Maatewoosi Wongeella
11 Yesuusi 12 rosaanosira biddishsha uyinsahu gedensaanni, rosiisaranna sabbakara wole katamma haꞌri.
2 Yohaannisi usuru mine heeꞌre Kiristoosi loosanni noore macciishshe rosaanosi soye, 3 “Daanno yinihu ateetinso wole agadhino?” yee xaꞌmi. 4 Yesuusino togo yee qolinsa: “Hadhine macciishshitinanninna laꞌinanni heedhinoonnire Yohaannisira kulle: 5 Ballootu laꞌanni no; kottootu uurrite hadhanni no; dhiigu dhibbi amadinonsari hurtanni no; macciweelootu macciishshitanni no; reyitinori kaꞌanni no; buxaneteno dancha duduwo kullanni heeꞌnoonni. 6 Anenni kainohunni gufiꞌrannokkihu hagiirraamoho.”
7 Yohaannisi rosaano hadhuhu gedensaanni, Yesuusi mannaho Yohaannisi daafira kula hanafi: “Halallira hadhinoonnihu maa laꞌinaraati? Bubbe milli assitanno shomboqqo? 8 Ikkina hadhinoonnihu maa laꞌꞌateeti? Seesallitte uddano uddiꞌrino mancho? Seesallitte uddano uddiꞌrino manni noohu mootoollate mineeti. 9 Mayira hadhiniyya? Masaalaancho laꞌinara? Ee kuleemmoꞌnena, isi masaalaancho nafa lowo geeshsha rooreho. 10 ‘Kuneeti albakkiinni haꞌranni doogokki qixxeessanno gede sokkaanchoꞌya atera albaanni soyemmo’ yine borreessinoonnihu isi daafiraati. 11 Halaale yeemmoꞌnena, xaa geeshsha heeꞌrino manni giddo Cuuaancho Yohaannisi roorannohu dino; ikkollana gordu Gashshootira shiimiidihu nafa roorannosi. 12 Cuuaanchu Yohaannisi soqqansho hanafi yannanni kayise xaa geeshsha mannu gordu Gashshootira gaaramanni no; cince gaaramannohuno afiꞌranno. 13 Korkaatuno Masaalaano coyidhinorinna Muse Seeri baalu Yohaannisi yanna geeshsha kullanna keeshshino; 14 kiꞌne ammanneno hooggenona, ‘Daanno yini Eeliyaasi’ isooti. 15 Macca noohu macciishsho.
16 “Tenne ilama ayenni masalso? Dikkote ofolte mimmito woshshitanni togo yitanno ooso gedeeti: 17 ‘Suusulle ufuunfummoꞌne, kiꞌne kayinni disirbitinoonni; ninke wiꞌlishshinummoꞌne, kiꞌne kayinni dadillunni gagaso digaꞌnitinoonni.’ 18 Hatteente gede, Yohaannisi itikkinna agikkinni dayita, mannu ‘Agaaninte amaddinoho’ yiisi. 19 Manchi Beetti itanninna aganni dayi; mannu kayinni, ‘Laꞌe konne kokkaamonna woyinete xajjera wojji yaannoha, qaraxaasinetenna cubbaataammu jaala’ yiisi. Hayyo kayinni keeraancho* ikkase loosisenni* buunxoonni.”
20 Hakkiinni Yesuusi lowo maalale loosino katamma maaro eꞌinokki daafira togo yaanni mishinsa: 21 “Koraaziini, atera aanneꞌe! Beetesaayida, atera aanneꞌe! Kiꞌnewa loonsoonni maalale Xiroosinna Sidooni katammara* loonsoonniha ikkoommero, xiddu uddano uddidhenna buluuloho ofolte biꞌre biꞌrenni maaro eꞌe kaꞌino. 22 Ani kayinni yeemmoꞌnena, Yoote Barra Xiroosinna Sidooni katammanni roore kiꞌnera kaajjado yoo yinanniꞌne. 23 Atino Qifirinaahoomi, gotti yite gordu geeshsha iillattaha lawihe? Deeꞌni! Waamma* dirratta; korkaatuno atewa loonsoonni maalale Soddoomaho loonsoonniha ikkoommero, hakko katami techo geeshsha heeꞌrannohu baino. 24 Ani kayinni yeemmoꞌnena, Yoote Barra Soddoomunni roore kiꞌnera kaajjado yoo yinanniꞌne.”
25 Hatte yannara Yesuusi togo yii: “Gordunna baattote Mooticha Annaꞌya, konne coye hayyooletenna egennaammaho golte, qaaqquulleho xawisootto daafira faajjete guwisiꞌreemmohe. 26 Ee Annaꞌya, tini ate fajjooti. 27 Anniꞌya baalanka coye anera uyinoe; Anna agurranna Beetto seekke afinohu dino; Beetto agurranna Annano seekke afinohu dino; Beettu baxe xawisinosiha agurranna Anna seekke afa dandaannohu mittuno dino. 28 Daafurtinoonnirinna duhu ayirrinoꞌneri baalu anewa amme; ani fooliishshiisheemmoꞌnena. 29 Qambaraꞌya duqqe; anewiinnino rosse; ani shaqqadohonna wodana joogaho; umiꞌnerano* fooliishsho afidhinanni. 30 Korkaatuno qambariꞌya shotaho;* duhiꞌyano diayirrannoho.”