Nda ti batême nga ndani so a yeke kota ye ti wara ni

1. Nyen la afa so batême ayeke mbeni kota fango ye ti Bible?

TERÊ ti e ayeke nzere ka mingi na ngoi so afini zo awara batême. Terê ti akozo Chrétien anzere nga lani mingi na ngoi so ala bâ gbâ ti azo awara batême na Pentecôte ti ngu 33. Na ngoi ni so, bazengele Pierre amû mbeni diskur so na yâ ni lo fa ndani so a yeke kota ye ti wara batême (Kus. 2:​38, 40, 41). Bazengele Paul atene so “fango ye na ndö ti abatême” ayeke na yâ ti “akozo fango ye na ndö ti Christ”. (aHéb. 6:​1, 2). Tongaso, na bango ni, batême ayeke mbeni oko ti akota fango ye ti Bible so e bezoin ti mä yâ ni nzoni. Ngbanga ti nyen?

2. Ngbanga ti nyen la e bezoin ti comprendre nda ti batême nzoni?

² Gï tongana ti so mbeni nzoni fondation apeut ti sara si mbeni da aluti ngangu, tongana e comprendre nda ti batême nzoni apeut ti aidé e ti duti na kpengba mabe. E bezoin ti mä yâ ni atâa e yeke gue na li ni ti wara batême wala e wara batême aninga awe. Tongaso na yâ ti article so, e yeke kiri tënë na ahunda so: Tënë batême aye ti tene nyen? Aye ayeke passé na ngoi ti batême tongana nyen? Ngbanga ti nyen la e yeke wara batême na iri ti Babâ, ti Molenge na ti yingo vulu?

NDA TI BATÊME TI MO

3. Tongana mo wara batême afa na azo nyen?

³ Tongana mo wara batême mo fa na azo polele so mo yeda na tâ tënë so mo manda na ndö ti Jéhovah Nzapa na Christ Jésus. Mo ke asiokpari ti mo nga mo changé fini ti mo ti sara na Jéhovah. Mo hinga so Nzapa ayeke sö azo gï na lege ti Jésus. Nga mo fa na Nzapa na yâ ti sambela so mo ye biani ti sara ye so bê ti Lo aye legeoko na bungbi ti lo. Na peko ti so mo mû zendo so wala mo mû terê ti mo na Jéhovah nga mo wara batême awe, mo komanse ti vivre na fason so ayeke gue na mo ti wara fini ti lakue lakue.

4. Tongana a yôro mbeni zo kue na yâ ti ngu aye ti tene nyen? (Bâ nga foto.)

⁴ Na ngoi so mo wara batême, a yôro mo na yâ ti ngu na pekoni a sigi na mo,a mo bâ mo tene a lu mo na pekoni a zingo mo na kuâ. (Bâ aColossien 2:12.) Batême ti mo afa so mo sara akota changement na yâ ti fini ti mo. Na lege wa? Tongana a yôro mo na yâ ti ngu, mo fa so mo zia lege ti angbene sarango ye ti mo awe. Na ngoi so mo sigi na yâ ti ngu ni, mo komanse mbeni fini gigi, na ye so bê ti Nzapa aye la ayeke kota ye na yâ ti gigi ti mo.

5. Na lege wa la e peut ti haka aye so mo yeke sara ti leke terê ti mo ndali ti batême na kua so Noé asara ti leke arche? (1 Pierre 3:​18-21).

⁵ Diko 1 Pierre 3:​18-21. E peut ti haka aye so mo sara ti duti nduru ti wara batême na kua so Noé asara lani ti leke arche. Tongana mo komanse ti manda ye na ndö ti Jéhovah ade ti ninga ape, mo peut ti bâ so ye so angbâ na mo ti sara ti wara batême ayeke ngangu mingi. A peut même ti duti ngangu tongana kua ti lekengo arche so Noé asara lani. Eskê mo bezoin biani ti sara aye so kue? En. Ngbanga ti nyen la e tene tongaso? Gbu li na ndö ti tapande ti Noé. Nzapa afa lani na Noé tongana nyen ti leke arche ni, na Noé adoit ti sara ye alingbi na aye so Jéhovah afa ti sö kuâ na ngoi ti Kota ngu ni. Noé awara lege ti leke arche ni ndali ti so lo mä na bê na Jéhovah, lo mä yanga ti lo nga Jéhovah a-aidé lo. Tongana Noé, mo peut ti sara ‘aye kue so Nzapa amû yanga na mo ti sara.’—Gen. 6:22.

6. Batême apeut ti sö mo na lege wa?

⁶ Na versê 21, bazengele Pierre atene so batême ‘ayeke sö mo’. Tâ tënë, gï senge yorongo mo na yâ ti ngu la ayeke sö mo ape nga a yeke sukula asiokpari ti mo ape. Gï mênë ti Jésus la ayeke sukula siokpari ti mo (1 Jean 1:7). Me ti wara batême ayeke kota ye mingi ndali ti so Jéhovah la ahunda na e ti wara ni. Na ngoi so e wara batême e hunda na lo ti aidé e ti duti na “nzoni conscience” na gbele lo. A yeke nzere na Jéhovah ti mû na e ye so e hunda na lo. Tongaso, batême ‘ayeke sö mo’, so ti tene a yeke gue na mo ti wara fini.

AYE SO AYEKE PASSÉ NA NGOI TI BATÊME

7. Aye ayeke passé tongana nyen na ngoi ti batême?

⁷ Bible atene so ti batize mbeni zo, a doit ti yôro lo kue na yâ ti ngu me a fa ambeni nzene nzene ye na ndö ni ape. Ye oko, Bible afa ye so ayeke na lege ni ti sara na ngoi ti batême. Na tapande, amama-ndia ti Bible a-aidé azo so ayeke wara batême ti hinga bongo so ala peut ti yü nga a-aidé azo so ayeke bâ batême ni ti hinga aye so ala doit ti sara na ngoi ni (1 aCor. 14:40; 1 Tim. 2:9). Laso, mingi ni mbeni ancien la ayeke batize azo, me e yeke gonda lo ahon ndö ni ape (1 aCor. 1:​14, 15). Tongana gbâ ti azo wala kete wungo ti azo la abâ batême, so la ayeke kota ye ape.—Kus. 8:36.

8. Ahunda wa la a yeke hunda na azo so aye ti wara batême? Ngbanga ti nyen? (Kusala 2:​38-42). (Bâ nga foto.)

⁸ Bible afa so a yeke nzoni e “fa tënë dandara ti wara salut”, so ti tene e fa so e mä na bê (aRom. 10:​9, 10). E yeke “fa tënë dandara ti wara salut” na ngoi so e yeke fa tënë na azo nga mbilimbili na lango ti batême ti e. Ndali ti raison so, a yeke hunda ka atënë use na azo so ayeke wara batême. Kozo hunda ni ayeke so: “Eskê mo ke siokpari ti mo awe, mo mû terê ti mo na Jéhovah awe, nga mo yeda na salut so Lo yeke mû na lege ti Jésus Christ?” Hunda so aluti mingi na ndö ti ye so zo ni asara awe ti wara batême. Pierre atene lani mara ti tënë tongaso na Pentecôte na ngoi so lo wa azo ti changé bê ti ala na ti wara batême. Use hunda ni ayeke so: “Eskê mo hinga so tongana mo wara batême, mo fa so mo ga Témoin ti Jéhovah awe nga so mo sara beoko na bungbi ti Jéhovah?” Hunda so adabe ti e so e yeke sara ye alingbi na mungo terê ti e na Jéhovah tongana e sara ye alingbi na fango lege ti bungbi ti lo nga e voro lo legeoko na aita tongana ti so akozo disciple asara lani. (Diko Kusala 2:​38-42.) Azo so akiri tënë en na ahunda so na bê ti ala kue apeut ti wara batême.

9. Nyen la azo kue adoit ti sara ti zia ngia na bê ti Nzapa?

⁹ Même kozo ti tene mo komanse ti manda tâ tënë, peut-être mo yeke sara ye na lege ni nga mo sara mbeni kota siokpari lâ oko ape. Peut-être babâ na mama ti mo ayeke aTémoin na ala aidé mo ti ye Jéhovah. Eskê mo bezoin ti changé bê ti mo nga ti wara batême si mo zia ngia na bê ti Nzapa? En. E kue, a dü e na siokpari na terê ti e na ndali ni e peut pëpe ti duti akamarade ti Nzapa (Ps. 51:5). Me na ngoi so e manda ye mingi na ndö ti Jéhovah, e mû desizion ti zia ye so bê ti lo aye kozo na ti e. Vundu asara e mingi ndali ti asiokpari so e sara ândö nga e zia lege ti sarango aye so azia vundu na bê ti Nzapa na e komanse ti vivre na fason so anzere na Babâ ti e ti yayu. Tongaso, e peut ti wara batême.—Kus. 3:19.

10. Nyen la mo doit ti sara tongana mo wara lani batême na yâ ti mbeni bungbi ti vorongo nzapa nde?

¹⁰ Tongana mo wara lani batême na yâ ti mbeni bungbi ti vorongo nzapa nde, mo bezoin encore ti wara batême ti ga Témoin ti Jéhovah. Ngbanga ti nyen? Ngbanga ti so mo mä lani yâ ti tâ tënë na ndö ti Jéhovah Nzapa na Jésus nzoni ape. Même tongana na yâ ti sambela mo mû terê ti mo na Nzapa lani awe, mo mû zendo na lo me mo comprendre nzoni ape ye so bê ti lo aye. Na ngoi so bazengele Paul atingbi na ambeni koli ti Éphèse so awara batême kozo awe sân ti comprendre nzoni afango ye ti aChrétien, lo leke ti tene a kiri a batize alab (Kus. 19:​1-5). Laso nga, Jéhovah ayeke yeda na batême ti mbeni zo gï tongana zo ni acomprendre nzoni aye so Jéhovah ahunda na lo ti sara.

“NA IRI TI BABÂ, TI MOLENGE NA TI YINGO VULU”

11. Ti wara batême “na iri ti Babâ, ti Molenge na ti yingo vulu” aye ti tene nyen? (Matthieu 28:​18-20).

¹¹ Jésus amû lani yanga ti tene a batize afini disciple “na iri ti Babâ, ti Molenge na ti yingo vulu.” (Diko Matthieu 28:​18-20.) Ye so aye ti tene nyen? Na yâ ti Bible, fani mingi tënë “iri” aye ti sara tënë ti aye so a hinga mbeni zo na ni. A peut nga ti sara tënë ti kua ti zo ni nga na ngangu so lo yeke na ni. Tongaso, tongana e sara mbeni ye “na iri ti” mbeni zo wala ti mbeni ye, e hinga ngangu so ayeke na peko ti iri ni. (Bâ Matthieu 10:41; bâ nga note ti étude na ndö ti tënë “parce que c’est un prophète.”) Gbu li ti bâ tongana nyen la mo peut ti hinga kua nga na ngangu so Babâ ni na Molenge ni ayeke na ni nga na kua ti yingo vulu ti Nzapa.

12. Tongana nyen la e yeke wara batême na iri ti Babâ ni? (Apocalypse 4:11.) (Bâ nga foto.)

¹² “Na iri ti Babâ.” E hinga so Jéhovah ayeke Babâ ti e ti yayu so amû na e fini. Lo yeke Nzapa so ngangu ti lo ahon angangu kue, Lo so acréé aye kue. (Diko Apocalypse 4:11.) E hinga so lo yeke mä asambela ti e nga e yeke di iri ti lo na yâ ti asambela ti e nga na ngoi so e yeke sara tënë ti lo na azo (Ps. 65:2). Me mbeni ye ayeke encore dä ti sara ti wara batême na iri ti Babâ ni. Azo so amä lani Pierre na lango ti Pentecôte ahinga ye na ndö ti Jéhovah awe, me ala bezoin ti hinga so Jéhovah ayeke mû na zo fini ti lakue lakue gï na lege ti Jésus Christ.—aRom. 5:8.

13. Tongana nyen la e yeke wara batême na iri ti Molenge ni? (Bâ nga foto.)

¹³ Na iri ti Molenge ni. E hinga so Jésus ayeke oko Molenge ti Nzapa. Jésus ayeke “lege ni,” oko zo so na lege ti lo e peut ti duti na nzoni songo na Jéhovah (Jean 14:6). Jésus ayeke nga Zo so azi e, so akui ndali ti e si e peut ti wara fini. So e hinga tongaso apusu e ti mû tapande ti lo lâ na lâ, me gï pëpe na ngoi ti batême ti e (1 Jean 2:6). Tongaso tongana lo, e yeke yapu na fango tënë, e yeke zia si ye oko akanga lege na e ape (Luc 4:43). E yeke nga nduru ti gbu ngangu tongana a sara aye ti ngangu na e ndali ti so e ye ti sara na Nzapa be-ta-zo (2 Tim. 3:12). E ne Jésus so ayeke “li ti congrégation,” ni la e yeke mä yanga ti azo so lo zia ala ti mû li ni na ti bâ lege ti e.—aÉph. 4:​8, 11, 12; 5:23.

14. (a) Tongana nyen la e yeke wara batême na iri ti yingo vulu? (Bâ nga foto.) (b) Ambeni batême nde wa la aChrétien so a soro ala ti gue na yayu ayeke wara? (Bâ encadré “Abatême so aChrétien so a soro ala ti gue na yayu ayeke wara.”)

¹⁴ Na iri ti yingo vulu. E yeda na tâ tënë na ndö ti yingo vulu. A yeke zo ape nga ayeke mbage ti Trinité ape, me a yeke ngangu ti Nzapa. E hinga so yingo vulu afa lani lege na aprophète nga na azo ti sungo Bible, tongaso e yeke diko Bible lakue nga e yeke sara ye alingbi na afango ye so ayeke na yâ ni (2 Pi. 1:​20, 21). Nga e yeke sara pëpe akota siokpari ndali ti so sarango tongaso apeut ti kanga lege na yingo ti Nzapa ti si na e nga ti sara kua na yâ ti congrégation.—aÉph. 4:30.

15. Nyen la a yeke nzoni e leke na bê ti e ti sara?

¹⁵ Tongana mo wara batême awe, leke na bê ti mo ti comprendre ye kue na ndö ti “fango ye na ndö ti abatême”c nga ti sara ye alingbi na zendo so mo mû na Jéhovah na ngoi so mo mû terê ti mo na lo nga mo wara batême. Ka tongana ade mo wara batême ape? Eskê mbeni ye akanga lege na mo? Na yâ ti article ti peko, e yeke bâ aye so mo peut ti sara ti wara batême.