Lege so Jéhovah ayeke aidé e ti gbu ngangu

1. Ngbanga ti nyen la e bezoin ti gbu ngangu? Zo wa la ayeke aidé e ti gbu ngangu? (1 Pierre 5:10).

NA LÂ ti nda ni so ayeke ngangu mingi so, awakua ti Jéhovah abezoin ti gbu ngangu. Terê ti ambeni ason a ninga mingi awe. Ambeni ayeke bâ pasi ndali ti mbeni zo ti ala so ala ye so akui. Azo ti sewa ti ambeni wala azo ti gouvernement ayeke sara ye ti ngangu na ala (Mat. 10:​18, 36, 37). Hinga na bê ti mo kue so atâa kpale wa la mo yeke tiri na ni, Jéhovah apeut ti aidé mo ti gbu ngangu.—Diko 1 Pierre 5:10.

2. Nyen la asara si e peut ti gbu ngangu?

² Ti gbu ngangu aye ti tene ti ngbâ be-ta-zo na Jéhovah nga ti sara na lo na ngia même tongana e yeke na akpale, a sara ye ti ngangu na e wala bê ti e apusu e ti sara siokpari. Ti gbu ngangu, e bezoin nga ti duti sûr so aye ayeke ga ande nzoni. E peut ti gbu ngangu gï ndali ti so Jéhovah amû na e “ngangu so ahon ti so zo ayeke na ni”. Sân aide ti lo e peut ti gbu ngangu ape (2 aCor. 4:7). Na yâ ti article so, e yeke bâ aye osio so Jéhovah amû na e ti aidé e ti gbu ngangu. E yeke bâ nga tongana nyen la e peut ti bâ nzoni na lege ti aye so oko na oko kue.

SAMBELA

3. Ngbanga ti nyen la e peut ti tene so sambela ayeke mbeni miracle?

³ Jéhovah amû na e mbeni ye so ayeke pendere mingi so apeut ti aidé e ti gbu ngangu. Lo sara si e peut ti sara lisoro na lo atâa so e yeke awasiokpari (aHéb. 4:16). Gbu li kete si: E peut ti sambela Jéhovah na ngoi kue nga na ndö ti aye kue. Lo peut ti mä e atâa yanga ti kodro wa la e tene wala ndo wa la e yeke dä, même tongana e yeke na ndo so azo ayeke dä ape wala na da ti kanga (Jonas 2:​1, 2; Kus. 16:​25, 26). Tongana e gi bê ti e mingi na e hinga tënë ti tene na Jéhovah ape, lo hinga lakue tënë so e ye ti tene (aRom. 8:​26, 27). Sambela ayeke biani mbeni miracle.

4. Ngbanga ti nyen la e peut ti tene so tongana e sambela Jéhovah ti tene lo aidé e ti gbu ngangu ague oko na ye so bê ti lo aye?

⁴ Na yâ ti Bible, Jéhovah adë bê ti e atene “atâa ye wa la e hunda, tongana a gue oko na ye so bê ti lo aye, lo yeke mä e.” (1 Jean 5:14). Eskê e peut ti hunda na Jéhovah ti aidé e ti gbu ngangu? En! A gue oko na ye so bê ti lo aye. E hinga ni tongana nyen? Na ngoi so e yeke gbu ngangu na yâ ti akpale, e mû lege na Jéhovah ti kiri tënë na Satan Zabolo so agi yanga ti lo (aProv. 27:11). Bible atene nga so Jéhovah aye “ti mû ngangu ti lo ti mû maboko na azo so azia bê ti ala kue na lo.” (2 Chron. 16:9). Tongaso, e peut ti hinga na bê ti e kue so Jéhovah ayeke na ngangu nga na nzara ti aidé e ti gbu ngangu.—És. 30:18; 41:10; Luc 11:13.

5. Tongana nyen la sambela apeut ti aidé e ti duti na siriri ti bê? (Ésaïe 26:3).

⁵ Bible atene so tongana e sambela Jéhovah na bê ti e kue na ndö ti agingo bê ti e, ‘siriri ti Nzapa so ahon ndö ti bibe kue ayeke bata bê ti e nga na lege ti hingango ndo ti e na lege ti Christ Jésus.’ (aPhil. 4:7). Tënë so aye ti tene nyen? Azo so ayeke voro Jéhovah ape ayeke na akpale na ala yeke sara aye nde nde ti gi ti duti na siriri ti bê. Na tapande, ambeni zo ayeke na mbeni fason ti gbungo li so na lege ni ala yeke zi apensé kue na li ti ala, même agingo bê ti ala. Ambeni kode ti gbungo li ti ala apeut ti sara si mbeni ye ti batango bibe ti ala ayeke dä ape na apeut même ti zia ala na gbe ti ngangu ti asioni yingo. (Bâ Matthieu 12:​43-45.) Siriri so e wara tongana e sambela Jéhovah ayeke nzoni mingi ahon siriri so zo apeut ti wara na lege ti gbungo li tongaso. Tongana e sambela Jéhovah e fa so e zia bê ti e kue na lo na lo yeke sara si e “duti lakue na siriri”. (Diko Ésaïe 26:3.) Mbeni lege so Jéhovah amû na e siriri so ayeke ti aidé e ti dabe ti e na atâ tënë so adë bê ti zo so e manda na yâ ti Bible. Atâ tënë so amû na e siriri ti bê ndali ti so e hinga so Jéhovah aye e nga lo ye ti tene ye so e sara aga nzoni.—Ps. 62:​1, 2.

6. Tongana nyen la mo peut ti bâ nzoni mingi na lege ti asambela ti mo? (Bâ nga foto.)

⁶ Ye so mo peut ti sara. Na ngoi so mo yeke gbu ngangu na yâ ti kpale, ‘bi aye so ane mo na ndö ti Jéhovah’ na hunda na lo ti mû na mo siriri (Ps. 55:22). Hunda nga na lo ti mû na mo ndara so mo bezoin ni tongaso si mo peut ti gbu lê ni na yâ ti kpale ni (aProv. 2:​10, 11). Nga girisa ape ti kiri singila na Jéhovah na yâ ti asambela ti mo (aPhil. 4:6). Gbu li na ndö ti aye so Jéhovah ayeke sara ti aidé mo ti gbu ngangu na kiri singila na lo ndali ti mungo maboko ti lo. Zia pëpe si kpale ti mo akanga lê ti mo ti bâ anzoni ye so Jéhovah asara ndali ti mo.—Ps. 16:​5, 6.

BIBLE

7. Tongana nyen la mandango Bible apeut ti aidé e ti gbu ngangu?

⁷ Jéhovah amû na e Bible ti aidé e ti gbu ngangu. Aversê mingi ti Bible afa na e so Jéhovah ayeke aidé e biani. Bâ mbeni tapande ni. Matthieu 6:8 atene: “Babâ ti ala ahinga aye so ala yeke na bezoin ni même kozoni si ala hunda ni na lo.” Jésus la atene atënë so na lo hinga Jéhovah nzoni mingi ahon azo kue. Tongaso, e peut ti duti sûr so na ngoi so e yeke na yâ ti kpale, Jéhovah ahinga ye so e bezoin ni nga lo yeke aidé e. Gbâ ti mara ti apensé tongaso, so apeut ti mû na e ngangu ti ngbâ ti gbu ngangu, ayeke na yâ ti Bible.—Ps. 94:19.

8. (a) Fa mbeni mama-ndia ti Bible so apeut ti aidé e ti gbu ngangu. (b) Nyen la apeut ti aidé e ti dabe ti e na amama-ndia ti Bible na ngoi so e bezoin ni?

⁸ Amama-ndia ti Bible apeut ti aidé e ti gbu ngangu. Amama-ndia so apeut ti aidé e ti wara ndara so apeut ti aidé e ti mû anzoni desizion (aProv. 2:​6, 7). Na tapande, Bible atene na e ti zia ti gi bê ti e na ndö ti ye so apeut ti si kekereke, me ti sara confiance na Jéhovah lâ oko oko (Mat. 6:34). Tongana lakue e yeke diko Bible nga e yeke gbu li na ndö ni, a yeke duti ande ngangu na e ape ti dabe ti e na amama-ndia so apeut ti aidé e na ngoi so e bezoin ni.

9. Tongana nyen la ambaï ti Bible ayeke pusu e ti sara confiance mingi na mungo maboko ti Jéhovah?

⁹ Na yâ ti Bible, e yeke wara nga mbaï ti azo so ayeke tongana e so asara confiance na Jéhovah na lo aidé ala (aHéb. 11:​32-34; Jacq. 5:17). Tongana e gbu li na ndö ti ambaï so, e yeke sara confiance mingi na Jéhovah so ayeke “ndo so e kpe dä ti bata terê ti e nga na ngangu ti e; na ngoi ti vundu, a yeke ngangu pëpe ti kpe na mbage ti lo ti tene lo mû maboko na e.” (Ps. 46:1). Tongana e gbu li na ndö ti tapande ti awakua ti Jéhovah ti ândö so ayeke na mabe na lo nga ala ngbâ ti sara na lo na yâ ti angoi ti kpale, a yeke kpengba e ti sara ye tongana ala.—Jacq. 5:​10, 11.

10. Tongana nyen la mo peut ti bâ nzoni mingi na lege ti Bible?

¹⁰ Ye so mo peut ti sara. Diko Bible lâ oko oko nga sara molongo ti aversê so mo bâ so ayeke aidé mo. Aita mingi ayeke diko versê ti lango ni nga na commentaire ni lakue na ndapre. A sara si ala wara mbeni pensé so ala peut ti gbu li ti ala na ndö ni na yâ ti lango ni kue. Mbeni ita-wali so iri ti lo ayeke Mariea abâ so tënë so ayeke tâ tënë na ngoi so a wara cancer na terê ti babâ na mama ti lo. Nyen la a-aidé lo ti gbu ngangu na ngoi so lo yeke bâ lege ti ala na andangba nze ti fini ti ala? Lo tene: “Lakue na ndapre, mbi yeke diko versê ti lango ni na yâ ti Gingo nda ti Tënë ti Nzapa lâ oko oko na mbi yeke gbu li na ndö ni. So mbi sara tongaso lakue, mbi yôro na yâ ti li ti mbi mbeni versê so a-aidé mbi ti zia li ti mbi na ndö ti mbeni ye so ayeke kota ahon mbi nga na kpale so mbi yeke gbu ngangu na yâ ni.”—Ps. 61:2.

AMBA TI E ACHRÉTIEN

11. Ngbanga ti nyen la ti hinga so gï e oko la e yeke gbu ngangu na yâ ti akpale ape akpengba e?

¹¹ Jéhovah amû na e sewa ti e ti aita ti aidé e ti gbu ngangu. Gï ti hinga so “a-oko pasi so ayeke si nga na bungbi ti [e] ti aita kue na yâ ti dunia so” adë bê ti e so gï e oko la e yeke na yâ ti kpale ape (1 Pi. 5:9). E peut ti duti sûr so atâa kpale wa la e yeke na yâ ni, ambeni ita awara mara ni nga ala gbu ngangu dä. So aye ti tene e nga kue e peut ti gbu ngangu.—Kus. 14:22.

12. Tongana nyen la aita apeut ti aidé e? Nyen la e peut ti sara na ala? (2 aCorinthien 1:​3, 4).

¹² Aita ti e apeut ti kpengba e ti gbu ngangu. Bazengele Paul abâ lani so tënë so ayeke tâ tënë. Fani mingi lo kiri singila na aita so a-aidé lo na ngoi so lo sara kanga na da ti lo, lo di même iri ti ala. Ala dë bê ti lo, ala kpengba lo nga ala sara ambeni ye ti mû maboko na lo (aPhil. 2:​25, 29, 30; aCol. 4:​10, 11). Mara ti ye so apeut ti si nga na e laso. Na ngoi so e bezoin mungo maboko ti gbu ngangu, aita ti e ayeke dä; nga na ngoi so ala bezoin mungo maboko, e yeke dä.—Diko 2 aCorinthien 1:​3, 4.

13. Nyen la a-aidé mbeni ita-wali so iri ti lo ayeke Maya ti gbu ngangu?

¹³ Sewa ti aita a-aidé lani mingi mbeni ita-wali na Russie so iri ti lo ayeke Maya. Na ngu 2020, a fouillé yâ ti da ti lo na pekoni a gue na lo na gbele ngbanga ndali ti so lo fa tënë. Lo tene: “Na ngoi ni so, mbi fatigué nga vundu asara mbi. Me aita airi mbi, ala tokua amessage nga na alettre na mbi ti fa na mbi so ala ye mbi mingi. Mbi hinga lani awe so mbi yeke na yâ ti mbeni kota sewa ti aita so aye mbi. Me ngbene ye na ngu 2020, mbi bâ na lê ti mbi tongana nyen la aita aye mbi.”

14. Tongana nyen la e peut ti bâ nzoni na lege ti mungo maboko ti amba ti e aChrétien na ngoi so e yeke gbu ngangu? (Bâ nga foto.)

¹⁴ Ye so mo peut ti sara. Tongana mo yeke gbu ngangu na yâ ti mbeni kpale, ngbâ nduru na aita. Sara mbeto ape ti hunda a-ancien ti aidé mo. Ala peut ti duti tongana mbeni “kpangba ndali ti pupu nga tongana ndo ti kpe dä ti bata terê ndali ti ngu-nzapa so apika na kota pupu.” (És. 32:​2, kete tënë na gbe ni). Girisa nga ape so amba ti mo aChrétien nga kue ayeke gbu ngangu na yâ ti akpale. Tongaso, tongana mo sara mbeni nzoni ye na mbeni ita so abezoin ni, mo yeke duti na ngia nga a yeke aidé mo ti gbu ngangu na yâ ti kpale ti mo.—Kus. 20:35.

BEKU TI E

15. (a) Tongana nyen la beku ti Jésus a-aidé lo? (b) Tongana nyen la beku ti e ayeke aidé e? (aHébreu 12:2).

¹⁵ Jéhovah amû na e mbeni beku so aluti nzoni ti aidé e ti gbu ngangu (aRom. 15:13). Girisa ape so Jésus agbu lani ngangu na yâ ti lango so ayeke ngangu na lo mingi na ndö ti sese ndali ti beku so lo yeke ni. (Diko aHébreu 12:2.) Jésus ahinga so tongana lo duti be-ta-zo, a yeke zi zonga so a bi na ndö ti iri ti Jéhovah. Jésus aku lani kungo ti kiri na terê ti Babâ ti lo nga, na peko ti ambeni ngoi, ti sara kua maboko na maboko na aita ti lo na yâ ti Royaume ti yayu. Legeoko nga, beku so e yeke na ni ti ngbâ na fini lakue lakue na yâ ti fini dunia ti Nzapa a-aidé e ti gbu ngangu na yâ ti akpale kue so e wara na yâ ti dunia ti Satan.

16. Tongana nyen la beku a-aidé mbeni ita-wali ti gbu ngangu? Nyen la mo manda na lege ti atënë so lo tene?

¹⁶ Bâ tongana nyen la beku so e yeke na ni ti vivre na yâ ti fini dunia a-aidé mbeni ita-wali na Russie, so iri ti lo ayeke Alla, so a gbu koli ti lo nga a kanga lo ti ku na ngoi so a yeke gue na lo na gbele ngbanga. Na ngoi so ye so asi, Alla atene: “So mbi sambela nga mbi gbu li na ndö ti beku ti mbi ti kekereke a-aidé mbi ti découragé kue ape. Mbi hinga so na peko ti akpale so anzoni ye ayeke ga. Jéhovah ayeke sö benda na ndö ti awato ti e nga lo yeke futa e.”

17. Tongana nyen la e peut ti kiri singila na Jéhovah ndali ti beku so lo mû na e? (Bâ nga foto.)

¹⁷ Ye so mo peut ti sara. Mû ngoi ti gbu li na ndö ti pendere gigi ti kekereke so Jéhovah amû zendo ni. Bâ terê ti mo na yâ ti fini dunia nga imaginé atufa so mo yeke wara ande. A yeke sara si mo bâ akpale so mo yeke na yâ ni tongana “ye so aninga pëpe nga ye so ayapu”. (2 aCor. 4:17). Nga, fa tënë na azo alingbi na dutingo ti mo. Gbu li na ndö ti azo so avoro Jéhovah ape. Ala nga ala yeke na gbâ ti akpale, me ala hinga tënë na ndö ti apendere zendo so Jéhovah amû na e ape. Mo peut ti zia na yâ ti ala nzara ti hinga ye mingi na ndö ti Royaume ti Jéhovah nga na azendo so lo mû même tongana mo tene gï mbeni nduru tënë.

18. Ngbanga ti nyen la e peut ti sara confiance na azendo ti Jéhovah?

¹⁸ Na peko ti so Job agbu ngangu na yâ ti gbâ ti angangu kpale, lo tene na Jéhovah, lo tene: “Fadeso, mbi hinga so mo lingbi ti sara ye kue, nga mbeni ye so mo pensé ti sara si akara mo ayeke dä pëpe.” (Job 42:2). Job ahinga lani so ye oko apeut ti kanga lege na Jéhovah ape ti sara ye so lo leke na bê ti lo ti sara. So e hinga ni apeut ti kpengba e ti gbu ngangu. Na tapande, imaginé mbeni wali so terê ti lo ason aninga. Lo découragé ndali ti so lo bâ gbâ ti adocteur me zo oko asava lo ape. Me lo wara mbeni nzoni docteur so afa na lo ye so asara si lo tï kobela nga lo fa na lo tongana nyen la lo peut ti aidé lo ti wara sava. Hio bê ti lo adë atâa so lo doit ti ku mbeni ngoi si terê ti lo akaï. Fadeso a yeke ngangu na lo ape ti kanga bê na yâ ti kobela ni ndali ti so lo hinga so lo yeke wara sava. Legeoko nga, e peut ti ngbâ ti gbu ngangu ndali ti so e hinga na bê ti e kue so zendo ti Nzapa na ndö ti Paradis ayeke ga ande tâ tënë.

19. Nyen la e doit ti sara ti gbu ngangu?

¹⁹ Tongana ti so e bâ, Jéhovah ayeke aidé e ti gbu ngangu na yâ ti akpale ti e na lege ti sambela, Bible, amba ti e aChrétien nga na beku ti e. Tongana e sara kue ti bâ nzoni na lege ti aye so, Jéhovah ayeke aidé e atâa kpale wa la e wara. E yeke ngbâ ti gbu ngangu juska na ngoi so dunia ti Satan nga na pasi kue ayeke hunzi.—aPhil. 4:13.