Maatewoosi Wongeella

12 Hatte yannara Yesuusi Sambatunni gidu irshi giddoonni hige saꞌꞌanni no. Rosaanosino hudidhino daafira, shoye tattayisse ittu. 2 Farisootu tenne laꞌe togo yitusi: “Lai, rosaanokki Sambatunni seeru hoolinore assitanni no.” 3 Isino togo yiinsa: “Daawiti isinna ledosi noo manni hudiꞌri woyite maa assinoro dinabbabbinoonni? 4 Isi Maganu minira eꞌꞌe, kakkalaano agurranna isino ledosi noorino ittara fajjinoonnikkiha qullaawa tima* diꞌꞌittino? 5 Woy kakkalaano Sambatunni qullaawu mini giddo soqqantanno woyite, Sambata ayirrisa hooggurono xaꞌmantannokkita Seeru giddo dinabbabbinoonni? 6 Ani kayinni kuleemmoꞌnena, kowiicho noohu qullaawa mine rooreho. 7 Ikkollana, ‘Ani hasiꞌreemmoti maarote ikkinnina kakkalo diꞌꞌikkitino’ yaa mayyaatero huwattinoonniha ikkoommero, huninori nookki manna busha diassitinanni. 8 Korkaatuno manchi Beetti Sambatu Mootichaati.”

9 Yesuusi hakkiinni haꞌrihu gedensaanni xaadu mininsara ei; 10 hakkiicho mittu anga laanshaawino manchi no; insa Yesuusa busha assitanno faro hasidhanni, “Sambatunni hursa seeru fajjino?” yite xaꞌmitusi. 11 Isino togo yiinsa: “Kiꞌne giddo mitte geꞌrecho noosi manchi geꞌrechosi Sambatu barra balete ubburo hakkiinni goshooshe fushshannokkihu nooni? 12 Ikkina mannu geꞌrecho lowo geeshsha dirooranno? Hakko daafira Sambatunni dancha looso loosa fajjinoonni.” 13 Hakkiinni mancho, “Angakki diriirsi” yiisi. Manchuno angasi diriirsi; angasino hurte teꞌee gede fayyo ikkitu. 14 Farisootu kayinni gobbara fulte, iso shitara gano gantu. 15 Yesuusino tenne afe hakkiinni agure haꞌri. Lowo mannino hoodesi haꞌri; isino dhiwantinore baala hursi; 16 ikkollana ayimmasi mittohono kultannokki gede qorophisiisinsa; 17 isi hatto assinohu masaalaanchu Isayyaasi widoonni togo yine coyiꞌnoonniri woꞌmanno gedeeti:

18 “Baxeemmohunna hagiirsiisannoehu* doodhoommo soqqamaanchiꞌya kuneeti! Ayyaanaꞌya isi aana dirriseemmo; isino taashsho maatiro dagate kulanno. 19 Isi digiwamanno, dicancanno, jajjabba dooggarano huurosi dimacciishshantanno. 20 Taashsho woꞌmitanno gede assa geeshsha, cancanantino shomboqqo dihiiqqanno, xoara kaino heqichano dixoyissanno. 21 Ee, daga suꞌmasi hexxitanno.”

22 Hakkunni gedensaanni, mannu mitto agaaninte amaddinoha danqichanna ballicha mancho Yesuusiwa haaꞌre abbi; isino hursisi; danqichu manchino coyiꞌranna laꞌꞌa dandii. 23 Mannu baalu dhagge assiꞌre, “Ayiddeꞌya isi kuni Daawiti Beettootikka?” yii. 24 Farisootu tenne macciishshite, “Kuni manchi agaaninte fushshannohu agaanintete roorrichi Bieelizebuuli* wolqanniitilla” yitu. 25 Yesuusi giddonsata afe togo yiinsa: “Isi isiniiwa babbadamanno gashshooti baalu baꞌꞌanno; isi isiniiwa babbadamanno katami woy mini baaluno kaajje uurre diafanno. 26 Hatteente gede, Sheexaanu Sheexaane fushshannoha ikkiro isi isiniiwa babbadamino yaate; hatto ikkiro gashshootisi hiitto ikke kaajjanno? 27 Qoleno ani agaaninte fushsheemmohu Bieelizebuuli wolqanni ikkiro, oosoꞌne* fushshitannohu aye wolqanniitiyya? Oosoꞌne yoo yitannoꞌnehu* iseraati. 28 Ani agaaninte fushsheemmohu Maganu ayyaaninni ikkiro kayinni, Maganu Gashshooti heddinikkinni kiꞌnewa iillino yaate. 29 Mittu manchi balaxe wolqaataamo mancho usurikkinni hakko manchi minira eꞌꞌe jajjasi hiitto asse mulqiꞌra dandaanno? Jajjasi mulqiꞌra dandaannohu hatto assiro callaati. 30 Ane wido ikkinokkihu baalu giwannoeho; ane ledo gamba assannokkihu baalu qole fince hunanno.

31 “Konnira kuleemmoꞌnena, mannaho loosanno cubbonna xonanno xono baala gatona yinanni; qullaawa ayyaana xonannoha kayinni gatona diyinanni. 32 Lawishshaho, manchi Beetti aana busha qaale coyiꞌrannoha baala gatona yinanni; qullaawu ayyaani aana busha qaale coyiꞌrannoha baala kayinni tenne alamerano* daggannoterano gatona diyinanni.

33 “Haqqichoꞌne dancha ikkituro dancha guma laaltanno; busha ikkituro kayinni busha guma laaltanno; korkaatuno haqqicho bande anfannihu gumisenniiti. 34 Kiꞌne buutete ooso, bushuulle ikkitine heedhine hige dancha coye hiitto ikkitine coyiꞌra dandiitinanni? Korkaatuno afuu coyiꞌrannohu wodanaho woꞌminoreeti. 35 Danchu manchi cibbiꞌrinohu danchu coyi giddonni danchare fushshanno; bushu manchi kayinni cibbiꞌrinohu bushu coyi giddonni bushare fushshanno. 36 Halaale kuleemmoꞌnena, mannu coyiꞌrannohu mittu mittunku haafu qaalira Yoote Barra xaꞌmamanno; 37 korkaatuno coyiꞌrootto qaalinni keeraawatto; coyiꞌrootto qaalinni cubbamatto.”

38 Hakkiinni borreessaanotenna Farisootu giddo mitu, “Rosiisaancho, malaate leellishattonkera hasiꞌneemmo” yitu. 39 Isino qole togo yiinsa: “Bushanna foora* ilama woꞌmanka woyite malaate laꞌꞌa hasidhanno; ikkollana masaalaanchu Yoonaasi malaate agurranna wole malaate dileellinshanninsa. 40 Yoonaasi jawa qulxuꞌmicho godowi giddo sase barranna sase hashsha keeshshinte gede, manchi Beettino waammate giddo sase barranna sase hashsha keeshshanno. 41 Nennewete manni Yoonaasi sabbakinore macciishshe maaro eino daafira, Yoote Barra tenne ilama ledo kae cubbishannonsa. Ikkollana, kuneeti Yoonaasi rooru kowiicho no. 42 Wodiidi mootitte Salamooni hayyo macciishshitara baattote qaccenni kaꞌe daggino daafira, Yoote Barra tenne ilama ledo kaꞌe cubbishshannonsa; ikkollana kuneeti Salamooni rooru kowiicho no.

43 “Battete ayyaani mittu manchiwiinni fuliro fooliishshiꞌrannowa hasiꞌranni wayi nookki basera raataawanno; kayinni fooliishshiꞌrannowa diafiꞌranno. 44 Hakkiinni ‘Agure fulummo miniꞌyawa higeemmo’ yaanno; higanno woyite, minu fano ikke, feyamamenna biife nooha afanno. 45 Hakkiinni haꞌre isinni roore bushshinore wole lamala ayyaanna adhe daanno; insano eꞌe hakko heedhanno; hakko manchiti gedensiidi heeshsho albitenni roore busha ikkitanno. Tenne busha ilamarano togoori iillanno.”

46 Isi mannaho coyiꞌranni heeꞌreenna, amasinna roduuwisi hasaawissasira hasidhe gobbaanni uurrite no. 47 Konnira mittu manchi, “Kune amakkinna roduuwikki hasaawissahera hasidhe gobbaanni uurrite no” yiisi. 48 Isino hakko manchira togo yee qoli: “Amaꞌya ayeti? Roduuwiꞌyano ayeooti?” 49 Hakkiinni angasi rosaanosi widira qole diriirse togo yii: “Amaꞌyanna roduuwiꞌya kuriiti! 50 Korkaatuno, iima heeꞌranno Anniꞌya fajjo wonshannohu baalu anera labbaa rodooꞌyaati, meya rodooꞌyaatinna amaꞌyaati.”