“ Mo yeke mbeni zo so a bâ mo na nene ni mingi”

1-2. Nyen la apeut ti aidé e ti duti sûr so Jéhovah abâ e na nene ni?

NA POPO ti awakua ti Jéhovah so lo bâ ala na nene ni, ambeni ayeke dä so abâ so ala yeke ye oko ape. Peut-être mbeni zo asara ye na ala mo bâ mo tene ala yeke ye oko ape. Eskê a si na mo awe ti bâ so mo yeke ye oko ape? Tongana a yeke tongaso, nyen la apeut ti aidé mo ti bâ so Jéhovah abâ mo na nene ni?

² Mbeni ye so apeut ti aidé mo ayeke ti diko ambaï ti Bible so afa tongana nyen la Jéhovah aye ti tene e bâ azo nga e sara ye na ala. Molenge ti lo Jésus ane lani azo nga lo sara ye na ala na nzoni bê. So lo sara tongaso, lo fa so lo na Babâ ti lo abâ na nene ni mingi azo so asara terê ti ala kete so aba so ala yeke ye oko ape (Jean 5:19; aHéb. 1:3). Na yâ ti article so, e yeke bâ: (1) tongana nyen la Jésus a-aidé lani azo ti hinga so Jéhovah abâ ala na nene ni nga (2) tongana nyen la e peut ti duti sûr so Nzapa abâ e biani na nene ni mingi.—Ag. 2:7.

JÉSUS A-AIDÉ AZO TI HINGA SO NZAPA AYE ALA MINGI

3. Jésus asara ye lani tongana nyen na azo ti Galilée so aga na mbage ti lo ti hunda mungo maboko?

³ Na ngoi so Jésus ayeke fa lani tënë na Galilée, gbâ ti azo aga na mbage ti lo ti mä lo nga ti tene lo sava ala. Jésus atene so “a sara pasi na ala nga yâ ti ala akangbi kirikiri tongana ataba so ayeke na berger pëpe.” (Mat. 9:36; bâ anote ti étude na ndö ti versê so na Français). Akota zo ti bungbi ti nzapa ti ala abâ so ala yeke ye oko ape, ala iri même ala “azo so a deba ala awe.” (Jean 7:​47-49; note ti étude na Français). Me Jésus asara ye na ala na nzoni bê nga lo ne ala na lege so lo mû ngoi ti fa ye na ala nga ti sava ala (Mat. 9:35). Na ndö ni, ti aidé azo mingi, lo fa na abazengele ti lo ti fa tënë na ala nga lo mû yanga na ala ti sava ala.—Mat. 10:​5-8.

4. Nyen la e manda na lege ti fason ti sarango ye ti Jésus na mbage ti azo so azo ane ala ape?

⁴ So Jésus asara ye na nzoni bê na azo so amä lo nga lo ne ala, a fa so lo na Babâ ti lo abâ na nene ni mingi azo so mingi ni azo ane ala ape. Tongana mo yeke wakua ti Jéhovah me mo yeke na kite so lo bâ mo na nene ni, gbu li na ndö ti sarango ye ti Jésus na mbage ti azo so ayeke na mara ti bango ndo so, so aye ti manda ye na mbage ti lo. Tongana mo sara ni apeut ti aidé mo ti bâ so Jéhovah abâ mo na nene ni mingi.

5. Nyen la e hinga na ndö ti mbeni wali so ayeke zo ti Galilée so Jésus atingbi na lo?

⁵ Jésus afa ye lani na gbâ ti azo nga lo fa ye na azo oko oko nga lo aidé ala. Na tapande, na ngoi so lo yeke fa tënë na Galilée, lo tingbi na mbeni wali so mênë ayeke ga na terê ti lo mingi a sara ngu 12 awe (Marc 5:25). Ndia afa so lo ga sioni awe na zo kue so andu lo ayeke ga sioni. Tongaso, peut-être mingi ni lo yeke duti gï lo oko. Na ndö ni, lo lingbi lani ape ti voro Jéhovah legeoko na amba ti lo na synagogue wala na ngoi ti amatanga (Lév. 15:​19, 25). Kite ayeke dä ape so terê ti wali so ason me lo bâ nga so lo yeke ye oko ape.—Marc 5:26.

6. Nyen la wali ni asara ti wara sava?

⁶ Wali so, so ayeke bâ lani pasi, aye ti tene Jésus asava lo. Me lo hunda na Jésus ape ti sava lo. Ngbanga ti nyen? Peut-être ngbanga ti so kobela ti lo ni asara si kamene asara lo. Wala ndali ti so lo yeke sioni, peut-être mbeto asara lo ti tene Jésus asuku na lo ndali ti so lo lï na popo ti gbâ ti azo ni. Tongaso, lo ndu gï bongo ti Jésus ti ndö ni ndali ti so lo hinga so tongana lo ndu ni lo yeke wara sava (Marc 5:​27, 28). Lo wara lani futa ti peko ti kpengba mabe ti lo: lo wara sava. Na pekoni, Jésus ahunda zo wa la andu lo na lo fa ye so lo sara. Jésus asara ye lani na wali so tongana nyen?

7. Jésus asara ye lani na wali so abâ pasi mingi so tongana nyen? (Marc 5:34).

⁷ Jésus asara ye lani na wali so na nzoni bê nga lo ne lo. Lo bâ so “mbeto agbu wali ni na terê ti lo ayeke dö.” (Marc 5:33). So Jésus acomprendre lo, lo dë bê ti lo. Lo iri même lo “molenge ti mbi ti wali”. So Jésus atene tongaso, lo fa so lo ne lo nga lo sara ye na lo na nzoni bê. (Diko Marc 5:34.) A yeke gï na yâ ti versê so la Jésus airi mbeni wali “molenge ti mbi”. Peut-être lo iri lo tongaso ndali ti so lo bâ so mbeto asara wali ni mingi. Imaginé dengo bê so wali so awara lani. Tongana Jésus adë lani bê ti lo ape, lo yeke wara sava lo hon me lo yeke bâ so tënë ayeke na li ti lo. Me Jésus a-aidé lo ti hinga so lo yeke molenge-wali so Babâ ti lo ti yayu aye lo mingi.

8. Akpale wa la mbeni ita-wali na Brésil awara?

⁸ Laso nga, ambeni wakua ti Nzapa ayeke na akpale ti seni so asara ala vundu mingi. Mariaa ayeke mbeni pionnier permanent na Brésil. Na ngoi so a dü lo, gere ti lo use kue nga na maboko ti lo ti wali ayeke dä ape. Lo tene: “Na ekole, amba ti mbi ayeke iri mbi na airi so ayeke son bê ti mbi. Na ambeni ngoi, même azo ti sewa ti mbi asara si mbi bâ so mbi yeke ye oko ape.”

9. Nyen la a-aidé Maria ti bâ so Jéhovah abâ lo na nene ni?

⁹ Nyen la a-aidé Maria? Na ngoi so lo ga Témoin ti Jéhovah, amba ti lo aChrétien adë bê ti lo nga ala aidé lo ti bâ terê ti lo tongana ti so Jéhovah abâ na lo. Lo tene: “Gbâ ti aita a-aidé mbi. Mbi kiri singila na Jéhovah na bê ti mbi kue so lo mû na mbi pendere sewa na yâ ti congrégation.” Aita so a-aidé biani Maria ti hinga so Nzapa abâ lo na nene ni.

10. Akpale wa la azia lani vundu na bê ti Marie ti Magdala? (Bâ nga afoto.)

¹⁰ Gbu li na ndö ti fason so Jésus a-aidé lani mbeni wali so iri ti lo Marie ti Magdala. Asioni yingo mbasambala ayeke lani na yâ ti lo (Luc 8:2). Peut-être asioni yingo ni asara si lo yeke sara ye lani kirikiri, na azo ayeke kpe lo kpengo. Lo bâ lani pasi mingi. Âmanke mbeto asara lo mingi nga lo pensé so zo oko aye lo ape wala zo oko apeut ti aidé lo ape. Peut-être Jésus atomba lani asioni yingo so asara pasi na lo nga lo ga disciple ti lo. Na mbeni lege nde wa la Jésus a-aidé Marie ti Magdala ti comprendre so Nzapa abâ lo na nene ni mingi?

11. Tongana nyen la Jésus afa na Marie ti Magdala so Nzapa abâ lo na nene ni mingi? (Bâ nga afoto.)

¹¹ Jésus atisa lani Marie ti Magdala ti tene lo mû peko ti lo na ngoi so lo na adisciple ti lo ague ti fa tënë na akete kodro.b A sara si lo ngbâ ti mä Jésus na ngoi so lo yeke fa ye na azo. Jésus asi nga lani na lo tâ na lango so a zingo lo na kuâ. Lo yeke lani oko ti akozo disciple so Jésus asara tënë na ala na lango ni so. Jésus ahunda même lani na lo ti gue ti tene na abazengele ti lo so a zingo lo na kuâ awe. Na alege so kue, Jésus a-aidé lo ti bâ so Jéhovah abâ lo na nene ni mingi.—Jean 20:​11-18.

12. Nyen la asara si Lidia abâ so lo yeke ye oko ape?

¹² Tongana ti Marie ti Magdala, laso azo mingi abâ so ala yeke ye oko ape. Lidia, mbeni ita-wali so ayeke na Espagne, atene so kozo ti tene a dü lo, mama ti lo aye lani ti tuku ngo ti lo. Lo dabe ti lo so même na ngoi so lo de kete, mama ti lo asara sanka ti lo nga lo tene asioni tënë na lo. Lo tene: “So mama ti mbi aye lani mbi ape, mbi ye lakue ti tene azo aye mbi nga mbi ye ti ga kamarade ti ala. Mbi sara lani mbeto ti tene atâa nyen la mbi sara, azo ayeke ye mbi ape ndali ti so mama ti mbi asara kue ti tene mbi bâ so mbi yeke sioni zo.”

13. Nyen la a-aidé lani Lidia ti bâ so Jéhovah abâ lo na nene ni mingi?

¹³ Na ngoi so Lidia akomanse ti manda tâ tënë, aye achangé. Lo yeke sambela Jéhovah, lo yeke diko Bible nga aita ayeke tene atënë nga ala yeke sara ye na lo na nzoni bê, a sara si lo bâ so Jéhovah abâ lo na nene ni mingi. Lo tene: “Fani mingi koli ti mbi ayeke tene na mbi so lo ye mbi mingi. Lakue lo yeke dabe ti mbi na apendere sarango ye ti mbi. Ambeni kamarade ti mbi ayeke sara nga tongaso.” Eskê mo pensé na mbeni zo so abezoin ti tene a aidé lo ti comprendre so Jéhovah abâ lo na nene ni mingi?

LEGE TI BÂ TERÊ TI E TONGANA TI SO JÉHOVAH ABÂ NA E

14. Tongana nyen la 1 Samuel 16:7 a-aidé e ti hinga fason so Jéhovah abâ na e? (Bâ nga encadré “Ngbanga ti nyen la Jéhovah ayeke bâ azo ti lo na nene ni?”)

¹⁴ Hinga so Jéhovah abâ mo pëpe tongana ti azo ti dunia so. (Diko 1 Samuel 16:7.) Jéhovah abâ mo pëpe na nene ni ndali ti pendere ti mo, ye so mo yeke sara wala hingango mbeti ti mo (És. 55:​8, 9). Tongaso, gi ti bâ terê ti mo tongana ti so Jéhovah abâ na mo me pëpe tongana ti so azo ti dunia so abâ na mo. Mo peut ti diko ambaï ti Bible so afa so Jéhovah abâ na nene ni azo so na ambeni ngoi abâ so ala yeke ye oko ape, na tapande, Élie, Naomi nga na Hannah. Mo peut nga ti sû na mbeti aye so asi na mo so afa so Jéhovah aye mo biani nga lo bâ mo na nene ni mingi. Na ndö ni, mo peut ti kiri ti diko ye na ndö ti tënë ti bango zo wani na nene ni na yâ ti ambeti ti e.c

15. Ngbanga ti nyen la Jéhovah abâ Daniel tongana ‘mbeni zo so a bâ lo na nene ni mingi’? (Daniel 9:23).

¹⁵ Hinga so, so mo yeke be-ta-zo, Jéhovah abâ mo na nene ni mingi. Na mbeni ngoi, prophète Daniel so peut-être ngu ti lo ahon ngu 90 ‘awoko kue’ nga lo découragé (Dan. 9:​20, 21). Jéhovah akpengba lani lo tongana nyen? Lo tokua lani ange Gabriel ti dabe ti Daniel so lo yeke ‘mbeni zo so a bâ lo na nene ni mingi’ nga Nzapa amä asambela ti lo awe. (Diko Daniel 9:23.) Nyen la asara si Nzapa abâ Daniel na nene ni mingi? A yeke ngbanga ti so Daniel aye lani sarango ye na lege ni nga lo yeke be-ta-zo (Ézéch. 14:14). Jéhovah abata mbaï so na yâ ti Bible ti dë bê ti e (aRom. 15:4). Jéhovah ayeke mä nga asambela ti mo nga lo bâ mo na nene ni mingi ndali ti so mo ye sarango ye na lege ni nga mo yeke be-ta-zo na lo.—Mi. 6:​8, akete tënë na gbe ni; aHéb. 6:10.

16. Nyen la apeut ti aidé mo ti bâ Jéhovah tongana Babâ ti mo so aye mo?

¹⁶ Bâ Jéhovah tongana Babâ ti mo so aye mo. Lo yeke gi ti bâ afaute ti mo ape, me lo ye ti aidé mo (Ps. 130:3; Mat. 7:11; Luc 12:​6, 7). Gbungo li na ndö ti tënë so a-aidé gbâ ti azo so abâ so ala yeke ye oko ape. Na tapande, Ita-wali Éliana so ayeke na Espagne abâ so a ye lo ape nga so lo yeke ye oko ape ndali ti so koli ti lo azonga lo na yâ ti angu mingi. Lo tene: “Na ngoi kue so mbi bâ so mbi yeke ye oko ape, mbi imaginé Jéhovah so ayeke yô mbi na maboko ti lo na lo yeke sara ye na mbi na ndoye nga lo bata mbi.” (Ps. 28:9). Ita-wali Lauren so ayeke na Afrique du Sud adabe ti lo, lo tene: “Tongana, na nzoni bê, Jéhovah agboto mbi na mbage ti lo na akamba ti ndoye, lo sara si mbi ngbâ nduru na lo na yâ ti angu mingi nga lo sara même kua na mbi ti fa ye na azo, lo bâ mbi biani na nene ni nga mbi peut ti sara anzoni kua na lo.”—Os. 11:4.

17. Nyen la apeut ti aidé mo ti hinga biani so mo zia ngia na bê ti Jéhovah? (Psaume 5:12). (Bâ nga foto.)

¹⁷ Hinga biani so mo zia ngia na bê ti Jéhovah. (Diko Psaume 5:12.) David ahaka ziango ngia na bê ti Jéhovah, wala nzoni bê ti lo, na “kota vala” so ayeke bata azo ti mbilimbili. Tongana mo hinga so mo zia ngia na bê ti Jéhovah nga lo yeke mû maboko na mo, a yeke sara si mo pensé ape so mo yeke ye oko ape. Tongana nyen la mo peut ti hinga so mo zia ngia na bê ti Jéhovah? Tongana ti so e bâ fade, Bible afa na e apensé ti Jéhovah na ndö ti e. Na ndö ni, lo yeke sara kua na a-ancien, akota kamarade ti mo nga na ambeni ita ti dabe ti mo so lo bâ mo na nene ni mingi. Tongana azo atene nzoni tënë ti mo, a yeke nzoni mo sara ye tongana nyen?

18. Tongana azo agonda mo, ngbanga ti nyen la a yeke nzoni mo yeda na ni?

¹⁸ Tongana azo so ahinga mo nga aye mo agonda mo na bê ti ala kue, yeda na ni. Girisa ape so Jéhovah apeut ti sara kua na ala ti sara si mo hinga biani so mo zia ngia na bê ti lo. Éliana, so e sara tënë ti lo fade, atene: “Yeke yeke, mbi manda ti yeda na atënë so azo atene na mbi na nzoni bê. A yeke kete ye na mbi ape, me mbi hinga so a yeke ye so Jéhovah aye ti tene mbi sara la.” Na nzoni bê, a-ancien a-aidé nga Éliana ti bâ so Jéhovah aye lo. Laso, lo yeke pionnier nga lo yeke volontaire so angbâ ayo ayeke aidé na Béthel.

19. Ngbanga ti nyen la mo peut ti duti sûr so Nzapa abâ mo na nene ni?

¹⁹ Na nzoni bê, Jésus adabe ti e so Babâ ti e ti yayu abâ e na nene ni mingi (Luc 12:24). Tongaso, e peut ti duti sûr so lo bâ e na nene ni. Zia e girisa ni lâ oko ape. Zia e sara kue ti aidé nga amba ti e ti bâ so Nzapa abâ ala na nene ni mingi.