Lege ti aidé afami ti e so ayeke aTémoin ape

1-2. Nyen la apeut ti sara si e yeke na nzoni songo na afami ti e ape na peko ti so e manda tâ tënë fini fini?

JÉSUS atene na mbeni koli so aye lani ti mû peko ti lo, lo tene: “Kiri na ndo ti afami ti mo, na mo fa na ala peko ti aye kue so Jéhovah asara ndali ti mo.” (Marc 5:19). Jésus atene atënë so ndali ti so lo hinga so mingi ti azo aye ti fa na afami ti ala anzoni tënë so ala mä.

² Eskê mo dabe ti mo na tënë ti bê ti mo na ngoi so mo mä nzoni tënë ti kozoni? Peut-être mo ye lani ti fa ni na azo kue. Me peut-être azo so mo ye ala ayeda na ni ape. Wala peut-être fason so mo fa lani tâ tënë na ala asara si ala mä terê ape. Tongana a yeke ye so asi la, nyen la mo peut ti sara ti ngbâ ti duti na nzoni songo na ala wala ti kiri ti duti na nzoni songo na ala sân ti sara ye ague nde na andia ti Bible?

3. Nyen la e yeke bâ na yâ ti article so?

³ Na yâ ti article so, e yeke bâ aye osio so e peut ti sara ti duti na nzoni songo na azo ti sewa ti e. Kozoni, e yeke bâ so tongana e bâ mawa ti afamia ti e, e yeke ye ala nga e yeke kanga bê na ala même tongana ala ye ti mä e ape. Use ni, e yeke bâ ye so e peut ti sara tongana afami ti e atene mbeni tënë wala asara mbeni ye so ason e. Ota ni, e yeke bâ ye so e peut ti sara ti aidé afami ti e tongana e kanga bê na ala nga e duti na beku so mbeni lâ ala peut ti voro Jéhovah. Osio ni, e yeke bâ tongana nyen la e peut ti fa na afami ti e so e ye ala.

BÂ MAWA TI ALA

4. Jésus asara lani ye tongana nyen na azo so asara nzara ti mä tënë ti lo ape?

⁴ Jésus azia lani pëpe ti gi ti aidé azo so asara nzara ti mä lo ape. Lo haka lo wani na mbeni zo so ayeke sara kua na yâ ti yaka ti vigne so asara ngangu ti tene mbeni keke ti figue alë (Luc 13:​6-9). Na ngoi so Jésus atene atënë so, lo gi lani awe ti aidé aJuif ti mä na bê na lo nga ti ga adisciple ti lo ahon ngu ota awe. Ngbanga ti nyen la lo ngbâ lani ti gi ti aidé ala? Jésus abâ lani mawa ti ala na a-aidé lo ti kanga bê na ala.

5. Nyen la apusu lani Jésus ti bâ mawa ti aJuif?

⁵ Jésus abâ lani mawa ti aJuif ndali ti so lo hinga so akota zo ti nzapa ti ala a-aidé ala ape ti hinga tâ tënë na ndö ti Jéhovah. Jésus atene lani so azo ni ayeke “tongana ataba so ayeke na berger pëpe.” (Marc 6:34). Kete kozo si Jésus akui, lo toto même ndali ti Jérusalem ndali ti so lo hinga so mingi ti azo ni ayeke perdre ande fini ti ala ndali ti so ala mä na bê ape (Luc 19:​41-44). Tongana dutingo ti afami ti e asara si e bâ mawa ti ala, e yeke ye mingi ti aidé ala.

6. Ngbanga ti nyen la a yeke nzoni e kanga bê na afami ti e so ayeke aTémoin ape? (aGalate 6:9).

⁶ Diko aGalate 6:9. Même tongana ade afami ti e asara nzara ti hinga ye na ndö ti Jéhovah ape, a yeke nzoni e kanga bê na ala nga e ngbâ ti ‘sara ye ti nzoni’ na ala. E hinga so ti tene mbeni zo achangé aye so lo mä na bê na ni nga lo mä na bê na Jéhovah ayeke mû ngoi. Eskê na mbeni ngoi lani mo nga kue mo yeke na ‘beku oko pëpe nga mo yeke na Nzapa pëpe na yâ ti dunia ni’? (aÉph. 2:12). Tongana a yeke tongaso, kite ayeke dä ape so mbeni zo la a-aidé mo. Tongana mo kanga bê na afami ti mo, mo kue mo peut ti wara lege ti aidé ala ti hinga ye na ndö ti Jéhovah.

GI TI COMPRENDRE ALA

7. Nyen la peut-être akanga lege lani na aita ti Jésus ti mä na bê na lo?

⁷ Peut-être aita ti Jésus amä lani tënë ti amiracle so lo sara na Galilée (Luc 4:​14, 22-24). Me na tongo nda ni, ala mä na bê na lo ape (Jean 7:5). Ngbanga ti nyen? Bible afa ni ape. Me Bible afa kamême aye use so akanga lege na aJuif ti ga adisciple ti Jésus. Ti ambeni, mbeto ti tene azo ti ndo so ala yeke dä ake ala asara ala (Jean 9:​18-22). Ambeni ahinga Jésus na kete ti lo na ala pensé ape so Nzapa la atokua lo (Marc 6:​1-4). Aita ti Jésus apeut nga lani ti pensé tongaso. Azo so mo ye ala apeut nga ti duti na mara ti apensé tongaso.

8. Nyen la apeut ti sara si afami ti e so ayeke aTémoin ape asara ye na e wala atene tënë na e na nzoni bê ape?

⁸ Gi ti hinga ye so apusu ala ti tene tënë wala ti sara ye. Peut-être aita ti Jésus ayeke lani na popo ti azo so atene “ye asara li ti lo awe.” (Marc 3:21). Ngbanga ti nyen la ala tene tongaso? Mbaï ni afa so Jésus afa tënë mingi nga lo kaï kobela ti azo asara si lo yeke même na ngoi ti te ye ape (Marc 3:20). Peut-être aita ti Jésus apensé so lo sara ye ahon ndö ni ndali ti so lo fa tënë mingi asara si na ambeni ngoi lo te même ye ape. Afami ti e apeut nga ti pensé so e sara ye ahon ndö ni ti voro Nzapa ti e. Tongana ala pensé tongaso, a yeke nzoni e fa na lege ti asarango ye ti e nga na atënë ti e so e sara ye ahon ndö ni ape.

9. Nyen la apeut ti aidé afami ti e ti changé bango ndo ti ala na ndö ti e? (1 Pierre 3:​1, 2). (Bâ nga afoto.)

⁹ Ngbâ ti sara ye na nzoni bê nga sara ye ahon ndö ni ape. Atënë nga na aye so e sara na nzoni bê apeut ti pusu afami ti e ti changé bango ndo ti ala na ndö ti e. (Diko 1 Pierre 3:​1, 2.) Na tapande, koli ti mbeni ita-wali apeut ti voro Jéhovah ape. Koli ni apeut ti bâ so lo yeke gï lo oko wala bê ti lo apeut ti son na ngoi so ita-wali ni ague ti fa tënë wala ague na bungbi. Tongana ita-wali ni aye ti tene lo pensé tongaso ape, lo peut ti changé kapa ti lo ti aye ti yingo tongaso si lo wara ngoi mingi ti duti na terê ti lo. Na tapande, lo peut ti gue ti fa tënë na ngoi so koli ni ayeke sara mbeni kua wala lo yeke na yanga-da ape. Tongana mbeni wali ayeke nduru ti sara achangement tongaso ti zia ngia na bê ti koli ti lo, lo peut ti aidé lo ti changé bango ndo ti lo na ndö ti aTémoin ti Jéhovah.

10. Tongana nyen la e peut ti sara ye tongana Jésus tongana azo asara tënë na e na nzoni bê ape?

¹⁰ Tongana afami ti mo akasa mo, na ambeni ngoi a yeke nzoni mo duti kpô. Na ngoi so azo atene Jésus ate ye nga lo nyon ye ahon ndö ni, bê ti lo ason ape nga lo gi pëpe ti fa so tënë ti ala ni ayeke mvene. Me lo wa ala ti bâ asarango ye ti lo (Mat. 11:19). Lo fa nga na lege ti tapande ti lo so lo sara ye ahon ndö ni ape nga lo sara ye so anzere na lo. (Bâ Jean 2:​2, 6-10.) Legeoko nga, pensé ape so mo doit ti kiri tënë na atënë kue so azo atene ti kasa mo. Me na lege ti asarango ye ti mo, fa na afami ti mo so mo sara ye ahon ndö ni ape nga gigi anzere na mo. Tongana afami ti mo abâ ni, ala yeke hinga so asioni tënë so ala mä na ndö ti e ayeke mvene.

NGBÂ TI KANGA BÊ NGA DUTI NA BEKU

11. Tongana nyen la Jésus asara ye na aita ti lo so amä na bê ape?

¹¹ Bible afa so Jésus angbâ lani ti kanga bê na aita ti lo. Na tapande, na bango ni ala kue ayeke lani na Cana na ngoi so lo sara kozo miracle ti lo (Jean 2:​11, 12). Tongana ti so e tene fade, aita ti Jésus amä na bê na lo ape. Me Jésus afâ yâ ti songo na ala ape. Ngu ota tongaso na peko ti kozo miracle so lo sara na Cana, Bible atene so lo sara tënë na aita ti lo na nzoni bê.—Jean 7:​5-8.

12. Nyen la apeut ti aidé e ti duti na beku so ambeni fami ti e ayeke changé bango ndo ti ala?

¹² So e hinga so Jéhovah ayeke sara ye na nzoni bê mingi apeut ti aidé e ti ngbâ ti duti na beku so afami ti e ayeke mû desizion ti sara na Jéhovah. Na ngoi so a yeke futi ande abungbi ti vorongo nzapa ti wataka, afami ti e apeut ti dabe ti ala so e sara lani tënë ni na alab (Apoc. 17:16). Ala peut même ti ga ti tene e na ala e voro Jéhovah na peko ti so kota ye ti vundu akomanse. Me kozo ti si kâ, tongana afami ti e ayeke na akpale, e yeke sara ye kue so e peut ti sara ti aidé ala. Tongana ala bâ so e ye ala biani, ala peut ti yeda ti manda ye mingi na ndö ti aye so Bible afa.

FA NA ALA SO MO YE ALA

13. Atâa so e yeke sara kua ti Jéhovah mingi, nyen la a yeke nzoni e sara hange na ni?

¹³ Atâa so e yeke sara kua ti Jéhovah mingi, e ye ape ti tene afami ti e apensé so e yeke na ngoi ndali ti ala ape wala e ye ala encore ape (Mat. 7:12). Tongana nyen la e peut ti fa so e pensé na ala? Bâ ambeni ye so e peut ti sara la.

14-15. Mbeni ye wa la e peut ti sara ti fa na afami ti e so ayeke aTémoin ape so e ye ala? Fa mbeni tapande ni.

¹⁴ Sara lisoro na ala lakue nga fa na ala so mo ye ala. E yeke fa so e ye afami ti e tongana e sara lisoro na ala lakue. Na tapande, e peut ti iri ala na téléphone wala ti tokua na ala message nga na ambeni foto so e sara na ngoi ti congé ti e, mbeni voyage so e sara wala na ngoi ti mbeni ngia so e na akamarade ti e e sara. Mbeni kete cadeau wala mbeni nduru lettre apeut ti duti ye so e peut ti sara ti kpengba songo ti e na ala. Tongana e mû li ni ti sara tongaso, e yeke fa na afami ti e so e ye ala.

¹⁵ Gbu li na ndö ti tapande ti Anna, mbeni ita-wali so ayeke na Arménie. Azo ti sewa ti lo ayeke mû ka ngoi mingi ti duti ndo oko, mbilimbili na ngoi ti alango ti dungo azo ti sewa ni nga na alango ti fête. Na ngoi so Anna aga Témoin ti Jéhovah, afami ti lo agi bê ti ala so lo yeke zia ti mû ngoi ti duti na terê ti ala. Ala gi nga bê ti ala so, so lo ga Témoin, gigi ayeke ga ngangu na lo. Nyen la Anna asara ti dë bê ti ala? Lo tene: “Tongana mbi gue ti bâ afami ti mbi, mbi yeke sara tënë na ala na ndö ti gigi ti mbi nga na aye so mbi yeke sara. Mbi yeke tisa nga ala na ndo ti mbi nga mbi yeke fa ala na akamarade ti mbi. A sara si mingi ti afami ti mbi ahinga akamarade ti mbi nzoni nga a nzere na ala ti duti na terê ti ala.” Lo kiri lo tene: “Afami ti mbi mingi atene so ala bâ so mbi yeke na ngia mingi na ala gi bê ti ala na ndö ti mbi encore ape.”

16. Tongana nyen la Jésus afa na ita ti lo Jacques so lo pensé na lo? (Bâ nga kete tënë na gbe ni.)

¹⁶ Fa na ala so mo bâ ala na nene ni. Na peko ti so a zingo Jésus na kuâ, lo fa so lo pensé na ita ti lo Jacques na lege so lo si na lo (1 aCor. 15:7). A doit lani ti nzere na Jacques ti hinga so Jésus angbâ ti ye lo. Warango terê ti ala so la peut-être apusu Jacques ti hinga so Jésus ayeke Messie. Na pekoni, peut-être Jacques a-aidé tanga ti azo ti sewa ni ti yeda so Jésus ayeke Messie.c—Kus. 1:14.

17. Tongana nyen la e peut ti sara ye alingbi na mama-ndia so ayeke na aRomain 12:15? (Bâ nga foto.)

¹⁷ Diko aRomain 12:15. Anzoni ye nga na akpale ayeke si na afami ti e. Tongana e fa so e yeke pensé na ala, mbilimbili na angoi so ala yeke tâ na bezoin ti tene e aidé ala, ala peut ti changé bango ndo ti ala na ndö ti e.d Na tapande, na ngoi so mbeni fami ti e adü mbeni bébé, e peut ti duti na ngia legeoko na lo nga ti mû na lo mbeni cadeau ti fa na lo so terê ti e anzere. Tongana mbeni zo so mbeni fami ti e aye lo akui, e peut ti tene na lo mbeni tënë ti dë bê ti lo wala ti tokua na lo mbeni lettre wala ti sara ambeni ye nde ti aidé lo. Nga a yeke nzoni e girisa ape ti iri afami ti e, ti tokua message na ala wala ti gue ti bâ ala lakue, mbilimbili na ngoi so ala yeke na yâ ti mbeni ngangu kpale.

18. Tongana nyen la e peut ti sara ye tongana disciple André?

¹⁸ Fa afami ti mo na aita. Na ngoi so disciple André ahinga so Jésus ayeke Messie, hio lo gue lo tene na ita ti lo Pierre ti ga ti bâ lo (Jean 1:​40-42). Eskê e peut ti sara tongaso na afami ti e? Na tapande, eskê ngoi na ngoi e peut ti tisa mbeni fami ti e na bungbi wala ti tisa lo ti te ye legeoko na aita? Tongana e fa lo na aita, lo yeke bâ so aTémoin ayeke tongana tanga ti azo kue nga ala yeke anzoni zo.

19. Même tongana afami ti e acomprendre nzoni ape ambeni ye so e mä na bê na ni, a yeke nzoni e sara ye na ala tongana nyen? (1 Pierre 3:15).

¹⁹ Diko 1 Pierre 3:15. Afami ti e apeut ti comprendre nzoni ape ndani so e ke ti sara ambeni ye, me ala yeke dabe ti ala lakue so e sara ye na ala na nzoni bê nga e ne ala. Même tongana e yeke na terê ti ala ape na angoi ti fête wala e yeke mû mbage na ambeni ngobo encore ape, tongana e sara effort ti passé mbeni ngoi na ala ayeke nzere na ala. Na tapande, e peut ti gue ti bâ ala, ti te ye ndo oko na ala nga ti mû na ala acadeau na ambeni ngoi nde.

NGBÂ TI GI TI AIDÉ AFAMI TI MO

20. Ngbanga ti nyen la tapande ti Jacques adë bê ti e?

²⁰ Jacques aperdre lani pasa ti fa tënë legeoko na Jésus, me na nda ni lo ga mbeni disciple (aGal. 1:​18, 19; 2:9). Atâa so lo yeke lani pëpe na popo ti akozo disciple ti Jésus, a yeke polele so lo manda ye na lege ti afango ye ti lo. Na tapande, lo sû mbeni lettre na aChrétien so na yâ ni a wara mara ti aye so Jésus afa na ngoi ti Fango ye ti lo na ndö ti Hoto.e

21. Ngbanga ti nyen la a yeke nzoni e ngbâ ti duti na beku so afami ti e so ayeke aTémoin ape apeut ti voro Jéhovah?

²¹ Atâa e sara kue ti sara ye na nzoni bê na afami ti e nga ti fa so e pensé na ala, ala peut ti sara ye na e na nzoni bê ape wala ala peut ti ke ti manda ye na ndö ti Jéhovah. Ngbanga ti nyen la a yeke nzoni e ngbâ ti sara ye na ala na nzoni bê? Ngbanga ti so lakue tongana e sara ye na nzoni bê, e yeke sara ye tongana Nzapa ti e Jéhovah nga na Molenge ti lo Jésus so ayeke sara ye na nzoni bê (Luc 6:​33, 36). Tongana ngoi ayeke hon, sarango ye ti e na nzoni bê na mbage ti ala apeut ti pusu ala ti changé bango ndo ti ala na ndö ti e nga ala peut ti dabe ti ala na aye so e mä na bê na ni ahon ti so e pensé. Tongana e ngbâ lakue ti gi ti aidé ala, ala peut ti yeda ti voro Jéhovah legeoko na e na ayeke nzere na e mingi.