ලෝක නායකයන් යුද්ධ වෙනුවෙන් වියදම් කරපු මුදල ඩොලර් ට්‍රිලියන 2 ඉක්මවයි! - ඒ ගැන බයිබලයේ කියන්නේ මොකක්ද?

2022දී ලෝකේ පුරාම යුද්ධ වෙනුවෙන් වියදම් කරපු මුදල ඇමරිකානු ඩොලර් ට්‍රිලියන 2.24 දක්වා ඉහළ ගියා. ඒකට විශේෂම හේතුව වුණේ රුසියාව සහ යුක්රේනය අතර දිගින් දිගටම පවතින යුද්ධයයි. ස්ටොක්හෝම් ජාත්‍යන්තර සාම පර්යේෂණ ආයතනයෙන් (SIPRI) 2023 අප්‍රියෙල් මාසේදී පළ කරපු වාර්තාවක 2022 වසර ගැන මේ වගේ තොරතුරු සඳහන් කරලා තිබුණා.

• මේ අවුරුද්දේ යුරෝපයේ රටවල් යුද්ධ වෙනුවෙන් වියදම් කරපු මුදල “13%කින් ඉහළ ගිහින් තියෙනවා. ඒ තරම් ඉහළ යාමක් 1991න් පස්සේ ඒ කියන්නේ සීතල යුද්ධයෙන් පස්සේ කවදාවත් වාර්තා වෙලා නැහැ.”

• “රුසියාව යුද්ධ වෙනුවෙන් වියදම් කරපු මුදල 9.2%කින් ඉහළ ගිහින් තියෙනවා. ඒ නිසා යුද්ධ වෙනුවෙන් වැඩියෙන්ම වියදම් කරන රටවල් අතරින් රුසියාව පස්වෙනි ස්ථානයේ ඉඳන් තුන්වෙනි ස්ථානයට ඇවිත් තියෙනවා.”

• යුද්ධ වෙනුවෙන් වැඩියෙන්ම වියදම් කරන රටවල් අතරින් ප්‍රථම ස්ථානය හිමි කරගෙන ඉන්නේ ඇමරිකා එක්සත් ජනපදයයි. “එයාලා ඒ වෙනුවෙන් වියදම් කරන ගාණ මුළු ලෝකෙම යුද්ධවලට වියදම් කරන ගාණෙන් 1/3කටත් වඩා වැඩියි.”

SIPRI වාර්තාවේ කර්තෘවරයෙක් වන මහාචාර්ය නෑන් ටියන් මෙහෙම කියනවා. “යුද්ධ වෙනුවෙන් වියදම් කරන මුදල එන්න එන්නම වැඩි වෙන එකෙන් පේන්නේ මිනිස් සංහතියම ඉන්නේ ලොකු අනතුරක කියන එකයි.”

ලෝක බලවතුන් අතර සිද්ධ වෙන බල අරගලය ගැනත් සාමය ගැන අපිට තියෙන එකම බලාපොරොත්තුව ගැනත් බයිබලයේ කලින්ම පැහැදිලි කරලා තියෙනවා.

යුද්ධවල වැඩි වීමක් ගැන අනාවැකියක්!

• බයිබලයේ කියනවා අපි ජීවත් වෙන්නේ “අවසාන කාලයේ” කියලා.—දානියෙල් 8:19.

• ඒ කාලේදී ලෝක බලවතුන් බලය අල්ලගන්න පොරබදිනවා කියලා දානියෙල් පොතේ කියලා තියෙනවා. බයිබලයේ කියන්නේ බලයට තියෙන කෑදරකම නිසා එයාලා එකිනෙකාට “විරුද්ධව පියවර ගන්නවා” කියලා. ඒ වෙනුවෙන් එයාලා ළඟ තියෙන ධන සම්පත් ඇතුළු “වටිනා දේවල්” පවා යොදවන්න එයාලා දෙසැරයක් හිතන්නේ නැහැ.—දානියෙල් 11:40, 42, 43.

දානියෙල් පොතේ තියෙන ඒ පුදුමාකාර අනාවැකිය ගැන තව තොරතුරු දැනගන්න ‘අනාවැකියක ඉටු වීමක්! - දානියෙල් 11’ කියන වීඩියෝ එක බලන්න.

සැබෑ සාමය උදා වෙන විදිහ

• බයිබලයේ කියනවා දෙවියන් මිනිස් ආණ්ඩු හැම එකක්ම අයින් කරනවා කියලා. ඒ වගේම ඔහු කරන තවත් දෙයක් ගැන බයිබලයේ මෙහෙම කියනවා. “දෙවි කිසිදාක විනාශ නොවන රාජ්‍යයක් පිහිටුවයි. එය වෙන සෙනඟක් අතට පත් නොවෙයි. එම රාජ්‍යය ඒ සියලු රාජ්‍යවල් පොඩි කර නැති කර දමයි. නමුත් එය සදහටම පවතියි.”—දානියෙල් 2:44.

• මෙච්චර කාලයක් මිනිස්සුන්ට උදා කරන්න බැරි වුණ දේ ඒ කියන්නේ සදහටම පවතින, සැබෑ සාමය යෙහෝවාa දෙවියන් ළඟදීම මිනිස්සුන්ට ලබා දෙනවා. ඔහු ස්වර්ගයේ පිහිටුවලා තියෙන ඔහුගේ ආණ්ඩුවෙන් මිනිස්සු හදලා තියෙන අවිආයුධ විනාශ කරලා හැම දුෂ්ටකමක්ම මුලිනුපුටා දානවා.—ගීතාවලිය 46:8, 9.

දෙවියන්ගේ ආණ්ඩුවෙන් කරන්න යන තවත් දේවල් ගැන දැනගන්න “දෙවියන්ගේ රාජ්‍යය යටතේ ‘බොහෝ සමාදානය තිබෙන්නේය’” කියන ලිපිය බලන්න.