Mbi zia si Jéhovah aleke mbi

Mbi bâ gbâ ti aye, me ye so apika bê ti mbi mingi ayeke azo. Aita-koli nga na aita-wali so ade maseka ayeke sara a-oko kua lakue. Azo abâ ala ape, me ala yeke na ngia. Tapande ti ala afa na mbi ye so aye ti tene ti sara na Nzapa na sarango terê kete.

Teti angu mingi Jéhovah a-aidé mbi ti ga mbeni nzoni wakua ti lo. Me zia mbi fa na ala kozoni tongana nyen la mbi gi tâ tënë na ngoi so mbi yeke lani Bouddhiste.

MBI GI NZAPA NA KETE TI MBI

A dü mbi na Chicago, na Illinois, na États-Unis nga mbi kono kâ. Mbi yeke yaya ti amolenge osio. Babâ na mama ti mbi alondo na Japon aga na Chicago ndali ti so ala pensé so kâ ala yeke vivre nzoni. Ala ye ti tene amolenge ti ala amanda mbeti nzoni nga ala ga zo.

Tënë ti Bouddha agbu bê ti babâ na mama ti mbi mingi. Temple ti Bouddha ayeke lani na yâ ti da so mama ti mbi akono dä. Babâ ti lo nga na aita ti lo ti koli use ayeke lani aprêtre ti Bouddha. Vorongo nzapa ti Bouddha ayeke lani kota ye mingi na yâ ti sewa ti e na ngoi so mbi de kete. Kozo ye so mbi yeke sara lani na peko ti so mbi londo na ekole mbi kiri ayeke ti zö dukane nga ti mû loso na ngu na yanda ti e ti Bouddha. Na adimanche e yeke gue lani na temple ti Bouddha, kâ e yeke he bia na mara yanda ti Bouddha so e yeke na ni me ti so ni so ayeke kota ni nga asara ni na lor.

Na ngoi so mbi yeke lani na ngu mbasambala, mbi dabe ti mbi so mbi yeke bâ yanda so ayeke na yâ ti da ti e na mbi yeke hunda terê ti mbi, mbi tene: ‘Nyen la ayeke si na mbi tongana mbi kui?’ Vorongo nzapa ti Bouddha afa na mbi so tongana mbi kui, mbi yeke ga mbeni yingo. Tongaso, mbi bâ so mbeni lâ fini ti mbi ayeke hunzi. Même tongana mbi ga mbeni yingo, gigi ayeke nzere na mbi ape tongana ti so mbi yeke zo. Ye so asara mbi mawa mingi. Hio mbi bâ so mbeni zo ti aidé mbi ayeke dä ape.

Na ngoi so mbi yeke na ngu 15 tongaso, mbi komanse ti bâ so aye so e yeke sara ti voro na Bouddha ndani ayeke dä ape. Mbi bâ so mbeni ye amanke na yâ ti fini ti mbi (Mat. 5:3). Na bê ti mbi kâ, mbi hinga so Nzapa so ayeke na fini so ayeke na ngangu mingi ayeke dä. Mbi ye ti hinga lo. Tongaso, mbi pensé so Bible apeut ti kiri tënë na ahunda so mbi yeke na ni. Ni la mbi vo Bible ti Roi Jacques so mbeni zo asara kua na ni awe na place ti mbeni matanga so a sara ndali ti Bouddha. Place so a doit ti wara Bible dä ape.

Na ngoi so mbi yeke lani na ngu 17, mbeni ita-koli so iri ti lo ayeke Wilson Bashou aga na terê ti mbi na ngoi so mbi yeke fono na mbo ti mbi. Lo hunda mbi lo tene: “Eskê mo hinga aye so Nzapa atene lo yeke sara ande kekereke?” Hunda so asara si e sara lisoro mingi na ndö ti Bible. Wilson adiko na mbi Apocalypse 17:1 na lo hunda mbi, lo tene: “‘Angu mingi mingi’ so wali-ndumba so aduti na ndö ni so aye ti sara tënë ti nyen?” Mbi hinga lani ye oko dä ape. Lo fa na mbi versê 15 so atene angu ni aye ti sara tënë ti azo. Li ti mbi akpe ti hinga so aTémoin ti Jéhovah ayeke sara kua na Bible ti aidé ala ti comprendre ambage ti Bible so ayeke ngangu ti mä yâ ni. Na hunzingo ti lisoro ni, Wilson amû na mbi buku Ta Tene so aga na Zo Fini ti La Koue La Koue. Kete buku so ayeke bleu so achangé fini ti mbi.

Lango 10 na pekoni, mbi gue na bungbi ti kozoni na Da ti Royaume. Mbi yeke girisa lâ oko ape yambango so azo ayamba mbi na ngia. Ti londo na ngoi ni so ti ga na ni mbi yeke gue lakue na abungbi. Na pekoni, Wilson akomanse ti manda Bible na mbi. A nzere na mbi mingi ti manda gbâ ti aye. A sara si na ambeni ngoi, e manda ye juska asara l’heure miombe na yâ ti lango oko. Babâ na mama ti mbi agi bê ti ala na ala kanga lege na mbi ngangu ti manda ye. Me so mbi manda ye mingi, mbi hinga na bê ti mbi kue so tâ tënë la. Mbi wara batême na ngu 1983.

MBI QUITTÉ UNIVERSITÉ TI GA PIONNIER

Na ngoi so mbi wara batême, mbi yeke gue lani na mbeni kota université ti ga docteur. Babâ na mama ti mbi afuta kota nginza tongaso si mbi gue na université so. Mbi peut lani ti ngbâ ti gue na université ti manda ye, me mbi ye lani ti mû na Jéhovah nzoni ye so mbi yeke na ni nga ti sara na lo na ngoi kue.

Babâ ti mbi agboto mê ti mbi atene: “Tongana mo quitté université, mbi yeke tomba mo na da.” Vundu asara mbi nga li ti mbi aga kirikiri. Mbi ye babâ na mama ti mbi mingi nga mbi ye ti zia vundu na bê ti ala ape. Tongaso, fani mingi na bï na ngoi so l’heure ahon na campus, mbi yeke sigi mbi sambela na bê ti mbi kue mbi tene: “Jéhovah, pardon, aidé mbi ti mû desizion so.” Na ngoi so na nda ni mbi mû desizion ti quitté université, babâ ti mbi atene na mbi ti sigi na da ti lo. Mbi iri Wilson na mbi fa na lo ye so asi, na nzoni bê lo tisa mbi ti ga ti lango na ndo ti lo. Mbi mû aye ti mbi kue, mbi zia na yâ ti mbeni sac oko na mbi mû bus mbi gue na ndo ti lo. Mbi dabe ti mbi so gï hio tongaso mbi bâ so bê ti mbi adë kpô. Mbi hinga so nzoni desizion la mbi mû so.

Mbi bâ so mbi yeke tongana mbeni ndeke so a zi lo na yâ ti da so a kanga lo dä. Mbi yeke fadeso na liberté ti fa tënë mingi. Mbi komanse kua ti pionnier na ngu 1984.

Na yâ ti angu so mbi sara kua ti pionnier permanent, Jéhovah a-aidé mbi ti duti na apendere sarango ye, na tapande, ti ngbâ ti gi ti sara aye. Mbeni lâ na bango ni, mbi yeke na anzoni raison ti gue na fango tënë ape. Mbi découragé ndali ti so mbi wara mbeni ita ti tene mbi na lo e fa tënë na peko ti midi ape me mbi gue kamême. Na peko ti so mbi sara l’heure use, mbi gue ti sara tanga ti vizite ti mbi. Mbi fatigué nga mbi yeke gï mbi oko, na bango ni ngu aye ti pika. Mbi hunda terê ti mbi: ‘Wala mbi kiri?’ Na ngoi so mbi gue na ota étage, mbi bâ mbeni maseka-koli so ayeke ti kodro ti Philippines so ayeke luti na devant ti mbi. Mbi tene na bê ti mbi, mbi tene: ‘Tongana mbi fa tënë na lo, lo yeke mä mbi ape.’ Me mbi handa terê ti mbi. Mbi komanse lani ti manda Bible na koli so na lo ga ita ti mbi.

MBI MANDA APENDERE YE NA BÉTHEL TI BROOKLYN

Na peko ti so mbi na Ita Wilson e vivre ndo oko ngu use, a tisa mbi ti gue na Béthel ti Brooklyn na ngu 1985. Tongana ti so mbi tene na tongo nda ti article so, a tokua mbi lani ti sara kua na ndo so a yeke tingbi ambeti dä ti fü ni. Mbeni lâ, na ngoi so mbi yeke sara kua na machine so ayeke imprimé iri ti ambeti, mbi sara mbeni faute, a sara si couverture ti ambeti ngbangbo mingi abuba. Ndokua ni ahunda na mbi ti fa ye so asi. Mbi fa araison kue so asara si mbi sara faute ni, me mbeni ye amanke lani. Surveillant ni atene na mbi yeke atene: “A yeke lakue nzoni ti hunda pardon.” Na ngoi ni so, mbi manda so a yeke kota ye ti yeda na afaute ti mbi nga ti tene: “Pardon.”

So mbi bâ aita ti Béthel so ngu ti ala ague na li ni so ayeke sara kua be-ta-zo, a changé bango ndo so mbi yeke na ni na ndö ti sarango kua ndali ti azo. Mbeni lâ, na ngoi ti tengo ye, Ita Milton Henschel so ayeke lani membre ti Bebungbi aduti na table ti e. Na ngoi ni so, azo aga mingi na aita so ayeke kangbi kobe ayeke sara kue ti kangbi kobe na azo. E aita-koli so e yeke amaseka e yeke dema ndali ti so kangbingo kobe ni ague hio hio ape. Sân ti sara tënë, Ita Henschel alondo lo gue lo aidé ala. Lo mû acarafe ti ngu, mapa nga na beurre lo ga lo zia na ndö ti table. So lo sara terê ti lo kete so adabe ti mbi na Jésus so asara kua lani ndali ti abazengele ti lo, na mbi yeke girisa ni lâ oko ape.—Jean 13:​3-5.

“A YEKE NZONI MO MANDA JAPONAIS!”

Na ngu 1987, mbi gue na Japon, na kâ, so mbi bâ aita ayapu nga ala sara terê ti ala kete apika bê ti mbi mingi. Mbi ye lani ti aidé ala me kpale ni ayeke so mbi hinga lani Japonais ape. Ita-wali Michiko Oda so ayeke na Béthel abâ yâ ti lê ti mbi na lo tene: “A yeke nzoni mo manda Japonais.” Na a yeke ye so mbi sara lani. Na ngoi ni so, mbi hinga lani ape so wango ti lo so ayeke changé fini ti mbi.

Ambeni nze na pekoni, mbi kiri na congrégation ti Japonais na New York. So mbi manda Japonais azi lege ni mbi ti sara gbâ ti aye na yâ ti kua ti Jéhovah Nzapa. Na ngu 1989, mbi gue ti kozoni na kota bungbi ti lango ota so a sara na Japonais na Los Angeles, na Californie. Mbi bâ mbeni ita-wali so ayeke pionnier so asara mbeni mbage ti drame na ngoi ti kota bungbi ni, iri ti lo ayeke Miwako Onami, na lo gbu bê ti mbi.

Mbi na Miwako e sara mariage na ngu 1992 na e wara pasa ti sara kua na Béthel ti Brooklyn. Miwako ayeke pensé na azo nga lo ye azo, lo yeke lakue nduru ti aidé azo. Tapande ti lo a-aidé mbi ti changé sarango ye ti mbi na mbage ti azo. Lo yeke mbeni cadeau so alondo na Jéhovah. Lakue lo yeke sara si mbi duti na ngia nga lo dë bê ti mbi.

A TOKUA E NA BÉTHEL TI JAPON NA PEKONI NA TERRITOIRE

A si na mbeni ngoi, terê ti babâ na mama ti Miwako, so ayeke vivre na Japon, ason ngangu. Tongaso, a tokua e na Béthel ti Japon tongaso si e duti nduru na ala ti bâ lege ti ala. E gue lani kâ na ngu 1999.

Sewa ti Béthel ti Japon ayamba e nzoni nga e sara achangement ti lingbi na fini ndo ti e ni. Mbi kiri mbi manda apendere ye na lege so mbi mû tapande ti apendere sarango ye ti aita ti Japon. Na tapande, ala yeke mû ye na zo mingi nga ala yeke yamba azo mingi. Tongana a ndu tënë ti kua, ala yeke sara ni na bê ti ala kue nga ala yeke zia li ti ala na ndö ni. Ala yeke sara nga kua nzoni na groupe. Ala yeke sara ni tongana nyen? Na yâ ti ngobo ti azo ti Japon, azo aye mingi ti sara kua legeoko na amba ti ala ahon ti sara kua gï ala oko. Nzoni tapande ti ala a-aidé mbi ti sara terê ti mbi kete ti tene mbi na azo e sara kua. Nga a aidé mbi ti comprendre so kete ye so mbi yeke sara ayeke mû maboko ti tene ye so Jéhovah aleke na bê ti lo ti sara asi.

Me so angobo ti e ayeke nde nde, na ambeni ngoi, mbi comprendre ape ndani so aita ti Japon asara ambeni ye na mbeni fason. Mbi manda lani ti kanga bê nga ti sara ye ahon ndö ni ape. Tongana ngoi ayeke hon, mbi changé bango ndo ti mbi nga mbi bâ so Jéhovah apeut ti sara tufa na ndö ti adesizion kue so e mû tongana e sara ye alingbi na fango lege ti bungbi ti lo. Na nda ni, Jéhovah la ayeke sara si aye atambela nzoni.

Fani mingi mbi haka afango ye so mbi wara na Béthel na fango ye so prophète Moïse awara lani. Jéhovah a-aidé lani Moïse ti sara terê ti lo kete na yâ ti ngu 40 so lo sara kua ti berger. Tongana ti Moïse, mbi manda lani mbeti mingi, a sara si mbi ga zo ti baba nga mbi zia bê ti mbi gï na mbi wani. Me Béthel afa na mbi ti sara terê ti mbi kete nga ti zia bê ti mbi na Jéhovah. Gï tongana ti so Jéhovah akanga bê lani lo leke Moïse, lo sara nga na mbi tongaso na yâ ti angu mingi.

E bâ lani lege ti babâ na mama ti Miwako na yâ ti ngu 24 tongaso juska ala kui. Fani mingi e iri ala na téléphone, na ambeni ngoi e gi bê ti e nga e gue na ala na hôpital fani mingi. Seni ti mama ti Miwako aga sioni sioni, a sara si na mbeni ngoi lo peut ti tambela ape. A yeke lani ngangu na Masako ti gue na abungbi nga na fango tënë. Na yâ ti andangba yenga ti fini ti lo, lo yeke lani na yâ ti puse ti azo so ayeke na kpale ti seni. Me lo ye Jéhovah na yâ ti gigi ti lo kue. Lakue lo yeke he ngia na ngoi so lo yeke fa tâ tënë na mbeni zo. Tapande ti Masako so ayeke sara na Nzapa nga ayeke na ngia atâa dutingo ti lo a-aidé mbi mingi.

Na ngu 2024 mbeni kota changement asi na yâ ti fini ti e. Na peko ti so e sara kua na Béthel ahon ngu 30, a tokua e na territoire. Fadeso e yeke apionnier spécial na zoa ti Okinawa na e yeke na pasa ti fa tënë na asewa so ayeke na yâ ti camp ti aturugu so ayeke nduru na e. Nzoni fango ye so e wara na Béthel a-aidé e ti sara changement hio ti lingbi na dutingo ti e. E ngbâ ti duti na mbeni nzoni kapa nga ti sara kua nzoni na ngoi ti e na lege so e zia li ti e na ndö ti kua ti fango tënë nga e fa tënë mingi. Jéhovah a-aidé e ti manda Bible na azo so aga tongana sewa ti e. E manda so a yeke kota ye ti ye azo. Mbi na Miwako e yeke kiri singila na Jéhovah lâ oko oko ndali ti pendere kua so lo mû na e.

MBI LEKE NA BÊ TI MBI TI ZIA SI JÉHOVAH ANGBÂ TI LEKE MBI

Afami ti mbi ayeke kanga lege na mbi encore ape, me ade ala voro Jéhovah ape. Jésus atene so azo so azia afami ti ala ti ga adisciple ti lo ayeke wara afami na lege ti yingo laso fani 100 (Marc 10:​29, 30). A yeke ye so asi na mbi la. Afami kue na yâ ti dunia so aye mbi nga abâ lege ti mbi na yâ ti angu mingi ayeke gbani na mbi peut ti fa ala kue ape.

Mbi ngbâ ti bata buku Tâ tënë so Wilson amû lani na mbi. Tongana mbi bâ buku so, mbi yeke dabe ti mbi na pendere fason so Jéhovah a-aidé mbi lani ti wara lo (1 Chron. 28:9). Mbi leke na bê ti mbi ti ngbâ ti zia si lo leke mbi nga ti aidé azo ti hinga tâ tënë so ague na zo na fini ti lakue lakue.