Sara ye sân mbeto nga duti be-ta-zo tongana Bénaïah

Bénaïah ayeke lani mbeni ngangu turugu so asara kua na gbe ti Gbia David nga na Gbia Salomon. So lo yeke lani molenge ti mbeni prêtre, ti tâ tënë ni lo doit fade ti gbu ye ti bira ape, me mo lo mû mbage mingi na yâ ti bira ti Jéhovah. Lo sara ye na mbeto oko ape. Na tapande, lo fâ mbeni bamara na yâ ti mbeni dû ti ngu nga lo fâ mbeni yongoro turugu. David asara confiance na Bénaïah mingi, tongaso lo zia lo mokonzi ti agarde ti lo.—2 Sam. 23:​20-23.

Bénaïah angbâ be-ta-zo na David na ngoi so Absalom na Adonijah aye ti mû mbata ti gbia na ngangu na tïtî David (2 Sam. 8:18; 15:18; 1 aGbia 1:8). Na ngoi so David aga mbakoro, Bénaïah amû nga maboko ti tene a zia Salomon gbia (1 aGbia 1:​32-40). Biani, Bénaïah ayeke be-ta-zo na Jéhovah nga lo yeke be-ta-zo na azo so Jéhovah asoro ala même na ngoi so ambeni zo ayeke be-ta-zo ape.

E nga kue e bezoin ti sara ye sân mbeto si e tiri na angangu wato ti e, Satan na azo so amû peko ti lo. E doit nga ti leke na bê ti e ti ngbâ ti vivre ague oko na andia ti Jéhovah na ndö ti nzoni sarango ye (aÉph. 6:11; 1 Pi. 5:​8, 9). Même tongana ambeni zo asoro ti zia Jéhovah, e yeke ngbâ be-ta-zo na lo na hingango so lo yeke futa e.—2 Sam. 22:26.