Ngbâ ti manda ye na lege ti akozo fango ye ti Bible

1. Tongana nyen la akozo tâ tënë ti Bible so mo manda lani achangé gigi ti mo?

AKOZO tâ tënë so e manda achangé lani gigi ti e. Na tapande, na ngoi so e hinga so iri ti Nzapa ayeke Jéhovah, e komanse ti sara kamarade na lo (És. 42:8). Na ngoi so e hinga tâ tënë na ndö ti akuâ, e sara mbeto ti akuâ encore ape (Zo-ti. 9:10). Nga na ngoi so e hinga so Nzapa amû zendo ti tene sese aga Paradis, e gi bê ti e encore ape na ndö ti kekereke ti e. E hinga na bê ti e kue so fini ti e ayeke ngbâ gï pëpe na ngu 70 wala ngu 80, me e peut ti ngbâ na fini lakue lakue.—Ps. 37:29; 90:10.

2. Tongana nyen la 2 Pierre 1:​12, 13 afa so même aChrétien so akpengba apeut ti bâ nzoni na lege ti akozo fango ye ti Bible?

² E doit ti bâ lâ oko ape akozo fango ye ti Bible tongana asenge ye. Bazengele Pierre asû use mbeti ti lo na aChrétien so ‘aluti ngangu na yâ ti tâ tënë’. (Diko 2 Pierre 1:​12, 13.) Me na ngoi ni so, asioni zo so ayeke na yâ ti congrégation agi ti pusu aita ti gue yongoro na tâ tënë (2 Pi. 2:​1-3). Pierre aye lani ti kpengba aita ti lo tongaso si ala dö sese na azo so. Tongaso, lo dabe ti ala na ambeni fango ye so ala hinga awe. Afango ye so ayeke aidé ala ti ngbâ be-ta-zo juska na nda ni.

3. Mû mbeni tapande ti fa ndani so a yeke nzoni aChrétien kue angbâ ti gbu li na ndö ti akozo fango ye ti Bible.

³ Même tongana e yeke na yâ ti tâ tënë aninga awe, e peut ti ngbâ ti bâ nzoni na lege ti akozo fango ye ti Bible. Na tapande, mbeni zo so ahinga ti tö ye nzoni nga na mbeni zo so ayeke manda ti tö ye ayeke tö ye na amême ye ti tongo na kobe. Me tongana ngoi ayeke hon, zo so ahinga ti tö ye nzoni ayeke manda ti sara kua na aye so na alege nde nde ti tö akobe nde nde so anzere mingi. Legeoko nga, azo so asara na Jéhovah aninga awe apeut ti manda aye nde nde na lege ti akozo fango ye ti Bible ahon azo so ayeke manda Bible fini fini. Peut-être dutingo ti e wala akua so e sara na Jéhovah achangé ngbene ye so e wara batême. Tongana e gbu li na ndö ti afango ye ti Bible so e manda lani, e peut ti bâ so e peut ti sara ye alingbi na ni na ambeni lege nde ti lingbi na dutingo ti e laso. Zia e bâ aye so aChrétien so akpengba apeut ti manda na lege ti akozo fango ye ota ti Bible.

JÉHOVAH LA ACRÉÉ AYE

4. So e hinga so Jéhovah la acréé aye achangé gigi ti e tongana nyen?

⁴ “Zo so asara aye kue ayeke Nzapa.” (aHéb. 3:4). E hinga so Zo so ayeke na ndara nga na ngangu mingi la acréé sese nga na aye so ayeke na ndö ni. So lo sara e, lo hinga ye kue na ndö ti e. Na ndö ni, lo yeke pensé na e. Lo hinga ye so ayeke nzoni ndali ti e. Tongaso, ti hinga so Jéhovah la acréé aye achangé gigi ti e na alege nde nde so ayeke pendere mingi nga asara si e hinga ndani so e yeke na fini.

5. Tâ tënë wa la apeut ti aidé e ti sara terê ti e kete? (Ésaïe 45:​9-12).

⁵ So e hinga so Jéhovah la acréé aye, a yeke mbeni tâ tënë so apeut ti aidé e ti sara terê ti e kete. Na peko ti so Job azia li ti lo mingi na ndö ti lo wani nga na ambeni zo, Jéhovah adabe ti lo so Lo la lo créé aye nga ngangu ti Lo ahon angangu kue (Job 38:​1-4). Ye so a-aidé Job ti bâ so ye kue so Jéhovah asara ayeke lakue na lege ni. Ti gue oko na tënë so, ambeni ngoi na pekoni, prophète Ésaïe atene: “Eskê popoto ti sarango na ta alingbi ti hunda Zo ti lekengo ta, atene: ‘Nyen la mo yeke leke so?’”—Diko Ésaïe 45:​9-12.

6. Na ngoi wa la a yeke kota ye mingi ti gbu li na ndö ti kota ndara nga na kota ngangu ti Lo so acréé e? (Bâ nga afoto.)

⁶ Mbeni zo so asara na Jéhovah teti angu mingi apeut ti komanse ti zia bê ti lo na ndö ti bango ndo ti lo wani ahon ti gi fango lege na mbage ti Jéhovah nga na yâ ti Bible (Job 37:​23, 24). Ka tongana mbeni zo agbu li nzoni na ndö ti kota ndara nga na kota ngangu ti Lo so acréé lo? (És. 40:22; 55:​8, 9). Kozo tâ tënë so ayeke aidé lo ti ngbâ ti sara terê ti lo kete nga ti hinga so apensé ti Jéhovah la ayeke lakue na lege ni.

7. Nyen la a-aidé Rahela ti yeda na mbeni changement so bungbi ti Jéhovah asara?

⁷ Rahela, so ayeke na Slovénie, abâ so gbungo li na ndö ti Lo so acréé lo a-aidé lo ti yeda na mbeni changement so bungbi ti Jéhovah asara. Lo tene: “Na ambeni ngoi, a yeke ngangu na mbi ti yeda na adesizion so aita so amû li ni amû. Na tapande, même na peko ti so mbi bâ Fini sango n° 8 ti ngu 2023 so alondo na Bebungbi, bê ti mbi ason ti bâ mbeni ita so ayeke mû diskur abata kuä ti yanga ti lo. Tongaso, mbi sambela Jéhovah ti aidé mbi ti yeda na changement so.” Rahela ahinga so, so Jéhovah la acréé yayu na sese, lo lingbi biani ti fa nzoni lege na bungbi ti lo. Tongana a yeke ngangu na mo ti yeda na mbeni fini fango nda ti ye wala mbeni fini fango lege, mû ngoi ti gbu li nzoni na ndö ti kota ndara nga na kota ngangu ti Lo so acréé mo.—aRom. 11:​33-36.

NDANI SO NZAPA AZIA LEGE NA PASI

8. So e hinga ndani so Nzapa azia lege na pasi a-aidé e tongana nyen?

⁸ Ngbanga ti nyen la Nzapa azia lege na pasi? Bê ti azo so awara kiringo tënë na hunda so ape ason na terê ti Nzapa wala ala tene so Nzapa ayeke dä ape (aProv. 19:3). Me mo manda so azo ayeke bâ pasi ndali ti siokpari so a dü ala na ni nga ndali ti so ala yeke mbilimbili-kue ape, me pëpe ndali ti so Jéhovah asara mbeni sioni ye. Mo manda nga so, so Jéhovah akanga bê amû lege na azo kutu mingi ti hinga lo nga ti bâ ala wani tongana nyen la Jéhovah ayeke hunzi ande pasi biani biani (2 Pi. 3:​9, 15). Atâ tënë so adë bê ti mo nga asara si mo ga nduru mingi na lo.

9. Na yâ ti aye wa la peut-être a yeke kota ye mingi ti dabe ti e na araison so ndali ni Jéhovah azia lege na pasi?

⁹ E hinga so e doit ti kanga bê e ku ti tene Jéhovah ahunzi pasi. Me tongana mbeni zo so e ye lo akui, wala e wara kpale na yâ ti sewa ti e wala a sara ye na e na lege ni ape, bê ti e apeut ti son ndali ti so e bâ so Jéhovah asara ye hio ape ti kaï pasi (Hab. 1:​2, 3). Na angoi tongaso, a yeke na lege ti ndara ti gbu li na ndö ti ndani so Jéhovah azia lege na azo ti mbilimbili ti bâ pasia (Ps. 34:19). E peut nga ti gbu li na ndö ti ye so lo leke na bê ti lo ti sara ti hunzi pasi biani biani.

10. Nyen la a-aidé Anne ti gbu ngangu na peko ti kuâ ti mama ti lo?

¹⁰ Ti hinga tâ tënë na ndö ti pasi apeut ti aidé e ti gbu ngangu. Anne, so avivre na ndö ti zoa ti Mayotte, so ayeke na yâ ti Kota ngu-ingo ti Inde, atene: “A sara ambeni ngu awe, mama ti mbi akui na vundu asara mbi mingi. Me lakue mbi yeke dabe ti mbi so Jéhovah ayeke na gunda ti pasi ape. Lo yeke ku kungo ti hunzi pasi kue nga ti zingo azo so e ye ala so akui. Tongana mbi gbu li na ndö ti atâ tënë so, a mû na mbi siriri ti bê so fani mingi asara si li ti mbi akpe.”

11. Tongana nyen la so e hinga ndani so Jéhovah azia lege na pasi a-aidé e ti ngbâ ti fa tënë?

¹¹ So e hinga tâ tënë na ndö ti ndani so Nzapa azia lege na pasi apeut ti pusu e ti ngbâ ti fa tënë. Bazengele Pierre afa mbeni raison so ndali ni Jéhovah angbâ ti zia lege na pasi, lo fa so lo ye ti tene azo achangé bê ti ala na ala sö fini ti ala. Pierre afa nga na e ye so e peut ti sara, lo tene: “A yeke nzoni ala bâ wala dutingo ti ala ayeke tongana nyen na lege ti sarango ye so ayeke nzoni-kue nga na akusala so afa so ala voro Nzapa na bê ti ala kue.” (2 Pi. 3:11). Na popo ti ‘akusala so afa so e voro Nzapa na bê ti e kue’ mo yeke wara kua ti e ti fango tënë. Tongana ti Babâ ti e, e ndoye azo. E ye ti tene ala vivre na yâ ti fini dunia ti Nzapa so mbilimbili ayeke duti dä. Jéhovah ayeke kanga bê ti mû lege na azo ti yâ ti territoire ti mo ti voro lo. So pasa si mo yeke na ni ti sara kua maboko na maboko na Nzapa nga ti aidé azo mingi ti manda ye na ndö ti lo kozo si nda ni aga!—1 aCor. 3:9.

E YEKE NA “LÂ TI NDA NI”

12. So e hinga so e yeke na “lâ ti nda ni” a-aidé e tongana nyen?

¹² Bible afa na lege ni sarango ye ti azo na “lâ ti nda ni”. (2 Tim. 3:​1-5). Tongana e bâ tongana nyen la azo so angoro e ayeke sara ye, e bâ polele so prophétie so ayeke ga tâ tënë. Bango ndo ti azo ayeke ga gï sioni sioni, ye so asara si e hinga biani so e peut ti sara confiance encore mingi na Bible.—2 Tim. 3:​13-15.

13. Ti gue oko na toli ti Jésus so ayeke na Luc 12:​15-21, ahunda wa la e peut ti hunda terê ti e na ni?

¹³ So e hinga so e yeke na lâ ti nda ni ayeke mbeni tâ tënë so apusu e ti sara ye hio. Bâ ye so e peut ti manda na ndö ti sarango ye hio na lege ti toli ti Jésus so ayeke na Luc 12:​15-21. (Diko ni.) Ngbanga ti nyen la a iri koli so ayeke na aye mingi ‘zo so li ti lo ayeke dä ape’? A iri lo tongaso pëpe ndali ti so lo yeke na mosoro mingi me ndali ti so lo zia aye so ayeke kota mingi kozo ape. Lo bungbi “mosoro ndali ti lo wani, me lo yeke na mosoro na mbage ti Nzapa pëpe.” Ngbanga ti nyen la koli so adoit ti sara ye hio? Ngbanga ti so Nzapa atene na lo, atene: “A yeke mû fini ti mo na bï so.” Laso, so aye ti ngoi so aga nduru ti hunzi, e peut ti hunda terê ti e, e tene: ‘Eskê aye so mbi yeke gi ti sara afa so mbi yeke sara kua nzoni na ngoi ti mbi? Ka ti aye so mbi yeke aidé amolenge ti mbi ti gi ti si dä? Eskê mbi yeke sara kua na ngangu ti mbi, ngoi ti mbi nga na aye ti mbi kozoni kue ti bungbi mosoro ndali ti mbi wani wala ti bungbi mosoro na yayu?’

14. Tongana nyen la ye so asi na Miki a-aidé e ti bâ so e doit ti girisa ape so e yeke na lâ ti nda ni?

¹⁴ Bango ndo ti e apeut ti changé tongana e gbu li na ndö ti aye so afa so e yeke na lâ ti nda ni. A yeke ye so asi na Ita-wali Miki. Lo tene: “Na ngoi so mbi hunzi ekole na lycée, mbi ye lani ti manda ye na ndö ti anyama. Mbi ye nga lani ti ga pionnier permanent nga ti gue na ndo so a bezoin awafango tënë dä mingi. Ambeni ita so akpengba awa mbi ti gbu li nzoni ti bâ wala mbi peut ti sara kua ti nginza so mbi ye nga ti sara akua ti Jéhovah so mbi ye ti sara. Ala dabe ti mbi so dunia so aga nduru ti hunzi awe. Me na yâ ti fini dunia, mbi peut ti manda ye na ndö ti anyama kue teti lakue lakue. Tongaso, mbi mû desizion ti manda mbeni ye so amû ngoi mingi ape. Ye so amû lege na mbi ti wara mbeni kua ti nginza so a-aidé mbi na yâ ti kua ti mbi ti pionnier permanent nga na pekoni ti gue na Équateur, ndo so a bezoin awafango tënë dä mingi.” Miki na koli ti lo ayeke sara laso kua ti circonscription na kodro so.

15. Azo so ake laso ti mä nzoni tënë apeut ti sara ye mbeni lâ tongana nyen? Mû mbeni tapande ti fa ni. (Bâ nga afoto.)

¹⁵ E doit ti découragé ape tongana azo ake ti mä nzoni tënë so e fa na ala. Azo apeut ti changé. Bâ tapande ti Jacques, ita ti Jésus so mama ti ala ayeke oko. Lo bâ lani Jésus na ngoi so lo yeke kono, lo ga Messie nga lo fa ye tongana ti so mbeni zo afa lâ oko ape. Me, teti angu mingi, Jacques amû peko ti Jésus ape. A yeke gï na peko ti so a zingo Jésus na kuâ la ita ti lo so aga mbeni disciple ti lo. Ti vrai ni, lo ga mbeni disciple so ayapu mingib (Jean 7:5; aGal. 2:9). A yeke kota ye ti tene mo zia pëpe ti gi ti fa tënë na afami ti mo so ade asara nzara ti tâ tënë ape nga na azo so ade ayeda na tokua ti Royaume ape. Girisa ape so e yeke na lâ ti nda ni tongaso e doit ti fa tënë hio. Azo apeut ti gbu li mbeni lâ na ndö ti tënë so mo tene na ala laso nga ti sara ye alingbi na ni peut-être même na peko ti so kota ye ti vundu akomanse.c

KIRI SINGILA NA JÉHOVAH NDALI TI ATËNË TI DANGO BÊ TI LO

16. Tongana nyen la atënë ti dango bê ti Jéhovah a-aidé mo? (Bâ nga encadré “Sara kua na atâ tënë ti Bible ti aidé azo.”)

¹⁶ Ambeni kobe ti yingo so e wara, a leke ni ndali ti azo so amä akozo tâ tënë ti Bible lâ oko ape. Na tapande, adiskur ti yenga oko oko, ambeni article nga na ambeni vidéo so ayeke na ndö ti jw.org, Tour ti Ba Ndo ti kangbingo ni nga na Zingo na lango!, a leke ni kozoni kue ndali ti azo so ayeke aTémoin ape. Atâa so kue, e yeke bâ nzoni dä. Akobe ti yingo so asara si e ye Jéhovah mingi, e yeke na confiance mingi na Bible nga a-aidé e ti fa akozo tâ tënë ti Bible na azo nzoni mingi.—Ps. 19:7.

17. Na yâ ti aye wa la mo peut ti gbu li na ndö ti akozo fango ye ti Bible?

¹⁷ E aTémoin ti Jéhovah, a nzere na e mingi ti wara mbeni fini fango nda ti ye na ndö ti mbeni tâ tënë ti Bible. Me e kiri nga singila mingi ndali ti akozo fango ye ti Bible so e wara so agboto e na yâ ti tâ tënë. Tongana bê ti e apusu e ti luti nganganga na ndö ti bango ndo ti e ahon ti yeda na fango lege ti bungbi ti Jéhovah, a yeke nzoni e sara terê ti e kete e dabe ti e na zo so ayeke fa lege na bungbi so. A yeke Lo so acréé aye kue so ngangu ti lo ahon angangu kue so ayeke na ndara mingi. Tongana e wala mbeni zo so e ye lo ayeke gbu ngangu na yâ ti mbeni kpale, e peut ti kanga bê nga e gbu li na ndö ti ndani so Jéhovah azia lege na pasi. Na ngoi so e yeke gbu li ti bâ tongana nyen la e yeke sara kua na ngoi nga na aye ti e, e peut ti dabe ti e so e yeke na lâ ti nda ni na e doit ti sara ye hio. Zia si atënë ti dango bê ti Jéhovah angbâ ti kpengba e, ti pusu e ti sara ye nga ti aidé e ti ga azo ti ndara.