Maatewoosi Wongeella
10 Yesuusi 12 rosaanosi isiwa woshshe, battete ayyaanna hajajjanno gede roorre uyinsa; hatto assinohu, battete ayyaanna fushshitanno gedeetinna baalunku gari dhibbanna xisso hursitanno gedeeti.
2 Tonaalamente soqqamaasine suꞌmi aane nooho: Pheexiroosi yinihu Simooninna rodiisi Indiriyaasi; Zebidewoosi beetti Yaaqoobinna rodiisi Yohaannisi; 3 Filiphoosinna Bertelemewoosi; Toomaasinna qaraxaasinchu Maatewoosi; Ilfiyoosi beetti Yaaqoobinna Taadewoosi; 4 Laalaataanchu* Simooninna gedensoonni Yesuusa sayise uyihu Asqorootu Yihuda.
5 Yesuusi kuri 12 soqqamaasinesi togo yee hajaje soyinsa: “Daganniwa martinoonte; mittono Samaariyu katama eꞌinoonte; 6 hatteentenni, Israeelete mine baino geꞌreewiwa calla hadhe. 7 Martinanni woyite, ‘Gordu Gashshooti gambisino’ yitinanni dudubbe. 8 Dhiwantinore hurse, reyitinore kayisse, dhiigu amadinore hurse, agaaninte fushshe. Mulla adhitinoonnire mulla uyiyye. 9 Qoraho culka woy birra woy camo wodhitinoonte; 10 hadhinanni woyite sinqe woy layinki uddano* woy layinki caamma woy layinki siqqicho adhitinoonte; loosannohura sagale hasiissannosina.
11 “Martinanni katami woy qachi baalunkura, sokkaꞌne macciishshate malino mancho hasse; hakkiinni fultine hadhina geeshsha hakko keeshshe. 12 Minira eꞌinanni woyite mini manna keere haadhe. 13 Insa danchu garinni haadhuꞌnero keeriꞌne iillonsa; danchu garinni haaꞌra gibbuꞌnero kayinni keeriꞌne kiꞌnewa higo. 14 Mittu manchino kiꞌne haaꞌra woy yitinannire macciishsha giwiro, hakko mininni woy kataminni fultine hadhinanni woyite lekkaꞌne buko gangaꞌne.* 15 Halaale yeemmoꞌnena, Yoote Barra hakko katamira Soddoomunna Gomooru kataminni roore kaajjado yoo yinanni.
16 “Kuneeti hiyyeeyyete mereero noo geꞌreewi gede asse soyemmoꞌne; konnira, hamashshu gede busulla, lembooli gede jooguulle ikke. 17 Mannu yoote minira sayise aannoꞌne; xaadu minnansarano halangetenni ganannoꞌne; hakko daafira insa qorophe. 18 Qoleno ane daafira yitineenna gashshaanotenna mootoollate albira shiqishshannoꞌne; hakkiicho insarano dagateno farcidhinanni. 19 Ikkollana sayisse uyitannoꞌne woyite, ‘Ma garinni coyiꞌneemmo woy mayine qolleemmo?’ yitine yaaddinoonte; coyidhinannire hatte saatera kullanniꞌnena; 20 kiꞌne widoonni coyiꞌrannohu Anniꞌne ayyaanaati ikkinnina, coyidhinanniri kiꞌne calla diꞌꞌikkitinoonni. 21 Qoleno roduu rodoosi, annuno beettosi reyote sayise aanno; ooso anninsaranna amansara finqiltanno, hattono shiishiishshannonsa. 22 Suꞌmiꞌyara yitineenna mannu baalu giwannoꞌne; goofimarchu geeshsha kaajje uurrinohu* kayinni gatanno. 23 Mittu katamira waadduꞌnero wole katama xooqqe; halaale kuleemmoꞌnena, manchi Beetti daa geeshsha Israeelete katammanna qachuwa hadhine horo diguddinanni.
24 “Rosaanchu rosiisaanchosi, borojjichuno mootichasi dirooranno. 25 Rosaanchu rosiisaanchisi gede, borojjichuno mootichisi gede ikkiro ikkannosi. Mannu minu anna Bieelizebuuli* yiiro, minisi manna isinni hakkiinni sainore diyaanno? 26 Hakko daafira insa waajjitinoonte; korkaatuno diwaminori baalu faꞌnamasi digattanno; fojo ikkinori baaluno xawo fulasi digattanno. 27 Ani tunsote kuleemmoꞌnere kiꞌne xawaabbaho coyidhe; hashaanshe kulloonniꞌnere minu guunxo fultine lallabbe. 28 Maala shitannore, lubbo* kayinni shaa dandiitannokkire waajjitinoonte; hatteentenni, lubbono maalano Gaannaamete* huna dandaannoha waajje. 29 Lame gurrae hirrannihu mitte saantera* diꞌꞌikkino? Ikkirono, insa giddonni mitte nafa Anniꞌne afikkinni uulla diubbanno. 30 Kiꞌnehu umiꞌne dananchi baalu nafa kiirreenna nooho. 31 Konnira waajjitinoonte; kiꞌne lowo gurrae roortinannina.
32 “Mannu albaanni rosaanchoꞌya ikkinota coyiꞌrannohura baalaho, anino iima heeꞌranno Anniꞌya albaanni isi rosaanchoꞌya ikkinota coyiꞌreemmo. 33 Mannu albaanni kaadannoeha kayinni, anino iima heeꞌranno Anniꞌya albaanni kaadeemmosi. 34 Uullate aanira keere haaꞌre dayommoha lawoonkeꞌne; dayommohu bise abbammoraati ikkinnina keere abbammora diꞌꞌikkino. 35 Ani dayommohu labbaa beetto annisiwiinni, meya beetto amasewiinni, beettu beettono ballosewiinni badammoraati. 36 Manchoho minisi manni diina ikkannosi. 37 Anenni roorse annasi woy amasi baxannohu baalu aneha ikka didandaanno; qoleno anenni roorse labbaa beettosi woy meya beettosi baxannohu baalu aneha ikka didandaanno. 38 Qarru haqqasi* duqqa hasiꞌrannokkihunna hoodeꞌya haꞌrannokkihu baaluno aneha ikka didandaanno. 39 Lubbosi* gatisiꞌrate woꞌnaalannohu baalu huꞌnanno; ane daafira yee lubbosi* hunannohu baalu kayinni wirro afiꞌranno.
40 “Kiꞌne haaꞌrannohu baalu ane haaꞌrannoho; ane haaꞌrannohu baalu qole Soyinoeha haaꞌranno. 41 Mitto masaalaancho, masaalaancho ikkino daafira haaꞌranno manchi masaalaanchu afiꞌranno baꞌraaꞌra afiꞌranno; keeraancho mancho keeraanchimmasinni haaꞌrannohuno keeraanchu manchi afiꞌranno baꞌraaꞌra afiꞌranno. 42 Halaale kuleemmoꞌnena, kuri shiimmaaddu giddonni mittoho ane rosaancho ikkino daafira mitte birciqqo qiidino waa aannohu baalu, baꞌraaꞌra adhikkinni horo digatanno.”