Mbeni article so akpengba awali so a sara ye na ala na lege ni ape

Article “Tënë ti nzoni duti ti awali: Bible atene nyen na ndö ni?” so ayeke na ndö ti jw.org akomanse tongaso. Na lege ti lien so ayeke na hunzingo ti article ni, mo peut ti téléchargé ni ti imprimé ni nga ti plié ni aga mbeni tract so ayeke na alembeti osio. Ita-wali Stacy so ayeke na États-Unis atene: “Mbi imprimé lani tract so gbani na mbi na mbeni ita-wali e gue na ni na mbeni ndo na yâ ti territoire ti e so awali akpe ague dä ti bata terê ti ala.”

Mbeni zo so ayeke sara kua kâ ahunda wala lo peut ti wara ambeni encore ti mû na azo so ayeke kâ. Ye so asara si e kiri e kangbi tract so 40 nga na carte ti jw.org 30 na azo. Ambeni ngoi na pekoni, kota zo ti ndo ni aye ti tene aTémoin afa na awali so ayeke kâ tongana nyen ti manda Bible.

Stacy na ambeni ita-wali use ague na mbeni mara ti ndo ni so na ala mû tract so oku na azo, na ambeni zo ahunda nga ti wara ni. Mbeni zo so ayeke sara kua na ndo ni so atene: “Mbeti so ayeke aidé awali so ayeke ge.” Lo kiri lo tene: “E bezoin mbeti so.” Na ngoi so aita-wali ni akiri ague kâ, ambeni wali aye ti bâ tongana nyen la a yeke manda Bible, na use na popo ti ala atene ala ye ti gue na bungbi na Da ti Royaume na weekend so ayeke ga.

Stacy atene: “Li ti e akpe ti bâ tongana nyen la a nzere na azo ti diko article so. Tongana mo imprimé ni nga mo plié ni, a yeke tâ pendere mingi ti fa na tënë ti Royaume na awali so a sara ye na ala na lege ni ape. Terê ti e anzere mingi ti bâ tongana nyen la a nzere na azo ti diko ni. E yeke ku kungo ti bâ tongana nyen la Jéhovah ayeke aidé e ti ngbâ ti fa nzoni tënë na awali so.