Maatewoosi Wongeella
14 Hatte yannara Galiilu gashshaanchi Heroodiisi Yesuusi duduwo macciishshe, 2 soqqamaanosira togo yii: “Kuni Cuuaancho Yohaannisiiti. Isi reyotenni kaino; tenne maalale loosa dandiinohu iseraati.” 3 Hakkuyira albaanni Heroodiisi,* rodiisi Filiphoosi minaama Heroodiyaadanni kainohunni Yohaannisi sansalatetenni usure usuru minira eessino. 4 Korkaatuno Yohaannisi duucha hige “Ise adhattora seeru difajjannohe” yaannosi. 5 Heroodiisi iso shaa hasiꞌrinoha ikkirono, mannu Yohaannisi masaalaanchu gede asse laꞌꞌanno daafira insa waajjino. 6 Ikkollana Heroodiisi ilamino barra ayirrinsanni heeꞌneenna, Heroodiyaada beetto mannu albaanni sirbitanni Heroodiisi lowo geeshsha hagiirsiissu; 7 hakko daafira xaꞌmidhure baala aasera xaari. 8 Iseno amase kultinose garinni, “Tenne sayinera worte Cuuaanchu Yohaannisi umo uyie” yitu. 9 Moote dadillinoha ikkirono, xaarino xaaroranna ledosi itanni noo mannira yee Yohaannisi umo uyinannise gede hajaji. 10 Hakko daafira usuru minira manna soye Yohaannisi umo mursiisi. 11 Umono sayinete worte abbite beettote uyitu; beettono amasera massitu. 12 Gedensoonni Yohaannisi rosaano dagge reeshsha haadhe massite madaartu; hakkiinni dagge Yesuusira kultu. 13 Yesuusi tenne macciishshiti callu heeꞌra hasiꞌre, yowolo gidde hakkiinni agure baddowa haꞌri; ikkollana mannu tenne macciishshe katammatenni fule iso faana gananni lekkatenni haꞌri.
14 Yesuusi baaru qacce dayiti, lowo manna lae lowo geeshsha mararinsa; abbidhinoha dhiwamino mannano hursi. 15 Rosaanosi kayinni hashshita isiwa shiqqe togo yitu: “Heeꞌnoommohu baddowaati; yannano hashshitino; hakko daafira qacha haꞌre sagale hidhanno gede manna haꞌrisi.” 16 Yesuusi kayinni “Haꞌra dihasiissannonsa; ittannore kiꞌne uyiyyensa” yiinsa. 17 Insano “Onte timanna lame qulxuꞌmicho agurranna noonkeri dinowe” yitusi. 18 Isino “Hakkoye noore anewa abbe” yii. 19 Mannuno hayissote ofollanno gede hajaji. Hakkiinni ontenka timanna lamenta qulxuꞌmicho haaꞌre iima hige laꞌꞌanni maassiꞌri; timma hiiqqaqqe rosaanosira uyi; rosaanosino mannaho iillishshu. 20 Baalunku itte duubbu; ittanna gatino haambaa 12 gimboola gamba assitu. 21 Sagale itino manni meentonna qaaqquulle kiirrikkinni 5,000 labballo ikkanno. 22 Hakkiinni bayichonkonni Yesuusi manna haꞌrisa geeshsha rosaanosi yowolo giddite iso balaxxe baara widoonni saꞌanno gede kulinsa.
23 Manna haꞌrisihu gedensaanni huuccatto assiꞌrara callisi ilaala fuli. Hashshi woyiteno isi hakkiicho callisi no. 24 Hatte yannara yowolo moola baattowiinni lowo xibbe meetire* xeertidhe no; bubbe insawa higge bubbissanni noo daafira dambalu lowo geeshsha qarrisinsa. 25 Ikkollana hashsha shoolki agarera* Yesuusi baaru aana lekkatenni haꞌranni insawa dayi. 26 Rosaanosi isi baaru aana lekkatenni haꞌranna laꞌe lowo geeshsha masse, “Haaqiiꞌnanni heeꞌnoommonso?” yitu. Qoleno waajjite raartu. 27 Ikkollana Yesuusi bayichonkonni “Massinoonte! Aneetina waajjitinoonte” yiinsa. 28 Pheexiroosi qole, “Mooticha, ateetiro wayi aana haꞌranni atewa dayemmo gede hajajie” yiisi. 29 Isino, “Amo!” yiisi. Hakko daafira Pheexiroosi yowolotenni dirre wayi aana lekkatenni haꞌranni Yesuusiwa hige mari. 30 Ikkollana bubbete wolqa lae waajji. Itamara rahiti, “Mooticha, gatisie!” yee raari. 31 Yesuusino bayichonkonni angasi diriirse amade togo yiisi: “Ati ammana xeꞌinohehu, mayira huluullamitto?” 32 Yowolo giddituhu gedensaanni bubbe bubbisa agurtu. 33 Yowolote giddo noori, “Halaalinta ati Maganu Beettooti” yitanni ayirrinye uyitusi.* 34 Hakkiinni baara tayisse saꞌe Gensereexi yinanni gobba daggu.
35 Hakko heeꞌranno manni Yesuusa ikkinota afiti, qooxeessaho noo gobba baalate sokka soyi; mannuno dhiwantinore baala isiwa haaꞌre abbi. 36 Dhiwantinori uddanosi qacce calla kissara huuccidhusi; kissinori baaluno dhibbinsanni woꞌmunni woꞌma hurtu.