Sara confiance na Jéhovah Gbia ti dunia kue

1. Angangu kpale wa la asi lani na Job?

JOB, mbeni zo ti giriri so ayeke na mabe, aperdre aye ti lo kue: Lo perdre amolenge ti lo, terê ti lo ason ngangu nga lo perdre amosoro ti lo na ndö ni iri ti lo abuba. Azo so atene ala yeke “akamarade” ti lo atene na lo atënë so asara si lo découragé. Vundu ahon même ndö ti wali ti lo na lo wa lo ti “zonga Nzapa na ti kui!” (Job 2:9; 15:​4, 5; 19:​1-3). Akpale so kue apeut lani ti sara si Job ayeke na confiance na tâ Nzapa encore ape, a peut nga ti sara si lo yeke na kite so Jéhovah apeut ti bata azo so andoye lo nga ayeke sara na lo.

2-3. Na ngoi so e yeke bâ pasi, nyen la apeut ti ga na li ti e? Nyen la e peut ti manda na lege ti mbeti ti Job?

² E yeke vivre na “ngoi ti akpale so ayeke ngangu na zo ti kanga bê na yâ ni.” (2 Tim. 3:1). Tongaso, tongana ti Job e peut ti wara angangu kpale. Tongana e wara gbâ ti akpale na peko ti terê na ambeni ngoi, vundu apeut ti sara e nga e gi bê ti e so gigi ti e ayeke ga nzoni lâ oko ape. Mara ti akpale tongaso apeut ti sara si ambeni zo ahunda terê ti ala wala Jéhovah ayeke pensé na ala.

³ Tongana mo wara mara ti apensé tongaso, découragé ape. Job ahinga lani so Jéhovah ayeke sö azo so ayeke be-ta-zo na lo. E nga kue e peut ti duti na mara ti confiance tongaso na Jéhovah. Ti aidé e, zia e gbu li na ndö ti mbeti ti Job ti bâ akota ye use so e peut ti manda na yâ ni. Kozoni, Jéhovah oko la ayeke Gbia ti dunia kue. Use ni, Jéhovah ayeke na ngangu ti sara si ye so lo tene asi, lo yeke bata nga e na lege so lo aidé e ti ngbâ ti duti na nzoni songo na lo.

SATAN ALÏ NA POPO TI ALA

4. Nyen la apassé na ngoi so Jéhovah na a-ange asara mbeni bungbi?

⁴ Mbeni lâ, Jéhovah na ‘amolenge ti lo’ asara mbeni bungbi na yayu. Mbaï ni atene: “Satan nga kue aga na popo ti ala.” (Job 1:6). Kozoni ti tene Bible afa iri ti zo so amû li ni ti ke Jéhovah la. Iri ti lo ayeke “Satan” wala “zo so ayeke dö sese na zo.” Na ngoi ni so, Satan ayeke be-ta-zo na Nzapa encore ape. Lo ga wato ti Jéhovah, wato ti a-ange nga wato ti azo kue so ayeke be-ta-zo. Tënë so Jéhovah atene na ndö ti Satan na Genèse 3:15 asara si e hinga so lo yeke encore pëpe na yâ ti sewa ti Jéhovah so ayeke na yayu so aye ti sara tënë ti “wali ni”.

5. Bungbi so a sara na yayu so afa na e nyen?

⁵ Jéhovah asara si a sû na yâ ti Bible ye so apassé na yayu na ngoi ti bungbi so. Satan afa polele so lo yeke sioni zo nga lo tene mvene na iri ti awakua ti Jéhovah. (Job 1:9; bâ Apocalypse 12:10.) So Jéhovah asara si a sû na yâ ti Bible aye so apassé na yayu, a fa so lo sara kua nzoni na komandema ti lo. A fa nga na e so, so ngangu ti Jéhovah ahon angangu kue, lo la lo yeke fa ye so azo apeut ti sara wala ye so ala peut ti sara ape.

JÉHOVAH AFA NDO SO ZO APEUT TI HON NI APE

6. Nyen la afa so Jéhovah la amû li ni na ngoi ti bungbi so a sara na yayu? (Job 1:​7, 8).

⁶ Diko Job 1:​7, 8. Jéhovah ato nda ti lisoro ni na lege so lo hunda Satan, lo tene: “Mo bâ wakua ti mbi Job?” So Jéhovah la akomanse lisoro ni afa so lo la lo mû li ni na ngoi ti bungbi ni nga lo hinga lani so Satan aye ti sara sioni na Job. Zia e bâ tongana nyen la Jéhovah asara kua na kota ngangu ti lo ti aidé Job.

7. Ti gue oko na Job 1:​10, 11, Satan atene nyen na ndö ti azo so ayeke voro Jéhovah?

⁷ Diko Job 1:​10, 11. Jéhovah ayeke Gbia ti dunia kue nga lo yeke sara kua na ngangu ti lo tongana ti so bê ti lo aye (Jér. 32:17; Dan. 4:35). Me atâa so kue, Satan atene so Jéhovah ayeke sara kua na ngangu ti lo na lege ni ape. Ti vrai ni, tënë so Satan ayeke tene lani ayeke so: Nzapa apete goro na azo, na tapande Job, la ala yeke voro lo. Satan atene nga so azo ayeke voro Jéhovah gï ndali ti so lo mû ye na ala. Jéhovah asara ye lani tongana nyen?

8-9. Nyen la Jéhovah amû lege na Satan ti sara? Nyen la lo mû lege na lo ti sara ape? Ngbanga ti nyen? (Job 1:12). (Bâ nga foto.)

⁸ Diko Job 1:12. Jéhovah asara kua na ngangu ti lo ti bata Job nga ti fa so lo yeke Nzapa ti ndoye so asara ye na lege ni, a yeke nga tongaso laso. Jéhovah azia lani lege na Zabolo ti tara Job, me lo fa na lo ndo so lo doit ti ngbâ dä. Nzapa atene na lo polele atene: “Mo yôro maboko ti mo na terê ti [Job] pëpe!” A-ange kue amä lani tënë so Jéhovah atene na Satan so. Satan apeut lani ape ti sara ye ahon ti so Jéhovah amû lege na lo ti sara.

⁹ Ye so Satan aleke lani ti sara atï tâ na ngu. Job angbâ lani be-ta-zo na Babâ ti lo ti yayu (Job 1:22). Ye oko, Satan ayeke kiri ti tara Job.

10. Ngbanga ti nyen la Jéhovah akiri azia lege na Satan ti tara Job? (Job 2:​2-6).

¹⁰ Diko Job 2:​2-6. Satan aye ti sara mbeni ye so ayeke tâ sioni mingi na Job ti kanga lege na lo ti voro Jéhovah. Satan atene so tongana Job abâ so lo yeke gue ti kui, ti vrai ni lo yeke zonga Nzapa. Ti leke tënë ni, Jéhovah azia lege na Zabolo ti sara sioni na koli be-ta-zo so. Me ge encore, Jéhovah afa ndo so Satan adoit ti ngbâ dä. Lo tene: “Mo mû fini ti lo pëpe!” Satan apeut lani ape ti sara ye ahon ti so Jéhovah amû lege na lo ti sara. Ge Nzapa afa encore so ngangu ti lo ahon ti Satan ndali ti so Satan apeut pëpe ti sara ye ahon ti so lo mû lege na lo ti sara.

JÉHOVAH AHUNZI PASI TI JOB

11. Na peko ti so akpale ti Job ahunzi, Jéhovah afuta lo tongana nyen? (Job 42:​10-13).

¹¹ Diko Job 42:​10-13. Na peko ti so Jéhovah abâ polele so Job angbâ be-ta-zo na lo, lo kanga lege na Satan ti kiri ti tara lo. Jéhovah azia lani lege na Satan ape ti ngbâ ti tara Job so ayeke wakua ti lo so lo ye lo mingi. Satan ayeke na ngangu ape ti kanga lege na Jéhovah ti bata Job nga ti sara tufa na ndö ti lo.

12. Fa tapande ti mbeni ye so Jéhovah asara ti sö awakua ti lo so ayeke be-ta-zo na lo.

¹² Jéhovah asara kua na ngangu ti lo ti sö gbâ ti awakua ti lo na lâ ti nda ni so. Na tapande na ngu 1945, aturugu aforcé aTémoin ti Jéhovah 230 ti sara mbeni yongoro tambela so ayeke ngangu ti londo na mbeni da ti kanga na Allemagne ti gue na yanga ti Ngu-ingo ti tene a fâ ala. Me ala kue asö kuâ. Aita ni atene so: “Ala bâ so Jéhovah asö ala tongana ti so lo sö lani aHébreu ota na yâ ti four ti wâ so fion ti wâ ni afun même na terê ti ala ape. Ala nga kue asigi na yâ ti mbeni ngangu kpale, me mabe ti ala akpengba ahon ti kozo, Jéhovah la amû lani na ala ngangu. Ala bâ nga so Jéhovah asö ala tongana ti so lo sö lani Daniel na dû ti abamara. Ti londo na ngoi ni so ti gue na ni, ala leke na bê ti ala ti ngbâ ti sara na Jéhovah teti lakue lakue. Ala tene so kota futa so ala wara ayeke so ala ngbâ ti sara na Jéhovah.”—Bâ Daniel 3:27; 6:22.

13. Tongana mo wara akpale nyen la mo peut ti duti na confiance na ni? (Bâ nga afoto.)

¹³ E kue na ambeni ngoi, e peut ti wara akpale so ayeke mo bâ mo tene a bi e na yâ ti dû ti abamara (1 Pi. 5:​8-10). Na ambeni ngoi, e peut ti bâ so a kinda e. Na angoi tongaso, e peut ti hunda terê ti e wala akpale ti e ayeke hunzi ande. Tongana mara ti ye tongaso asi na e, ti dabe ti e na tapande ti Job apeut ti aidé e. E peut ti duti biani na confiance na ngangu so Nzapa ayeke na ni ti hunzi pasi ti e atâa laso wala na yâ ti fini dunia. Tongana ngoi so lo leke alingbi, lo yeke hunzi apasi ti e.

JÉHOVAH AYE AWAKUA TI LO SO AYEKE BE-TA-ZO

14-15. Nyen la Jéhovah aye ti sara na awakua ti lo so ayeke be-ta-zo? Ngbanga ti nyen? (Job 14:15). (Bâ nga foto.)

¹⁴ Diko Job 14:15. Babâ ti e ti yayu aye mingi azo so ayeke be-ta-zo na lo. So lo ye ala mingi, tongana ala kui, lo yeke kiri na ala na fini. Tongana lo kiri na ala na fini na yâ ti fini dunia, ala yeke duti ande na ngia mingi.—És. 65:17.

¹⁵ Atâa so Job angbâ lani ti vivre na yâ ti dunia so Satan la akomande ni, Bible atene so Jéhovah asara si lo wara seni nga lo mû na lo aye mingi ahon ti so lo yeke na ni kozo ti tene Satan atara lo. Anzoni ye so Job awara ayeke kete yanga ti ye so Jéhovah ayeke mû na lo ande na yâ ti fini dunia. Jéhovah aye ti tene azo so ayeke be-ta-zo aduti biani na ngia nga gigi anzere na ala. Lo yeke futa ande azo kue so ayeke be-ta-zo na lo nga ala yeke ngbâ na fini lakue lakue na yâ ti fini dunia (Apoc. 21:​3, 4). So lo yeke Gbia ti dunia kue, lo yeke na nzara ti sara ni. Tënë so adë bê ti e na ngoi so e yeke na yâ ti kpale.

16. Mbeni raison wa la e yeke na ni ti duti na confiance so Jéhovah la ayeke Gbia ti dunia kue?

¹⁶ Na peko ti so Job ate gigi aninga, lo kui. Me Jéhovah ayeke na ngangu ti kiri na lo na fini ndali ti so ngangu ti lo ahon angangu kue nga lo la lo yeke Gbia ti dunia kue (Deut. 32:39). Tongaso, zo oko apeut ti kanga lege na lo ape ti zingo azo so lo ye ala. Na lo yeke sara ni na ngoi so lo leke awe.—aRom. 8:​38, 39.

ZIA BÊ TI MO KUE NA JÉHOVAH

17. Nyen la afa so a-effort so Satan asara ti futi awakua ti Jéhovah atï na ngu?

¹⁷ Ye so asi na Job afa na e akpengba raison ti sara confiance kue na Jéhovah. E kiri singila na Jéhovah so aye kue so Satan asara ti futi na awakua ti lo atï na ngu. So laso wungo ti awakua ti Jéhovah asi kutu gumbaya afa so Jéhovah la ayeke Gbia ti dunia kue. Ge encore e bâ so, atâa aye ti bira kue so azo aleke ti sara na bira na awakua ti Jéhovah ayeke sara ye oko na ala ape (És. 54:17). Amara nga na abungbi ti vorongo nzapa so ayeke na ngangu mingi awara lege ape ti futi awakua ti Jéhovah so na bango ni mbeni ye ti bata ala ayeke dä ape. Ye oko apeut ti kanga lege na e ape ti ngbâ ti fa ye na azo na ndö ti Jéhovah nga ti fa so Satan ayeke zo ti mvene nga zo ti fango zo. Même kuâ apeut ti kanga lege na e ape ndali ti so Jéhovah ayeke kiri na fini azo kue so ayeke be-ta-zo na lo.—Os. 13:14.

18. Ngbanga ti nyen la e bezoin ti sara mbeto ti ye so ayeke si kekereke ape?

¹⁸ Tongana e gbu li na ndö ti ye so asi na Job, mabe ti e ayeke kpengba na mbeto ti kekereke ayeke sara e ape. Na ngoi ti kota ye vundu, na bango ni, awakua ti Jéhovah ayeke duti ande tongana azo so a yeke ngangu ape ti sara sioni na ala na a yeke mo bâ mo tene Satan na azo ti lo asö benda na ndö ti ala. Me Jéhovah ayeke sara ande kua na kota ngangu ti lo tongana ti so lo sara lani kua na ni ti bata Job. Lo yeke zia ande ape si Satan afuti awakua ti lo biani biani. Ngoi so Jéhovah aleke ti hunzi pasi so Satan aga na ni na ndö ti azo ayeke pusu nduru nduru. A yeke bi ande lo na asioni yingo ti lo na yâ ti kota dû so alï mingi teti ngu saki oko (Luc 8:31; Apoc. 20:​1-3). Na nda ni, a yeke futi Satan na azo kue so amû peko ti lo (Apoc. 20:10). Tongana ti so Jéhovah atene lani, a yeke neka ande li ti Satan, so ti tene a yeke futi lo biani biani teti lakue lakue.—Gen. 3:15; aRom. 16:20.

19. Futa wa la ayeke ku azo so azia bê ti ala kue na Jéhovah? (Bâ nga foto.)

¹⁹ E yeke ku kungo fini dunia so na yâ ni e yeke ga mbilimbili-kue nga e yeke duti biani na ngia. Gigi ayeke duti ande pendere mingi ahon ti so e peut ti imaginé ndali ti so Jéhovah atene: “Bâ, mbi yeke sara si aye kue aga fini.” (Apoc. 21:5). Tënë so aye ti tene nyen? A ye ti tene so Satan na asioni yingo ti lo ayeke wara lege ape ti sara sioni na azo wala ti pusu azo ti sara asioni ye; a yeke ti kozoni la ti tene ye tongaso asi ngbene ye na ngoi so Adam na Ève ake yanga ti Nzapa na yaka ti Éden. Azo ayeke wu ande pupu. Agingo bê so laso ayeke sara si azo alango ape ayeke duti dä encore ape. Azo so asö kuâ na Harmaguédon ayeke bâ ande gbâ ti amiracle, azo so terê ti ala ason ayeke wara sava nga azo so e ye ala so akui ayeke kiri na fini. Na ngoi ni so e yeke vivre ande na ngia tongana ti so Babâ ti e ti yayu aye lani na tongo nda ni.

20. Nyen la mo leke na bê ti mo ti ngbâ ti sara?

²⁰ Laso peut-être e yeke tingbi na akpale mingi, me e bezoin ti sara ye na mbeto ape si e ngbâ be-ta-zo. Tongaso, e ye ti ngbâ ti zia bê ti e kue na Jéhovah nga ti mä yanga ti lo ndali ti so lo la lo yeke Gbia ti e. Zia e fa so e ye Babâ ti e ti yayu nga e fa so atënë so Satan atene na ndö ti lo nga na awakua ti lo ayeke mvene. E peut ti duti sûr so tongana e ngbâ be-ta-zo na Jéhovah, pendere gigi ti kekereke ayeke ku e ndali ti so Jéhovah aye ti futa azo so ayeke be-ta-zo na lo na lo yeke sara ni.