15 Hakkiinni Farisootu hadhe coyiꞌranno coyinni amaddasira maꞌlitu. 16 Hakko daafira rosaanonsa Heroodiisi manni ledo togo yite sokku: “Rosiisaancho, ati halaalaancho ikkoottota, Maganu doogono halaalunni rosiisattota, mannu naadahera yite mittoreno assattokkitanna manna aana laꞌe mallaadattokkita anfoommo. 17 Hanni kulinke, atera maa lawannohe? Qeesaarira giwire aa hasiissannonso dihasiissanno?* 18 Yesuusi kayinni bunshensa afe togo yii: “Kiꞌne lawisiisaano, mayira jiffinannie? 19 Hanni giwiru saante leellishsheꞌꞌe.” Insano mitte diinaare* abbitu. 20 Isino togo yiinsa: “Tenne saante aana noo misile ayete? Aanaho borreessinoonni suꞌmino ayeho?” 21 Insano “Qeesaariho” yitu. Hakkiinni isi togo yiinsa: “Hatto ikkiro Qeesaariha Qeesaarira, Maganunniha kayinni Maganoho uyiyye.” 22 Insa tenne macciishshituti dhagge assidhe iso agurte hadhu.

23 Hakko barranni, kao noota ammantannokkiri Saduqootu dagge iso togo yite xaꞌmitusi: 24 ‘Rosiisaancho, Muse togo yiino: “Mittu manchi ooso ilikkinni reyiro, rodiisi minaamasi ragiꞌre rodiisi sircho sayisa hasiissannosi.’ 25 Ninkewa lamalu roduuwi no. Bayiriidihu seenne adhe ooso ilikkinni reyenna minaamasi rodiisi ragiꞌri. 26 Layinkihuno sayikkihuno, lamalkihu geeshsha ise ragidhe ooso iltukkinni reyitu. 27 Insa baalu reyituhu gedensaanni manchono reyitu. 28 Ise baalunku adhitino daafira, reyotenni kaꞌnanni woyite lamalunku giddo hiikkunnita ikkitanno?”

29 Yesuusi togo yee qolinsa: “Kiꞌne Qullaawa Borrono Maganu wolqano affinoonnikki daafira sodhinoonni; 30 korkaatuno, reyotenni kaꞌnanni woyite labballu diadhitanno, seennuno mine diassiꞌranno; insa iimi sokkaasine gede ikkitanno. 31 Maganu reyotenni kaꞌꞌate daafira kiꞌnera togo yee coyiꞌrinore dinabbabbinoonni? 32 ‘Ani Abirihaami Maganooti, Yisaaqi Maganootinna Yaaqoobi Maganooti.’ Isi noori Maganooti ikkinnina reyitinori Magano diꞌꞌikkino.” 33 Mannu tenne macciishshiti rosiisino roso dhagge assiꞌri.

34 Farisootu, Yesuusi Saduqoota sammi assinota macciishshituti, gamba yite daggu. 35 Insa giddonni mittu Seeru egennaami jife laꞌꞌasira togo yee xaꞌmi: 36 “Rosiisaancho, Seeru giddo baalanta roortanno hajajo hiitteeti?” 37 Isino togo yiisi: “‘Maganokki Yihowa* woꞌmu wodanikkinni, woꞌma lubbokkinninna* woꞌma hedokkinni* baxi.’ 38 Baalanta roortannotinna umi hajajo tenneeti. 39 Tenne labbannoti layinki hajajo, ‘Olliichokki* umikki gede assite baxi’ yitannote. 40 Seerunna Masaalaanote rosi baalu xintaminohu tenne lamente hajajo aanaati.”

41 Farisootu mitteenni gamba yite heedheenna Yesuusi togo yee xaꞌminsa: 42 “Kiꞌne Kiristoosi* daafira mayitinanni? Isi aye beettooti?” Insano, “Daawiti beettooti” yitusi. 43 Isino togo yee xaꞌminsa: “Hatto ikkiro Daawiti qullaawu ayyaaninni iso hiitto Mooticha yiiyya? 44 Korkaatuno Daawiti, “Yihowa* Mootichiꞌyara, ‘Diinnakki lekkakkira woroonni qolammo geeshsha qiniiteꞌyaanni ofolli’ yiinosi yee coyiꞌrino.” 45 Daawiti iso Mooticha yiina, Kiristoosi hiitto ikke beettosi ikkannoyya?” 46 Isira mittoreno dawara dandiinohu dino; hakko barrinni kayise worbe iso xaꞌmo xaꞌminohuno dino.