Manda ti sambela Jéhovah na bê ti mo kue

1-2. (a) Nyen la apeut ti kanga lege na e ti zi bê ti e na Jéhovah? (b) E hinga tongana nyen so a nzere na Jéhovah ti mä asambela ti e?

ESKÊ na ambeni ngoi mo bâ so gï a-oko tënë la mo yeke tene na yâ ti sambela ti mo nga fani mingi mo fa na Jéhovah ape vrai tënë ti bê ti mo? Tongana a yeke tongaso, a si na mo mo oko ape. So e yeke na aye mingi ti sara, na ambeni ngoi e tene gï anduru sambela na e girisa ti sambela ayo. Wala e peut même ti bâ so a yeke ngangu na e ti zi bê ti e na Jéhovah ndali ti so e bâ so e kpa ape ti ga nduru na lo.

² Bible afa na e so ye so ayeke kota ye na Jéhovah ayeke pëpe apendere tënë so e tene na yâ ti sambela, me ti tene atënë ni alondo na bê ti e. Lo yeke mä ‘azo so abâ terê ti ala kete tongana ala hunda ye na lo.’ (Ps. 10:17). A nzere na lo ti mä atënë kue so e tene ndali ti so lo pensé na e mingi.—Ps. 139:​1-3.

3. Ahunda wa la e yeke kiri tënë na ni na yâ ti article so?

³ E peut ti hunda terê ti e, e tene: Ngbanga ti nyen la e doit ti sara mbeto ape ti fa na Jéhovah atënë ti bê ti e? Tongana nyen la e peut ti sambela nzoni ahon ti kozo? Tongana nyen la ti gbu li na ndö ti asambela ti awakua ti Jéhovah ti ândö apeut ti aidé e ti sambela nzoni ahon ti kozo? Nyen la e peut ti sara tongana e gi bê ti e ahon ndö ni na a yeke ngangu na e ti fa na Jéhovah atënë ti bê ti e? Zia e kiri tënë na ahunda so.

SARA MBETO APE TI SAMBELA JÉHOVAH

4. Nyen la apeut ti aidé e ti sara mbeto ape ti sambela Jéhovah? (Psaume 119:145).

⁴ Tongana e hinga so Jéhovah ayeke mbeni kamarade so ayeke be-ta-zo so aye ti tene aye aga nzoni na e, e yeke bâ so e peut ti sara mbeto ape ti sambela lo. Zo ti sungo Psaume 119 agi lani ti bâ Jéhovah tongaso na ngoi so lo yeke sambela lo. Lo yeke lani na akpale. Ambeni zo atene lani mvene na iri ti lo (Ps. 119:​23, 69, 78). Lo doit nga lani ti tiri na awokongo ti lo (Ps. 119:5). Atâa so kue, mbeto asara lo ape ti zi bê ti lo na Jéhovah.—Diko Psaume 119:145.

5. Ngbanga ti nyen la a yeke nzoni e zia ape si asioni pensé akanga lege na e ti sambela? Mû mbeni tapande ti fa ni.

⁵ Jéhovah atisa même azo so asara akota siokpari ti sambela lo (És. 55:​6, 7). Tongaso, a yeke nzoni e zia ape si asioni pensé akanga lege na e ti sambela lo. Imaginé so mo gue na mbeni ndo fini fini. Kâ, mo girisa lege. Me mbeni zo ti ndo ni apeut ti aidé mo ti hinga nzoni lege ti mû ni. Eskê mbeto ayeke sara mo ti hunda zo ni ndali ti so kamene asara mo? Ên-ën! Legeoko nga, même tongana na ambeni ngoi e bâ so e hinga ye so e peut ti sara ape wala e sara siokpari, e doit ti sara mbeto ape ti sambela Jéhovah.—Ps. 119:​25, 176.

LEGE TI SAMBELA NZONI AHON TI KOZO

6-7. Tongana nyen la ti gbu li na ndö ti apendere sarango ye ti Jéhovah apeut ti aidé e ti sambela nzoni ahon ti kozo? Fa mbeni tapande ni. (Bâ nga kete tënë na gbe ni.)

⁶ Tongana e zi bê ti e na Jéhovah na lege so e fa na lo avrai pensé ti e, e yeke ga nduru mingi na lo. Tongaso, nyen la apeut ti aidé e ti sambela tongaso?

⁷ Gbu li na ndö ti apendere sarango ye ti Jéhovah.a Tongana e gbu li mingi na ndö ti apendere sarango ye ti lo, e yeke fa na lo apensé ti e sân mbeto (Ps. 145:​8, 9, 18). Bâ tapande ti Kristine, mbeni ita-wali so babâ ti lo asara ye ti ngangu na lo. Lo tene: “Ti sara tënë na Jéhovah tongana ti so zo ayeke sara tënë na babâ ti lo ayeke lani kete ye na mbi ape. Mbi pensé lani so afaute ti mbi ayeke sara si lo dö mbi lo zia.” Sarango ye ti Jéhovah wa la a-aidé lo? Lo tene: “Tâ ndoye ti Jéhovah asara si mbi yeke nzoni. Mbi hinga so lo yeke aidé mbi lakue. Même tongana mbi tï, na ndoye lo yeke yô mbi na nduzu. Tongana mbi pensé na ndoye ti Jéhovah, a yeke ngangu na mbi ape ti fa na lo aye so asara si mbi yeke na ngia nga na aye so asara si mbi yeke na vundu.”

8-9. Tongana mo gbu li kozo na ndö ti atënë so mo ye ti tene na yâ ti sambela ti mo, ambeni nzoni ye wa la mo yeke wara na pekoni? Fa mbeni tapande ni.

⁸ Gbu li na ndö ti atënë so mo ye ti tene. Kozo ti tene mo sambela, mo peut ti hunda terê ti mo na ambeni hunda. Na tapande: ‘Akpale wa la mbi yeke na ni na ngoi so? Eskê mbeni zo ayeke dä so mbi bezoin ti pardonné lo? Eskê mbi wara mbeni fini kpale so mbi bezoin ti tene Jéhovah a-aidé mbi ti hon ndö ni?’ (2 aGbia 19:​15-19). E peut nga ti mû tapande ti sambela so Jésus afa na lege so e gbu li na ndö ti ye so e peut ti hunda na Jéhovah so andu iri ti lo, Royaume ti lo nga na ye so bê ti lo aye.—Mat. 6:​9, 10.

⁹ Na ngoi so Ita-wali Aliska amä so koli ti lo ayeke na kobela ti cancer so ayeke gue na lo na kuâ, a yeke lani ngangu na lo ti sambela. Lo tene: “Vundu asara mbi lani mingi, a sara si a yeke ngangu na mbi ti gbu li nzoni na ndö ti tënë so mbi yeke tene na yâ ti sambela.” Nyen la a-aidé lo? Lo tene: “Kozo ti tene mbi sambela, mbi yeke gbu li na ndö ti tënë so mbi peut ti tene na Jéhovah tongaso si mbi tene gï tënë na ndö ti mbi nga na ndö ti kobela ti koli ti mbi ape. So mbi sara tongaso, mbi duti kpô nga mbi wara lege ti sambela Jéhovah nzoni na ndö ti aye nde nde.”

10. Ngbanga ti nyen la a yeke nzoni e gi ti sambela aninga? (Bâ nga afoto.)

¹⁰ Sambela aninga. Atâa so anduru sambela apeut ti sara si e ga nduru na Jéhovah, tongana e sambela aninga e yeke fa na Jéhovah atënë ti gbe ti bê ti e.b Elijah, koli ti Aliska, atene: “Mbi gi ti sambela fani mingi na yâ ti lango ni na mbi bâ so mbi ga nduru mingi na Jéhovah so mbi mû ngoi ti sambela aninga. Jéhovah ayeke ku kungo ape ti tene mbi hunzi sambela ti mbi, tongaso mbi peut ti mû ngoi ti sambela lo.” Tara ye so: Gi ti wara mbeni ngoi nga na mbeni place so ayeke mû lege na mo ti sambela, peut-être na kota go, sân ti tene ambeni ye agboto lê ti mo nga sara effort ti sambela lakue aninga.

GBU LI NA NDÖ TI ASAMBELA SO AYEKE NA YÂ TI BIBLE

11. Tongana e gbu li na ndö ti asambela ti awakua ti Jéhovah so a sara tënë ni na yâ ti Bible, a yeke aidé e tongana nyen? (Bâ nga encadré “Tënë ti bê ti mo ayeke tongana ti ala?”)

¹¹ Tongana mo gbu li na ndö ti asambela ti awakua ti Jéhovah nga na abia so ala he ti gonda na lo, a peut ti aidé mo. Tongana mo gbu li na ndö ti fason so awakua ti Nzapa afa atënë ti gbe ti bê ti ala, a yeke pusu mo ti zi bê ti mo na Jéhovah. Asambela ti ala apeut nga ti aidé mo ti wara ambeni fini tënë so mo peut ti tene na yâ ti asambela ti mo. Nga mo peut ti wara ambeni sambela so na yâ ni a fa atënë ti bê ti mo.

12. Ahunda wa la e peut ti hunda terê ti e na ni na ngoi so e diko mbeni sambela so ayeke na yâ ti Bible?

¹² Tongana mo diko mbeni sambela so ayeke na yâ ti Bible, hunda terê ti mo: ‘Zo wa la asara tënë so? Nyen la asara si lo tene ni? Eskê mbi peut ti tene mara ti atënë so lo tene na yâ ti sambela so? Aye wa la mbi manda dä?’ Peut-être mo peut ti sara ambeni recherche si mo wara kiringo tënë na ahunda so, me effort ti mo ayeke ngbâ senge ape. Bâ ambeni tapande ni.

13. Mbeni ye so e peut ti manda na lege ti sambela ti Hannah ayeke so wa? (1 Samuel 1:​10, 11). (Bâ nga foto.)

¹³ Diko 1 Samuel 1:​10, 11. Na ngoi so Hannah atene sambela so, lo yeke lani na yâ ti akota kpale use. Lo dü lani ape nga sambâ ti lo asara si gigi akpengba na lo (1 Sam. 1:​4-7). Tongana mo kue mo yeke na mbeni kpale so asara si gigi akpengba na mo, nyen la mo peut ti manda na lege ti sambela ti Hannah? Lo mû lani ngoi ti fa agingo bê ti lo kue na Jéhovah na pekoni bê ti lo adë (1 Sam. 1:​12, 18). E nga kue, bê ti e apeut ti dë tongana ‘e bi aye so ane e na ndö ti Jéhovah’ na lege so e fa na lo ye so akpale ti e asara na ndö ti e.—Ps. 55:22.

14. (a) Mbeni ye nde wa la e manda na lege ti tapande ti Hannah? (b) Tongana e gbu li na ndö ti aversê ti Bible apeut ti aidé e tongana nyen na ngoi so e yeke sambela? (Bâ kete tënë na gbe ni.)

¹⁴ Ambeni ngu na peko ti so Hannah adü Samuel, lo gue lo fa lo na Kota prêtre Éli (1 Sam. 1:​24-28). Na yâ ti mbeni sambela so lo tene na bê ti lo kue, lo kiri singila na Jéhovah ndali ti so lo bata awakua ti lo so ayeke be-ta-zo nga lo bâ lege ti alac (1 Sam. 2:​1, 8, 9). Akpale ti Hannah na yanga-da ahunzi lani ape, me lo zia li ti lo na ndö ti gbâ ti atufa so Jéhovah asara na ndö ti lo. Nyen la e manda dä? E yeke wara lege nzoni ti gbu ngangu na yâ ti akpale so e yeke na yâ ni tongana e zia li ti e na ndö ti fason so Jéhovah a-aidé e juska laso.

15. Nyen la e peut ti manda na lege ti sambela ti prophète Jérémie? (Jérémie 12:1).

¹⁵ Diko Jérémie 12:1. Na mbeni ngoi na yâ ti fini ti prophète Jérémie, li ti lo aga kirikiri so lo bâ aye ti asioni zo ayeke maï. Fani mingi lo découragé nga ndali ti so azo ti Israël ahe lo (Jér. 20:​7, 8). Tënë ti bê ti e na lo apeut ti gue oko na ngoi so e bâ aye ti azo so asara ye na lege ni ape ayeke maï wala na ngoi so azo ahe e. Atâa so Jérémie atene lani na Jéhovah so bê ti lo ason, lo tene lâ oko ape so faute ni ayeke ti Jéhovah. Na ngoi so lo bâ tongana nyen la Jéhovah akiri na azo ti lo so asara kpengba-li na nzoni lege, lo kiri lo sara confiance mingi na lo (Jér. 32:19). E nga kue e peut ti fa na Jéhovah tongana nyen la bê ti e ason na ngoi so azo asara ye na e na lege ni ape. Na oko ngoi ni, e yeke fa so e yeke na confiance so Jéhovah ayeke sara mbeni ye ti leke aye so a sara na e na lege ni ape na tâ ngoi ni.

16. Tongana e bâ so dutingo ti e amû lege na e ti sara aye mingi ape, nyen la e peut ti manda na lege ti tapande ti mbeni Lévite so a gue na lo na kodro-wande? (Psaume 42:​1-4). (Bâ nga afoto.)

¹⁶ Diko Psaume 42:​1-4. Mbeni Lévite so a gue na lo na kodro-wande so apeut ti bungbi oko na amba ti lo ape la ahe bia so. Psaume ti lo so afa tënë ti bê ti lo. Tënë ti bê ti e apeut ti duti oko na ti lo tongana e yeke gï na yanga-da ndali ti so terê ti e ason wala a kanga e ndali ti mabe ti e. Na ambeni ngoi e peut ti duti nzoni, na ambeni ngoi e peut ti duti nzoni ape, me e peut ti fa atënë ti bê ti e na Jéhovah na yâ ti sambela. Ye so ayeke aidé e ti comprendre nzoni apensé ti e nga ti dabe ti e na aye so ayeke biani kota ye. Na tapande, Lévite so abâ lani so ambeni fini lege ayeke zi ande na lo ti gonda Jéhovah (Ps. 42:5). Lo gbu li ti lo nga na ndö ti fason so Jéhovah ayeke bâ lani lege ti lo (Ps. 42:8). Tongana e sambela Nzapa na bê ti e kue apeut ti aidé e ti comprendre nzoni ndani so e wara mbeni pensé, a peut nga ti aidé e ti kiri ti duti kpô nga ti wara ngangu ti gbu ngangu.

17. (a) Nyen la e peut ti manda na lege ti sambela ti prophète Jonas? (Jonas 2:​1, 2). (b) Ambeni tënë so ayeke na Psaume apeut ti aidé e tongana nyen na ngoi so e wara akpale? (Bâ kete tënë na gbe ni.)

¹⁷ Diko Jonas 2:​1, 2. Prophète Jonas atene sambela so na ngoi so lo yeke na yâ ti mbeni kota susu. Atâa so Jonas ake lani yanga ti Jéhovah, lo hinga na bê ti lo kue so lo yeke mä lo. Na yâ ti sambela so, Jonas asara kua na gbâ ti atënë so ayeke na Psaume.d Peut-être lo hinga lani atënë ni so nzoni mingi. So lo gbu li na ndö ni, lo hinga biani so Jéhovah ayeke aidé lo. Legeoko nga, tongana e gi ti bata ambeni versê ti Bible na li, e peut ti dabe ti e na ni nga bê ti e ayeke dë na ngoi so e yeke sambela Jéhovah na ngoi ti akpale.

NGBÂ TI GA NDURU NA JÉHOVAH NA LEGE TI SAMBELA

18-19. Tongana na ambeni ngoi a yeke ngangu na e ti fa atënë ti bê ti e na Jéhovah na yâ ti sambela, tënë ti dengo bê wa la ayeke na aRomain 8:​26, 27? Fa mbeni tapande ni.

¹⁸ Diko aRomain 8:​26, 27. Na ambeni ngoi, gingo bê apeut ti hon ndö ti e asara si e lingbi pëpe ti fa atënë ti bê ti e na Jéhovah. Me mbeni ye ayeke dä so apeut ti aidé e. Na mara ti angoi tongaso, yingo vulu ti Nzapa ayeke “hunda” ye ndali ti e. Tënë so aye ti tene nyen? Na lege ti yingo ti lo, Jéhovah apusu azo so asû Bible ti sû gbâ ti asambela. Na ngoi so e peut ti fa polele ape apensé ti e, Jéhovah apeut ti bâ ambeni tënë so ayeke na yâ ti asambela so tongana aye so e ye ti hunda na lo, na lo peut ti kiri tënë na ni.

¹⁹ Pensé so a-aidé lani mbeni ita-wali na Russie so iri ti lo ayeke Yelena. A gbu lo ndali ti so lo yeke sambela nga lo yeke diko Bible. Yelena agi lani bê ti lo mingi asara si a yeke ngangu na lo ti sambela. Lo tene: “Na pekoni, mbi dabe ti mbi so na ngoi so gingo bê ahon ndö ti mbi na mbi hinga ye so mbi peut ti sambela Jéhovah ndali ni ape, lo yeke bâ asambela ti awakua ti lo ti ândö . . . tongana asambela ti mbi. . . . Ye so adë lani bê ti mbi mingi na ngoi so mbi yeke na yâ ti mbeni ngangu kpale.”

20. Nyen la apeut ti sara si a yeke ngangu mingi na e ape ti sambela na ngoi so e gi bê ti e?

²⁰ Na ngoi so e yeke na gingo bê, a peut ti duti ngangu na e ti zia li ti e na ndö ti ye so e yeke sambela ndali ni. Ti leke bibe ti e, e peut ti diko ambeni psaume na kota go. E peut nga ti gi ti sû atënë ti bê ti e na mbeti, tongana ti so Gbia David asara lani (Ps. 18, 34, 142; akete li ti tënë). Mbeni ndia ayeke dä ape so afa na e tongana nyen ti leke terê ti e ndali ti sambela (Ps. 141:2). Sara ye so mo bâ ayeke nzoni.

21. Ngbanga ti nyen la e peut ti sambela na bê ti e kue?

²¹ So e hinga so Jéhovah ahinga atënë ti bê ti e même kozo si e zi yanga adë bê ti e (Ps. 139:4). Me a nzere na lo ti mä e na ngoi so e yeke fa na lo atënë ti bê ti e ti fa so e sara confiance na lo. Tongaso, sara mbeto ape ti sambela Babâ ti mo ti yayu. Manda ye na lege ti asambela so ayeke na yâ ti Bible. Sambela na bê ti mo kue. Fa na lo aye so asara si mo yeke na ngia nga na aye so asara mo vundu. So Jéhovah ayeke tâ kamarade ti mo, lo yeke lakue dä ndali ti mo.