මරණයේදී සිදු වන්නේ කුමක්ද?

මරණය කියන්නේ ජීවිතයේ ප්‍රතිවිරුද්ධ දෙයයි. මරණය තද නින්දක් වගෙයි. (යොහන් 11:11-14) මැරුණු අයට කිසිවක් අසන්න, බලන්න, කතා කරන්න හෝ කිසිම දෙයක් සිතන්න බැහැ. (දේශනාකාරයා 9:5, 10) මැරුණු අය තම මුතුන්මිත්තන් සමඟ ජීවත් වීමට ආත්ම ලෝකයකට යනවා කියා බොරු ආගම්වල උගන්වනවා. බයිබලයේ ඒ වගේ දෙයක් කොහෙත්ම උගන්වන්නේ නැහැ.

අපට උපකාර කිරීමටවත් හිංසා කිරීමටවත් මැරුණු අයට බැහැ. යම් චාරිත්‍ර සහ පූජා මගින් මැරුණු අයව සතුටු කිරීමට පුළුවන් කියන විශ්වාසය මනුෂ්‍යයන් අතර පොදු දෙයක් වී තිබෙනවා. මෙම විශ්වාසය සාතන්ගේ බොරුවක් මත පදනම් වූ දෙයක් නිසා එය දෙවිව අසතුටට පත් කරනවා. ඒ වගේම මැරුණු අයට පණ නැති නිසා, අපිට ඔවුන්ව සතුටු කරන්නත් බැහැ. එමනිසා, මැරුණු අයට බිය වෙන්න හෝ නමස්කාර කරන්න කිසිම අවශ්‍යතාවයක් නෑ. අපි නමස්කාර කළ යුත්තේ දෙවිට පමණයි.—මතෙව් 4:10.

මැරුණ අය නැවත ජීවත් වෙන්න යනවා. යෙහෝවා මැරුණු අයව පාරාදීස පොළොවකට නැඟිටවන්න යනවා. නුදුරු අනාගතයේදීම එම කාලය පැමිණෙනවා. (යොහන් 5:28, 29; ක්‍රියා 24:15) ඔබට නිදා සිටින කෙනෙකුව නින්දෙන් නැඟිටවන්න පුළුවන් වගේම යෙහෝවාටත් පුළුවන් මැරුණු අයව නැඟිටුවන්න.—මාර්ක් 5:22, 23, 41, 42.

අප මැරෙන්නේ නෑ කියන අදහස සාතන් නමැති යක්ෂයා පැතිරවූ බොරුවක්. සාතන් සහ ඔහුගේ භූතයන් මැරුණු අයගේ ආත්ම ජීවත් වන බවත් එම ආත්ම, රෝග සහ වෙනත් ගැටලු ඇති කරන බවත් මනුෂ්‍යයන්ට හැඟීමට සලස්වනවා. සාතන් සමහර අවස්ථාවලදී සිහින සහ දර්ශන මගින් මනුෂ්‍යයන්ව රවටනවා. මැරුණු අයත් එක්ක කතා කිරීමට උත්සාහ කරන අයව යෙහෝවා හෙළා දකිනවා.—ද්විතීය කථාව 18:10-12.