Maatewoosi Wongeella

9 Hakkunni gedensaanni, Yesuusi yowolo gidde baara tayise umisi katama* dayi. 2 Hakkiicho mannu rerete goxinoha mitto laanshaawino mancho isiwa haaꞌre dayi. Yesuusino ammanansa lae laanshaawino mancho “Beettoꞌya waajjitooti! Cubbokki maarroonnihena” yiisi. 3 Hatte yannara mite borreessaano wodaninsanni, “Kuni manchi Magano xonanni no” yite heddu. 4 Yesuusino giddonsata afe togo yiinsa: “Wodaniꞌnenni bushare heddinannihu mayiraati? 5 ‘Cubbokki maarroonnihe’ yaatenna ‘Kaꞌe haꞌri’ yaate giddo shottannoti hiitteeti? 6 Ikkollana manchi Beettira uullate aana cubbo gatona yaate silxaane noosita affinara hasiꞌreemmo.” Hakkiinni laanshaawino mancho “Kai, rerekki duqqite minikkira haꞌri” yiisi. 7 Manchuno kae minisira haꞌri. 8 Mannu tenne lae lowo geeshsha waajji; qoleno mannaho togoo silxaane uyino Maganira ayirrinye uyi.

9 Yesuusi hakkiinni kae haꞌranni heeꞌre, Maatewoosi yinanni manchi qaraxo qaranxanni darga ofolle nooha afe, “Hoodeꞌya amo” yiisi. Isino kae hoodesi haꞌri. 10 Hakkunni gedensaanni, Yesuusi Maatewoosi mine sagale itanni heeꞌreenna, lowo qaraxaasinenna cubbaataammi dagge Yesuusinna rosaanosi ledo sagale ittu. 11 Farisootu kayinni tenne laꞌe rosaanosi, “Rosiisaanchiꞌne qaraxaasinetenna cubbaataammu ledo itannohu mayiraati?” yitu. 12 Yesuusino insa yitinota macciishshe togo yiinsa: “Xagisaanchu hasiisannohu dhiwantinoriraati ikkinnina fayyu mannira diꞌꞌikkino. 13 Konnira hadhine, ‘Ani hasiꞌreemmoti maarote ikkinnina kakkalo diꞌꞌikkitino’ yaanno qaali mayyaatero huwatte. Korkaatuno ani dayommohu keeraano ikkikkinni cubbaataamma woshshammoraati.”

14 Hakkiinni Yohaannisi rosaano Yesuusiwa dagge, “Ninkenna Farisootu duucha woyite xoommanna ate rosaano kayinni xoontannokkihu mayiraati?” yite xaꞌmitu. 15 Hatte yannara Yesuusi togo yiinsa: “Idayichu ledonsa heeꞌri geeshsha idayichu jaalla dadillitanno gede assannonsari mayi no? Ikkollana idayicho insawiinni haaꞌne hoollanni yanna dagganno; insa hakkawoyite xoontanno. 16 Akkala uddanora haaro hocco qaaffisiꞌranno manchi dino; hatto assiro haaru hocci duuranno daafira uddanote dadhamme lexxitanno. 17 Qoleno mannu haaro woyine akkalu woyinete ogorira diwodhanno. Hatto assiro ogoru dhoohanno, woyine duꞌnantanno, ogoruno baꞌꞌanno. Ikkollana mannu haaro woyine haaru woyinete ogorira wodhanno; hakko daafira lamunkuri dibaꞌꞌanno.”

18 Yesuusi konne coye kulanni heeꞌreenna, mittu xaadu mini roorrichi isiwa daye guluphe* togo yii: “Qaaqqoꞌya kawoote reyitukki digattino; ikkollana ati dagge anga aanaho worittosero galagalte heeshshote heedhanno.”

19 Hakkiinni Yesuusi kae, rosaanosi ledo manchu hoode haꞌri. 20 Hadhanni heedheenna, mitte 12 diro mundee duꞌnantannase shette heedhanno mancho, badheenni higge dagge uddanosi qacce kissu. 21 Ise hatto assitinohu, “Uddanosi nafa kisummaro hureemma” yite heddino daafiraati. 22 Yesuusino ise caaqqi yee lae, “Beettoꞌya, waajjitooti! Ammanakki hursitinohena” yiise. Manchono hakkawoyintenni hurtu.

23 Yesuusi xaadu mini roorrichi qae iilliti, suusulle ufuufannonna wiꞌlanni didanno manna lae, 24 togo yii: “Hanni gobbara fulle; qaaqqo goxxinollana direyitino.” Insa kayinni arrassitanni osoꞌlitu. 25 Manna mininni fushshihu gedensaanni, Yesuusi ise noowa mare angase amadi; qaaqqono kaꞌu. 26 Kuni duduwi hatte gobba woꞌmate duduwami.

27 Yesuusi hakkiinni kae haꞌranni heeꞌreenna, lamu ballooti “Daawiti Beetto, mararinke”* yite raartanni hoodesi hadhu. 28 Minira eihu gedensaanni ballootu isiwa daggu; Yesuusino “Ani illeꞌne fanammora dandeemmota ammantinanni?” yee xaꞌminsa. Insano, “Ee Mooticha” yite qoltu. 29 Hakkiinni isi illensa amammade “Ammanaꞌne gede ikkoꞌne” yiinsa. 30 Illensano faꞌnantu; Yesuusino, “Konne coye mittu manchirano kultinoonte” yee seekke qorophisiisinsa. 31 Ikkollana insa fultuhu gedensaanni hakko qooxeessira baalaho isire dudubbu.

32 Insa hadhanni heedheenna, mannu agaaninte amaddinoha mitto danqicha mancho isiwa haaꞌre dayi; 33 Yesuusi agaaninte fushshisihu gedensaanni danqichu manchi coyiꞌri. Mannu tenne dhagge assiꞌre, “Israeelete gobbara togoo coye laꞌne diegenninoonni” yii. 34 Farisootu kayinni, “Isi agaaninte fushshannohu agaanintete roorrichi* wolqanniitilla” yitu.

35 Yesuusino xaadu minnansara rosiisanni, Maganu Gashshootiha dancha duduwo sabbakanninna baalunku gari dhibbanna xisso hursanni, katammatenna qachuwate haꞌrami. 36 Yesuusi isiwa dayino manna lai yannara, allaalaanchu nookki geꞌreewi gede madiꞌrenna tugame noo daafira lowo geeshsha mararinsa. 37 Hakkiinni Yesuusi rosaanosira togo yiinsa: “Gidu lowoho; gide midanno manni kayinni shiimaho. 38 Konnira loosu Anni middannore soyanno gede huuccidhe.”