Jésus ayeke Kota prêtre ti e so ayeke bâ mawa ti zo

1-2. (a) Ngbanga ti nyen la Jéhovah atokua lani Molenge ti lo na sese? (b) Nyen la e yeke bâ na yâ ti article so? (aHébreu 5:​7-9).

JÉHOVAH NZAPA atokua lani molenge ti lo so lo ye lo mingi na sese ge, a sara ngu 2000 tongaso awe. Ngbanga ti nyen? Mbeni raison ni ayeke ti zi azo na gbe ti ngbâa ti siokpari na kuâ nga ti leke akpale kue so Satan aga na ni (Jean 3:16; 1 Jean 3:8). Jéhovah ahinga nga lani so aye so Jésus ayeke vivre ni na sese ayeke leke lo ti ga Kota prêtre so ayeke bâ mawa ti e. Jésus aga lani Kota prêtre na peko ti batême ti lo na ngu 29.a

² Na yâ ti article so, e yeke bâ tongana nyen la aye so Jésus avivre ni na sese a-aidé lo ti ga Kota prêtre so ayeke bâ mawa ti zo. Tongana e comprendre nzoni tongana nyen la Jésus ‘aga zo so alingbi biani’ ti sara kua ti Kota prêtre, a yeke duti ngangu na e ape ti sambela Jéhovah même tongana asiokpari ti e wala afaute ti e asara si e découragé.—Diko aHébreu 5:​7-9.

NZAPA ATOKUA MOLENGE TI LO SO LO YE LO MINGI NA SESE

3-4. Akota changement wa la Jésus asara na ngoi so lo ga na sese?

³ Mingi ti e, e sara ambeni changement awe na yâ ti gigi ti e, na tapande, e gue ayo na ndo ti e so e ye ni mingi nga e zia afami nga na akamarade ti e. Mara ti achangement so apeut ti duti kete ye ape. Me zo oko na popo ti e ade ti sara gbâ ti achangement tongana ti so Jésus asara lani ape. Na yayu, lo yeke lani kozo ange nga lo yeke kota mingi. Jéhovah aye lo mingi nga lo yeke lakue na ngia ndali ti so lo sara kua nduru na terê ti Babâ ti lo (Ps. 16:11; aProv. 8:30). Me aPhilippien 2:7 atene lo yeda ti “dö aye ti lo kue [ti] zia”, so ti tene, lo zia kota ndo ti lo na yayu ti ga ti vivre na popo ti azo so ayeke mbilimbili-kue ape na ndö ti sese.

⁴ Gbu nga li na ndö ti akozo ngu ti Jésus na sese. A dü lani Jésus na yâ ti sewa ti awayere, ye so afa ni ayeke kete sandaga so babâ na mama ti lo amû na peko ti so a dü lo (Lév. 12:8; Luc 2:24). Na peko ti so sioni Gbia Hérode amä tënë ti dungo Jésus, lo gi ti fâ lo. Ti sö fini ti Jésus, sewa ni akpe ague na Égypte ti bata terê ti lo teti mbeni ngoi (Mat. 2:​13, 15). Fini ti Jésus na sese ayeke lani tâ nde mingi na ti yayu.

5. Nyen la Jésus abâ lani na ndö ti sese? Tongana nyen la so lo vivre na sese aleke lo ti duti Kota prêtre? (Bâ nga foto.)

⁵ Na ngoi so Jésus ayeke na sese, lo bâ gbâ ti azo so ayeke bâ pasi. Kite ayeke dä ape so lo perdre lani ambeni zo so lo ye ala mingi, na tapande Joseph, babâ ti lo so abata lo. Na ngoi so Jésus ayeke fa tënë, lo tingbi lani na azo ti buruma, azo so abâ ndo ape, azo so aparalysé nga na ababâ na amama so aperdre amolenge ti ala na lo bâ mawa ti ala (Mat. 9:​2, 6; 15:30; 20:34; Marc 1:​40, 41; Luc 7:13). Tâ tënë, na ngoi so Jésus ayeke na yayu, lo bâ lani azo so ayeke bâ pasi. Me so lo ga na sese tongana zo, lo comprendre nzoni mingi pasi so azo ayeke bâ (És. 53:4). Aye so Jésus avivre na sese a-aidé lo ti comprendre atënë ti bê ti azo, aye so ason ala nga na pasi so ala yeke bâ. Tongana ti tanga ti azo, Jésus nga kue afatigué lani, lo gi bê ti lo nga vundu asara lo.

JÉSUS AZIA TERÊ TI LO NA PLACE TI AZO

6. Nyen la e manda na lege ti prophétie ti Ésaïe na ndö ti bango mawa ti zo so Jésus ayeke na ni? (Ésaïe 42:3).

⁶ Na ngoi ti fango tënë ti Jésus, lo bâ mingi mawa ti azo so a sara ye ti ngangu na ala. So lo sara tongaso, lo sara si prophétie ti Ésaïe aga tâ tënë. Na yâ ti Mbeti ti Nzapa so a sû ândö na Hébreu, a haka azo so ayeke na mosoro nga so ayeke na ngangu na mbeni yaka so aye amaï dä pendere wala na akota keke (Ps. 92:12; És. 61:3; Jér. 31:12). Me a haka azo so ayeke na zo ti aidé ala ape nga na azo so a sara ye na ala na lege ni ape na sosongo so aba awe nga na mèche so wâ ni ayeke gue ti mingo. (Diko Ésaïe 42:3; Mat. 12:20.) Jéhovah asara kua na atapande so ti fa ndoye nga na bango mawa ti zo so Jésus ayeke fa ande ni na mbage ti azo so a bâ so ala yeke ye oko ape.

7-8. Tongana nyen la Jésus asara si prophétie ti Ésaïe aga tâ tënë?

⁷ Matthieu afa so Jésus asara si prophétie ti Ésaïe aga tâ tënë na ngoi so lo tene: “Sosongo so awoko awe, lo yeke dö ni pëpe, na mèche so wâ ni ayeke gue ti mingo, lo yeke mingo ni pëpe.” Ambeni miracle so Jésus asara a-aidé lani azo so mbeni zo ti aidé ala ayeke dä ape so ayeke tongana mbeni sosongo so aba awe wala mèche so wâ ni ayeke gue ti mingo. Na popo ti azo so, a yeke wara mbeni koli so buruma amû terê ti lo kue. Âmanke lo pensé lani so lo peut ti wara sava ape wala ti kiri ti duti na terê ti afami nga na akamarade ti lo ape (Luc 5:​12, 13). A yeke wara nga mbeni koli so mê ti lo akanga nga lo peut ti sara tënë nzoni ape. Imaginé, so azo ayeke sara pendere lisoro me lo yeke mä yâ ni ape, a sara lo tongana nyen? (Marc 7:​32, 33). Me ye ni kue la ape.

⁸ Na ngoi ti Jésus, aJuif mingi apensé so azo so terê ti ala ason wala mbeni ye ti terê ti ala abuba awara futa ti siokpari so ala wala babâ na mama ti ala asara (Jean 9:2). Sioni pensé so la asara si mingi ni ala sara ye na lege ni ape na mbage ti azo tongaso. Me Jésus asava ala nga lo aidé ala ti hinga so Nzapa apensé na ala. Ye so afa na e nyen na ndö ti tënë ti bê ti Jésus na ndö ti e laso?

9. Tongana nyen la aHébreu 4:​15, 16 afa so Kota prêtre ti e so ayeke na yayu ayeke bâ biani mawa ti azo so ayeke mbilimbili-kue ape?

⁹ Diko aHébreu 4:​15, 16. E peut ti duti sûr so Jésus ayeke bâ lakue mawa ti e. Tënë so aye ti tene nyen? Tënë ti Grec so a kiri peko ni na tënë “bâ mawa ti zo” aye ti tene mo hinga biani vundu nga na pasi so mbeni zo abâ. Bâ so Paul asara kua na oko tënë ti Grec so na aHébreu 10:34 ti fa so e yeke bâ mawa ti azo so ayeke na kanga. Amiracle so Jésus asara so Bible asara tënë ni afa so lo bâ mingi mawa ti azo. Lo sava lani azo gï pëpe ndali ti so lo bâ so lo doit ti sara ni. Lo pensé biani na ala na lo ye ti aidé ala. Na tapande, na ngoi so lo sava zo ti buruma ni, lo peut lani ti ngbâ ayo ti sara ni, me bê ti lo apusu lo ti ndu koli ni. Peut-être a sara ngu mingi mbeni zo andu lo ape. Na ngoi so lo yeke aidé koli so mê ti lo akanga ti mä ndo, na nzoni bê lo mû lo, lo gue na lo na ndo so bruit ayeke dä ape nga zo ayeke dä ape. Nga na ngoi so mbeni Farizien azere mbeni wali so achangé bê ti lo, so asukula gere ti Jésus na ngu ti lê ti lo na lo mbô ni na kuä ti li ti lo, Jésus agbu koko ti lo ngangu (Mat. 8:3; Marc 7:33; Luc 7:44). Jésus ayeke kpe lani kpengo ape azo so ayeke na mbeni kpale ti seni wala so asara mbeni kota siokpari. Me lo tene na ala ti ga na mbage ti lo nga lo fa so lo ye ala. E peut ti duti sûr so lo yeke bâ nga mawa ti e mingi.

MÛ TAPANDE TI KOTA PRÊTRE TI E LASO

10. Nyen la e peut ti sara kua na ni laso ti aidé azo so mê ti ala akanga nga na azo so abâ ndo ape? (Bâ nga afoto.)

¹⁰ So e yeke adisciple ti Jésus so ayeke be-ta-zo, tongana lo, e yeke sara ngangu ti sara ye na ndoye, ti zia terê ti e na place ti mba nga ti bâ mawa ti azo (1 Pi. 2:21; 3:8). Atâa so e peut pëpe ti zi mê wala lê ti azo, e peut ti aidé ala na lege ti yingo. Na tapande, a yeke wara ambeti nga na avidéo ti e laso na ayanga ti awabuburu ahon 100. Nga ti azo so ayeke bâ ndo nzoni ape wala so lê ti ala akanga, ambeti ayeke dä ndali ti ala na ayanga ti kodro ahon 60. E yeke nga na audio so afa nda ti avidéo ti e na ayanga ti kodro ahon 100. A sara aye so kue ti aidé azo so mê ti ala wala lê ti ala akanga ti ga nduru na Jéhovah na Molenge ti lo.

11. Tongana nyen la bungbi ti Jéhovah ayeke bâ mawa ti azo tongana ti so Jésus ayeke bâ mawa ti azo kue? (Kusala 2:​5-7, 33). (Bâ nga afoto.)

¹¹ Bungbi ti Jéhovah ayeke sara ngangu ti aidé mara ti azo nde nde kue. Girisa ape so na peko ti so a zingo Jésus na kuâ, lo tuku yingo vulu na ndö ti adisciple ti lo tongaso si azo kue so abungbi ti sara matanga ti Pentecôte apeut ti mä nzoni tënë na ‘yanga ti kodro ti ala wani.’ (Diko Kusala 2:​5-7, 33.) Na gbe ti fango lege ti Jésus, laso bungbi ti Jéhovah ayeke sigi na ambeti nga na avidéo na ayanga ti kodro ahon 1000, ambeni yanga ti kodro ni gï kete wungo ti azo la atene ni. Na tapande, gï kete wungo ti azo so ayeke na Amérique du Nord nga na Sud la ayeke tene ambeni yanga ti kodro ni. Me bungbi ti Jéhovah asigi na ambeti nga na avidéo na ayanga ti kodro so ahon 160, tongaso si azo kue so atene ayanga ti kodro so apeut ti mä nzoni tënë. A sigi na ambeti nga na avidéo na ayanga ti kodro ti azo so a iri ala aRom. Azo saki mingi so atene mara ti ayanga ti kodro so akomanse ti sara na Jéhovah.

12. Ambeni ye nde wa la bungbi ti Jéhovah ayeke sara ti aidé azo?

¹² Na ndö ti so bungbi ti Jéhovah ayeke aidé azo ti mä nzoni tënë, a yeke aidé nga azo so awara mbeni ngangu kpale tongana ngu so asuku amû ndo wala sese so ayengi. Aita saki mingi ayeke nduru ti aidé aita ti ala so awara mara ti akpale so. Bungbi ti Jéhovah ayeke leke nga ada ti bungbi so azo apeut ti ga dä ti manda ye na ndö ti ndoye ti Nzapa na mbage ti ala.

KOTA PRÊTRE TI E APEUT TI AIDÉ E

13. Ambeni ye wa la Jésus asara ti aidé e?

¹³ So Jésus ayeke berger ti e so ayeke nzoni mingi, lo sara si e yeke na ye kue so e bezoin ni ti ngbâ nduru na Jéhovah (Jean 10:14; aÉph. 4:7). Na ambeni ngoi, e peut ti découragé mingi asara si e bâ so e yeke tongana mbeni mèche so wâ ni ague ti mingo wala sosongo so aba. E peut ti découragé mingi ndali ti so terê ti e ason mingi, ndali ti mbeni faute so e sara wala ndali ti so e na mbeni ita e mä terê ape. A peut ti duti ngangu na e ti zia li ti e na ndö ti beku ti e ti kekereke na ti pensé ape na ndö ti akpale ti e nga na pasi so e yeke bâ laso. Me girisa ape so Jésus acomprendre akpale so mo yeke na yâ ni nga na vundu so asara mo. So Jésus abâ mawa ti mo, lo ye ti aidé mo. Na tapande, lo peut ti sara kua na yingo vulu ti mû na mo ngangu na ngoi so mo woko (Jean 16:7; Tite 3:6). Lo peut nga ti sara kua na ‘akoli so a mû ala tongana amatabisi’ nga na aita ti kpengba mo na ti mû maboko na mo.—aÉph. 4:8.

14. Nyen la e peut ti sara tongana e découragé?

¹⁴ Tongana mo découragé, girisa ape so Jésus ayeke Kota prêtre ti e nga gbu li nzoni na ndö ti ye so tënë so aye ti tene ndali ti mo. Girisa ape so Jéhovah atokua lo na sese ti mû fini ti lo tongana ye so a futa ti zi azo nga ti aidé lo ti comprendre nzoni mingi akpale so azo so ayeke mbilimbili-kue ape ayeke na ni. Tongana e découragé ndali ti asiokpari ti e wala awokongo ti e, Jésus ayeke nduru ti aidé e “na tâ ngoi ni” na lo ye ti sara ni.—aHéb. 4:​15, 16.

15. Nyen la a-aidé mbeni ita-koli ti kiri na yâ ti congrégation?

¹⁵ Jésus ayeke fa nga lege na azo ti lo so ayeke sara ngangu ti gi azo so ague yongoro ti kiri na lo (Mat. 18:​12, 13). Bâ ye so asi na Stefano.b Ngu 12 na peko ti so a zi lo na yâ ti congrégation, lo mû desizion ti gue na bungbi. Lo tene: “A yeke lani kete ye na mbi ape, me mbi ye lani ti tene mbi kiri mbi sara na Jéhovah legeoko na aita. A-ancien so awara terê na mbi ayamba mbi nzoni. Na ambeni ngoi, vundu asara mbi mingi so mbi zia lani Jéhovah, na mbi ye ti sara effort encore ape. Me a-ancien ni adabe ti mbi so Jéhovah na Jésus aye ti tene mbi sara tongaso ape. Na ngoi so a kiri na mbi na bungbi, aita kue ayamba mbi na azo ti sewa ti mbi na ngia. Ambeni ngoi na pekoni, wali ti mbi ayeda ti manda Bible na laso mbi na lo e yeke voro Jéhovah.” A nzere na Kota prêtre ti e so aye e ti bâ azo so achangé bê ti ala awara mungo maboko so ala bezoin ni ti kiri na yâ ti congrégation.

16. Ngbanga ti nyen la mo kiri singila so e yeke na Kota prêtre so ayeke bâ mawa ti e?

¹⁶ Na ngoi so Jésus ayeke lani na sese, lo mû maboko na azo mingi na tâ ngoi ni. Laso, e peut ti duti sûr so lo yeke aidé e na ngoi kue so e bezoin ti tene a aidé e. Na yâ ti fini dunia, lo yeke zi e na yâ ti akpale kue so siokpari nga na dutingo mbilimbili-kue ape aga na ni. E kiri singila mingi na Jéhovah Nzapa so andoye e mingi na apusu lo ti zia Molenge ti lo Kota prêtre ti e so ayeke bâ mawa ti e.