Ndoye ti Nzapa ayeke ngbâ lakue lakue

1-2. Kpale wa la aChrétien mingi awara?

IMAGINÉ mbeni bateau so ayeke na lê ti ngu na ngoi so mbeni kota pupu ayeke ya. Akota mapo ni asara si bateau ni amonté adescend. Tongana mbeni zo adescend kale ti bateau ni ape, mapo ni ayeke gue na bateau ni kirikiri. Mbeni kale ti bateau ayeke sara si bateau ni aluti na ayengi kirikiri ape na ngoi so ngangu pupu ayeke ya.

² Tongana mo yeke na yâ ti mbeni ngangu kpale, mo peut ti bâ so mo yeke tongana bateau so. Na mbeni ngoi mo peut ti duti nzoni me na mbeni ngoi mo yeke nzoni ape. Laso mo peut ti hinga biani so Jéhovah aye mo nga lo yeke aidé mo, me kekereke mo peut ti hunda terê ti mo wala lo bâ kpale so mo yeke na yâ ni so (Ps. 10:1; 13:1). Peut-être mbeni kamarade ti mo atene na mo atënë ti dengo bê na asara si mo yeke nzoni teti mbeni ngoi (aProv. 17:17; 25:11). Me na pekoni, mo yeke encore na kite so Jéhovah ayeke aidé mo. Mo peut même ti pensé so Jéhovah aye mo encore ape. Tongana nyen la mo peut ti yengi ape tongana mbeni bateau so a descend kale ni na ngoi so mo yeke na yâ ti mbeni kpale? So ti tene, tongana nyen la mo peut ti ngbâ ti duti sûr so Jéhovah aye mo nga lo yeke aidé mo?

3. “Tâ ndoye” so a sara tënë ni na Psaume 31:7 nga na 136:1 aye ti tene nyen? Ngbanga ti nyen la e peut ti tene so Jéhovah la afa tâ ndoye ahon tanga ti azo kue? (Bâ nga foto.)

³ Mbeni ye so apeut ti sara si mo luti na ngoi ti kpale ayeke ti dabe ti mo na tâ ndoye ti Jéhovah. (Diko Psaume 31:7; 136:1.) Tënë “tâ ndoye” aye ti sara tënë ti yengo so mbeni zo aye na mba ti lo ngangu nga so lo yeke ngbâ ti sara ni. Jéhovah la afa tâ ndoye ahon tanga ti azo kue. Bible afa so lo “si singo na tâ ndoye.” (Ex. 34:​6, 7). Bible atene nga tënë so na ndö ti Jéhovah, atene: “Mo fa tâ ndoye ti mo mingi na mbage ti azo kue so airi ndo na mo.” (Ps. 86:5). Gbu li na ndö ti nda ti aversê so. A ye ti tene: Jéhovah ayeke dö awakua be-ta-zo ti lo lâ oko ti zia ape. Tongana mo dabe ti mo so Jéhovah ayeke be-ta-zo apeut ti sara si mo yengi ape na ngoi ti mbeni ngangu kpale.—Ps. 23:4.

BÂ TÂ NDOYE TI JÉHOVAH TONGANA MBENI KOZO FANGO YE TI BIBLE

4. Fa ambeni kozo fango ye ti Bible. Fa ndani so e mä na bê na ni ngangu.

⁴ Mbeni ye so mo peut ti sara ti yengi ape na ngoi ti mbeni kpale ayeke ti bâ tâ ndoye ti Jéhovah tongana mbeni kozo fango ye ti Bible. Ti mo, tënë “kozo fango ye ti Bible” aye ti tene nyen? Peut-être mo pensé na atâ tënë so mo manda na yâ ti Bible. Na tapande, mo manda so iri ti Nzapa ayeke Jéhovah, Jésus ayeke oko Molenge ti Nzapa, akuâ ahinga ndo ape nga sese ayeke ga Paradis so na yâ ni azo ayeke ngbâ na fini lakue lakue (Ps. 83:18; Zo-ti. 9:5; Jean 3:16; Apoc. 21:​3, 4). Na peko ti so mo yeda so atënë so ayeke tâ tënë, a yeke ngangu ti tene mbeni zo asara si mo bâ so a yeke mvene. Ngbanga ti nyen? Ngbanga ti so aye ayeke dä so afa so a yeke tâ tënë. Zia e bâ tongana nyen la tongana mo bâ tâ ndoye ti Jéhovah tongana mbeni kozo fango ye ti Bible apeut ti aidé mo ti zi na yâ ti li ti mo so Jéhovah apensé na mo ape wala lo bâ akpale ti mo ape.

5. Fa tongana nyen la zo apeut ti ke afango ye ti mvene.

⁵ Na ngoi so mo komanse lani ti manda Bible, nyen la a-aidé mo ti ke afango ye ti mvene? Âmanke mbeni ye so a-aidé mo ayeke so mo haka aye so kozo bungbi ti nzapa ti mo afa na ati so Bible afa. Bâ mbeni tapande ni: Imaginé so mo mä na bê lani so Jésus ayeke Nzapa so ngangu ti lo ahon angangu kue. Me na ngoi so mo manda Bible, mo hunda terê ti mo: ‘Eskê fango ye so ayeke biani na lege ni?’ Na peko ti so mo manda ye so Bible atene na ndö ni, mo hinga so a yeke mvene. Tongaso, mo zia na place ti fango ye ti mvene so tâ tënë ti Bible so: Jésus ayeke “kozo ye na popo ti aye kue so Nzapa asara,” “oko Molenge ti Nzapa.” (aCol. 1:15; Jean 3:18). Tâ tënë, afango ye ti mvene apeut ti duti “aye so gere ni aluti ngangu” na a yeke ngangu ti kinda ni (2 aCor. 10:​4, 5). Me na peko ti so mo manda tâ tënë, mo yeke mä na bê na ni encore ape.—aPhil. 3:13.

6. Ngbanga ti nyen la mo peut ti duti sûr so ‘tâ ndoye ti Jéhovah ayeke ngbâ lakue lakue’?

⁶ Mo peut ti sara nga tongaso na ye so Bible afa na ndö ti tâ ndoye ti Jéhovah. Na ngoi so mo wara kpale si mo komanse ti duti na kite so Jéhovah aye mo, hunda terê ti mo: ‘Eskê bango ndo ti mbi so ayeke na lege ni?’ Haka kite so mo yeke na ni na ndö ti ndoye ti Jéhovah na tënë so ayeke na Psaume 136:​1, so ayeke versê so ayeke mama-tene ti article so. Ngbanga ti nyen la Jéhovah atene ndoye ti lo ayeke “tâ” ndoye? Ngbanga ti nyen la na yâ ti psaume so a kiri na ndö ti tënë “tâ ndoye ti lo angbâ lakue lakue” fani 26? Tongana ti so e bâ, tâ ndoye ti Jéhovah ndali ti azo ti lo ayeke mbeni kozo fango ye ti Bible tongana ambeni kozo fango ye ti Bible so ayeke lani ngangu na mo ape ti yeda na ni. Ti bâ so mo yeke ye oko ape wala Jéhovah aye mo ape ayeke mvene. Ke pensé ni so tongana ti so mo ke afango ye ti mvene kue.

7. Fâ ambeni versê so afa so Jéhovah aye mo.

⁷ Gbâ ti aye ayeke na yâ ti Bible so afa so Jéhovah aye e. Na tapande, Jésus atene lani na adisciple ti lo, atene: “Ngere ti ala ahon ngere ti gbâ ti anzêrë.” (Mat. 10:31). Jéhovah wani atene lani na azo ti lo, atene: “Mbi yeke kpengba mo, ti tâ tënë ni, mbi yeke mû maboko na mo. Mbi yeke gbu mo nzoni na maboko ti mbi ti koli, so mbi yeke sara aye ti mbilimbili na ni.” (És. 41:10). Bâ tongana nyen la tënë so ayeke polele. Jésus atene ape: ‘Ngere ti ala apeut ti hon,’ nga Jéhovah atene ape: ‘Mbi peut ti mû maboko na mo.’ Me, ala tene: “Ngere ti ala ahon” nga “Mbi yeke mû maboko na mo.” Tongana mo yeke na kite so Jéhovah aye mo na ngoi so mo yeke na yâ ti mbeni kpale, aversê so apeut ti sara si mo bâ so lo ye mo nga apeut ti sara si mo hinga biani so lo ye mo. Aye ayeke dä so afa ni. Tongana mo sambela Jéhovah na ndö ti akite so mo yeke na ni nga mo gbu li nzoni na ndö ti aversê so, mo peut ti tene atënë so ayeke na 1 Jean 4:​16, so atene: “Ti e, e hinga na e mä na bê na ndoye so Nzapa ayeke na ni na mbage ti e.”a

8. Nyen la mo peut ti sara tongana na ambeni ngoi mo yeke na kite so Jéhovah aye mo?

⁸ Me ka tongana na ambeni ngoi, mo ngbâ ti duti na kite so Jéhovah aye mo? Haka ye so mo pensé na ye so mo hinga na ndö ti Jéhovah. Aye so e pensé apeut ti changé, me aye so Bible afa na e na ndö ti ndoye ti Jéhovah achangé ape. Tongana e yeke na kite so Jéhovah aye e, andâ e sara sanka ti pendere sarango ye ti lo so ayeke ndoye.—1 Jean 4:8.

GBU LI NZONI NA NDÖ TI TËNË SO: JÉHOVAH ‘AYE MO MINGI’

9-10. Nyen la Jésus ayeke sara lani tënë na ndö ni na ngoi so lo tene tënë so: “Babâ wani aye ala mingi”, so ayeke na Jean 16:​26, 27? (Bâ nga foto.)

⁹ E peut ti manda ye mingi na ndö ti ndoye ti Jéhovah na lege ti tënë so Jésus atene na adisciple ti lo, so lo tene: “Babâ wani aye ala mingi.” (Diko Jean 16:​26, 27.) Jésus atene lani tënë so pëpe gï ti sara si terê ti adisciple ti lo anzere. Tongana e diko aversê so aga kozo na tënë so, e bâ so Jésus ayeke sara lani pëpe tënë ti ye so anzere na ala wala amû vundu na ala. Me lo yeke sara lani tënë na ndö ti sambela.

¹⁰ Jésus alondo ti tënë na adisciple ti lo so a yeke nzoni ala sambela na iri ti lo me ala sambela lo ape (Jean 16:​23, 24). A yeke lani kota ye ti tene ala hinga tongaso. Na peko ti so a zingo Jésus na kuâ, bê ti adisciple ti lo apeut lani ti pusu ala ti sambela lo ngbanga ti so lo yeke kamarade ti ala. Ala peut lani ti pensé so, so lo ye ala mingi, lo yeke mä aye so ala hunda nga lo yeke hunda na Babâ ti lo ti aidé ala. Me, Jésus atene a yeke nzoni ala pensé tongaso ape. Ngbanga ti nyen? Ngbanga ti so lo tene na ala, lo tene: “Babâ wani aye ala mingi.” Tënë so ayeke mbage ti kozo fango ye ti Bible na ndö ti sambela. Gbu li na ndö ti ye so tënë so aye ti tene ndali ti mo: Na lege ti mandango Bible, mo hinga Jésus nga mo ye lo (Jean 14:21). Me legeoko tongana ti akozo disciple, mo peut ti sambela Nzapa na bê ti mo kue na hingango so lo ‘wani lo ye mo mingi.’ Mo fa so mo mä na bê na tënë so na ngoi kue so mo yeke sambela Jéhovah.—1 Jean 5:14.

GI TI HINGA AYE SO ASARA SI MO YEKE NA KITE

11. Ngbanga ti nyen la a yeke nzere na Satan tongana e yeke na kite so Jéhovah aye e?

¹¹ Nyen la apeut ti sara si e yeke na kite so Jéhovah aye e? Tongana mo tene so Satan la asara si e pensé tongaso, mo yeke kamême na raison. Zabolo ayeke ‘gi ti te’ e na a yeke nzere na lo tongana e yeke na kite so Jéhovah aye e (1 Pi. 5:8). Ndoye ti Jéhovah apusu lo ti mû ye so a futa ti zi azo, mbeni ye so Satan aye ti tene e pensé so e lingbi na ni ape (aHéb. 2:9). Me tongana e yeke na kite so Jéhovah aye e, zo wa la a yeke nzere na lo? A yeke Satan. Nga zo wa la ayeke duti na ngia tongana e découragé na e zia ti sara na Jéhovah? A yeke gï lo. Satan aye ti tene e pensé so Jéhovah aye e ape. Ti vrai ni, Satan la Jéhovah aye lo ape. Mbeni oko ti “amayele” ti lo so lo yeke sara na kua ayeke so lo yeke gi ti sara si e bâ so e la Jéhovah aye e ape nga lo fâ ngbanga na li ti e (aÉph. 6:11). Tongana e hinga ye so wato ti e Zabolo ayeke gi ti sara, e yeke leke na bê ti e ti ngbâ ti ‘luti na lo’.—Jacq. 4:7.

12-13. So a dü e na yâ ti siokpari, tongana nyen la a peut ti sara si e yeke na kite so Jéhovah aye e?

¹² Mbeni ye nde ayeke nga dä so apeut ti sara si e yeke na kite so Jéhovah aye e. Ye ni so ayeke nyen? A yeke siokpari so a dü e na yâ ni (Ps. 51:5; aRom. 5:12). Siokpari abuba songo so ayeke na popo ti azo na Nzapa. A buba nga pensé ti e, bê ti e nga na terê ti e.

¹³ Siokpari asara ngangu na ndö ti atënë ti bê ti e, a sara si e bâ so tënë ayeke na li ti e, e gi bê ti e, e bâ so sioni apeut ti si na e nga a sara si kamene asara e. Tongana e sara mbeni siokpari, e peut ti wara apensé ni so. Me e peut nga ti wara apensé ni so ndali ti so e hinga so e yeke mbilimbili-kue ape, Jéhovah aleke e lani na tongo nda ni tongaso ape (aRom. 8:​20, 21). Legeoko tongana ti so mbeni oto so roue ni akoro apeut ti mû loro nzoni ape, e nga kue so e yeke mbilimbili-kue ape, aye ti terê ti e ayeke sara kua kue nzoni tongana ti so Nzapa aleke ape. Tongaso, li ti e akpe ape so na ambeni ngoi e yeke na kite so Jéhovah aye e. Tongana a si tongaso, a yeke nzoni e dabe ti e so Jéhovah ayeke ‘kota Nzapa so amû mbeto mingi na zo, Nzapa so ayeke fa tâ ndoye na azo so aye lo na so ayeke bata acommandement ti lo’.—Néh. 1:5.

14. Tongana nyen la ti gbu li na ndö ti ye so a futa ti zi azo apeut ti aidé e ti duti sûr so Jéhovah aye e? (aRomain 5:8). (Bâ nga encadré “Hange na ‘ngangu so siokpari ayeke na ni ti handa zo.’”)

¹⁴ A yeke tâ tënë so na ambeni ngoi e peut ti pensé so e lingbi ape ti tene Jéhovah aye e. Me so e lingbi na ni ape so la asara si ndoye ti lo na mbage ti e ayeke tâ nde mingi. Jéhovah aye e pëpe ndali ti mbeni ye so e sara. Me ye so a futa ti zi azo akanga ndö ti asiokpari ti e nga Jéhovah amû ni ndali ti so lo ye e (1 Jean 4:10). Girisa nga ape so Jésus aga lani ti sö awasiokpari, me pëpe azo so ayeke mbilimbili-kue. (Diko aRomain 5:8.) Zo oko na popo ti e apeut ti sara aye tâ na lege ni ape na Jéhovah ahunda na e ti sara tongaso ape. Tongana e hinga so, so e yeke mbilimbili-kue ape apeut ti sara si e yeke na kite so Jéhovah aye e, e peut ti leke na bê ti e ti ngbâ ti tiri na ni.—aRom. 7:​24, 25.

SORO TI NGBÂ BE-TA-ZO

15-16. Tongana e ngbâ be-ta-zo na Jéhovah, nyen la e peut ti duti sûr na ni? Ngbanga ti nyen? (2 Samuel 22:26).

¹⁵ Jéhovah aye ti tene e soro ye na lege ni na lege so e “ngbâ nduru na lo”. (Deut. 30:​19, 20). Tongana e sara tongaso, e peut ti duti sûr so lo yeke ngbâ be-ta-zo na e. (Diko 2 Samuel 22:26.) Tongana e ngbâ be-ta-zo na Jéhovah, e peut ti zia bê ti e na lo ti aidé e na yâ ti akpale kue so e wara.

¹⁶ Tongana ti so e londo ti bâ, e yeke na araison mingi ti ngbâ ti luti atâa e wara akpale. E hinga so Jéhovah aye e nga lo yeke mû maboko na e. Ye so Bible afa la. Tongana a si so e yeke na kite so Jéhovah aye e, e peut ti gbu li na ndö ti aye so e hinga so ayeke tâ tënë ahon ti gbu li na ndö ti aye so e pensé ayeke tâ tënë. Bible atene so tâ ndoye ti Jéhovah ayeke ngbâ lakue lakue, zia e ngbâ ti sara confiance na tâ tënë ti Bible so.