මායාව සහ මන්ත්‍ර ගුරුකම් වැරදියි

සාතන්ට අවශ්‍ය වන්නේ ඔබ මන්ත්‍ර ගුරුකම්වල නිරත වනවා දකින්නයි. බොහෝ අය මුතුන්මිත්තන්ට හෝ භූතාත්මයන්ට පූජා ඔප්පු කරන්නේ, ඔවුන්ගෙන් එල්ල වන වධ හිංසාවන්ගෙන් ආරක්ෂාවක් ලබාගැනීම සඳහායි. ඇත්තෙන්ම ඔවුන් මෙවැනි දේ කරන්නේ භූතයන්ගේ බලයට ඔවුන් බිය වන නිසායි. එමනිසා, ඔවුන් මතුරන ලද මුදු, වළලු ආදිය පළඳින අතර මන්තර බලයක් ඇතැයි කියා සිතන “බෙහෙත්” පානය කරනවා. එහෙමත් නැත්නම් ඇඟේ ගාන තෙල් වර්ග පාවිච්චි කරනවා. තවදුරටත්, ආරක්ෂා කිරීමට බලයක් ඇතැයි සිතන ද්‍රව්‍ය ඔවුන්ගේ නිවෙස්වල එල්ලා හෝ පොළොවේ වළලා තබනවා. තවත් අය ව්‍යාපාර සාර්ථක කරගැනීමට, පාසැලේ විභාග සමත් වීමට හෝ පූර්ව විවාහ ඇසුරක් සාර්ථක කරගැනීමට මතුරන ලද “බෙහෙත්” පාවිච්චි කරනවා.

සාතන්ගේ පීඩාවලින් බේරීමට ඇති හොඳම ආරක්ෂිත ක්‍රමය වන්නේ යෙහෝවාව ඔබේ මිතුරා කරගැනීමයි. සාතන් සහ ඔහුගේ භූතයන්ට වඩා යෙහෝවා දෙවි සහ ඔහුගේ දූතයන් ඉතා බලවත්. (යාකොබ් 2:19; එළිදරව් 12:9) ඇත්තෙන්ම තම පක්ෂපාත මිතුරන් වෙනුවෙන් බලය යෙදවීමට යෙහෝවා ආශාවෙන් බලා සිටිනවා.—2 ලේකම් 16:9.

“මායම් භාවිතා නොකරන්න” කියා දෙවිගේ වචනයෙහි පවසනවා. යෙහෝවා මායාව සහ මන්ත්‍ර ගුරුකම් හෙළා දකිනවා. ඊට හේතුව එවැනි දේවලින් කෙනෙකුව කෙළින්ම සාතන් නමැති යක්ෂයාගේ බලයට හසු වන නිසයි.—ලෙවී කථාව 19:26.