Sarango ye ti ngangu na zo ayeke leke akpale ape

Laso, mingi ti azo apensé so sarango ye ti ngangu na zo la ayeke leke akpale. Me, mara ti apensé ni so ague nde na afango ye ti Jésus Christ nga na tapande so lo zia. Bâ ambeni tënë so lo tene nga na aye so lo sara.

Tënë so Jésus atene

Na yâ ti fango ye ti Jésus na ndö ti hoto, lo fa so ngonzo nga na sarango ye ti ngangu na zo ayeke leke akpale ape. Bâ ambeni tapande ni.

• “Ye kue so ala ye azo asara na ala, ala sara ni na azo ni nga.” (Matthieu 7:12; Luc 6:31). Wango ni so a-encouragé e ti sara ye na azo tongana ti so e ye ti tene ala asara na e.a Zo oko aye ti tene a sara ye ti ngangu na lo ape. Ye so ayeke pusu e ti sara ye na azo kue na nengo zo nga na nzoni bê, atâa e na azo ni e mä terê ape.

• “Zo so apika ngbangba ti mo ti mbage ti koli, mo dengi na lo ti mbage ti wali ni nga.” (Matthieu 5:38, 39; Luc 6:29). Jésus aye lani ti tene ape so azo adoit ti sara ye ti sioni na amba ti ala. Me, lo ye ti leke mbeni bango ndo so ayeke na lege ni ape, so ambeni kota zo ti bungbi ti Nzapa ayeke na ni so ala fa so ayeke na lege ni ti kiri na peko ti ye ti sioni so a sara na zo. Lo tene lani na adisciple ti lo ti kiri pëpe peko ti ye ti sioni so a sara na ala, me ala doit ti kiri tënë na azo yeke na ngoi so a sara ye na ala na lege ni ape.b

• “Ala ngbâ ti ndoye awato ti ala.” (Matthieu 5:43, 44; Luc 6:27). Jésus afa so e doit ti sara ye ti nzoni na azo so ake e wala asara ye na e na lege ni ape. Lo ye ti tene e sara pëpe mara ti ye ti sioni so azo ni asara.c Me, tongana e sara ye ti nzoni na azo so ake e, a peut ti sara si ngonzo ti ala adë nga a yeke pusu ala ti sara ye ti nzoni na e.

Ye so Jésus asara lani nga na ye so lo yeke sara ande

Jésus afa lani so sarango ye ti ngangu na zo ayeke leke akpale ape, nga lo fa ni na lege ti aye so lo sara. Na temps so a gbu lani Jésus, mbeni disciple ti lo aye ti défendre lo na sarango ye ti ngangu, me Jésus atene: “Kiri na épée ti mo na place ni, ndali ti so azo kue so amû épée ayeke kui ande na lege ti épée.” (Matthieu 26:52). Jésus afa lani so lo ye awato ti lo na lege so lo pardonné azo so asara ye na lo na lege ni ape, nga lo sambela même ndali ti ala.—Luc 23:33, 34; 1 Pierre 2:23.

Bible atene so Jésus, so ayeke Mokonzi ti siriri, ayeke hunzi ande sarango ye ti ngangu na zo (Ésaïe 9:6, 7). Ti hinga ye mingi na ndö ti pendere gigi ti kekereke so, diko article “Tongana nyen la bira nga na sarango ye ti ngangu na zo ayeke hunzi ande?.”