Maï ‘kode ti mo ti fango ye na zo’ na fango tënë

1. Kode wa la e ye ti gi ti maï ni? Ngbanga ti nyen? (2 Timothée 4:2). (Bâ nga foto.)

JÉSUS atene lani na adisciple ti lo, atene: ‘Ala sara si azo aga adisciple. Ala fa na ala ti bata aye kue so mbi mû yanga na ala ti sara.’ (Mat. 28:​19, 20). Commandement so afa so aChrétien kue adoit ti duti azo so ayeke fa ye. Ti vrai ni, Jéhovah la ayeke gboto na mbage ti lo ‘azo kue so ayeke nduru ti yeda na tënë ni’ nga a-ange ayeke sara kota kua ti gue na e na mbage ti mara ti azo tongaso (Kus. 13:48; Jean 6:44; Apoc. 14:6). Me e bezoin ti hinga tongana nyen ti fa ye na azo na ndö ti Jéhovah. Bâ tapande ti bazengele Paul na Barnabas. Bible afa so na ngoi so ala yeke fa tënë lani na yâ ti synagogue na Iconium, ala “sara tënë na mbeni lege so asara si aJuif nga na aGrec mingi mingi aga azo so amä na bê.” (Kus. 14:1). Kite ayeke dä ape so Paul na Barnabas amaï lani ‘kode ti ala ti fango ye na zo.’ (Diko 2 Timothée 4:2.) A-Chrétien kue abezoin ti manda ti hinga tongana nyen ti fa ye na azo nzoni.

2. Ngbanga ti nyen la ambeni Chrétien apeut ti bâ so ala peut ti fa ye na azo nzoni ape?

² Ambeni zo apeut ti bâ so ala peut ti duti anzoni wafango ye ape ndali ti so ala gue na ekole ayo ape wala ala yeke na nzoni kode ti fa nda ti ye na azo ape. Ambeni koli so Bible asara tënë ti ala apensé nga lani so ala lingbi ape (Ex. 4:10; Jér. 1:6). Ambeni abâ so ala hinga ti fa ye nzoni ape ndali ti so ala yeke na gbâ ti azo ti manda Bible na ala ape tongana ti ambeni ita. Ti vrai ni, azo kue so e sara lisoro na ala la ayeke yeda ti hinga ye na ndö ti nzoni tënë ape. Atâa azo amä e wala ala mä e ape, a yeke pëpe ni la afa so e hinga ti fa ye nzoni. Tongana ti so e tene fade, Jéhovah na a-ange la ayeke gue na e na mbage ti azo so aye ti hinga ye na ndö ti nzoni tënë. Me atâa so kue, e ye ti sara kue ti fa tënë na mbeni fason so anzere na azo ti mä ni. Ti mû maboko na e ti sara ni, article so ayeke fa na e aye ota so e peut ti sara ti maï kode ti e ti fango ye na zo.

PENSÉ NA AZO SO AYEKE MÄ MO

3. Ngbanga ti nyen la Jésus awara lege ti ndu bê ti azo so amä lo?

³ Bible atene so Jésus ‘ahinga ye so ayeke na yâ ti bê ti zo.’ (Jean 2:25). Tënë so aye ti tene so Jésus ahinga ye so azo apensé nga ndani so ala pensé tongaso. Jésus ayeke lani na ngangu ti ndu bê ti azo so ayeke mä lo ndali ti so lo hinga abezoin ti ala. Jésus ahinga lani so azo abezoin ti tene a fa lege na ala nga a dë bê ti ala. Akota zo ti bungbi ti Nzapa ti aJuif asara lani si gigi akpengba na ala ndali ti gbâ ti andia so ala lu (Mat. 9:36; 23:4). Tongaso Jésus a-aidé azo ti tene gigi ti ala aga nzoni na lege ti aye so lo fa na ala. E wara aye so lo fa na yâ ti Fango ye ti lo na ndö ti hoto. Gbâ ti azo aye lani ti mä Jésus ndali ti so lo sara tënë na ndö ti aye so ala gi bê ti ala na ndö ni.

4. Tongana nyen la e peut ti fa so e pensé na azo? (Bâ nga afoto.)

⁴ E peut ti fa so e pensé na azo so e wara ala na lege so e gi ti comprendre aye so agbu bê ti ala. Gbâ ti asioni ye ayeke passé na yâ ti sioni dunia ti Satan so. Tongaso, azo kue so e wara ala ayeke na mbeni kpale so asara si ala gi bê ti ala wala ala bâ pasi. Tongana e girisa ni ape apeut ti aidé e ti zia terê ti e na place ti azo ti territoire ti e. Na tapande, eskê mbeni ye asi ade ti ninga ape so azo ti territoire ti e ayeke gi bê ti ala na ndö ni? Eskê ababâ na amama ayeke gi bê ti ala so kpale apeut ti si na amolenge ti ala na ekole? Eskê a yeke ngangu na gbâ ti azo ti wara kua? Imaginé tongana nyen la gigi ayeke ngangu mingi na azo so ahinga ape anzoni ye so Bible asara tënë ni.—2 Tim. 3:1; És. 65:​13, 14.

5. Tongana nyen la Jésus ayeke lani nde na aFarizien? (Matthieu 11:​28-30).

⁵ So Jésus apensé na azo so ayeke mä lo, ala peut ti bâ ni na yâ ti fason ti sarango ye ti lo na mbage ti ala. Lo yeke lani nde mingi na aFarizien so abâ tanga ti azo tongana ambumbuse zo (Mat. 23:13; Jean 7:49). Jésus asara ye na azo na nzoni bê nga lo ne ala. Lo ‘sara ye na ngangu pëpe nga lo sara terê ti lo kete’, ye so a-aidé lo ti duti nzoni wafango ye. (Diko Matthieu 11:​28-30.) A yeke nzoni e nga kue e sara ye na azo so ayeke mä e na nzoni bê nga e ne ala.

6. Tongana nyen la e peut ti sara ye na nzoni bê nga ti ne azo so ake ti mä e wala akanga lege na e?

⁶ Ambeni zo aye ti mä e ape na ambeni asara même ngonzo na terê ti e. Jésus afa na e ti sara sioni ape na azo so ake e. Me lo hunda nga na e ti sara mbeni ye nde. Lo tene na e ti ‘sara nzoni na azo so ake e, ti iri tënë nzoni na ndö ti azo so ayeke deba e nga même ti sambela ndali ti azo so ayeke tene tënë ti songo bê na e.’ (Luc 6:​27, 28). A yeke duti ngangu na e ape ti sara ye na nzoni bê na azo so asara sioni na e tongana e girisa ape so mbeni raison ayeke dä so ndali ni ala ke ti mä e. Tâ tënë, ambeni zo aye ti sara si e zia ti fa tënë. Me ambeni zo aye ti sara lisoro na e ape ndali ti so ala gi bê ti ala ndali ti mbeni kpale so ayeke na yâ ti sewa ti ala wala ndali ti mbeni ye nde. Peut-être e ga na nzoni ngoi ape. Atâa ye ni ayeke so wa, a yeke nzoni e sara ye alingbi na wango so atene: “Zia lakue tënë ti yanga ti ala aduti nzoni, ala zia ingo dä, si ala hinga tongana nyen la a lingbi ala kiri tënë na zo oko oko.” (aCol. 4:6). Tongana e zia terê ti e na place ti azo nga e gi ti hinga abezoin ti ala, bê ti e ayeke son hio ape nga e peut ti fa na ala mbeni ye so apeut ti aidé ala.

SARA CONFIANCE NA BIBLE

7. Tongana nyen la Jésus afa so lo sara confiance na Mbeti ti Nzapa na ngoi so lo yeke fa ye? (Jean 7:​14-16).

⁷ Jésus asara lani confiance na hingango ye ti lo wani ape. Lo fa na azo ye so ayeke na yâ ti Mbeti ti Nzapa nga lo fa tongana nyen la apeut ti aidé ala. Lo fa ye na ala na mbeni fason so akpengba ape tongaso si ala peut ti mä yâ ni hio nga ti dabe ti ala na aye ti manda so lo fa na ala. Bible atene so Jésus afa ye “tongana zo so awara komandema ni, me tongana ascribe pëpe.” Ye so asara si ‘bê ti azo ni adö’. (Marc 1:22). Ascribe ti ngoi ti Jésus ayeke fa na azo lani gï aye so akota zo ti nzapa so iri ti ala awu atene. Me Jésus ayeke fa ti lo lani na azo aye so ayeke na yâ ti Mbeti ti Nzapa. So lo yeke lani kozo na yayu lo peut ti sara kua na kota ndara so lo yeke na ni ti pika bê ti azo, me lo sara lani tongaso ape. Lo sara kua na Mbeti ti Nzapa ti fa na ala ye so bê ti Nzapa aye. (Diko Jean 7:​14-16.) Jésus azia lani nzoni tapande na adisciple ti lo.

8. Tongana nyen la bazengele Pierre amû tapande ti Jésus?

⁸ Adisciple ti Jésus nga kue asara confiance na Mbeti ti Nzapa na ngoi so ala yeke fa ye. Na tapande, gbu li na ndö ti diskur ti bazengele Pierre so lo sara na Pentecôte ti ngu 33. Pierre amanda mbeti ayo ape, me lo ndu bê ti azo so amä lo na lege so lo sara kua nzoni na Mbeti ti Nzapa ti fa na nda ti aprophétie so aga tâ tënë na ndö ti Jésus (Kus. 2:​14-37). Ye ti peko ni ayeke so ‘azo so ayeda na tënë ti lo na ngia na bê ti ala, a batize ala. Na lango ni so, azo 3000 tongaso aga na ndö ni.’—Kus. 2:41.

9. Na ngoi so e yeke fa ye, ngbanga ti nyen la e doit ti sara confiance na Bible?

⁹ Na ngoi so e yeke fa tënë, mbeni ye nde so e lingbi ti sara kua na ni ti ndu bê ti azo ahon Bible ayeke dä ape (aHéb. 4:12). Ndani la e bezoin ti sara kua mingi na Bible na ngoi so e yeke fa ye. E ye ti “fa tënë ti Nzapa” na azo ahon ti fa tënë ti bê ti e wani (2 Tim. 4:2). A-Proverbe 2:6 atene: “Jéhovah la ayeke mû ndara na zo; hingango ye nga bango yâ ti ye nzoni alondo na yanga ti lo.” Tongaso, na ngoi so e yeke fa ye na azo na ndö ti Bible, a yeke mo bâ mo tene e yeke zia Jéhovah la ayeke sara tënë na ala (Mal. 2:7). E ye ti tene azo ahinga so ndara so ayeke na yâ ti Bible ayeke kota mingi ahon ti azo. Bible ayeke tënë ti yanga ti Nzapa nga ayeke sara si e wara ndara so e bezoin ni ti zia ngia na bê ti Lo so acréé e nga ti duti na ngia.—2 Tim. 3:​16, 17.

10. Nyen la e peut ti sara ti tene mbeni zo so ayeke manda Bible abâ ni na nene ni mingi?

¹⁰ Atâa so afoto nga na avidéo ayeke na yâ ti mbeti so e yeke manda na ye na azo, na ngoi so e yeke leke terê ti e, a yeke nzoni e gbu li na ndö ti aversê so e yeke diko ti bâ tongana nyen la e yeke luti ande na ndö ni tongaso si zo so e yeke manda Bible na lo ahinga so Bible la lo yeke manda. Tongaso, na ngoi ti mandango ye ni, diko aversê so ayeke aidé zo ni ti mä yâ ti kota tënë ni nzoni. Na pekoni, aidé lo ti gbu li na ndö ti ye so lo peut ti manda dä. Na ngoi so mo yeke sara kua na afoto nga na avidéo, sara kue ti tene zo ni amä yâ ti mama-ndia ti Bible so lo yeke manda. Mo bezoin ape ti diko gbâ ti aversê si a-aidé lo. Tongana mo diko mbeni versê, mû ngoi na zo ni ti gbu li na ndö ni nga ti mä yâ ni. Na ambeni ngoi, mo peut ti kiri ti diko versê ni tongana bezoin ni ayeke dä. Tongana mo sara tongaso mo yeke fa na zo ni so Mbeti ti Nzapa la lo yeke manda, me pëpe mbeti ni, afoto wala avidéo so lo bâ.—1 aCor. 2:13.

11-12. (a) Tongana nyen la e peut ti kanga bê na azo so ayeke manda Bible? (Kusala 17:​1-4). (Bâ nga foto.) (b) Nyen la peut-être ambeni zo abezoin ti manda na ndö ti Bible? E peut ti aidé ala tongana nyen?

¹¹ Tongana a yeke ngangu na zo so mo yeke manda Bible na lo ti mä yâ ti mbeni ye, girisa ape so e doit ti kanga bê si e fa tënë na azo. Azo kue ayeke gue na li ni legeoko ape. A yeke ngangu na ambeni zo ti mä yâ ti ambeni ye so a yeke ngangu na e ape ti mä yâ ni. A yeke nga ye so asi lani na bazengele Paul la, lo doit lani ti fa tënë na aJuif ti Thessalonique fani mingi nga lo ga na ala ti yeda na Mbeti ti Nzapa kozo ti tene ambeni acomprendre ni.—Diko Kusala 17:​1-4.

¹² Laso na fango tënë, e peut ti wara ambeni zo so ahinga ye mingi na ndö ti Bible ape wala so ahinga ye oko na yâ ti Bible ape. Tongana nyen la e peut ti aidé mara ti azo tongaso? Kozoni, e yeke aidé ala tongana e mû na ala Bible. Nga tongana e sara lisoro na ala na e hunda na ala atënë, e kanga bê e mä ala nzoni na e diko tënë mingi ape. E peut ti sara kua na mbage “Nduru tënë na ndö ti Bible” so ayeke na yâ ti Mbeti ti Nzapa ti fini dunia ti fa na ala gbâ ti asango so ayeke na yâ ti Bible. Na tapande e peut ti diko versê oko wala use so ayeke na hunda 15 ti fa na azo ni tongana nyen la Bible apeut ti aidé e ti duti na ngia. Na nduru tënë, tongana e fa na azo so e yeke manda Bible na ala so Bible ayeke na ngangu, afango ye ti e ayeke ndu bê ti ala mingi.

GBOTO LÊ NA NDÖ TI JÉHOVAH

13. Na ngoi so e yeke fa ye na mbeni zo, zo wa la e yeke gboto lê mingi na ndö ti lo? Mû mbeni tapande ti fa ni.

¹³ Na ngoi so e yeke fa ye, ye so e ye ayeke ti aidé azo so ayeke mä e ti hinga Jéhovah nga ti ga nduru na lo (Jacq. 4:8). Ni la e peut ti haka kua ti e na mbeni zo so ayeke za torche na mbeni zo so ayeke gi ye na yâ ti vukongo ndo. Lo yeke za wâ ni na ndö ti lo ape, me na ndö ti zo so ayeke gi ye na yâ ti vukongo ndo so. Legeoko nga, tongana e yeke fa ye na mbeni zo, e yeke gboto lê na ndö ti e ape, me e yeke gboto lê mingi na ndö ti Jéhovah.

14. Nyen la e peut ti sara ti aidé zo so e yeke manda ye na lo ti zia ngia na bê ti Jéhovah?

¹⁴ Na ngoi so e yeke manda Bible na mbeni zo, e yeke aidé lo ti duti na nzara ti zia ngia na bê ti Jéhovah (aProv. 27:11). E yeke gi ti fa na lo ti sara ye so ayeke na lege ni, ti kpe ti sara aye ti sioni nga ti sara achangement ti zia ngia na bê ti Jéhovah. Na tapande, tongana lo yeke tiri ti zia lege ti mbeni sioni sarango ye, e peut ti hunda atënë tongaso na lo: “Ngbanga ti nyen la Jéhovah ake sarango ye ni so? Ngbanga ti nyen la Jéhovah ahunda na mo ti zia lege ti mbeni sarango ye so anzere na mo? So Jéhovah ahunda na mo ti zia lege ti sarango ye ni so, tongana nyen la afa so lo ye mo?” Ahundango tënë tongaso ayeke pusu lo ti gbu li na ndö ti Jéhovah na ti bâ tongana nyen la Jéhovah ayeke mbeni nzoni Babâ. Ye so ayeke aidé lo ti duti na nzara ti zia ngia na bê ti Jéhovah.

NGBÂ TI MAÏ KODE TI MO TI FANGO YE NA ZO

15. Nyen la mo peut ti sara ti ngbâ ti maï kode ti mo ti fango ye na zo?

¹⁵ Mo peut ti sambela Jéhovah ti aidé mo ti gbu li na ndö ti ye so mo bezoin ti sara ti maï kode ti mo ti fango ye na zo na ndö ti lo (1 Jean 5:14). Mo peut ti sara ye alingbi na sambela ti mo tongana mo sara ye alingbi na awango so a mû na e na ngoi ti abungbi ti milieu ti yenga. Mo peut nga ti hunda na mbeni ita so ahinga ti fa ye nzoni ti gue legeoko na mo ti manda ye na azo so mo yeke manda ye na ala. Na peko ti mandango ye ni, mo peut ti hunda ita ni na wango na ndö ti kode ti mo ti fango ye na zo. Girisa ape so mo la mo hinga ye na ndö ti tënë so ala yeke manda so, me zo so mo yeke manda Bible na lo so ahinga ti lo ye na ndö ni ape. Tongaso, ngoi na ngoi a yeke nzoni mo bâ lê ti lo ti bâ wala lo yeda na tënë ni wala lo yeda na ni ape. Na ngoi ti mandango ye ni, sara kue ti aidé lo ti bâ so nzoni ye la lo yeke sara so ndali ti so ayeke aidé lo ti ga kamarade ti Jéhovah, a yeke aidé lo ti wara ngia mingi na yâ ti gigi ti lo nga lo yeke wara ande aye ti nzoni so Jéhovah amû zendo ni.—Ps. 1:​1-3.

16. Ye ti nzoni wa la e yeke wara tongana e ngbâ ti maï kode ti e ti fango ye na zo?

¹⁶ Fango ye na azo na ndö ti Jéhovah aga na e kota ngia mingi laso nga e yeke ngbâ ti sara ande ni mingi na yâ ti fini dunia. Tongaso, zia e ngbâ ti pensé na azo so ayeke mä e, e sara confiance mingi na Bible na e gboto lê na ndö ti Jéhovah na ngoi so e yeke fa nzoni tënë na azo. Tongana e sara tongaso, e peut ti maï kode ti fango ye ti e na azo na fango tënë.