Duti na nzoni bango ndo tongana mo wara akpale

1-2. Nyen la e bezoin ti sara ti hon ndö ti akpale ti e? (Bâ nga foto.)

ESKÊ na ndembe so a sara ye na mo na lege ni ape? Afami ti mo akanga lege na mo? Wala a sara ye ti ngangu na mo ndali ti mabe ti mo? Eskê mo yeke na kpale ti seni wala ti gango mbakoro? Wala mbeni ye ti ngangu asi na mo, peut-être mo perdre mbeni zo so mo ye lo mingi? Legeoko tongana mingi ti awakua ti Jéhovah so lo ye ala mingi, peut-être gigi ti mo “asi singo na akpale nga na vundu”.—Ps. 90:10.

² Ti gbu ngangu na yâ ti akpale so e wara, e doit ti duti na nzoni bango ndo na ndö ti akpale ni. Ngbanga ti nyen la a yeke kota ye? Bâ tapande so: A peut ti haka akpale so mo wara na mbeni ye so asi gï gbagburu tongaso na devant ti mo na ngoi so mo yeke kpe na oto. Kpale ni apeut ti sara si mo gue na mbage ti koli wala na mbage ti wali, mo kpe yeke wala mo luti. Me mo doit ti bâ kpale ni nzoni si mo hinga mbilimbili ye so mo doit ti sara. Mo peut ti bâ ni ape tongana saleté wala poussière ayeke na lê ti vitre ti oto ni. Legeoko nga, ti gbu ngangu na yâ ti akpale ti e, e bezoin ti bâ ni tongana ti so Jéhovah abâ na ni. Na yâ ti article so, e yeke bâ (1) nzoni bango ndo so e doit ti duti na ni na ndö ti akpale ti e, (2) tongana e yeke na nzoni bango ndo ape, a peut ti ga na e kpale nga (3) ambeni ye so e peut ti sara ti ngbâ ti duti na nzoni bango ndo na ngoi so e wara akpale.

DUTI NA NZONI BANGO NDO NA NDÖ TI AKPALE

3. Ngbanga ti nyen la e yeke wara akpale?

³ Akpale ayeke manke na yâ ti dunia so ape. Ndali ti so e yeke mbilimbili-kue ape nga Satan la akomande dunia so, akpale ayeke si na e kue. Na ndö ni, so Nzapa aga nduru awe ti futi dunia so, e yeke tingbi encore na akpale mingi. A peut ti duti angangu kpale tongana ngu so asuku amû ndo, sese so ayengi wala akpale so azo la aga na ni (Mat. 24:8; 2 Tim. 3:13). Tongana Jéhovah aleke akpale so kue laso, a yeke mo bâ mo tene lo yeke mû maboko na Satan ti komande dunia ni. Na yâ ti dunia so, aye ti ngangu apeut ti si na e kue.—Zo-ti. 9:12.

4. Ambeni kpale nde wa la aChrétien ayeke wara?

⁴ A-Chrétien ayeke wara ambeni kpale nde. Fani mingi Jésus atene na adisciple ti lo so a yeke sara ye ti ngangu na ala ndali ti mabe ti ala (Mat. 24:9; Jean 16:2). So e hinga ni, a yeke aidé e ti gbu ngangu na ngoi so a sara ye ti ngangu na e (1 aThes. 3:​3, 4). Tongana e gbu ngangu na yâ ti akpale ndali ti so e yeke na kpengba mabe, e peut ti duti sûr so e yeke na ndö ti lege so ague na fini ti lakue lakue. Na ndö ni, e yeke fa so e soro ti voro Jéhovah ndali ti so lo yeke nzoni gbia ahon atanga ni kue nga e fa so Satan ayeke zo ti mvene. Mbeni mvene so Satan atene ayeke so lo tene azo ayeke voro Nzapa gï ndali ti so lo mû ye na ala. Ti fa so tënë ti lo ni ayeke tâ tënë, lo yeke sara aye ti ngangu na awakua ti Jéhovah sioni sioni (Job 1:​9-11). Me tongana e gbu ngangu ndali ti so e ye Jéhovah, e yeke zia ngia na bê ti lo.—aProv. 27:11.

5. Nyen la e peut ti manda na lege ti Zo-ti-fa-tene 7:​13, 14? (Bâ nga afoto.)

⁵ Jéhovah azia lege na akpale ti si. Jéhovah asara sioni ye lâ oko ape wala lo yeke tara e na asioni ye ape (Jacq. 1:13). Me, Gbia Salomon atene so “lango ti ngangu kpale” ayeke “kusala ti tâ Nzapa.” (Diko Zo-ti-fa-tene 7:​13, 14.) Tënë so aye ti tene ape so Jéhovah la ayeke sara si asioni ye asi na e me lo yeke kanga lege na ni ape ti tene asi na e. Salomon amû na e nzoni wango so apeut ti aidé e ti duti na nzoni bango ndo na ngoi ti akpale. Kozoni, e doit ti girisa ape so, so e yeke na yâ ti dunia ti Satan, na ambeni lango, aye ayeke tambela nzoni, na ambeni lango aye ayeke tambela nzoni ape. Na lango so aye ayeke nzoni, e peut ti kiri singila na Nzapa ndali ti anzoni ye so lo mû na e na e bâ lango ni so tongana mbeni cadeau. Use ni, Salomon adabe ti e so, e ‘lingbi pëpe ti hinga biani ye so ayeke si ande na e’, atâa a yeke nzoni ye wala sioni ye. Akpale so zo aku terê ti lo na ni ape apeut ti si na anzoni zo nga na asioni zo.

6. Peut-être ngbanga ti nyen la Jéhovah azia si akpale asi na e? (aHébreu 12:​7, 11).

⁶ Tongana e yeke na nzoni bango ndo na ndö ti akpale ti e, a yeke aidé e ti sara confiance mingi na Jéhovah me na e wani ape. Jéhovah ayeke bâ lakue aye so ayeke si na e, vundu asara lo na ngoi so e yeke bâ pasi nga lo yeke aidé e lakue. Même tongana lo zia lege na e ti tambela na yâ ti “popo-hoto so avuko pitipiti,” lo yeke ngbâ lakue ti fa lege na e, lo dë bê ti e so lo ye e nga lo yeke mû na e ngangu so e bezoin ni ti gbu ngangu (Ps. 23:4). Akpale so e wara apeut ti aidé e ti hinga awokongo ti e nga grâce na mungo maboko ti Jéhovah, e peut ti hon ndö ni. (Diko aHébreu 12:​7, 11.) Tapande ti Job afa ni. Aye so asi na lo a-aidé lo ti bâ so lo bezoin ti sara terê ti lo kete. Atâa so Jéhovah la ayeke na gunda ti akpale ni ape, so lo zia lege na ni ti si a-aidé lo ti manda ye mingi dä (Job 42:​1-6). E peut ti duti sûr so tongana Jéhovah azia lege na akpale ti si na e, lo yeke aidé e ti gbu ngangu dä na kite ayeke dä ape so lo yeke futa e.—aRom. 8:​35-39.

7. Ngbanga ti nyen la mo peut ti duti na ngia même tongana a sara ye ti ngangu na mo ndali ti mabe ti mo?

⁷ E peut ti duti na ngia na ngoi so a sara ye ti ngangu na e. Tongana a sara ye ti ngangu na mo ndali ti mabe ti mo, pensé ape so Jéhovah asara tufa na ndö ti mo encore ape. Me aye ti ngangu so a sara na mo afa so mo zia ngia na bê ti lo (Mat. 5:​10-12). Tongana mo yeke na mara ti bango ndo tongaso, mo peut ti duti na ngia tongana ti abazengele lani (Kus. 5:​40-42). Na ndö ni, mo peut ti aidé azo so ayeke aTémoin ape ti hinga tâ tënë nga ti “mû gloire na Nzapa.” (1 Pi. 2:12). Gbu li na ndö ti tapande ti Joseph, Jéhovah a-aidé lo nga lo futa lo même na ngoi so lo ngbâ na da ti kanga. Jéhovah apeut ti sara tongaso na mo na ngoi so mo yeke bâ pasi.—Gen. 39:​3, 23.

8. Mbeni ye nde wa la apeut ti aidé e ti leke na bê ti e ti ngbâ be-ta-zo na Jéhovah même na ngoi so e yeke bâ pasi?

⁸ Akpale so e wara ayeke hunzi ande. Ye so asi na Job adabe ti e so akpale ti e ayeke hunzi ande. Ti vrai ni, “Jéhovah airi tënë nzoni na ndö ti atanga ti ngu ti Job ahon même ati kozoni”. (Job 42:12). Legeoko nga, Jéhovah ayeke sara tufa na ndö ti e na yâ ti fini dunia na mbeni lege so apika bê mingi, fini ti e ti laso asi singo na akpale nga ayeke nduru tongana a haka ni na fini ti lakue lakue so e yeke wara ni ande. E ye ti bâ tongana nyen la Jéhovah ayeke sara ye alingbi na zendo so lo mû ti futa e na yâ ti fini dunia. Tongaso, zia e ngbâ ti sara na lo be-ta-zo.—Mat. 24:13.

TI DUTI NA NZONI BANGO NDO APE APEUT TI GA NA E KPALE

9. Tongana nyen la ti duti na nzoni bango ndo ape na ndö ti akpale so e wara apeut ti ga na e kpale?

⁹ Atâa kpale wa la e wara, bango ndo ti e apeut ti sara si kpale ni akiri aga ngangu mingi. Na tapande, e peut ti pensé so Jéhovah la asara si e wara akpale ni. Na mbeni ngoi, Job apensé so Jéhovah la asara si lo wara akpale. So lo pensé tongaso asara si lo gi “ti fa so lo la lo yeke mbilimbili, ahon ti fa so a yeke Nzapa.” (Job 32:2). Legeoko nga, na tongo nda ni Naomi atene so Jéhovah la asara si lo wara angangu kpale (Ruth 1:​13, 20, 21). Tongana Naomi na Job angbâ lani ti pensé tongaso, ala yeke sara ngonzo na terê ti Jéhovah na ala yeke zia ti sara na lo (aProv. 19:3). Me Jéhovah a-aidé ala ti changé bango ndo ti ala na ndö ti akpale ti ala ni nga lo sara tufa na ndö ti ala ndali ti so ala duti be-ta-zo.

10. Na ngoi so e yeke na yâ ti kpale, nyen la e peut ti komanse ti gi bê ti e na ndö ni?

¹⁰ Même tongana e hinga so Jéhovah la ayeke na gunda ti akpale ti e ape, e peut ti komanse ti hunda terê ti e wala lo ngbâ ti pensé na e. Mara ti bango ndo tongaso apeut ti découragé e na asara si e zia ti sara na Jéhovah (aProv. 24:10). Gbia David nga na prophète Habakuk awara lani akpale. Na ambeni ngoi, ala hunda terê ti ala wala Jéhovah ayeke mä toto so ala toto na lo ti mû maboko na ala (Ps. 10:1; Hab. 1:2). Me, ala zia lani ti sambela ape. Jéhovah atene na akoli be-ta-zo so lo yeke mû maboko na ala na lo yeke mû maboko na mo nga.—Ps. 10:17.

11. Nyen la apeut ti si tongana e yeke na nzoni bango ndo ape na ndö ti akpale ti e?

¹¹ Tongana e yeke na nzoni bango ndo ape na ndö ti akpale, akpale ni apeut ti hon gbungo li ti e, peut-être e peut ti pensé so mara ti aye tongaso adoit fade ti si na e ape (1 Pi. 4:12). E peut ti manda ye na lege ti tapande ti adisciple ti Jésus (Luc 18:​33, 34). Lo tene lani na ala so a yeke sara ye ti ngangu na lo nga a yeke fâ lo. Me ala pensé so ye tongaso ayeke si na lo ape. Atâa so Jésus afa polele ye so ayeke ku lo, bazengele Pierre abâ ni tongana senge ye. Jésus ahinga lani so mara ti bango ndo tongaso apeut ti kanga lege na lo ti sara ye so bê ti Jéhovah aye, ni la lo suku na Pierre (Marc 8:​31-33). Nga même na peko ti kuâ ti Jésus, adisciple ti lo acomprendre hio ape ndani so a fâ lo. Me lo découragé na terê ti ala ape. Tongaso, na ngoi so lo wara terê na ala na peko ti so a zingo lo na kuâ, na lege ti Mbeti ti Nzapa lo aidé ala ti comprendre ndani so lo doit lani ti bâ pasi (Luc 24:​25-27, 32, 44-48). Tongana ala gbu li na ndö ti aye so Jésus afa na ala, a yeke aidé ala ti leke terê ti ala ndali ti kangango lege so ala ga nduru ti wara ndali ti so ala yeke adisciple ti Jésus. E nga kue tongana e gbu li na ndö ti ye so Bible afa na ndö ti sarango ye ti ngangu na zo nga na akpale, a peut ti aidé e ti leke terê ti e ndali ti akpale so ayeke ga.

12. Tongana e yeke na nzoni bango ndo na ndö ti mbeni kpale ape, a peut ti sara si e pensé nyen?

¹² Tongana e wara mbeni kpale si e yeke na nzoni bango ndo na ndö ni ape, a peut ti sara si e pensé so kpale ni ayeke ngangu, andâ a yeke nga tongaso ape. Jésus afa so ye tongaso apeut ti si na lege ti toli so lo fa na ndö ti azo so asara kua na yâ ti mbeni yaka ti vigne. Bê ti ambeni zo ti kua ni ason ndali ti so ala pensé so a futa ala na lege ni ape, me wa ti yaka ni atene na mbeni oko ti ala, atene: “Fami, mbi sara sioni na mo pëpe!” (Mat. 20:​10-13). Azo ti kua ni apensé so wa ti yaka ni asara ye na ala na lege ni ape, me a yeke tongaso ape. Bê ti ala ason ndali ti so ala yeke ku fade ti wara mbeni ye so ala doit ti wara ni ape. Laso, ambeni ita apeut ti pensé tongaso. Na tapande, ala peut ti pensé so a yeke na lege ni ape so a mû na ala ape mbeni kua so ala ye fade ti sara na yâ ti bungbi ti Jéhovah. Aye wa la e peut ti sara ti duti na nzoni bango ndo na ndö ti mbeni kpale?

AYE SO E PEUT TI SARA TONGANA E WARA AKPALE

13. Nyen la apeut ti si tongana e wara akpale?

¹³ E peut ti hinga aversê ti Bible so asara tënë na ndö ti akpale. E peut même ti fa ni na amba ti e ti aidé ala ti gbu ngangu na yâ ti akpale. Me tongana kpale asi na e wani, a peut ti duti ngangu na e ti ngbâ ti duti na nzoni bango ndo. Na tapande, e peut ti pensé so Jéhovah la ayeke punir e wala lo mä sambela ti e encore ape. Tongana e komanse ti pensé tongaso, nyen la e peut ti sara?

14. Tongana mo yeke bâ pasi, nyen la mo peut ti sambela ndali ni? (aPhilippien 4:13).

¹⁴ Hunda Jéhovah ti aidé mo. Fa na Jéhovah kpale ti mo ni nga ye so asara na ndö ti mo. Mo peut ti fa na Jéhovah mbilimbili ye so mo ye ti tene lo sara na mo. Mo peut ti hunda lo ti mû na mo yingo vulu tongaso si mo wara ngangu nga na ndara so mo bezoin ni ti gbu ngangu. Me girisa ape so Jéhovah apeut ti kiri tënë na sambela ti mo na mbeni lege so mo ku terê ti mo na ni ape (aÉph. 3:20). Lo peut nga ti pusu a-ange wala aita ti aidé mo (Ps. 34:7). Tongaso, yeda na mungo maboko kue so Jéhovah ayeke mû na mo. Mo peut ti duti sûr so lo yeke mû na mo yingo vulu ti lo so mo bezoin ni na yâ ti akpale kue.—Diko aPhilippien 4:13.

15. Nyen la ayeke aidé mo ti gbu ngangu na ngoi ti akpale? (Bâ nga foto.)

¹⁵ Ngbâ ti sara aye so mo yeke sara ka ti voro na Jéhovah. Sara ye kue so mo yeke sara ka ti voro na Jéhovah même tongana mo peut ti sara ni tongana ti kozo ape. Mo bezoin ti wara apensé ti Nzapa mingi même na “angoi ti ye ti vundu nga na ti ngangu kpale”. (Ps. 119:143). Ngbâ ti diko Bible lakue, ti manda ni nga ti gbu li na ndö ni. Fa tënë alingbi na ngangu ti mo, gue na abungbi nga mû mbage na ni. Mû ngoi mingi ti duti gï mo oko ape même tongana mo bâ so mo bezoin ti sara tongaso, me ngbâ nduru na aita.—aProv. 18:1.

16. Na ngoi so mo wara akpale, akite wa la apeut ti dü na li ti mo? Tongana nyen la mo peut ti hon ndö ni? (2 aCorinthien 10:​4, 5).

¹⁶ Hon ndö ti akite ti mo. Na ngoi so mo wara kpale, peut-être mo bezoin ti hon ndö ti apensé so “gere ni aluti ngangu”, na tapande kite so mo yeke na ni na ndö ti mo wani wala na ndö ti Jéhovah. (Diko 2 aCorinthien 10:​4, 5.) Mo peut ti hon ndö ti mara ti akite tongaso grâce na “hingango ye ti Nzapa” so ayeke na yâ ti Bible nga na yâ ti ambeti ti e. Na tapande, eskê mo pensé so mo zia ngia na bê ti Jéhovah encore ape? Tongana a yeke tongaso, manda ye na lege ti tapande ti bazengele Paul. Na ngoi ti kua ti fango tënë ti lo, lo wara lani angangu kpale; me, akpale ni asara si lo hinga biani so lo yeke wakua ti Christ so azia ngia na bê ti lo (2 aCor. 11:​23-27). Eskê mo gi bê ti mo wala Jéhovah apardonné mo biani awe ndali ti afaute so mo sara ândö? Tongana a yeke tongaso, sara molongo ti aversê so afa so Jéhovah ayeke pardonné asiokpari ti e (És. 43:25). Na pekoni, diko aversê ni nga gbu li na ndö ni (Ps. 119:97). Eskê mbeni ngangu kpale asi na mo awe so asara si mo yeke na kite so Jéhovah ayeke bata awakua be-ta-zo ti lo? Tongana a yeke tongaso, sara recherche na ndö ti ndani so Nzapa azia lege na apasi nga tongana nyen la lo yeke bata e na lege ti yingo atâa ye wa la asi na e (Ps. 91:​9-12). Diko nga mbaï ti aita so agbu ngangu na yâ ti angangu kpale.a

17. Nyen la a yeke nzoni e sara tongana e wara akpale?

¹⁷ Eskê na ndembe so mo yeke vivre ngoi so aye atambela nzoni, na mo wara angangu kpale ape? Tongaso, kiri singila na Jéhovah nga gonda lo ndali ti anzoni ye so lo sara ndali ti mo (Zo-ti. 7:14). Me tongana mo wara akpale, ngbâ ti duti na nzoni bango ndo na ndö ni nga zia bê ti mo kue na Jéhovah. Tongana mo sara tongaso, Jéhovah ayeke ‘leke lege ti tene mo gbu ngangu dä.’ (1 aCor. 10:13). Me nyen la a yeke nzoni e sara tongana mbeni ngangu kpale asi na aita ti e? E yeke kiri tënë na hunda so na yâ ti article ti peko.