Aye wa la mo peut ti sara ti duti na ngia tongana mo wara akpale? Bible atene nyen na ndö ni?

Na ambeni ngoi, e peut ti contrôlé aye so asi na e ape. Me, mingi ni, ngia ti e adépend na aye so ayeke si na e ape. Bible atene so atâa azo awara akpale, ‘bê ti ala ayeke na ngia.’ (aProverbe 15:15, Tënë ti Nzapa, Kozo Mbouki). Nyen la e peut ti sara ti duti na ngia? Bâ tongana nyen la awango ti Bible apeut ti aidé mo.

Hon ndö ti gingo bê

Bible atene: “Gingo bê asara si bê ti zo anze, me nzoni tënë asara si bê ti lo akiri awara ngia.”—aProverbe 12:25.

• Bible apeut ti aidé mo ti tene mo gi bê ti mo mingi ape. Ti hinga ye na ndö ni, diko article “D’après la Bible l’inquiétude.”

Hon ndö ti bibe ti dutingo mo oko

Bible atene: “Tâ kamarade aye mba ti lo na ngoi kue nga lo yeke mbeni ita so a dü lo ndali ti angoi ti vundu.”—aProverbe 17:17.

• A yeke wara na yâ ti Bible awango so apeut ti aidé mo ti hon ndö ti bibe ti dutingo mo oko, tongaso si mo kpengba songo ti mo na akamarade ti mo. Diko article “Tongana nyen la Bible apeut ti aidé mo ti sara kamarade na azo si mo hon ndö ti kpale ti dutingo zo lo oko?.”

Gi ti ndoye Nzapa nga na amba ti mo

Bible atene: “Mo doit ti ndoye Jéhovah Nzapa ti mo na bê ti mo kue, na âme ti mo kue nga na bibe ti mo kue. . . . Mo doit ti ndoye mba ti mo tongana mo wani.”a—Matthieu 22:37-39.

• Sambela apeut ti aidé e ti kiri ti ndoye Nzapa mingi. Ti hinga ye mingi na ndö ni, diko article “Eskê Nzapa ayeke mä asambela ti e?”

• E yeke sara ye na ndoye na mbage ti amba ti e, tongana e sara ye alingbi na tënë so Jésus atene na ndö ti fason so e yeke sara ye na mbage ti azo. Gi ti hinga tënë mingi na ndö ni na yâ ti article “Jésus atene e sara ye na azo tongana nyen?”

Peut-être mo ye ti gi ti hinga ye mingi na ndö ti Bible. Tongana ayeke tongaso, e wa mo ti yeda ti tene e manda Bible na mo senge senge.