Maatewoosi Wongeella

24 Yesuusi qullaawu mininni fule haꞌranni heeꞌreenna, rosaanosi qullaawu mini maalaꞌlinanniha ikkino gara leellishshasira isiwa shiqqi yitu. 2 Isino qole togo yiinsa: “Konne baala laꞌinanni? Halaale yeemmoꞌnena, kinchu kinchu aana togo ikke duunamino gedeenni diigamikkinni horo diheeꞌranno.”

3 Yesuusi Ejedhete Ilaalira ofolle heeꞌreenna, rosaanosi calluwinsa isiwa shiqqi yite togo yite xaꞌmitusi: “Hanni kulinke, kuni coyi ikkannohu mamarooti? Leellakkiranna* alamete* gumulora malaatu maati?”

4 Yesuusino togo yee qolinsa: “Mittuno soꞌrisiisannoꞌnekki gede qorophe; 5 korkaatuno batinyu manni ‘Ani Kiristoosiiti’ yaanni suꞌmiꞌyanni daanno; lowo mannano soꞌrisiisanno. 6 Olu luulonna olu duduwo macciishshitinanni. Kuni coyi ikkikkinni gatannokkihona hatte yannara massinoonte; goofimarchu kayinni albillittete.

7 “Qoleno daga dagate aana, gashshootuno gashshootu aana ola kayisanno; addi addi darga hude ubbanno, hattono baatto huxidhanno. 8 Kuni baalu coyi ilate game gede qarraho hanafote.

9 “Hatte yannara mannu buuto qarrisannoꞌne, shaannoꞌne; suꞌmiꞌyara yitineenna daga baala gibbannoꞌne. 10 Qoleno hatte yannara batinyu manni gufiꞌranno; mimmito sayise aanno; kuꞌu koꞌonne giwanno. 11 Batinye kaphu masaalaano kaꞌe lowo manna soꞌrisiissanno; 12 qoleno bunshe* lexxitanni hadhanno daafira, lowo manni baxilli qiidanno. 13 Goofimarchu geeshsha kaajje uurrinohu* kayinni gatanno. 14 Daga baalate naqaashshe ikkanno gede, kuni Maganu Gashshootihu danchu duduwi uulla woꞌmate duduwamanno; hakkiinni goofimarchu daanno.

15 “Hakko daafira, masaalaanchu Daanieeli coyiꞌrino garinni, bao abbannohu battete coyi qullaawa darga nooha laꞌinanni woyite nabbawannohu wodancho; 16 hatte yannara Yihudaho noori ilaalla xooqqo. 17 Mineho iimaanni* noo manchi, uduunne adhara minisira dirroonke; 18 gate noo manchino uddano adhara higoonke. 19 Hatte yannara godowinni noo meentiranna qansiꞌranni noorira aanneꞌe! 20 Xooqqinannihu hawado woy Sambatu barra ikkannokki gede woꞌmanka woyite huuccidhe; 21 korkaatuno hatte yannara, alamete hanafonni kayise xaa geeshsha daye egenninokkihu, layinkimeeshshono daannokkihu quuxxote qarri daanno. 22 Isinni hatti barruwa haraꞌma hooggoommero, mittu manchino* digatanno; ikkollana doorantinorira yineenna hatti barruwa haraꞌmitanno.

23 “Hatte yannara aye manchino, ‘Kuneeti Kiristoosi kowiicho no’ woy ‘Kooiicho no’ yiiꞌnero ammantinoonte. 24 Korkaatuno kaphaano Kiristoosootinna kaphu masaalaano kaꞌanno; insa dandiituro doorantinore nafa soꞌrisiissara lowo maalalenna dhagge leellishshanno. 25 Ane woyite balaxe qorophisiisoommoꞌne. 26 Konnira mannu, ‘Isi halalla no’ yiiꞌnero hakkira hadhinoonte; ‘Holge no’ yiiꞌnerono ammantinoonte. 27 Korkaatuno banqo soojjaatoonni beleqqe galchimi geeshsha xawissannonte gede, manchi Beetti leellanno* yannano hattoota ikkitanno. 28 Reeshshu noowa baalawa allamuru gamba yaanno.

29 “Hattenne qarru barruwa gedensaanni hakkawoyintenni arrishsho tunsitanno, aganuno dixawanno; beeddahe gordunni giggiltanno; iima noorino shafamanno.* 30 Hakkiinni manchi Beetti malaati gordoho leellanno; uullate aana heedhanno gaꞌre baalano lowo geeshsha dadillite gagaso gaꞌnitanno; qoleno manchi Beetti wolqatenninna lowo ayirrinyinni gordu gomichinni daanna laꞌanno. 31 Isi, sokkaasinesi batiꞌra xurumbu huuronni soyanno; insano shoolunku raginni* mitte gordu qasiꞌronni wole gordu qasiꞌro geeshsha isira doorantinore gamba assitanno.”

32 “Balasete haqqichonni konne lawishsha rosse: Sinnase ciirtannonna darose lattanno woyite arru* rahinota affinanni. 33 Kiꞌneno konne coye baala laꞌinanni woyite manchi Beetti shiqe waalchoho noota affe. 34 Halaale yeemmoꞌnena, kuni coyi baalu woꞌma geeshsha tini ilama horonta disaꞌanno. 35 Iiminna uulla saꞌꞌanno; qaaliꞌya kayinni horonta disaꞌꞌanno.

36 “Hakkonne barranna hattenne saate Anna agurranna gordu sokkaasineno ikkito, Beettono ikko, woy wolu mittuno afinohu dino. 37 Nohi yannara ikkinte gede, manchi Beetti leellanno* yannano hattoota ikkitanno. 38 Hakkawaro, Baote Wayi daara albaanni Nohi markaawe ei barri geeshsha mannu itanninna aganni, labballu adhanni, seennuno assiꞌranni no; 39 Baote Wayi daye baalanka feye gudansa geeshsha diwodanchitino; manchi Beetti leellanno yannano hattoota ikkitanno. 40 Hattee yannara lamu manchi gate loossanno; mitto haaꞌnanni, mitto agurranni. 41 Lame meenti daammaho daahanno; mitte haaꞌnanni, mitte agurranni. 42 Konnira, Mootichiꞌne daanno barra affinoonnikki daafira woꞌmanka woyite baqqi yitine agadhe.

43 “Kayinni mitto coye wodanche: Qaete anni mooraanchu hashsha hiittee saatera daannoro afoommero, baqqi yee agadhanno; minesi hiiqqe earano diwodhanno. 44 Konnira kiꞌneno, manchi Beetti heddinoonnikki saatera daanno daafira baqqi yitine agadhe.

45 “Hasiissanno yannara sagale aannonsa gede, mootichisi minisi manni aana shoominohu ammanaminohunna wodanaamu* borojjichi addinta ayeti? 46 Mootichisi daanno woyite hatto assanna afannosiha ikkiro, hakku borojjichi hagiirraamoho! 47 Halaale yeemmoꞌnena, mootichu jajjisi baalu aana shoomannosi.

48 “Ikkollana hakku bushu borojjichi wodanisinni, ‘Mootichiꞌya keeshshanno’ yee hede, 49 ledosi loossanno borojjoota ganiro hattono dimbaasinete ledo itironna agiro, 50 mootichisi hedinokki barranna hedinokki saatera daye, 51 buuto qorichishannosi;* gawalosino lawisiisaanote ledota assanno. Isi hakkiicho wiꞌlanno, hattono hinko gaꞌmiꞌranno.