හරි තොරතුරු දැනගන්න

ප්‍රශ්නය

හුඟක් වෙලාවට කෙනෙක් අනිත් අයව පහත් කරලා සලකන්නේ හරි තොරතුරු දන්නේ නැති නිසයි. පහත සඳහන් උදාහරණ බලන්න.

• විද්‍යාව සහ තාක්ෂණය සම්බන්ධ රැකියාවන් කරන්න කාන්තාවන්ට හැකියාවක් නැහැ කියලා සමහර ආයතනවල ප්‍රධානීන්ට වැරදි මතයක් තියෙනවා.

• 5වෙනි සියවස සහ 15වෙනි සියවස අතර කාලයේදී ළිංවලට වස දානවා කියලත් ලෙඩ බෝ කරනවා කියලත් යුරෝපය පුරා හිටපු යුදෙව්වන්ට බොරු චෝදනා එල්ල වුණා. ජර්මනියේ ආර්ථික බිඳ වැටීමට හේතුව යුදෙව්වන් කියලා නාට්සි පාලන කාලයේදී ආයෙත් චෝදනාවක් එල්ල වුණා. ඒ අවස්ථා දෙකේදීම යුදෙව්වන්ව හැමෝම පහත් කරලා සැලකුවා. අදටත් ඒ දේ දකින්න තියෙනවා.

• ශාරීරික ආබාධයක් තියෙන හැම කෙනෙක්ම ජීවිතේ ගැන කලකිරිලා හුඟක් දුකින් ඉන්නවා කියලා හුඟදෙනෙක්ට වැරදි අදහසක් තියෙනවා.

ඒ වගේ බොරු මත විශ්වාස කරන හුඟදෙනෙක් එයාලා විශ්වාස කරන දේ හරි කියලා පෙන්වන්න බොරු සාක්ෂි ගොතනවා. ඒ වගේම එයාලා කියන දේවල් පිළිගන්නේ නැති අයව එයාලා සලකන්නේ කිසිම දෙයක් දන්නේ නැති මෝඩ අය විදිහටයි.

බයිබල් ප්‍රතිපත්තිය

“කාරණා හොඳින් වටහාගන්න තැනැත්තා දැනුම සොයා යයි.”—හිතෝපදේශ 15:14.

ඒකෙන් අදහස් කරන්නේ මොකක්ද? යම් දෙයක් ගැන හරියටම තොරතුරු දන්නේ නැති වුණාම අපි වැරදි තීරණ ගන්නවා. හරි තොරතුරුවලට වඩා බොරු මත විශ්වාස කළොත් අපි මිනිසුන් ගැන වැරදි විදිහට හිතන්න පෙලඹෙනවා.

හරි තොරතුරු දැනගන්න එකෙන් ලැබෙන ප්‍රයෝජන

අපි මිනිසුන් ගැන හරි තොරතුරු දන්නවා නම් පොදුවේ අනිත් අය එයාලා ගැන කියන බොරු දේවල් අපි විශ්වාස කරන්නේ නැහැ. ඒ වගේම යම් පිරිසක් ගැන දැනගෙන හිටපු තොරතුරු වැරදියි කියලා අපි තේරුම්ගත්තාම ඊළඟ වතාවේ එයාලා ගැන යම් කෙනෙක් දෙයක් කියද්දී ඒක පිළිගන්න කලින් ඒකේ ඇත්ත නැත්ත හොඳට හොයලා බලනවා.

ඔයාට කරන්න පුළුවන් මොනවාද?

• යම් කණ්ඩායමක් ගැන මිනිසුන් පොදුවේ යම් මතයක් දැරුවාට ඒ කණ්ඩායමේ ඉන්න හැම කෙනෙක්වම ඒ මිම්මෙන් මනින්න බැහැ කියලා මතක තියාගන්න.

• අනිත් අය ගැන ඔයා හැම තොරතුරක්ම දන්නේ නැහැ කියලා තේරුම්ගන්න.

• නිවැරදියි කියලා සහතික වෙන්න පුළුවන් තැන්වලින් විතරක් තොරතුරු ලබාගන්න උත්සාහ කරන්න.