Sara achangement so mo bezoin ti sara ti wara batême

1. (a) Ambeni nzoni ye so e yeke wara tongana e wara batême ayeke so wa? (b) Nyen la e yeke bâ na yâ ti article so?

ESKÊ mo mû terê ti mo na Jéhovah na mo fa ni polele na lege ti batême awe? Tongana a yeke tongaso, andâ mo hunda na Nzapa ti duti na nzoni conscience la (1 Pi. 3:21). So mo sara tongaso, mo zia nzoni tapande na amaseka nga na afini zo na yâ ti congrégation ti mo. So nzoni desizion la mo mû so! Me ka tongana ade mo wara batême ape? Kite ayeke dä ape so mo ye Jéhovah na mo ye ti sara ye so bê ti lo aye. Mo hinga so tongana mo ye ti tene Jéhovah apardonné asiokpari ti mo nga mo ye ti zia ngia na bê ti lo, mo doit ti wara batême (Kus. 2:​38-40). Me peut-être a yeke ngangu na mo ti mû desizion ti wara batême. Nyen la apeut ti aidé mo? Na yâ ti article so, e yeke bâ (1) ndani so ambeni zo aye ti wara batême hio ape, (2) ndani so a yeke lege ti ndara ti bata na li so nda ni aga nduru awe nga (3) anzoni ye so mo yeke wara tongana mo sara achangement hio ti wara batême.

NDANI SO AMBENI ZO AYE TI WARA BATÊME HIO APE

2. Ngbanga ti nyen la ambeni zo aye ti wara batême hio ape?

² Mbeto la asara si ambeni zo aye ti wara batême hio ape. Na tapande, atâa so ala ye ti sara na Jéhovah, ala sara mbeto so ala lingbi lâ oko ape ti zia ngia na bê ti lo. Tongana mo pensé tongaso, diko aversê ti Bible so apeut ti sara si mo hinga so Jéhovah ahunda na mo ape ti sara ye kue tâ gï na lege ni nga lo yeke na ngia tongana mo sara ye kue so mo peut ti sara ti zia ngia na bê ti lo (Ps. 103:​13, 14; aCol. 3:23). Tongana mo sara mbeto ti kangango lege, hunda Jéhovah ti aidé mo ti duti na mara pensé ti mbeni zo ti sungo psaume so atene: “Jéhovah ayeke na terê ti mbi; mbeto ayeke sara ande mbi pëpe. Nyen la zo apeut ti sara na mbi nyen?”—Ps. 118:6.

3. Ambeni zo so aye ti wara batême hio ape apeut ti pensé nyen? (Bâ nga foto.)

³ Ambeni zo so aye Jéhovah ayeke kiri na lango ti batême ti ala na peko ndali ti so ala pensé so ade ala hinga ye nzoni na ndö ti Jéhovah ape. Me eskê mo bezoin ti hinga ye kue na ndö ti Bible kozo si mo wara batême? Ên-ën. Gbu li na ndö ti mbeni tapande ti Bible. Na mbeni bï, Jéhovah asara si sese ayengi ngangu ti tene lo zi Paul na Silas na kanga, na ala wara lege ti fa tënë na ndö ti Jésus na zo ti batango da ti kanga ni nga na azo ti sewa ti lo. Peut-être koli ni na azo ti da ti lo acomprendre so Nzapa la asara miracle so ti zi azo ti lo na kanga. Ala manda nga aye mingi na bï ni so. A sara si “gï na pekoni, a batize” ala (Kus. 16:​25-33). Tongana mo hinga Jéhovah, mo ye lo na bê ti mo kue, mo hinga akozo fango ye ti Bible, mo changé bê ti mo nga mo leke na bê ti mo ti ngbâ ti sara ye alingbi na aye so lo hunda na mo, andâ mo yeke nduru ti wara batême.—Marc 12:30.

4. Nyen la ambeni zo apensé mingi na ni asara si ala yeke kiri na lango ti batême ti ala na peko? (Bâ nga foto.)

⁴ Ambeni zo so aye ti zia ngia na bê ti Nzapa apensé mingi na akota changement so ala doit ti sara. Tâ tënë, a yeke na lege ti ndara ti gbu li na ndö ti aye ti peko ti adesizion ti e (Luc 14:​27-30). Me ambeni apensé mingi na asacrifice so ala doit ti sara ti voro Nzapa. Candace, so ahinga tâ tënë depuis kete ti lo, apensé nga tongaso na ngoi so a hunda ti manda Bible na lo na ngoi so lo kono awe. Lo tene: “Mbi hinga lani ye so Jéhovah ahunda na mbi ti sara, me mbi mû desizion hio ape ndali ti so aye so mbi yeke sara lani anzere na mbi mingi. Mbi hinga so a yeke duti ngangu na mbi ti ke aye ni so.” Ambeni agi bê ti ala so ala peut ti sara ye alingbi na aye so Jéhovah ahunda ape na peko ti batême ti ala. Ala gi bê ti ala so na peko ti batême ti ala, ala yeke sara mbeni kota siokpari na a yeke zi ala na yâ ti congrégation. Tongana mo yeke na mara ti agingo bê so, nyen la mo peut ti sara?

5. Nyen la a yeke nzoni e pensé na ni mingi tongana mbeto asara e ti wara batême? (Matthieu 13:​44-46).

⁵ Tongana e ye ti vo mbeni ye, e yeke pensé ka na ngere ni nga na nzoni ye so e yeke wara na pekoni. Tongana anzoni ye so e yeke wara na peko ti ye ni ayeke mingi ahon ngere ni, e yeke vo ye ni hio. Legeoko nga, tongana e sara mbeto ti wara batême, a yeke nzoni e pensé na asacrifice so e doit ti sara nga na anzoni ye so e yeke wara tongana e yeke na nzoni songo na Jéhovah. Jésus atene atoli use ti fa ni. (Diko Matthieu 13:​44-46.) Na yâ ti toli ni oko na oko, mbeni koli ayeke na ngia ti kä aye ti lo kue ti vo ye ti ngangu ngere so lo wara ni. Mo nga kue mo wara mbeni ye ti ngangu ngere: tâ tënë na ndö ti Royaume. Tongaso, tongana mbeto asara mo ti sara achangement so mo doit ti sara ti wara batême, gbu li nzoni na ndö ti atoli ti Jésus so. Mo peut ti hunda terê ti mo na ahunda so: ‘Eskê mbi mä na bê biani so nzoni tënë ti Royaume ayeke mbeni ye so ngere ni ayeke ngangu mingi? Eskê mbi bâ na nene ni mingi songo ti mbi na Jéhovah, beku ti fini ti lakue lakue nga na sewa ti aita so aye terê so lo mû na mbi?’ Kiringo tënë ti mo na ahunda so apeut ti aidé mo ti hinga ye so mo bezoin ti sara ti mû desizion ti wara batême.

6. Nyen la ayeke aidé e ti sara ye alingbi na aye so e manda?

⁶ Na yâ ti toli ti Jésus na ndö ti zo ti lungo ye, lo fa so ye so ayeke na bê ti ambeni zo so amä nzoni tënë la apusu ala ti sara ye alingbi na ni ape. Me Jésus afa nga so ambeni zo so ayeke mä tënë ni ayeke na “bê so ayeke mbilimbili nga ayeke nzoni” na ala yeke sara ye alingbi na ye so ala mä (Luc 8:​5-15). Tongana mo gi bê ti mo ndali ti so mo yeke sûr ape ti sara ye alingbi na aye so mo manda, découragé ape. Grâce na mungo maboko ti Nzapa, mo peut ti “wara mbeni fini bê”, mbeni bê so ayeke yeda na fango lege ti lo. Hunda Jéhovah na yâ ti sambela ti aidé mo ti tene bê ti mo awoko si atâ tënë ti Royaume apeut ti maï dä.—Ézéch. 18:31; 36:26.

7-8. Ngbanga ti nyen la ambeni maseka ayeke gue na li ni ti wara batême ape? (Bâ nga foto.)

⁷ Ambeni maseka so aye Jéhovah ayeke gue na li ni ti wara batême ape ndali ti ngangu so ambeni zo asara na ndö ti ala. Na tapande, ambeni wafango mbeti apeut ti gi ti sara si a-élève ayeda na ambeni sarango ye so na lê ti Jéhovah ayeke sioni. Me tongana ala yeda na ni apeut ti ga na ala ngangu kpale (Ps. 1:​1, 2; aProv. 7:​1-5). Mo peut ti kpe mara ti kpale so tongana mo mû tapande ti zo ti sungo psaume so atene na Jéhovah, atene: “Mbi hinga ti bâ yâ ti aye nzoni ahon azo kue so ayeke fa ye na mbi, ndali ti so mbi gbu li na ndö ti awango ti mo.”—Ps. 119:99.

⁸ Na bango ni, sân ti hinga ni ambeni babâ na mama so ayeke aTémoin ayeke sara si a yeke ngangu na amolenge ti ala ti mû desizion ti wara batême. Ala pensé mingi na mandango mbeti ti amolenge ti ala nga na kua ti nginza so ala yeke sara. Wala ala peut ti girisa ti wa amolenge ti ala ti gi ti sara ambeni ye so ayeke aidé ala ti ga nduru na Jéhovah. Eskê mo bâ so babâ na mama ti mo adoit ti sara aye mingi ti aidé mo ti gue na li ni ti wara batême? Tongana a yeke tongaso, sara mbeto ape ti sara lisoro na ala na ndö ni. Atâa ngu ti mo ayeke oke, mo peut ti ga kota kamarade ti Jéhovah.—aProv. 20:11.

9. Ngbanga ti nyen la ambeni zo ayeke kiri na lango ti batême ti ala na peko?

⁹ Ambeni zo so alingbi awe ti wara batême apeut ti kiri na lango ni na peko ndali ti so ala ye ti wara batême na même lango na mbeni zo. Na tapande, peut-être ala ye ti tene ala na mbeni kota kamarade ti ala wala mbeni fami ti ala awara batême na même lango. Ti vrai ni, mo peut ti wara batême na même lango na mbeni zo so mo ye lo. Me eskê a yeke nzoni mara ti ye tongaso asara si mo kiri na lango ti batême ti mo na peko? Girisa ape so mo oko la mo mû lani zendo ti mû terê ti mo na Nzapa. A yeke nzoni batême ti mo adépend ape na ye so mbeni zo asara.—aRom. 14:12.

GIRISA APE SO NDA NI AGA NDURU

10. Ngbanga ti nyen la ambeni zo ayeke gue na li ni hio ape?

¹⁰ Na ndö ti araison so e fa fade, ambeni zo apeut ti gue na li ni hio ape ndali ti so ala pensé so ngoi angbâ mingi kozo si nda ni aga. Me eskê a yeke na lege ti ndara ti pensé tongaso? Jésus awa adisciple ti lo, lo tene: “Ala leke terê ti ala, ngbanga ti so a yeke na mbeni l’heure so peut-être ala bi bê ti ala na ni pëpe si Molenge ti zo ayeke ga.”—Luc 12:40.

11. Tongana e manda aye mingi na ndö ti Jéhovah ayeke pusu e ti sara nyen? Ngbanga ti nyen? (Psaume 119:60).

¹¹ Ndoye la adoit ti pusu e ti mû terê ti e na Jéhovah. Tongana e hinga ye mingi na ndö ti Nzapa ti e so aye e ayeke pusu e mingi ti ye acommandement ti lo nga ti sara ye alingbi na ni hio na peko ti so e hinga ni. (Diko Psaume 119:60.) Disciple Jacques afa mbeni kota raison so ndali ni e doit ti sara ye hio alingbi na acommandement ti Jéhovah: Zo oko ahinga ye so ayeke si na lo kekereke ape. Tongaso a yeke nzoni e “sara ye so ayeke nzoni” lâ oko oko, so ti tene e sara ye so e hinga Jéhovah aye ti tene e sara ni.—Jacq. 4:​13-17.

12. Nyen la e peut ti manda na lege ti toli ti Jésus na ndö ti zo ti fango yaka ti vigne?

¹² Gbu li na ndö ti toli ti Jésus na ndö ti zo ti fango yaka ti vigne. Lo fa so ambeni zo ayeke sara kua gï l’heure oko me ala yeke wara oko nginza so a futa na azo so asara kua na yâ ti lango ni kue. Me ngbanga ti nyen la azo so asara kua gï l’heure oko akomanse hio ape? Ala tene: “Mbeni zo ti mû e na kua ayeke dä pëpe.” Ala yeke azo ti goigoi ape. Ala ye lani ti sara kua na yâ ti lango ni kue me mbeni zo amû ala na kua ape. Gï so a iri ala, ala komanse ti sara kua (Mat. 20:​1-16). Jésus airi e laso ti ga adisciple ti lo nga ti mû mbage na kua ti Royaume. A yeke nzoni e komanse kua ni gï na ngoi so e mä tënë ni.

13. Nyen la e peut ti manda na lege ti tapande ti wali ti Lot?

¹³ Ambeni zo apeut ti ku ti sara achangement ti sara na Jéhovah ndali ti so ala pensé so ala peut ti sara achangement so tâ gï kozo ti tene nda ni aga. Me tongana ala ngbâ ti ku, a yeke duti ngangu na ala ti sara achangement ti voro Nzapa. So Jésus ahinga ni, lo wa adisciple ti lo, lo tene: “Ala dabe ti ala na wali ti Lot.” (Luc 17:​31-35). Lo hinga lani so Jéhovah ayeke futi Sodome na Gomorrhe fafadeso, me lo yeke lani nduru ti dö aye ti lo ti zia ape (Gen. 19:​23-26). Mbaï so adabe ti e so ngoi so Jéhovah azia na azo ti sara achangement ti sara na lo ayeke ngbâ lakue lakue ape. Tongana ngoi ni alingbi ande awe, mbeni ye ti sarango ni ayeke duti dä encore ape.—Luc 13:​24, 25.

14. Ngbanga ti nyen la a yeke nzoni mo gi ti bâ gango tâ tënë ti aprophétie ti Bible?

¹⁴ Lango oko oko so ayeke hon, e bâ gango tâ tënë ti aprophétie ti Bible na ndö ti nda ti aye ti ngoi so. Même tongana ambeni ye so Bible asara tënë ni asi pëpe na ndo so mo yeke dä, ti bâ so a yeke si na ambeni ndo mingi adoit ti pusu mo ti sara achangement hio ti wara batême. Gbu li na ndö ti tënë so bazengele Pierre atene na akozo Chrétien. Lo wa ala ti “zia lê ti ala akpengba” ndali ti so “nda ti aye kue aga nduru awe.” (1 Pi. 4:7.) Na yâ ti versê so, na bango ni tënë ‘nda ni’ aye ti sara tënë ti ngoi so a yeke futi Jérusalem nga na temple so ayeke kâ. A-Chrétien so Pierre asara lettre na ala ayo na Jérusalem mingi, tongaso ala yeke duti kâ ape na ngoi so a yeke futi gbata ni (1 Pi. 1:1). Me na peko ti so ala bâ gango tâ tënë ti prophétie so, ala sara confiance mingi na azendo ti Jéhovah kue so ade aga tâ tënë ape. Legeoko nga, tongana mo bâ gango tâ tënë ti aprophétie so afa so nda ni aga nduru mingi awe, a yeke pusu mo ti sara ye kue so mo doit ti sara ti wara batême.

15. Tongana nyen la e peut ti leke terê ti e ndali ti lâ ti Jéhovah? (2 Pierre 3:​10-13).

¹⁵ Na yâ ti use lettre ti Pierre, lo fa tongana nyen la e peut ti leke terê ti e ndali ti “lâ ti Jéhovah”, so ti tene nda ti aye ti ngoi so. Ti akozo Chrétien, lango ni so angbâ lani ti yo mingi; me Pierre atene na ala ti ‘bata ni lakue na li ti ala’ wala ti zia “lê ti ala gï na lege ti bâ” ni. (Diko 2 Pierre 3:​10-13; kete tënë na gbe ni.) E peut ti bata lango ni so lakue na li ti e na lege so e yeke ku ni kungo. E yeke fa ni na lege so e duti na ‘sarango ye so ayeke nzoni-kue nga e sara akusala so afa so e voro Nzapa na bê ti e kue.’ Gbu li ti bâ tongana nyen la a yeke nzere na Jéhovah ti bâ so mo yeke sara ‘akusala so afa so mo voro lo na bê ti mo kue.’ Lo yeke duti na ngia mingi ti bâ so mo mû terê ti mo na lo nga mo wara batême.

WARA BATÊME SÂN TI KU

16. Nzoni ngoi ti gue na li ni ti wara batême ayeke lawa? (2 aCorinthien 6:​1, 2). (Bâ nga afoto.)

¹⁶ Nzoni ngoi ti gue na li ni ti wara batême ayeke laso. (Diko 2 aCorinthien 6:​1, 2.) Kota zo ti Éthiopie so Philippe awara terê na lo abâ lani so a yeke kota ye ti sara ye hio. Gï so lo mä yâ ti nzoni tënë nga lege azi na lo ti wara batême, lo tene ape, lo tene: ‘Mbi ye ti hinga ye mingi na ndö ti nzoni tënë awe si. Mbi yeke wara ande mbeni ngu na devant.’ Me lo hunda Philippe, lo tene: “Nyen la akanga lege na mbi ti wara batême?” (Kus. 8:​26, 27, 35-39). So pendere tapande! Na peko ti so lo wara batême, lo “gue ti lo na ngia.”

17. Jéhovah ayeke aidé mo tongana nyen?

¹⁷ Tongana mo yeke kiri na lango ti batême ti mo na peko, hinga so Jéhovah aye ti aidé mo ti ga kota kamarade ti lo (aRom. 2:4). Lo peut ti aidé mo ti hon ndö ti mbeto, agingo bê wala aye so akanga lege na mo ti gue na li ni. Tongana mo yeke na nzoni conscience na devant ti Nzapa grâce na batême ti mo, peut-être mo yeke bâ ande so “aye kue so ayeke na peko” ti mo ayeke kota ye encore ape (aPhil. 3:​8, 13). Tongaso, mo peut ti ku kungo “aye so ayeke na devant,” so ti tene, gango tâ tënë ti aye so Jéhovah amû zendo ti mû na azo so amû terê ti ala na lo nga awara batême.—Kus. 3:19.