Ndani so mo peut ti duti na ngia même tongana azo ake mo

1. Tënë ti nyen la Jésus atene? Ngbanga ti nyen la ahon gbungo li ti e?

NA YÂ ti fango tënë ti Jésus na ndö ti hoto, lo tene: “Ngia ayeke na ala tongana azo ake ala.” (Luc 6:22). Atënë so adoit lani ti hon gbungo li ti azo so ayeke mä Jésus ndali ti so zo oko aye ti tene azo ake lo ape. Jésus atene lani tënë so ngbanga ti nyen? So pendere hunda la. Gbâ ti azo ake adisciple ti Jésus laso. E yeke bâ ndani so azo ake e nga ndani so e peut ti duti na ngia même tongana azo ake e.

NDANI SO AZO AKE E

2-3. Mbeni raison so ndali ni a yeke sara aye ti ngangu na atâ Chrétien ayeke so wa? So e hinga ni apusu e ti duti na bango ndo wa na ndö ti azo so ayeke sara aye ti ngangu na e? (Jean 16:​2, 3).

² Azo ake e ndali ti so e yeke voro Jéhovah. Jésus atene mbeni tënë na ndö ti azo so ayeke sara aye ti ngangu na ambeni disciple ti lo nga même ala yeke fâ ala. Lo tene: “Ala hinga Babâ pëpe nga ala hinga mbi pëpe.” (Diko Jean 16:​2, 3.) Zo wa la ayeke pusu ambeni zo ti ke awakua ti Nzapa? A yeke Satan ndali ti so lo yeke “nzapa ti aye ti ngoi so”. (2 aCor. 4:​3, 4). Lo vuko lê ti azo si ala hinga tâ tënë na ndö ti Jéhovah ape. Nga lo sara si ala ke azo so ahinga Nzapa nga andoye lo (Jean 8:​42-44). Tongana e hinga so Satan la ayeke handa ala a-aidé e ti ke ala ape.

³ Bâ tapande ti Pavel,a so ayeke na yâ ti mbeni kodro so a kanga lege na kua ti e dä. So lo ngbâ ti fa tënë be-ta-zo, a gbu lo a pika lo sioni sioni nga a kanga lo gï lo oko teti anze mingi. Fadeso, lo tene: “Na mbi a yeke polele so Satan na asioni yingo ti lo la ayeke gi ti kanga lege na e ti voro Jéhovah. Na bango ni, mingi ti azo so ayeke sara kua na da ti kanga ake e ape. Ala yeke sara gï kua so a mû na ala.” Mbeni ita-koli na Croatie, so babâ na mama ti lo asara na lo asioni ye mingi ndali ti so lo yeke voro Jéhovah, atene: “Fadeso mbi comprendre so Satan la ayeke vrai wato ti mbi, me babâ na mama ti mbi ape.”—aÉph. 6:12.

4. Nyen la e peut ti manda na lege ti tapande ti Jésus na disciple Étienne? (Bâ nga foto.)

⁴ E yeke ke awato ti e ape. E peut ti sambela ndali ti ala (Mat. 5:44). Tapande ti Jésus na ti disciple Étienne apeut ti aidé e ti sara ni. Na ngoi so aturugu ti Rome apika Jésus na pointe na ndö ti keke ti pasi, lo sambela Jéhovah lo tene: “Babâ, mo pardonné ala.” (Luc 23:34). Jésus ahunda lani na Jéhovah ti pardonné aturugu so a mû ala ti fâ lo. Peut-être lo yeke pensé nga lani na gbâ ti azo so amokonzi nzapa so ayeke awato ti lo apusu ala ti hunda ti tene a fâ lo. Jésus abâ lani so azo so ahinga ape ye so ala yeke sara so. Legeoko nga, disciple Étienne ahunda lani Nzapa ti pardonné azo so angbâ ti fâ lo (Kus. 7:​58-60). Eskê Jéhovah akiri lani tënë na sambela ti Jésus nga na ti Étienne? En. Ambeni ngoi na pekoni, gbâ ti azo so aye lani ti tene a fâ Jésus achangé, ala mä na bê na lo nga ala wara batême (Kus. 2:​36-41). Nga Saul so amû lani maboko na azo so afâ Étienne aga mbeni Chrétien ambeni ngoi na pekoni na vundu asara lo mingi ndali ti ye so lo sara lani.—1 Tim. 1:13.

5. Nyen la e manda na lege ti ye so asi na César?

⁵ Jéhovah angbâ ti kiri tënë na sambela ti e so e tene ni ndali ti azo so ake e laso. Tapande ti César so ayeke na Venezuela afa ni. Babâ ti lo ake lani tâ tënë ngangu. César atene: “Mama ti mbi ayeke lani mbeni nzoni wali nga mbeni nzoni mama. Lakue lo zia aye ti yingo na kozo ndo nga lo sara sanka ti babâ ti mbi ape. Lo fa na mbi na aita ti mbi ti ne babâ ti e. Lo fa nga na e so e doit ti mä yanga ti lo na yâ ti aye kue. Me e yeke mä yanga ti lo ape gï tongana lo hunda na e ti sara mbeni ye so Jéhovah ake. Tongana angu ayeke hon, babâ ti lo akomanse ti changé. César atene: “Mbeni lâ, na peko ti so mbi sambela na bê ti mbi kue, mbi hunda ti manda Bible na lo. A yeke ngangu ti fa nzerengo terê ti mbi na ngoi so lo yeda.” A si na mbeni ngoi, babâ ti César awara batême. A yeke azo kue so ake e la ayeke changé ape, me tongana ti babâ ti César ambeni achangé na peko ti so ala bâ so e sara ye na ala na nengo zo nga e yeke na anzoni sarango ye. Ti bâ ambeni so achangé anzere na e mingi. E yeke ku kungo ti bâ tongana nyen la Jéhovah Nzapa so asara ye na nzoni bê nga “Juge ti azo ti sese kue” ayeke gboto mara ti azo tongaso na mbage ti lo.—Gen. 18:25.

6. Ti gue oko na Marc 13:​13, mbeni raison wa la ndali ni azo ake e?

⁶ Azo ake e ndali ti so e yeke mû maboko na Jésus. Jésus atene na atâ Chrétien so azo kue ayeke ke ala ndali ti “iri ti lo.” (Diko Marc 13:13.) Iri ti Jésus aye ti sara tënë ti nyen? Aye ti sara tënë ti asarango ye ti lo nga na droit so lo yeke na ni ti duti Gbia ti Royaume ti Nzapa. Azo ake e ndali ti so ala sara confiance na akota zo ti komande ti dunia so me ala sara confiance na Jésus ape so Jéhovah asoro lo ti komande dunia so. Me ala yeke ngbâ ande ti ke gï e ti gue na ni tongaso ape, ndali ti so Jésus aga Gbia ti Royaume ti Nzapa ngbene ye na 1914 awe. Na yâ ti ngoi kete, lo yeke ga ti futi agouvernement kue so ake komandema ti lo.

7-8. Mbeni raison nde wa la ndali ni azo ake e? (Jean 15:​18-20). (Bâ nga afoto.)

⁷ Azo ake e ndali ti so e sara ye pëpe tongana azo ti dunia ti Satan. Jésus atene so azo ayeke ke adisciple ti lo ndali ti so ala “yeke ti dunia so pëpe.” (Diko Jean 15:​18-20.) Legeoko tongana akozo Chrétien, azo ayeke sara aye ti ngangu na aita ti e na place ti kua wala na ekole ndali ti so ala yeke sara asioni ye ape wala ala yeke tene pëpe abuba tënë so azo ayeke tene na yâ ti dunia so (1 Pi. 4:​3, 4). Me, a nzere na e so ambeni zo so ake e akomanse ti changé fason so ala yeke bâ na e nga ala komanse ti ne e.

⁸ Bâ ye so asi na Ignacio so ayeke na Amérique centrale. Na ekole so lo yeke dä, mbeni zo so ayeke fa mbeti na lo ayeke he lo teti angu mingi ndali ti so lo sara ye ague oko na andia ti Jéhovah na ndö ti nzoni sarango ye. Me kozo ti tene lo wara diplôme ti lo wafango mbeti ni ahunda lo, lo sara tongana nyen la lo yeke sara ye alingbi na amama-ndia ti Bible atâa so amba ti lo ti ndo ni so asara tongaso ape. Ignacio afa na lo so lo bâ andia ti Nzapa tongana ye so ayeke bata lo. Lo tisa lo ti ga na bungbi, li ti lo akpe ti bâ so lo ga. So aita ayamba lo na ngia apika bê ti lo mingi, a sara si lo ngbâ ti ga na abungbi. Na pekoni, lo komanse ti manda Bible na a komanse ti sara nga aye ti ngangu na lo. Me lo ngbâ ti gue na li ni juska lo wara batême.

9-10. (a) Mbeni ye wa la asara si aChrétien ayeke nde na azo ti dunia ti Satan so? (b) Nyen la e peut ti manda na lege ti tapande ti bazengele Paul?

⁹ E yeke nga nde na azo ti dunia ti Satan so ndali ti so e yeke sara poroso ape nga e yeke mû mbage na bira ape (Jean 18:36). Ti gue oko na wango so ayeke na aRomain 13:​1, e yeke sara kue ti sara ye alingbi na ndia ti kodro. So e yeke aChrétien, e yeke mû mbage na aye ti poroso ape, so ti tene e yeke gi ti ga maire wala député wala président ape. Wala e yeke voté mbeni zo ti ga maire, wala député wala président ape. Ngbanga ti nyen? Ngbanga ti so e ye ti ngbâ be-ta-zo na Jéhovah nga na Royaume ti molenge ti lo Christ. A kanga gbâ ti aTémoin ti Jéhovah ndali ti so ala sara ye ti poroso ape. Atâa so a kanga aita, ala ngbâ ti fa tënë. Ala mû tapande ti bazengele Paul so a kanga lo na yâ ti da ti lo nga na yâ ti da ti kanga teti ambeni ngu (Kus. 24:27; 28:​16, 30). Lo ngbâ lani ti fa tënë na azo kue, na tapande na agarde ti da ti kanga ni, na agouverneur, na agbia na peut-être na akota zo ti yangbo ti togbia Néron.—Kus. 9:15.

¹⁰ Legeoko nga, aita so a kanga ala ayeke sara kue ti fa tënë na azo so aye ti mä ala, azo tongana ajuge, akota zo ti gouvernement na agarde so ayeke bata ala. Mbeni ita so asara kanga ngu omene ndali ti so lo sara ye ti poroso ape atene so lo bâ ngoi so lo sara na da ti kanga ni tongana mbeni punition ape me tongana mbeni kua so Jéhovah amû na lo kâ ti gi ataba ti lo. E yeke duti na ngia tongana Jéhovah asara kua na e ti fa nzoni tënë na mara ti ando tongaso (aCol. 4:3). Zia e bâ nga ambeni raison so ndali ni e peut ti duti na ngia même tongana azo ake e ndali ti so e sara na Jéhovah.

NDANI SO E PEUT TI DUTI NA NGIA TONGANA A KE E

11. Tongana nyen la sarango ye ti ngangu apeut ti kpengba mabe ti e? Mû mbeni tapande ti fa ni.

¹¹ So azo ti dunia so ake e asara si aprophétie ti Bible aga tâ tënë. Na yâ ti kozo prophétie so ayeke na yâ ti Bible, Jéhovah atene awe so Satan na azo so amû peko ti lo ayeke ke azo so aye lo nga asara na lo (Gen. 3:15). Fani mingi na yâ ti a-Évangile Jésus atene so a yeke ke azo so asara na Jéhovah (Mat. 10:22; Marc 13:​9-12; Luc 6:​22, 23; Jean 15:20). Ambeni zo so asû Bible atene nga tongaso (2 Tim. 3:12; Jacq. 1:2; 1 Pi. 4:​12-14; Jude 3, 17-19). Tongaso, li ti e ayeke kpe ape tongana a sara ye ti ngangu na e. Me e yeke na ngia so aprophétie ti Bible ayeke ga tâ tënë. Ye so adë bê ti e so e yeke sara na tâ Nzapa. Mbeni ita-wali, so ayeke na yâ ti mbeni kodro so a kanga lege na ambeni kua ti e dä, atene: “Na ngoi so mbi mû terê ti mbi na Jéhovah, mbi hinga so lawa lawa a yeke sara aye ti ngangu na mbi. Tongaso, mbeto ti atara asara mbi ape nga li ti mbi akpe ape tongana mbi wara atara.” Koli ti lo ayeke na popo ti azo so asara ye ti ngangu na lo. Lo sara ye na lo na lege ni ape, lo zö Bible ti lo nga na ambeti ti lo. Me ahon ti tene mbeto asara lo, mabe ti ita ti e ti wali so akiri akpengba (aHéb. 10:39). Lo tene: “Sarango ye ti ngangu ayeke mbeni prophétie, mbi hinga so a doit ti si. So a sara ye ti ngangu na mbi asara si mbi hinga so mbi yeke na yâ ti tâ bungbi ti vorongo Nzapa.”

12. Nyen la a aidé mbeni ita-koli ti gbu ngangu?

¹² Atâa so e yeke ku ti tene a sara ye ti ngangu na e, a peut ti duti ngangu na e ti gbu ngangu. Mbeni ita-koli asara tene na ndö ti ngoi so lo yeke na da ti kanga, lo tene: “Na ambeni ngoi, mbi découragé, mbi gi bê ti mbi nga mbi ye même ti toto.” Me nyen la amû maboko na lo? Lo tene: “Mbi yeke sambela lakue. Mbi yeke to nda ti lango ti mbi na sambela. Na yâ ti lango ni, tongana mbi tingbi na ambeni ye ti ngangu, mbi sambela. Na ngoi so a sara ye na mbi na lege ni ape si bê ti ason, mbi gue na yâ ti douche mbi sambela.” Ita ti e ti koli so agbu nga li na ndö ti tapande ti awakua ti Jéhovah ti ândö nga na ti laso so angbâ be-ta-zo. So lo sara tongaso a-aidé lo ti gbu ngangu na ti wara siriri so Jésus amû zendo ni na adisciple ti lo.—Jean 14:27; 16:33.

13. Nyen la apeut ti aidé e ti hon ndö ti kengo zo?

¹³ So e ye Jéhovah nga na amba ti e ayeke aidé e ti hon ndö ti kengo zo. Jésus aye Babâ ti lo na bê ti lo kue juska na nda ni. Jésus aye nga adisciple ti lo (Jean 13:1; 15:13). Na tapande ti Jésus, tongana e ye Jéhovah nga na aita ti e, ayeke aidé e ti hon ndö ti kengo zo. E yeke sara ni tongana nyen? Ti wara kiringo tënë ni, zia e bâ tapande ti bazengele Paul.

14. Nyen la amû lani maboko na Paul ti gbu ngangu même na ngoi so a gue ti fâ lo?

¹⁴ Kete kozo si a fâ Paul, lo tokua mbeti na kamarade ti lo Timothée, lo tene: “Nzapa amû na e yingo ti zo ti mbeto ape, me lo mû na e yingo ti ngangu nga na ti ndoye.” (2 Tim. 1:7). Paul aye ti tene nyen la? Lo ye ti tene so tongana e ye Jéhovah mingi apeut ti aidé e ti luti na gbele angangu kpale (2 Tim. 1:8). Kite ayeke dä ape so, so Paul aye Jéhovah mingi a-aidé lo ti luti na lê ti kuâ sân mbeto nga ti ngbâ ti voro lo.—Kus. 20:​22-24.

15. Tongana nyen la aita ayeke fa tâ ndoye na mbage ti amba ti ala na ngoi ti e laso? (Bâ nga foto.)

¹⁵ E ye biani aita ti e so ayeke gbu ngangu na ngoi so a sara ye ti ngangu na ala. Laso, ambeni ita ayeke zia fini ti ala na lê ti kpale ndali ti amba ti ala tongana ti so Aquila na Priscille asara lani ndali ti Paul (aRom. 16:​3, 4). Na tapande, na Russie, gbâ ti aita ayeke gue na da-ngbanga ti kpengba aita so agbu ala. Na ngoi so mbeni ita-wali so a gbu lo abâ gbâ ti aita so aga na peko ti lo na da-ngbanga ni, bê ti lo adë mingi na lo sara tënë sân mbeto. Tâ ndoye so aita ti lo afa na mbage ti lo akpengba lo na ngoi so lo yeke tâ na bezoin ni. E yeke na ngia mingi so e yeke na ndoye so ayeke na ngangu ahon kengo zo.

16. Ngbanga ti nyen la bazengele Pierre atene so azo so a sara ye ti ngangu na ala ndali ti so ala sara na Nzapa apeut ti duti na ngia? (1 Pierre 4:14).

¹⁶ E hinga so tongana e gbu ngangu na ngoi so a ke e, e yeke zia ngia na bê ti Nzapa. (Diko 1 Pierre 4:14.) Bazengele Pierre atene so azo so a sara ye ti ngangu na ala ndali ti so ala sara na Nzapa apeut ti duti na ngia. Nyen la apeut ti aidé ala? So a yeke sara ye ti ngangu na e afa so yingo ti Nzapa ‘ayeke duti na ndö ti e.’ Pierre ahinga ye so a iri ni ti zia ngia na bê ti Jéhovah nga ti gbu ngangu na yâ ti akpale. Kete na peko ti Pentecôte ti ngu 33, a tokua aturugu so asara kua na yâ ti temple ti gbu Pierre nga na ambeni bazengele ndali ti so ala fa tënë. Me Pierre agbu koko ti mabe ti lo sân mbeto (Kus. 5:​24-29). Atâa so a pika ala, lo na amba ti lo azia pëpe ti fa tënë. Me ala yeke na ngia ndali ti so ala “bâ so ala lingbi ti tene a sara ye ti kamene na ala ndali ti iri ti Jésus.” E nga kue e peut ti duti na ngia tongana e wara akpale.—Kus. 5:​40-42.

17. Jésus atene nyen na adisciple ti lo na bï so na ndade ni a fâ lo?

¹⁷ Na bï so na ndade ni a fâ Jésus, lo tene na adisciple ti lo, lo tene: “Zo so andoye mbi, Babâ ti mbi ayeke ndoye lo na mbi yeke ndoye lo.” (Jean 14:21). E yeke ku kungo ngoi so zo oko ayeke ke e ape me azo ayeke ye e ndali ti so e sara na Jéhovah (2 aThes. 1:​6-8). Juska ti si na ngoi ni so zia e leke na bê ti e ti girisa ape so e yeke na araison mingi ti duti na ngia même tongana azo ake e.