Aidé azo ti hinga Jéhovah

1. Tongana mbeni zo so mo yeke manda Bible na lo ayeke gue na li ni, a yeke sara mo tongana nyen?

TONGANA mbeni zo so mo yeke manda Bible na lo aga na bungbi ti kozoni, akomanse ti mû acommentaire, akomanse ti fa tënë ti mabe ti lo na azo nga tongana ngoi ayeke hon si lo mû desizion ti mû terê ti lo na Jéhovah Nzapa, a yeke sara mo tongana nyen? Kite ayeke dä ape so a yeke nzere na mo mingi. Ti vrai ni, e hinga so Jéhovah la a-aidé zo ni ti sara aye so na e gonda lo ndali ni.—1 aCor. 3:​5-9; 3 Jean 3, 4.

2. Nyen la Jéhovah aye ndali ti azo so ayeke manda Bible? (1 Timothée 2:​3, 4).

² Nzapa aye ti tene “mara ti azo nde nde kue asö fini ti ala nga ala wara tâ hingango ye na ndö ti tâ tënë.” (Diko 1 Timothée 2:​3, 4.) Jéhovah aye ti tene azo ahinga lo nga ala hinga ye so lo leke na bê ti lo ti sara nzoni (Jér. 9:24). So ti tene ala doit ti wara tâ hingango ye. Tâ hingango ye ayeke nyen? A ye pëpe ti tene zo ahinga gï aye na ndö ti Nzapa. Mbeni wandara ti Bible afa so, a ye ti sara tënë ti hingango ye so apusu mbeni zo ti sara ye kue so lo peut ti sara ti ga nduru mingi na Nzapa. Tongana mbeni zo so ayeke manda Bible ahinga Jéhovah, a yeke changé fason so lo yeke vivre na ni nga a yeke zi lege na lo ti wara ande “fini ti lakue lakue.”—Jean 17:3.

3. Nyen la e yeke bâ na yâ ti article so?

³ Jéhovah amû na e pasa ti aidé azo ti gi ti hinga lo. Na yâ ti article so, e yeke kiri tënë na ahunda so: Ngbanga ti nyen la azo so ayeke manda Bible adoit ti gi ti hinga Jéhovah nzoni? Tongana nyen la e peut ti fa na ala ti hinga Jéhovah nzoni? Tongana nyen la e peut ti aidé ala ti sara kua na aye so ala hinga na ndö ti Jéhovah?

AIDÉ ZO SO AYEKE MANDA BIBLE TI HINGA JÉHOVAH NZONI

4. Ti gue oko na Marc 12:​30, kozo ye so e yeke gi na ngoi so e yeke manda Bible na mbeni zo ayeke nyen?

⁴ Jésus atene lani so commandement so ahon atanga ni kue ayeke ti ndoye Jéhovah na bê ti e kue, na âme ti e kue, na bibe ti e kue nga na ngangu ti e kue. (Diko Marc 12:30.) Mbeni zo so ayeke manda Bible adoit ti hinga Jéhovah si lo ndoye lo. E ye ti tene zo so e yeke manda Bible na lo amû terê ti lo pëpe na e, na aye so e yeke fa wala na bungbi ti e, me na Jéhovah. Tongaso, kozo ye so e yeke gi na ngoi so e yeke manda Bible na mbeni zo ayeke ti aidé lo ti hinga Jéhovah nga ti ndoye lo.

5. Tongana mbeni zo so ayeke manda Bible aye Jéhovah, a yeke pusu lo ti sara nyen?

⁵ Kamba ayeke na popo ti ndoye nga na mango yanga. Tongana zo so mo yeke manda Bible na lo ahinga Jéhovah nga aye lo, a yeke pusu lo ti mä yanga ti lo. Jésus atene: “Ti tene dunia ahinga so mbi ndoye Babâ, mbi yeke sara gï tongana ti so Babâ amû yanga na mbi ti sara.” (Jean 14:31). Legeoko nga, tongana ti Jésus, mbeni zo so ayeke manda Bible so aye biani Jéhovah ayeke mä yanga ti lo nga ayeke ngbâ be-ta-zo na lo.—1 Jean 5:3.

6. Tongana mbeni zo so ayeke manda Bible ahinga Jéhovah ayeke aidé lo tongana nyen na ngoi so lo yeke mû adesizion? Mû mbeni tapande ti fa ni.

⁶ Tongana azo so ayeke manda Bible ahinga Jéhovah nzoni, a yeke aidé ala ti mû anzoni desizion. Na tapande, mbeni zo so aye ti kpe na oto adoit ti manda andia ti kpengo na oto nga ti sara mbeni examen. Me lo doit nga ti kpe na oto ni fani mingi tongaso si a aidé lo ti hinga ye so lo yeke sara na yâ ti aye nde nde so ayeke si na ngoi so lo yeke kpe na oto ni. Legeoko nga, mbeni zo so ayeke manda Bible ayeke hinga Jéhovah na lege ti aye so lo manda, me lo yeke hinga nga Jéhovah na lege ti aye so asi na lo na ngoi so lo mû adesizion so ague oko na amama-ndia ti Bible. Tongana lo hinga ye mingi na ndö ti Jéhovah nga lo bâ tongana nyen la Babâ ti lo ti yayu a-aidé lo, lo yeke manda ti mû anzoni desizion na yâ ti aye kue so asi.

7. Nyen la a-aidé lani Joseph ti mû mbeni nzoni desizion?

⁷ So Joseph ahinga Jéhovah a-aidé lo na ngoi so wali ti Potiphar agi ti pusu lo ti lango na lo. Kite ayeke dä ape so na ngoi so Joseph ade kete, lo mä mbaï ti Adam na Ève nga ti Abraham na Sara (Gen. 2:24; 20:​3, 6). Ambaï so afa na Joseph bango ndo ti Jéhovah na ndö ti mariage nga na bungbingo koli na wali so ayeke mbeni cadeau. Joseph ahinga lani Jéhovah nzoni mingi asara si lo ke ti bungbi na wali ti Potiphar nga lo tene na lo, lo tene: “Mbi lingbi ti sara kota ye ti sioni so tongana nyen? Nga mbi lingbi ti sara siokpari na terê ti Nzapa tongana nyen?” (Gen. 39:​7-9). Joseph ahinga lani ye so ayeke nzoni nga na ye so ayeke sioni na lê ti Jéhovah. Lo hinga ye so ayeke zia vundu na bê ti Nzapa ti lo. A sara si lo mû nzoni desizion. Tongana e aidé azo so e yeke manda Bible na ala ti gi ti hinga Jéhovah nzoni nga ti hinga ye so lo ye, ala nga kue ayeke mû adesizion so anzere na lo.

FA NA LO ASARANGO YE TI JÉHOVAH

8. Tongana nyen la mo peut ti sara kua na buku Ngbâ na fini lakue lakue! ti aidé zo so mo yeke manda Bible na lo ti gi ti hinga Jéhovah?

⁸ Tongana nyen la mo peut ti fa na zo so mo yeke manda Bible na lo ti hinga asarango ye ti Jéhovah? Jéhovah a-aidé lani Job ti hinga ye mingi na ndö ti lo na lege so lo hunda na lo atënë ahon 50 (Job 38:1–41:34). E nga kue e peut ti hunda atënë. A leke ahunda so ayeke na yâ ti buku Ngbâ na fini lakue lakue! ti aidé yeke yeke mbeni zo so ayeke manda Bible ti hinga asarango ye ti Jéhovah. (Bâ encadré “Ahunda so ayeke aidé e ti fa ye na azo.”) Sara kua na ni ti aidé zo so mo yeke manda Bible na lo ti gi ti hinga Lo.

9-10. (a) Nyen la ayeke aidé azo so ayeke manda Bible ti wara ye ti nzoni mingi na lege ti dikongo Bible ti ala? (Jacques 5:11). (b) Fa tongana nyen la mbeni mbaï ti Bible apeut ti fa ye so anzere na Jéhovah wala ye so anzere na lo ape.

⁹ Na ngoi so e komanse ti manda Bible na mbeni zo, e yeke wa lo ti komanse ti diko Bible lakue.a Tongana nyen la e peut ti aidé azo so ayeke manda Bible ti wara ye ti nzoni mingi na lege ti dikongo Bible ti ala? E peut ti wa ala ti tene lakue tongana ala diko Bible, ala gi ti hinga ndani so Jéhovah azia mbage ni so na yâ ti Bible nga asarango ye ti lo wa la asigi na yâ ti mbage ni so. Bâ tongana nyen la disciple Jacques asara ni na ngoi so lo yeke sara tënë ti mbaï ti Job. Jacques agboto lê na ndö ti mbeni pendere sarango ye ti Job: gbungo ngangu ti lo, me lo fa nga so Jéhovah asara ye na nzoni bê mingi.—Diko Jacques 5:11.

¹⁰ E ye ti tene azo so ayeke manda Bible abâ tongana nyen la ambaï so ayeke na yâ ti Bible afa aye so anzere na Jéhovah wala aye so anzere na lo ape. Na tapande, peut-être zo so e yeke manda Bible na lo abâ encadré “Komanse ti diko Bible” so ayeke na yâ ti buku Ngbâ na fini lakue lakue! na lo tene na e so lo soro ti diko mbaï ti Daniel so a bi lo na yâ ti dû ti abamara. E peut ti wa lo ti gbu li na ndö ti mara ti ahunda so: ‘Ngbanga ti nyen la Jéhovah asö lani Daniel? Ye so afa na e nyen na ndö ti ye so ayeke zia ngia na bê ti Jéhovah?’ (Dan. 6:​10, 22). Lo peut nga ti hunda terê ti lo na ahunda so: ‘Nyen la asi lani na akoli so abi tënë na li ti Daniel? Ye so afa na e nyen na ndö ti aye so anzere na Jéhovah ape?’ (Dan. 6:​4, 5, 24). Na nda ni, lo peut ti gbu li na ndö ti ambeni sarango ye ti Jéhovah so asigi na yâ ti mbaï ni.—Dan. 6:​26, 27.

11. Tongana nyen la e peut ti aidé zo so e yeke manda Bible na lo ti bâ mandango Bible ti lo tongana mbeni cadeau so alondo na Jéhovah?

¹¹ E yeke na ngia tongana zo so e yeke manda Bible na lo abâ na nene ni anzoni ye so lo wara na lege ti mandango Bible ti lo. Me a yeke nzoni e aidé lo ti bâ so anzoni ye ni so alondo na Jéhovah, Kota maître ti e (És. 30:​20, 21). Peut-être lo kiri singila na e ndali ti aye so lo yeke manda nga peut-être lo gonda même e ndali ti fason so e yeke fa ye na lo. Atâa so a yeke sioni ape ti sara ni, a yeke nzoni e aidé lo ti gonda Jéhovah.

AIDÉ LO TI SARA KUA NA YE SO LO HINGA

12-13. Tongana nyen la mo peut ti aidé zo so mo yeke manda Bible na lo ti sara kua na ye so lo hinga na ndö ti Jéhovah tongana a yeke ngangu na lo ti mä yâ ti mbeni mbaï ti Bible? (Bâ nga foto.)

¹² Ti bâ nzoni mingi na lege ti ye so e hinga, e doit ti sara kua na ni. Tongaso, tongana nyen la mo peut ti aidé zo so mo yeke manda Bible na lo ti sara kua na ye so lo hinga? Kozo ni, fa na lo ti dabe ti lo na ye so lo hinga na ndö ti Jéhovah na ngoi so lo diko mbeni mbaï so ayeke ngangu na lo ti mä yâ ni. Na tapande, tongana lo diko ye na ndö ti angbanga so Jéhovah afâ, peut-être lo peut ti hunda terê ti lo na ndani so Jéhovah afâ ambeni zo me lo fâ ambeni ape. Tongana nyen la mo peut ti aidé lo ti duti na nzoni bango ndo na ndö ni?

¹³ Mo peut ti wa lo ti gbu li na ndö ti aye so lo hinga na ndö ti Jéhovah. Na tapande, Jéhovah abâ fini tongana nyen? (2 Pi. 3:9). Kota ye wa la Jéhovah asara ti sö e atâa so e yeke awasiokpari? (aÉph. 2:​4, 5). Eskê Jéhovah ayeke punir azo atâa so ala lingbi na ni ape? Nga lo yeke punir pëpe azo so alingbi ti tene lo punir ala? (Ex. 34:​6, 7). Na ambeni ngoi, tongana e diko mbeni mbaï, a fa pëpe anzene nzene ye kue na ndö ni so apeut ti aidé e ti comprendre ndani so Jéhovah amû mbeni desizion. Me e bezoin ti hinga anzene nzene ye kue ape. E hinga Nzapa ti e na e hinga na bê ti e kue so lo yeke sara ye lakue na lege ni.

14. Tongana a yeke ngangu na zo so mo yeke manda Bible na lo ti mä terê na mbeni zo na yâ ti congrégation, mo peut ti aidé lo tongana nyen?

¹⁴ Bâ use ye so mbeni zo so ayeke manda Bible apeut ti sara ti sara ye alingbi na ye so lo hinga na ndö ti Jéhovah. Bâ so zo so mo yeke manda Bible na lo ayeke ga na abungbi, me a yeke ngangu na lo ti mä terê na mbeni ita na yâ ti congrégation. Peut-être ita ni ason bê ti lo. Wa lo ti duti na mara bango ndo ti Jéhovah na ndö ti aita. Sacrifice wa la Jéhovah asara ti fa so lo ye ala? (Jean 3:16). So e yeke beoko asara lo tongana nyen? (Ps. 133:1). Tongana e yeke beoko, lo bâ ni tongana nyen? (2 aCor. 13:11). Aidé zo so mo yeke manda Bible na lo ti bâ so tongana lo bâ gï apendere sarango ye ti aita ahon ti bâ afaute ti ala ayeke nzere na Jéhovah mingi.

15-16. (a) Tongana nyen la mbeni zo so ayeke manda Bible apeut ti mû tapande ti Jésus na ngoi so lo doit ti mû mbeni kota desizion? (Jean 8:29). (b) Tongana nyen la Marianne a-aidé zo so lo yeke manda Bible na lo ti mû nzoni desizion? (Bâ nga foto.)

¹⁵ Na nda ni, mo peut ti aidé zo so mo yeke manda Bible na lo ti sara kua na aye so lo hinga na ndö ti Jéhovah ti mû anzoni desizion. Kozoni, mo peut ti gboto lê ti lo na ndö ti ye ti manda 35 ti buku Ngbâ na fini lakue lakue!, so li ni ayeke “Tongana nyen la e lingbi ti mû anzoni desizion?” Me ka tongana lo sambela nga lo sara recherche me a yeke lakue ngangu na lo ti mû mbeni desizion? So amama-ndia ti Bible ayeke mingi, peut-être lo hinga ape ti so wa la lo peut ti sara kua na ni na yâ ti ye so asi. Mo peut ti wa lo ti gbu li na ndö ti tapande ti Jésus. Jésus ayeke mû lani adesizion tongana nyen? Lo tene: “Mbi yeke sara lakue aye so anzere na bê ti [Babâ ti mbi].” (Diko Jean 8:29.) Wa lo ti hunda terê ti lo na hunda so: ‘Ti gue oko na ye so mbi manda na yâ ti ambeti ti e nga na aye so mbi manda na ndö ti Jéhovah, nyen la mbi doit ti sara so ayeke nzere na lo?’ Desizion kue so anzere na Jéhovah ayeke nzoni desizion.

¹⁶ Mbeni wali so ayeke manda Bible na Chili ayeke lani na mbeni kota desizion ti mû. Azo ti sewa ti lo ayeke pusu lani lo ti yeda na mbeni kua so a payé lo dä nzoni, me so ayeke kanga lege na lo ti ga na abungbi. Marianne, so ayeke manda Bible na lo, atene: “Mbi wa lo ti gbu li ti bâ desizion ti lo ni ayeke sara Jéhovah tongana nyen? A yeke nzere na lo wala a yeke sara lo vundu? Mbi wa nga lo ti sambela Jéhovah na ndö ti kpale ni nga ti bâ tongana nyen la lo yeke kiri tënë na sambela ni. Lo ke kua ni na kete na pekoni lo wara mbeni kua so ayeke mû lege na lo ti ga na abungbi.” Bâ so Marianne afa na lo pëpe ye so lo doit ti sara, me lo aidé lo ti gbu li na ndö ti ye so lo hinga awe na ndö ti Jéhovah. Ye so asi so akpengba songo ti lo na Marianne nga na Jéhovah. Marianne atene tënë so na ndö ti lo, lo tene: “Lo manda so Jéhovah ayeke bâ lege ti e tongana e zia vorongo lo na kozo ndo.”

ANZONI YE SO AZO SO AHINGA JÉHOVAH NZONI AYEKE WARA

17. Nyen la ayeke kota ye mingi so azo so ayeke manda Bible adoit ti hinga ni?

¹⁷ Azo so e manda Bible na ala amanda akota ye mingi na ngoi ti mandango Bible ti ala. Ala manda aye so Bible afa, na tapande, ala hinga ye so ayeke si na zo na peko ti kuâ ti lo, ndani so Jésus akui nga na aye so Royaume ayeke sara ande. Ala manda nga ye na ndö ti fason so aye ayeke tambela na yâ ti bungbi ti Jéhovah. Na tapande, a yeke sara abungbi tongana nyen? Kua ti nyen la a-ancien ayeke sara? Nga kua ti Bebungbi ayeke so wa? Me e ye ti tene azo so e yeke manda Bible na ala angbâ gï na ndö ti aye so ape. E ye ti tene ala gi ti hinga Jéhovah nzoni.

18. Anzoni ye wa la ayeke ku azo so agi ti hinga Jéhovah?

¹⁸ Kota pasa la e yeke na ni ti fa na azo ti gi ti hinga Jéhovah. Même laso azo so agi ti hinga Jéhovah nga ayeke voro lo ayeke na ngia mingi (Ps. 25:​12-15). Na yâ ti angoi so ayeke ga, azo kue so awara ‘ndara so amû lege na ala ti hinga tâ Nzapa,’ Jéhovah, ayeke wara ande fini ti lakue lakue (1 Jean 5:20). Me aye ni kue la ape. Bible atene na e so azo so asara ngangu ti hinga Jéhovah nga ti ye lo, lo yeke ‘hinga’ ala (1 aCor. 8:3). Biani, Nzapa so ngangu ti lo ahon angangu kue ayeke bâ aye so e sara nga lo bâ e tongana akamarade ti lo. So ayeke pendere futa ahon atanga ni so e wara ni ndali ti so e hinga oko tâ Nzapa.