Siriri ayeke mû ande ndö ti sese kue

Zo kue aye ti vivre na mbeni ndo so siriri ayeke dä. Na yâ ti mbaï ti azo, azo so ayeke komande ayeke sara a-effort ti sara si siriri aduti dä. Parfois, aye so ala yeke sara so aga na aye ti nzoni gï teti kete ngoi. Me ye ti mawa ni ayeke so, abira akiri alondo lakue. Eskê siriri ayeke mû ande ndö ti sese kue? En. Bâ aye so e peut ti manda na lege ti afango ye ti Jésus.

Ye so Jésus ayeke sara ande

Bible afa so na yâ ti kete ngoi, Jésus ayeke sara ande si siriri amû ndö ti sese kue.

• ‘A yeke iri Jésus, Mokonzi ti siriri. Komandema ti lo so ayeke mû gï ndo ti gue na ni nga na siriri ayeke hunzi ande pëpe.’ (Ésaïe 9:6, 7). So Jésus ayeke Gbia ti Royaume ti Nzapa, lo yeke sara ande si siriri angbâ lakue lakue.

• “Lo yeke zi awayere so atoto ti tene a mû maboko na ala, nga . . . zo kue so zo ti mungo maboko na lo ayeke dä pëpe.” (Psaume 72:12-14). Jésus ayeke sara ande kua na ngangu ti lo ti sara si tâ sarango ye na lege ni aduti dä. Ye so asara si sarango ye ti ngangu na zo, pasi nga na bira ayeke hunzi ande.

• “Mara ayeke mû épée na terê ti mbeni mara pëpe, nga ala yeke manda sarango bira encore ape.” (Ésaïe 2:4). Na gbe ti komandema ti Jésus, azo kue ayeke manda ande ti duti na siriri sân ti sara bira.

Ti hinga tongana nyen la Jésus ayeke sara ande si siriri amû ndö ti sese kue nga na ye so mo peut ti sara ti duti dä, bâ nduru vidéo Royaume ti Nzapa ayeke nyen?

Ye so Jésus afa lani

Laso nga kue, afango ye ti Jésus a-aidé azo million mingi ti duti na siriri. Na yâ ti afango ye ti Jésus na ndö ti Hoto, lo fa lani akpengba tâ tënë so apeut ti aidé azo ti duti na siriri na amba ti ala. Bâ ambeni tapande ni.

• “Ngia ayeke na ala so asara si siriri amaï.” (Matthieu 5:9). Jésus a-encouragé lani adisciple ti lo ti sara bira ape, me ti maï siriri.

• “Leke tënë na ita ti mo kozoni, na pekoni ga, mo mû matabisi ti mo ni.” (Matthieu 5:23, 24). Jésus ahunda lani na azo so ayeke mä lo ti leke tënë hio na popo ti ala. Lo fa lani so tongana azo aleke tënë na popo ti ala ayeke sara si ala duti na nzoni songo na Nzapa.

• “Ala zia ti fâ ngbanga na li ti azo si a fâ ngbanga na li ti ala pëpe.” (Matthieu 7:1). Jésus amû lani wango na adisciple ti lo na ndö ti fango ngbanga na li ti azo nga na sarango ye ti handango lê ti azo so apeut ti ga na kangbi. Lo fa lani na ala ti “ngbâ ti pardonné azo” ahon ti tene ala bâ gï afaute ti amba ti ala.—Luc 6:37.

Na yâ ti dunia kue, azo mingi asara ye alingbi na afango ye ti Jésus so awe. Même na ando so sarango ye ti ngangu na zo nga na kangbi ayeke dä mingi, azo amanda ti leke akpale na popo ti ala na yâ ti siriri, ti pardonné azo nga ti sara ye na azo na ndoye, même si azo ni asara ye na ala na lege ni ape.

Ti hinga tongana nyen la afango ye ti Jésus a-aidé ambeni zo ti duti na siriri, diko article “Gi ti duti na siriri atâa so bira nga na sarango ye ti ngangu na zo amû ndo.”