Maatewoosi Wongeella

13 Hakko barra Yesuusi mininni fule haꞌre baaru qaccera ofolli. 2 Lowo mannino isiwa dayi; isino yowolo gidde ofolli; hakkawoyite mannu baalu baaru qaccera uurre no. 3 Hakkiinni isi togo yee lowo coye lawishshunni kulinsa: “Mittu manchi wixa wixiꞌrara fuli. 4 Wixanni heeꞌreenna mitu wixi doogote qaccera uwi; hakkiinni cea dagge xinqite ittu. 5 Wolu wixi qole gari bushshi nookkiwa kinnaame baattora uwi; baatto lowo bushshi nookkita giddo tula ikkitino daafira wixu mulenni muri. 6 Arrishsho fultuta kayinni qoori; qoleno rumushsho afiꞌrinokki daafira mooli. 7 Mitu wixi utu mereero uwi; utuno lophe qalxe amadi. 8 Wolu wixi kayinni danchu bushshira uwi; gumano laali; mittu 100, mittu 60, mittu 30 ero laali. 9 Macca noohu macciishsho.”

10 Hakkiinni rosaanosi dagge, “Lawishshunni kulattonsahu mayiraati?” yitusi. 11 Isino togo yee qoli: “Kiꞌnera gordu Gashshootita qullaawa fojo huwatate dandoo uyinoonniꞌne; insara kayinni diuyinoonninsa. 12 Noosihura baalaho lendannisi; woꞌmeno duꞌnamannosi; noosikkihura baalaho kayinni hakkonne noosinka haaꞌne hoollanni. 13 Korkaatuno insa laꞌurono laꞌannohu mulla beebbaati; macciishshiturono macciishshitannohu mulla beebbaati; insa diwodanchitanno. 14 Qoleno togo yitannoti Isayyaasi masaalo insa aana woꞌmitanni no: ‘Macciishshate woyite macciishshitinanni; kayinni horonta diwodanchitinanni; laꞌꞌate woyite laꞌinanni; kayinni horonta dibuuxxinanni. 15 Korkaatuno kuni manni wodana dillaawino; maccansanni macciishshinoreno dune hunanno; illensano ximbiiꞌlino; hatto ikka hoogoommero illensanni lae, maccansanni macciishshe, wodaninsannino wodanche anewa higeenna hurseemmonsahu baino.’

16 “Kiꞌne kayinni, illeꞌne laꞌanno daafiranna maccaꞌne macciishshitanno daafira hagiirraammaho. 17 Halaale yeemmoꞌnena, batinye masaalaanonna keeraano kiꞌne laꞌinanni heedhinoonnire laꞌꞌate halchitino; kayinni dilaꞌino; qoleno insa kiꞌne macciishshitinanni heedhinoonnire macciishshate halchitino; kayinni dimacciishshitino.

18 “Xa wixa wixiꞌri manchi lawishshi tiro maatiro macciishshe. 19 Mittu manchi gordu Gashshooti qaale macciishshe wodanchannokkiha ikkiro, bushu daye wodanisira winxoonni wixa hawulukanno; doogote qaccera winxoonni wixi konneeti. 20 Kinnaame baattora winxi wixi, qaale macciishshe bayichonkonni hagiidhe adhanno manchooti. 21 Ikkollana qaalu wodanisira rumuxxannokki daafira, shiima yannalla keeshshanno; qaalunni kainohunni qarru woy dartu iillannosi woyite bayichonkonni gufiꞌranno. 22 Utu mereero winxi wixi qaale macciishshanno manchooti; ikkollana tenne alame* yaaddonna jironniti dogate wolqa qaale qalxite amaddanno daafira gumiweele gatanno. 23 Danchu bushshira winxi wixi qaale macciishshe wodanchanno manchooti; gumano laalanno; mittu 100, mittu 60, mittu 30 ero laalanno.”

24 Hakkiinni isi togo yee wole lawishsha kulinsa: “Gordu Gashshooti gatesi dancha wixa wixiꞌrino manchi gedeeti. 25 Mannu goxe heeꞌreenna diinisi daye sindete giddo boddoono wixe haꞌri. 26 Sinde lophite laaltuta boddoonuno leelli. 27 Konnira qaete anni borojjooti isiwa dagge togo yitusi: ‘Mooticha, gatekki didancha wixalla wixiꞌritto? Boddoonu maminni dayiho?’ 28 Isino ‘Diinu assinote’ yiinsa. Borojjootuno ‘Haꞌne xinqine hoollammora hasiꞌratto?’ yitusi. 29 Isino togo yiinsa: ‘Deeꞌni, boddoono xinqitinanni woyite sindeno mitteenni buqqissine huntinannina heeꞌrona agurre. 30 Mindanni yanna iillita geeshsha ledo lophona; midote yannara middannore togo yeemmo: Balaxxine, giirranni gede boddoono xinqitine gamba assitine nadala nadala assitine usurre; hakkiinni sinde gamba assitine gootaariꞌyara worre.’”

31 Qoleno isi togo yee wole lawishsha kulinsa: “Gordu Gashshooti mittu manchi masse gatesi wixiꞌrinohu lenteetu* gumi gedeeti. 32 Lenteetu gumi baalunku guminni roore shiima ikkirono, lophanno woyite wole muꞌro baala roorino haqqicho ikkanno; hakko daafira iimi cea dagge sinnasi aana caaꞌlitanno.”

33 Isi xaano togo yee wole lawishsha kulinsa: “Gordu Gashshooti mitte mancho lixe gudisante fulta geeshsha sase jajjabba safaraancho ikkitanno bullee ledo karsiissino irsho gedeeti.”

34 Yesuusi gamba yiino mannira konne baalanka coye lawishshunni kulinsa. Isinni, lawishshiweelo dikulannonsa; 35 isi hatto assinohu masaalaanchu widoonni togo yine coyiꞌnoonniri woꞌmanno gedeeti: “Coyiꞌreemmore lawishshunni coyiꞌreemmo; safotenni* kayise dahaawinore duduweemmo.”

36 Hakkiinni Yesuusi gamba yiino manna haꞌrisihu gedensaanni minira ei. Rosaanosino isiwa dagge, “Gate fulino boddooni lawishsha xawisinke” yitu. 37 Isino qole togo yii: “Dancha wixa wixihu manchi Beettooti; 38 gatu alamete. Danchu wixi gordu Gashshooti oosooti; boddoonu kayinni bushu oosooti; 39 boddoono wixi diini Daawuloosiiti. Mido alamete* gumulooti; middannori sokkaasinete. 40 Hakko daafira, boddoono gamba assine giirate tunganninte gede, alamete* gumulorano hatto ikkanno. 41 Manchi Beetti sokkaasinesi soyanno; insa guficho ikkanno coye baalanna bunshe assanno manna Gashshootisi giddonni xinqite fushshitanno; 42 qoleno goolu giirara tugganno; insano hakkiicho wiꞌlitanno; hattono hinko gaꞌmidhanno. 43 Hatte yannara keeraano Anninsa Gashshootira arrishshote gede waraꞌa yite xabbanno. Macca noohu macciishsho.

44 “Gordu Gashshooti gate maanxoonni jiro gedeeti; mittu manchi tenne jiro afiꞌre maaxi; lowo geeshsha hagiidhino daafira haꞌre noosire baala hire hakkonne gate hidhi.

45 “Qoleno gordu Gashshooti dancha inqu hidhara hasiꞌrannohu haꞌre daddaꞌlanno daddalaanchi gedeeti. 46 Hakku daddalaanchi mitte lowo waaga afidhino inqu afiꞌri yannara bayichonkonni haꞌre afiꞌrinore baala hire hattenne inqu hidhi.

47 “Qoleno gordu Gashshooti baaru giddora tungeenna duuchunku gari qulxuꞌme amaddino woshshaado gedeeti. 48 Woshshaadote qulxuꞌme woꞌmituta goshooshshe baaru qacce fushshitu; hakkiinni ofolte dancha dancha xinqite uduunneho wortu; busha kayinni huntu. 49 Alamete* gumulorano hatto ikkanno. Sokkaasine fulte bushuulle keeraanotewiinni baddanno; 50 qoleno goolu giirara tugganno. Insano hakkiicho wiꞌlitanno; hattono hinko gaꞌmidhanno.”

51 Isino “Konne baalanka coye wodanchitinoonni?” yee xaꞌminsa. Insano “Ee” yitusi. 52 Hakkiinni togo yiinsa: “Hatto ikkiro, gordu Gashshooti daafira rosinohu dagate rosiisaanchi baalu, miinju minisinni haaronna akkala uduunne fushshannohu qaete anni gedeeti.”

53 Yesuusi tenne lawishshuwa coyiꞌre kaiti hakkiinni agure haꞌri. 54 Ilamino gobba higihu gedensaanni xaadu mininsara rosiisinsa; hakkiinni insa dhagge assidhe togo yitu: “Kuni manchi tenne hayyo mamiinni afiꞌri? Maalale loosate dandoono ayi uyisi? 55 Isi hanaaxichu beetto diꞌꞌikkino? Amasi Maariyaami diꞌꞌikkitino? Roduuwisino Yaaqoobi, Yooseefi, Simooninna Yihuda diꞌꞌikkitino? 56 Meya roduuwisi baaluno dininke ledo heeꞌranno? Isi tenne baala dandoo mamiinni afiꞌriyya?” 57 Hakko daafira isinni kainohunni gufidhu. Yesuusi kayinni togo yiinsa: “Masaalaanchu gobbasiranna minesi agurranna wolewa baalawa ayirranno.” 58 Insa ammana noonsakkire ikkitino daafira, hakkiicho lowo maalale diloosino.