“Nzapa ti tâ tënë” ayeke sara lakue ye so lo leke ti sara

1. Tongana ti so Psaume 31:​2-5 afa, ngbanga ti nyen la e peut ti sara confiance na Jéhovah?

E YEKE vivre na yâ ti mbeni dunia so Satan la akomande ni. Mvene, handango zo nga na kango zo amû ndo. A sara si a yeke ngangu ti hinga zo so e peut ti sara confiance na lo. Azo ti dengo buze ayeke sara ye na lege ni ape, azo so ayeke sara sabango ti aye so ala yeke kä ayeke tene mvene na ndö ni nga ambeni zo ayeke sara confiance na atënë so akamarade ti ala atene na ala ape. Me bê ti e adë ti hinga so e peut ti sara confiance kue na Jéhovah ndali ti so Bible atene Lo yeke “Nzapa ti tâ tënë”. (Diko Psaume 31:​2-5.) Jéhovah atene mvene lâ oko ape. Tënë kue so lo tene ayeke tâ tënë, e peut lakue ti duti sûr so lo yeke sara ye alingbi na tënë ti yanga ti lo.

2. Nyen la e yeke bâ na yâ ti article so?

² Na yâ ti article so, e yeke bâ araison so apeut ti pusu e ti sara confiance kue na Jéhovah. E yeke bâ nga tongana nyen la Nzapa ti tâ tënë ayeke futi ande sioni dunia ti Satan so nga ye so Nzapa ayeke sara ti sara si ye so lo leke na bê ti lo ti sara aga tâ tënë. Article ni ayeke aidé e ti fa tâ tënë na ndö ti Jéhovah na azo.

NDANI SO E PEUT TI SARA CONFIANCE NA NZAPA TI TÂ TËNË

3. Ngbanga ti nyen la e peut ti sara confiance kue na Jéhovah?

³ E peut ti sara confiance na Jéhovah ndali ti so lo la lo sara aye kue. Lo la lo sara yayu, sese nga na aye kue so ayeke na fini (Gen. 1:1; Ps. 36:9; Apoc. 4:11). Lo sara sese nga na aye kue so apeut ti sara si e ngbâ na fini, na tapande pupu so e yeke wu nga na ngu so e yeke nyon. Teti lakue lakue, lo yeke na ngangu na ndö ti aye kue. Teti so Jéhovah la asara e, lo hinga aye kue nga lo yeke na ngangu kue, e peut ti sara confiance na lo ti fa lege na e. Nga e peut ti duti sûr so lo yeke mû ande na e pendere gigi ti kekereke.

4. E hinga tongana nyen so Jéhovah aye e?

⁴ E peut ti zia bê ti e na Jéhovah ndali ti so lo ye e. Jéhovah acréé e azo ndali ti so lo ye si e duti na fini nga gigi anzere na e. Jéhovah afa ye so lo leke na bê ti lo na lege ti atënë so: “Zia e sara zo na image ti e, na lege so lo kpa e.” (Gen. 1:26). Lo mû na e liberté ti soro ye. Lo leke sese pendere ndali ti e (Ps. 115:16). Nga lo mû na kozo babâ na mama ti e pendere kua ti sara si sese aga Paradis (Gen. 1:28; 2:15). Lo mû na ala aye kue so ayeke na ndö ti sese. Biani, aye so afa polele so “tâ ndoye ti Jéhovah ayeke ngbâ kpu na kpu”.—Ps. 103:17.

5. (a) Jéhovah asara lani ye tongana nyen na ngoi so Adam na Ève ake yanga ti lo? (b) Ambeni zendo ti Jéhovah wa la aga tâ tënë awe? (Bâ encadré “Nzapa ayeke tene lakue gï tâ tënë.”)

⁵ E peut ti zia bê ti e na Jéhovah ndali ti so lo yeke sara ye lakue alingbi na tënë ti yanga ti lo. Jéhovah aleke sese ti tene angbâ “gï senge pëpe, me lo leke ni ti tene azo aduti dä.” (És. 45:​18, 19). Na ngoi so Adam na Ève asara kpengba-li, a dë ngbanga ti kuâ na ndö ti ala. Me ye oko apeut ti kanga lege na Jéhovah ape, lo sara lakue ye so lo mû desizion ti sara (És. 46:​10, 11). Lo leke lani ti tene azo so ayeke mbilimbili amû ndö ti sese kue na achangé ape. Ndani la lo zia lege na Adam na Ève ti dü amolenge. Nga lo mû oko Molenge ti lo tongana ye so a futa ti zi azo ti zi ahale ti Adam na gbe ti kuâ nga ti mû na ala pendere beku ti fini ti lakue lakue.—Jean 3:16.

AYE SO JÉHOVAH ASARA TI TENE AZENDO TI LO AGA TÂ TËNË

6. Tënë wa la Jéhovah atene na peko ti so Adam na Ève ake yanga ti lo?

⁶ Zo so apusu Adam na Ève ti ke yanga ti Nzapa ayeke “ngbo ti giriri, lo so a iri lo Zabolo na Satan”.a (Apoc. 12:9; Gen. 3:​4, 5; Jean 8:44). Jéhovah adë ngbanga na li ti lo, lo tene so a yeke futi lo ande (Gen. 3:15). Me kozo ti tene a futi lo, gbâ ti azo ayeke mû peko ti lo nga ayeke sara ye tongana lo. Me ambeni zo ayeke ngbâ be-ta-zo na Jéhovah.

7. Azo wa la amû peko ti Zabolo? Nyen la ayeke si ande na ala?

⁷ Gbâ ti a-ange nga na azo amû peko ti Satan Zabolo. So ala ke yanga ti Nzapa, ala ga mbage ti hale ti ngbo ni. Me Nzapa ayeke futi ala na Satan kue na ngoi so lo leke.—Dan. 2:44; aRom. 16:20.

8. Nyen la Jésus asara lani na ngu 1914? (Bâ nga afoto.)

⁸ Ngbanga ti nyen la e peut ti duti sûr so zendo so Jéhovah amû ti futi Satan na azo kue so amû peko ti lo ayeke ga ande tâ tënë? Na ngu 1914, Jésus akomanse ti sara bira na Satan na asioni yingo ti lo na lo bi ala na ndö ti sese (Apoc. 12:​7-9). Bira so apassé na yayu me aye ti pekoni aga juska na sese ge. Bible atene: “Mawa na sese nga na ngu-ingo, ngbanga ti so Zabolo adescend na mbage ti ala, lo yeke na kota ngonzo, ndali ti so lo hinga so lo yeke na ngoi mingi pëpe.” (Apoc. 12:12). Ngbene ye na ngu 1914, ye so Satan ayeke gi ayeke ti pusu gbâ ti azo ti mû peko ti lo ndani la aye ti sioni ahon ndö ni na yâ ti dunia laso. Me fafadeso, Jésus ayeke zi Satan so akomande dunia so na lo yeke futi azo kue so amû peko ti lo (Apoc. 6:2). Jésus ayeke zi zonga kue so Satan abi na ndö ti iri ti Jéhovah biani biani (Ps. 45:​4-6). Na azo kue ayeke hinga so Jéhovah ayeke Nzapa ti tâ tënë.—Ézéch. 38:23.

Kozo bira so amû sese kue: U.S. National Archives photo; bombe: USAF photo; mbeni kobela amû ndo: blvdone/stock.adobe.com; riot: inhauscreative/E+ via Getty Images

NZAPA TI TÂ TËNË AYEKE BUNGBI AZO KUE SO AYE TÂ TËNË

9. Azo wa la Jéhovah angbâ ti bungbi ala laso?

⁹ Juska ti si kâ, Jéhovah angbâ ti bungbi “aye kue oko na yâ ti Christ, aye so ayeke na yayu na aye so ayeke na sese.” (aÉph. 1:10). “Aye so ayeke na yayu” aye ti sara tënë ti aChrétien so Jéhovah asoro ala ti komande legeoko na Christ na yayu. “Aye ayeke so na sese” aye ti sara tënë ti azo so ayeke wara fini ti lakue lakue na yâ ti Paradis na ndö ti sese. Azo so kue ayeke voro Jéhovah ayeke sara ngangu kue ti aidé azo ti manda tâ tënë na ndö ti Jéhovah nga ti fa na ala so Satan ayeke sioni zo ti mvene.

10. Nyen la Jéhovah asara ti aidé azo ti hinga tâ tënë? (Apocalypse 14:​6, 7).

¹⁰ Ti wara azo so aye ti hinga tâ tënë na ndö ti Nzapa, Jéhovah ahunda na awakua ti lo ti fa tâ tënë na ndö ti lo na yâ ti dunia kue. Ade a sara mara ti kota kua ti fango tënë so lâ oko ape. (Diko Apocalypse 14:​6, 7.) Atâa so Jéhovah asara kua na azo ti fa nzoni tënë so, a-ange nga kue ayeke mû mbage na kua ti bungbingo azo so aye ti hinga Nzapa ti ga na yâ ti congrégation ti aChrétien. Na lege ti kua ti fango tënë so, a yeke sigi na nda ti amvene ti Babylone, Ngangu gbata, so ayeke abungbi ti vorongo nzapa ti wataka kue, so Zabolo ayeke sara kua na ni ti kangbi atënë ti mvene na ndö ti Jéhovah teti angu mingi (Apoc. 18:​2, 4). Fafadeso, a yeke futi abungbi ti vorongo nzapa ti wataka kue nga azo kue so aye Nzapa ti tâ tënë ayeke mû na lo gloire so lo lingbi tâ na ni.—Apoc. 17:16.

11. E peut ti hinga azo so ayeke voro Jéhovah na lege ni tongana nyen?

¹¹ Dutingo ti azo so aye tâ tënë ayeke nde nde, nga ala londo na yâ ti amara nde nde (Apoc. 7:​9, 10). Na ngoi so ala mä “nzoni tënë”, ala hinga so tâ tënë la na a nzere na ala ti bungbi oko na awakua ti Jéhovah (Marc 13:10). Tongana ngoi ayeke hon, yeke yeke a bâ polele azo so ayeke voro Jéhovah tongana ti so lo ye na ala so ayeke sara ni ape. Prophète Malachie atene lani atene: “Ala yeke kiri ande ti bâ kangbi so ayeke na popo ti zo ti mbilimbili na zo ti sioni, na kangbi so ayeke na popo ti zo so ayeke sara kua na Nzapa na zo so ayeke sara kua na lo pëpe.” (Mal. 3:18). Na lege ti sarango ye ti awakua ti Jéhovah nga na fango tënë ti ala, ala fa so ala yeke voro Nzapa ti tâ tënë.

12. Tongana nyen la kua ti fango tënë ayeke sara si ye so Jéhovah aleke na bê ti lo ti sara aga tâ tënë?

¹² So e yeke fa “nzoni tënë ti Royaume”, e yeke sara ye alingbi na yanga so Jésus amû nga na oko ngoi ni e yeke sara si mbeni prophétie ti Bible aga tâ tënë (Mat. 24:14; 28:​18-20). Ye so asara si azo na yâ ti dunia kue angbâ ti ga adisciple ti Christ na ala yeke ku kungo ti voro Nzapa ti tâ tënë teti lakue lakue. So pendere pasa la e yeke na ni ti mû maboko ti sara si ye so Nzapa aleke na bê ti lo ti sara aga tâ tënë!

E PEUT TI DUTI SÛR SO JÉHOVAH AYEKE SARA YE ALINGBI NA ZENDO TI LO

13. Azo wa la mbilimbili Satan ayeke sara ye ti ngangu na ala? Ngbanga ti nyen?

¹³ Satan Zabolo ayeke na kota ngonzo ndali ti so lo hinga so ‘ngoi angbâ mingi ape’ ti tene a futi dunia ti lo (Apoc. 12:​12, 13). Lo yeke sara ye ti ngangu mbilimbili na aChrétien so a soro ala ti gue na yayu “so ayeke bata acommandement ti Nzapa nga so ayeke na kusala ti fango tënë na ndö ti Jésus.” (Apoc. 12:17; 14:12). Lo yeke sara nga ye ti ngangu na azo so ayeke mû maboko na ala.

14. Nyen la ayeke passé ande na ngoi so Satan ayeke ga na bira na terê ti awakua ti Jéhovah? (Bâ nga foto.)

¹⁴ Na peko ti so a futi Babylone, Ngangu gbata, azo ti Satan ayeke ga na bira na terê ti awakua ti Jéhovah. Ye so ayeke sara si Harmaguédon akomanse (Apoc. 16:​13, 14, 16). Jésus na aturugu ti yayu ayeke sö awakua ti Jéhovah nga ala yeke futi tanga ti azo ti Zabolo so angbâ na yâ ti dunia (Apoc. 19:​19-21). A yeke futi asioni zo nga na azo ti mvene kue (Apoc. 21:8). Azo kue ayeke hinga ande so Jéhovah ayeke sara ye lakue na lege ni nga lo yeke tene lakue gï tâ tënë.

15. Ngbanga ti nyen la e peut ti duti sûr so aye so Jéhovah amû zendo ti sara, lo yeke sara ni? (Ésaïe 65:​16, 17). (Bâ nga foto.)

¹⁵ Laso na yâ ti dunia kangbi ayeke mingi ahon ti kozo. Me grâce na mungo maboko ti Jéhovah awakua ti lo angbâ beoko. Jéhovah angbâ ti ga na azo so aye tâ tënë na yâ ti sewa ti lo. Mbeni ye oko apeut ti kanga lege na Jéhovah ape ti sara tufa na ndö ti azo ti lo nga na ndö ti kua so ala yeke sara. (Diko Ésaïe 65:​16, 17.) E peut ti duti sûr so azendo so Jéhovah amû ayeke ga tâ tënë. Tënë ti bazengele Paul so ayeke na aRomain 8:​38, 39 adë bê ti e. Versê ni atene: “Atâa kuâ, wala fini, wala a-ange, wala agouvernement, wala aye so ayeke dä fadeso, wala aye so ayeke ga ande, wala angangu, wala yongo ti ye na nduzu, wala lingo ti ye na gbe ni, wala mbeni ye nde so a leke alingbi ande ti kangbi e na ndoye ti Nzapa pëpe, ndoye so ayeke na yâ ti Christ Jésus Seigneur ti e.”

16. Ngbanga ti nyen la mo zia bê ti mo kue na Jéhovah?

¹⁶ E yeke na araison kue ti zia bê ti e na Jéhovah, Nzapa ti tâ tënë. Lo la lo créé e. Lo ye e mingi. Lo ngbâ ti ga na gbâ ti azo na yâ ti dunia kue ti sara na lo na tâ lege ni (És. 60:22; Zach. 8:23). Lo yeke sara si azendo ti lo kue aga tâ tënë nga lo yeke zi Satan si mbeni zo ti mvene oko angbâ na yâ ti dunia ape. Zia e tene mara sambela so David atene, so lo tene: “Zia si a sepela Jéhovah Nzapa, . . . so gï lo oko la ayeke sara aye so apika bê. Zia si a gonda iri ti lo, so ayeke ye ti gloire, lakue lakue; zia si gloire ti lo amû ndö ti sese kue.”—Ps. 72:​18, 19.