Zia pëpe si mbeni ye agboto lê ti mo

1-2. Tongana nyen la mbeni ye so ayeke kota ye apeut ti ga ye so agboto lê ti e senge senge?

LAWA la mo sara effort ti zia lege ti mbeni ye so agboto lê ti mo senge senge? Peut-être mo ngbâ lani ti sara mbeni ye na mbeni ye agboto lê ti mo senge senge na mo doit ti bâ nyen la ayeke kota ye. Na tapande, bâ so mo yeke kpe na oto, na téléphone ti mo asonné. Peut-être mo bâ so a yeke kota ye ti mû téléphone ni, me so mo yeke kpe na oto, mo bâ so téléphone ni ayeke gboto lê ti mo senge senge, me kpengo na oto ni la yeke kota ye mingi.

² Lâ na lâ, e yeke na gbâ ti aye ti sara so ayeke akota ye. Me e hinga so aye so ayeke akota ye mingi ahon atanga ni kue ayeke aye so e yeke sara ti voro na Jéhovaha (Mat. 6:33). Legeoko tongana azo ti kpengo na oto so ayeke sara ye na hange mingi, e awakua ti Jéhovah e yeke gi ti hinga aye so apeut ti kanga lege na e ti zia Jéhovah kozo na yâ ti fini ti e.—aProv. 4:25; Mat. 6:22.

3. Article so ayeke aidé e tongana nyen?

³ E kue, e ye ti tene mbeni ye agboto lê ti e na terê ti kua ti Jéhovah ape, me aye ayeke mingi so apeut ti gboto lê ti e (Luc 21:​34-36). Tongaso, ti zia li ti e na ndö ti kua ti Jéhovah, e yeke gbu li ti e na ndö ti aye ota: (1) aye so apeut ti gboto lê ti e senge senge (2) tongana nyen la Jésus akanga lege na aye so apeut ti gboto lê ti lo, nga (3) tongana nyen la e peut ti kanga lege na aye so apeut ti gboto lê ti e laso.

AYE SO APEUT TI GBOTO LÊ TI E

4-6. Aye wa la apeut ti gboto lê ti e hio?

⁴ E yeke na aye so ayeke akota ye so e doit ti bâ lege ni. Na tapande, peut-être e yeke na kpale ti seni wala ambeni ye ti sewa so e doit ti bâ lege ni wala ambeni ye so abâ e wani. A yeke tâ tënë so aye ni so ayeke akota ye so e doit ti bâ lege ni. Me eskê a peut ti ga ye so agboto lê ti e? En, a peut ti gboto lê ti e tongana gï ni la e gbu li na ndö ni nga a mû ngoi nga na ngangu ti e kue.

⁵ Na ndö ni mingi ti e ayeke vivre na yâ ti akodro so ayeke sara aye ti ngangu na azo dä, a yeke ngangu ti wara nginza ti vivre na ni wala mbeni kobela ayeke mû ndo hio hio (2 Tim. 3:1). Tongana mara ti ye tongaso asi na e, e peut ti gi bê ti e ahon ndö ni nga gï ni la e yeke pensé dä.

⁶ Peut-être e hinga azo so mara ti akpale tongaso asara si gigi aga ngangu na ala. A yeke na lege ni so vundu asara ala ndali ni ndali ti so Jéhovah aleke e azo ti bâ gï pasi lakue ape. Ambeni zo abâ so ala peut ti vivre nzoni tongana ti kozo ape, a sara si ala bi terê ti ala gï na yâ ti angia ti girisa na akpale ti ala ni. Nyen la e peut ti sara tongana mara ti ye tongaso asi na e? Zia e bâ ye so e peut ti manda na lege ti tapande ti Jésus, so ayeke aidé e ti kanga lege na aye so apeut ti gboto lê ti e si e voro Jéhovah ape.

NYEN LA JÉSUS ASARA LANI TI NGBÂ TI ZIA YE SO BÊ TI JÉHOVAH AYE NA KOZO NDO?

7. Aye wa la apeut lani ti gboto lê ti Jésus?

⁷ Gbâ ti aye apeut lani ti gboto lê ti Jésus, na tapande akpale so ayeke na yâ ti kodro nga na aye ti poroso. Na ngoi ti lo, azo mingi ayeke lani awayere nga terê ti ala ason (Mat. 14:14; Marc 14:7). A-Romain nga na amba ti ala aJuif asara ye lani na ala na lege ni ape. Tongaso, na ngoi so azo abâ so Jésus ayeke na ngangu ti sara amiracle, ala ye ti mû lo gbia ti ala (Jean 6:​14, 15). Na ndö ni, Satan atara lani Jésus nga lo gi ti mû Jésus gbia ti dunia. Jésus apeut lani ti komanse ti pensé so a yeke nzoni ti ga gbia na ngoi ni so (Mat. 4:​8, 9). Mbeni lâ, même bazengele Pierre so ayeke kota kamarade ti Jésus awa lo ti sara pëpe mbeni ye so asara si gigi aga ngangu na lo. Lo tene: “Bâ mawa ti terê ti mo, Seigneur.”—Mat. 16:​21, 22.

8. Nyen la a-aidé lani Jésus ti ngbâ ti zia ye so bê ti Jéhovah aye na kozo ndo?

⁸ Nyen la a-aidé lani Jésus ti ngbâ ti zia ye so bê ti Jéhovah aye na kozo ndo? Aye ota la a-aidé lani lo. Kozoni, lo pensé tongana Jéhovah (Jean 8:28; 14:9). Use ni, lo sara kua ti Jéhovah mingi (Mat. 9:35). Nga ota ni, lo hinga polele ye so ayeke biani kota ye (Jean 4:34). Lo ke lani na kuru go ye so Satan aye ti mû na lo, lo hinga lani so Pierre aye ti aidé lo me wango ti Pierre ni ayeke ye so bê ti Jéhovah aye la ape (Mat. 4:10; 16:23). Jésus azia lani pëpe si apensé ti azo, atënë so ala tene wala aye so ala sara akanga lege na lo ti sara ye so bê ti Nzapa aye. Ti vrai ni, aye so apeut ti gboto lê ti e apeut ti duti nde na ti Jésus, me tongana e mû tapande ti lo, e peut ti kanga lege na aye so apeut ti gboto lê ti e senge senge.

E PEUT TI ZIA JÉHOVAH NA KOZO NDO TONGANA NYEN?

9. Ti “ngbâ ti gi ti hinga wala ye so bê ti Jéhovah aye ayeke nyen” aye ti tene nyen? (aÉphésien 5:17).

⁹ Manda ti pensé tongana Jéhovah. Tongana mo sara tongaso ayeke aidé mo ti “ngbâ ti gi ti hinga wala ye so bê ti Jéhovah aye ayeke nyen.” (Diko aÉphésien 5:17.) Tongana e diko Bible nga e gbu li na ndö ni, e peut ti hinga ye so anzere na Jéhovah. Même tongana Bible atene mbeni tënë na ndö ti dutingo ti e ni ape, e peut ti hinga ye so anzere na Jéhovah. E yeke hinga ni tongana nyen? E yeke sara ni tongana e manda Bible nzoni ti hinga bango ndo ti Jéhovah na ndö ti aye nga e duti nduru ti sara aye alingbi na aye so e manda.

10. Nyen la apeut ti aidé e ti hinga pensé ti Jéhovah?

¹⁰ E peut ti hinga pensé ti Jéhovah tongana e manda Bible nga e gbu li ti e na ndö ti sarango ye ti lo na mbage ti azo (Jér. 45:5). Tongana e diko mbeni mbaï so asara tënë na ndö ti sarango ye ti Jéhovah na mbage ti azo, e peut ti hunda terê ti e na mara ti ahunda so: ‘Mbaï so afa na mbi nyen na ndö ti Jéhovah? Tongana nyen la mbi peut ti pensé tongana Jéhovah?’ Tâ tënë, fason so Jéhovah ayeke pensé na ni ayeke nde mingi na ti e (És. 55:9). Tongaso, a yeke na lege ni ti tene e bâ ndo na mbage ti lo ti fa na e ye so bê ti lo aye (Ps. 143:10). Nga e yeke sambela lo ti aidé e ti comprendre fason so lo yeke pensé na ni nga ti pensé tongana lo.—1 Jean 5:14.

11. Nyen la Jéhovah aye ndali ti e?

¹¹ Tongana e gi ti pensé tongana Jéhovah, e yeke comprendre so lo ye ape ti tene e zia si mbeni ye agboto lê ti e senge senge tongaso si e fa so e yeke nduru ti ku futingo aye ti ngoi so (Mat. 24:44). Lo ye ape ti tene agingo bê ahon ndö ti e si e découragé (Mat. 6:​31, 32). Tongaso, na ngoi so e yeke gi bê ti e ndali ti seni ti e, kua ti e, azo ti sewa ti e, akpale ti e wani wala akpale ti sewa ti e, Jéhovah ayeke aidé e. Tongana e hunda lo ti mû na e ndara nga na ngangu ti hon ndö ti akpale ti e, lo yeke mû ni na e.—Ps. 55:22; aProv. 3:​5-7.

12. Nyen la ayeke aidé e ti ngbâ ti duti na ngia même tongana e bâ asioni ye so ayeke passé na yâ ti dunia? (Matthieu 5:3).

¹² Ngbâ ti duti na aye mingi ti sara na yâ ti kua ti Jéhovah. E kue a yeke si ka so e gi bê ti e ndali ti asioni ye so ayeke passé na yâ ti dunia so e peut ti kanga lege na ni ape. Tongaso, ti zia si aye ni so agboto lê ti e ape, a yeke nzoni e duti na gbâ ti aye ti sara na yâ ti kua ti Jéhovah. Tongana e ngbâ ti sara ye kue so e peut ti sara ti duti na nzoni songo na Jéhovah, e yeke duti na ngia ndali ti so a yeke ye so Jéhovah aleke e ndali ni la. (Diko Matthieu 5:3.) Tongana e yeke manda Bible nga e sara ye kue so e peut ti sara na yâ ti kua ti Jéhovah, e yeke duti na nzoni songo na lo. Sarango tongaso anzere na Jéhovah nga afa so e sara kua nzoni na ngoi ti e.—aProv. 23:15.

13. Tongana nyen la e peut ti ‘sara kua nzoni na ngoi ti e?’

¹³ E aChrétien, e leke na bê ti e ti ngbâ ti ‘sara kua nzoni na ngoi ti e’. (aÉph. 5:​15, 16). Versê so awa e ti sara kua nzoni na ngoi ti e lâ na lâ, a wa nga e ti sara kua nzoni na ngoi ti e ndali ti so Jéhovah aga nduru awe ti futi sioni dunia so. E yeke sara kua nzoni na ngoi ti e tongana nyen? Tongana e mû ngoi mingi ti diko andangba sango na ndö ti asioni ye so ayeke passé na yâ ti dunia so, a yeke gboto lê ti e senge senge, e peut ti découragé nga e peut ti yapu na vorongo Jéhovah encore ape. Tongaso, tongana e mû ngoi mingi ape ti diko asango wala ti bâ ni na télé ayeke ga na e kpale ape. Tongana e sara tongaso, e yeke wara ngoi nga na ngangu ti sara kua ti Jéhovah. E hinga nga so tongana e gi ti fa tënë mingi ahon ti kozo e yeke wara gbâ ti afini vizite. E hinga so ti gi alege kue so azi ti aidé azo ti “sö fini ti ala nga ti wara tâ hingango ye na ndö ti tâ tënë” ayeke nga kota ye mingi.—1 Tim. 2:4.

14. Na lege wa la ti ngbâ ti duti na aye mingi ti sara na yâ ti kua ti Jéhovah ayeke aidé e? (Bâ nga foto.)

¹⁴ Tongana e ngbâ ti duti na aye mingi ti sara na yâ ti kua ti Jéhovah ayeke aidé e ti girisa ape ndani so asioni ye ayeke passé na yâ ti dunia. Tongana e bâ aye ti ngangu, yere nga na akobela so ayeke mû ndo na yâ ti dunia, e yeke gi bê ti e ahon ndö ni ape ndali ti so e hinga so Bible atene so aye ni so ayeke si. Jéhovah ayeke hunzi ande aye kue nga lo yeke sara si sese aga Paradis. Me juska ti si kâ, e hinga so Jéhovah ayeke aidé e ti gbu ngangu na asara si li ti e aga kirikiri ape.—Ps. 16:8; 112:​1, 6-8.

15. Tongana e ‘bata bibe ti e nzoni’ ayeke aidé e ti sara nyen? (1 Pierre 4:7).

¹⁵ Hinga ye so ayeke biani kota ye. Ye so agbu bê ti azo mingi laso ayeke sarango ngia, me ala pensé ape so a ga nduru awe ti futi dunia so. Atâa so ngia ayeke sioni ape, e doit ti ‘bata bibe ti e nzoni’ si e sara ye tongana ti azo ti dunia so ape. (Diko 1 Pierre 4:7.) Ti bata bibe ti e nzoni aye ti tene nyen? A ye ti tene ti gi ti bâ yâ ti aye nzoni, ti duti na nzoni bango ndo na ndö ti angia nga ti mû anzoni desizion. Tongana e sara kua nzoni na ngoi ti e afa so e pensé tongana Jéhovah nga e hinga ye so ayeke biani kota ye.—2 Tim. 1:7.

16. Nyen la Jésus azia lani li ti lo mingi na ndö ni na ngoi so lo ga nduru ti kui?

¹⁶ Jésus agirisa lâ oko ape aye so ayeke akota ye mingi. Même na ngoi so lo ga nduru ti kui, lo hinga lani so ye so ayeke kota ye mingi ayeke ti tene lo ngbâ be-ta-zo na Jéhovah nga lo sara ye so bê ti lo aye. Ndani la lo sambela na bê ti lo kue. Me adisciple ti lo asara lani tongaso ape, ala tï na lango. Vundu so asara ala asara si ala woko kue.—Luc 22:​39-46; Jean 19:30.

17. Ngbanga ti nyen la gbâ ti azo ayeke sara kua na aréseau sociaux? Kpale wa la apeut ti ga na pekoni? (Bâ nga foto.)

¹⁷ Legeoko tongana adisciple ti Jésus, na ambeni ngoi vundu apeut ti sara e. Aye so ayeke passé na lâ ti nda ni so apeut ti ga na e gingo bê. Ye so asara si gbâ ti azo ayeke sara kua na aréseau sociaux. Na tapande, ala yeke sara kua na ni ti tokua afoto na akamarade ti ala nga na afami ti ala nga ti fa na ala aye so ayeke si na yâ ti fini ti ala. Ala yeke sara nga kua na ni ti bâ gbâ ti avidéo nga ti sara ajeu. So asango nga na avidéo ayeke mingi na ndö ti aréseau sociaux, azo ayeke sara ngangu ti gue dä lâ oko oko na amû mingi ti ngoi ti ala. Ti tene mara ti ye tongaso asi na e ape, a yeke nzoni e hunda terê ti e: ‘So mbi yeke sara kua na aréseau sociaux, eskê aga na mbi anzoni ye wala asara si a yeke ngangu na mbi ti hinga aye so ayeke biani akota ye?’

18. Na ngoi so e yeke soro angia ti e, ngbanga ti nyen la e doit ti bâ yâ ti aye nzoni?

¹⁸ A yeke nzoni ti sara ngia na ambeni ngoi, me e doit nga ti soro nzoni ye so e yeke bâ wala ngia so e yeke sara atâa na télé wala na ndö ti Internet. Ndali ti so tongana e hunzi ti bâ mbeni vidéo na ndö ti Internet, mbeni ayeke sigi na lê ti écran na bê ti e apeut ti pusu e ti bâ avidéo ni na peko ti terê. Na yâ ti ambeni vidéo ni, a yeke fa sarango ye ti ngangu na zo wala lango-sioni. A yeke ye so asi na mbeni ita-koli na Asie. Na tongo nda ni, lo yeke bâ anduru vidéo na ndö ti Internet. So lo yeke bâ lakue avidéo so ayeke sigi na peko ti terê, a gue ngbii lo komanse ti bâ avidéo so a fa asioni ye na yâ ni. Na nda ni, lo komanse ti bâ porno. Ye ti nzoni ni ayeke so a-ancien nga akota kamarade ti lo a-aidé lo ti changé. Lo zi na yâ ti téléphone ti lo a-application so lo yeke bâ ka na avidéo ni nga lo mû desizion ti sara kua mingi ape na téléphone ti lo. Ye so asi na ita so afa ndani so e doit ti bâ yâ ti aye nzoni na ngoi so e yeke soro angia ti e.

19. Nyen la apeut ti si tongana e mû ngoi mingi ti sara ngia?

¹⁹ E doit nga ti bâ yâ ti aye nzoni na ngoi so e yeke wu terê ti e wala e yeke sara ngia. E kue na ambeni ngoi, e bezoin ti wu terê ti e; a yeke sara e nzoni nga a yeke aidé e ti duti na nzoni seni. Me tongana e mû ngoi mingi ndali ni, e yeke wara ngoi ape ti sara na aye so ayeke biani akota ye mingi (aPhil. 1:10). E kue e doit ti soro ye so e yeke sara nga ngoi oke la e yeke sara na ni. Na ngoi so mo yeke soro aye so mo yeke sara, hunda terê ti mo na ahunda so: ‘Eskê ngoi so mbi mû ti sara ngia wala ti wu terê ti mbi afa so mbi bâ yâ ti aye nzoni? Eskê mbi yeke sûr so aye so ayeke akota ye la mbi zia na kozo ndo? Eskê sarango ye ti mbi afa so “nda ti aye kue aga nduru awe”?’

20. Tongana e zia Jéhovah na kozo ndo, a yeke aidé e tongana nyen?

²⁰ Tongana e zia Jéhovah na kozo ndo, mbeni ye oko ayeke kanga lege na e ti sara kua ti lo ape (És. 48:17). Grâce na aide ti Jéhovah, e yeke gbu ngangu na yâ ti akpale so e wara. Aye so ayeke si na yâ ti dunia so ayeke sara si li ti e aga kirikiri ape nga e yeke zia li ti e gï na ndö ti sarango angia ape. Tongaso, zia e leke na bê ti e ti ngbâ ti pensé tongana Jéhovah, ti duti na aye mingi ti sara na yâ ti kua ti lo nga ti hinga ye so ayeke biani kota ye. Tongana e sara tongaso, e yeke zia Jéhovah na kozo ndo nga e yeke “gbu fini so ayeke tâ fini ni biani.”—1 Tim. 6:19.