‘ Bata beoko ti yingo na yâ ti kamba ti siriri so abungbi e oko’

E yeke “beoko” na lege “ti yingo”. So aye ti tene e yeke beoko grâce na ngangu ti Nzapa. Ye oko, tongana ti so Paul afa, e doit ti sara ngangu ti bata ni. Zo wa la adoit ti sara ngangu ni? Ti vrai ni, Chrétien oko oko kue adoit ti sara ngangu “ti bata beoko ti yingo” so ayeke na popo ti e.

Na tapande, imaginé so mbeni zo amû na mo fini oto. Zo wa la ayeke bâ lege ni ti tene angbâ nzoni? Kiringo tënë ni ayeke polele. Tongana oto ni abuba ndali ti so mo bâ lege ni ape, mo yeke bi tënë ni na li ti zo so amû ni na mo ape.

Legeoko nga, atâa so Nzapa la asara si e yeke beoko, e oko oko kue e doit ti sara ngangu ti ngbâ ti bata ni. Tongana e na mbeni ita e mä terê ape, a yeke nzoni e hunda terê ti e, e tene: ‘Eskê mbi yeke sara kue ti tene beoko aduti na yâ ti congrégation?’

“SARA NGANGU” TI BATA BEOKO TI E

Tongana ti so Paul atene, na ambeni ngoi, peut-être e bezoin ti sara ngangu ti bata beoko ti yingo so ayeke na popo ti e. A peut ti duti tongaso mbilimbili tongana mbeni ita ason bê ti e. Ti ngbâ ti bata beoko, eskê a hunda lakue ti sara lisoro na zo ni na ndö ti kpale ni? Ên-ën. Hunda terê ti mo na tënë so: ‘Tongana mbi sara lisoro na zo ni na ndö ti tënë ni, eskê a yeke ga kota kpale?’ Na ambeni ngoi, a yeke nzoni ti sara sanka ti tënë ni wala ti pardonné zo ni.—aProv. 19:11; Marc 11:25.

Tongana ti so bazengele Paul atene, zia e ngbâ ti “kanga bê na mba na yâ ti ndoye”. (aÉph. 4:2). Mbeni mbeti atene so a peut ti kiri na peko ti tënë so na tënë “ye ala na asarango ye ti ala.” So aye ti tene e yeda so amba ti e aChrétien ayeke sara afaute gï tongana ti so e nga e yeke sara ni. Ti vrai ni, e yeke ngbâ ti gi ti “yü fini zo”. (aÉph. 4:​23, 24). Me zo oko na popo ti e apeut ti sara ni tâ na lege ni ape (aRom. 3:23). Tongana e yeda na tënë so, a yeke duti ngangu na e ape ti kanga bê na mba, ti pardonné mba nga ti “sara ngangu ti bata beoko ti yingo”.

Tongana e pardonné amba ti e ndali ti aye so ala sara na e nga e girisa ni, ‘kamba ti siriri ayeke ngbâ ti bungbi e oko.’ Tënë ti Grec so a kiri peko ni na tënë “kamba ti siriri so abungbi ye” na aÉphésien 4:​3, a kiri peko ni na aColossien 2:19 na tënë ‘akamba ti terê so atingbi abio’. Akamba ti terê ayeke asisa so akpengba so atingbi abio. Legeoko nga, siriri nga na yengo so e ye na aita ayeke aidé e ti ngbâ ti duti na kpengba songo na ala atâa so na ambeni ngoi e na ala e mä terê ape.

Tongaso, tongana mbeni ita ason bê ti mo, gi ti comprendre lo me bâ gï pëpe asioni ye so lo sara (aCol. 3:12). So azo kue ayeke mbilimbili-kue ape, mo nga kue peut-être na ambeni ngoi mo son bê ti mbeni zo. Tongana mo girisa tënë so ape ayeke aidé mo ti “sara ngangu ti bata beoko ti yingo”.