Girisa ape ti sambela ndali ti amba ti mo

1. E hinga tongana nyen so asambela ti e ayeke kota ye na lê ti Jéhovah?

SAMBELA ayeke mbeni pendere cadeau. Gbu li na ndö ti ye so: Jéhovah amû ambeni kua na a-ange (Ps. 91:11). Lo mû nga akota kua na Molenge ti lo (Mat. 28:18). Me eskê lo mû kua ti mango asambela ti e na mbeni zo? Ên-ën, a yeke mbeni kua so Jéhovah asoro ti sara ni lo wani. Jéhovah, ‘Lo so ayeke mä sambela,’ lo wani la lo yeke mä e.—Ps. 65:2.

2. Na alege wa la bazengele Paul ayeke nzoni tapande ti zo so asambela ndali ti amba ti lo?

² E peut ti sara tënë ti agingo bê ti e na Jéhovah sân mbeto, me a yeke nzoni e sambela nga ndali ti amba ti e. Bazengele Paul asara ni lani. Na tapande, lo tokua mbeti na aita ti Éphèse, lo tene: “Mbi ngbâ lakue ti sara tënë ti ala na yâ ti asambela ti mbi.” (aÉph. 1:16). Paul asambela nga lani ndali ti azo oko oko. Na tapande, lo tene na Timothée, lo tene: “Mbi kiri singila mingi na Nzapa, . . . Mbi zia lâ oko pëpe ti dabe ti mbi na mo na ngoi so mbi yeke voro terê ti mbi na Nzapa, bï na lâ.” (2 Tim. 1:3). Paul ayeke lani na akpale ti lo wani ti sambela ndali ni (2 aCor. 11:23; 12:​7, 8). Me lo mû ngoi ti sambela ndali ti amba ti lo.

3. Ngbanga ti nyen la e peut ti girisa ti sambela ndali ti amba ti e?

³ Na ambeni ngoi, e peut ti girisa ti sambela ndali ti amba ti e. Ngbanga ti nyen? Mbeni ita-wali so iri ti lo Sabrinaa afa mbeni raison ni, lo tene: “Na yâ ti dunia so, e yeke na aye mingi ti sara. E peut ti zia li ti e mingi na ndö ti akpale ti e asara si e sambela gï ndali ti abezoin ti e.” Eskê na ambeni ngoi a si na mo tongaso awe? Tongana a yeke tongaso, article so apeut ti aidé mo. A yeke fa (1) ndani so a yeke kota ye ti sambela ndali ti amba ti mo nga (2) aye so apeut ti aidé mo ti sara ni.

NDANI SO E YEKE SAMBELA NDALI TI AMBA TI E

4-5. Tongana nyen la asambela ti e ndali ti amba ti e apeut ti “sara aye mingi”? (Jacques 5:16).

⁴ Asambela so e tene ndali ti amba ti e “ayeke sara aye mingi.” (Diko Jacques 5:16.) Eskê asambela so e sara ndali ti amba ti e apeut biani ti changé ye so asi na ala? En, a peut ti changé ni. So Jésus ahinga so bazengele Pierre aga nduru ti tene so ni hinga lo ape, lo tene: “Mbi voro terê na Nzapa ndali ti mo si mabe ti mo awoko pëpe.” (Luc 22:32). Paul ahinga nga lani so sambela apeut ti changé ye so asi na mbeni zo. Na ngoi so a kanga lani lo senge senge na Rome, lo tokua mbeti na Philémon, lo tene: “Mbi yeke na beku so ndali ti asambela ti ala, a yeke sara si mbi kiri na ala kâ.” (Phm. 22). A yeke ye so asi lani. Kete na pekoni, a zi Paul na kanga na lo wara lege ti kiri ti fa tënë.

⁵ Me ye so afa ape so asambela ti e apeut ti forcé Jéhovah ti sara mbeni ye. Tongana awakua ti lo agi bê ti ala, lo hinga ni, na ambeni ngoi, lo soro ti sara ye so ala hunda. So e hinga ni apeut ti aidé e ti sambela Jéhovah na bê ti e kue ndali ti mbeni ye, na pekoni e zia tënë ni na maboko ti lo na e yeke na confiance so lo yeke bâ lege ni.—Ps. 37:5; bâ 2 aCorinthien 1:11.

6. Tongana nyen la ti sambela ndali ti amba ti e apeut ti changé bango ndo ti e na ndö ti ala? (1 Pierre 3:8).

⁶ Ti sambela ndali ti amba ti e ayeke aidé e ti gi ti ‘bâ mawa ti ala mingi.’ (Diko 1 Pierre 3:8.) Ti bâ mawa ti zo aye ti tene ti hinga pasi ti lo nga ti duti na nzara ti sara mbeni ye ndali ni (Marc 1:​40, 41). Michael so ayeke mbeni ancien atene: “Tongana mbi sambela ndali ti abezoin ti amba ti mbi, mbi yeke hinga nzoni mingi aye so ala yeke tiri na ni na apusu mbi ti ye ala mingi. Mbi bâ so mbi ga nduru na ala même tongana ala hinga ape.” Richard so ayeke mbeni ancien afa mbeni ye ti nzoni nde, lo tene: “Tongana e sambela ndali ti mbeni zo, e yeke ye mingi ti sara mbeni ye ti aidé lo.” Lo kiri lo tene: “Tongana e sara mbeni ye ti aidé zo ni, a yeke mo bâ mo tene e yeke aidé ti kiri tënë na sambela so e sara ndali ti lo.”

7. Tongana nyen la ti sambela ndali ti amba ti e ayeke aidé e ti duti na nzoni bango ndo na ndö ti akpale ti e? (aPhilippien 2:​3, 4). (Bâ nga afoto.)

⁷ Ti sambela ndali ti amba ti e ayeke aidé e ti duti na nzoni bango ndo na ndö ti akpale ti e. (Diko aPhilippien 2:​3, 4.) So e yeke na yâ ti dunia ti Satan, e kue e yeke na akpale (1 Jean 5:19; Apoc. 12:12). Tongana e yeke sambela lakue ndali ti amba ti e, e yeke girisa ape so ‘a-oko pasi so ayeke si nga na bungbi ti e ti aita kue na yâ ti dunia so.’ (1 Pi. 5:9). Cathérine so ayeke pionnier atene: “Ti sambela ndali ti amba ti mbi adabe ti mbi so ala nga kue ala yeke na akpale. Ye so asara si mbi yeke pensé gï na akpale ti mbi ape.”

ALA BEZOIN ASAMBELA TI E

8. Fa ambeni zo so e peut ti sara tënë ti ala na yâ ti asambela ti e.

⁸ Azo wa la e peut ti sara tënë ti ala na yâ ti sambela ti e? E peut ti sambela ndali ti agroupe ti azo, na tapande azo so ayeke na kpale ti seni, amaseka so amba ti ala ti ekole ayeke he ala nga ayeke pusu ala ti sara asioni ye wala azo so ayeke na akpale ndali ti so ala ga mbakoro. Aita ti e mingi ayeke gbu ngangu na yâ ti aye ti ngangu so azo ti sewa ti ala wala azo ti gouvernement ayeke sara na ala (Mat. 10:​18, 36; Kus. 12:5). Ambeni ita ti e adoit ti quitté ndo ti ala ndali ti akpale ti poroso so ayeke na yâ ti kodro ti ala. Ambeni awara kpale ndali ti aye tongana ngu so asuku amû ndo wala sese so ayengi. Peut-être e hinga aita ni so ape. Me tongana e sambela ndali ti ala, e yeke fa so e sara ye alingbi na yanga so Jésus amû so lo tene e “ndoye terê na popo ti [e].”—Jean 13:34.

9. Ngbanga ti nyen la a yeke nzoni e sambela ndali ti aita so ayeke mû li ni na yâ ti bungbi ti Jéhovah nga na awali ti ala?

⁹ E peut nga ti sambela ndali ti aita so ayeke mû li ni na yâ ti bungbi ti Jéhovah. Na tapande, aita ti Bebungbi nga na aita so ayeke mû maboko na ala, amembre ti aKomite ti filiale, asurveillant ti andokua na Béthel, asurveillant ti circonscription, a-ancien nga na awakua ti mungo maboko. Aita so ayeke na akpale, na oko ngoi ni ala yeke sara kua ngangu ti mû maboko na e (2 aCor. 12:15). Na tapande, Marc so ayeke mbeni surveillant ti circonscription atene: “Mbeni kota kpale ti mbi ayeke so mbi yo na babâ na mama ti mbi so ayeke ambakoro. Ala use kue ayeke na kpale ti seni. Atâa so yaya ti mbi ti wali na koli ti lo la ayeke bâ lege ti ala, a sara mbi vundu so mbi peut ti sara ye mingi ape ndali ti ala.” Aita-koli so ayeke sara kua ngangu so ayeke na akpale. Atâa e hinga ni wala e hinga ni ape, a yeke nzoni e ngbâ ti sambela ndali ti ala (1 aThes. 5:​12, 13). E peut nga ti sambela ndali ti awali ti aita-koli so, so ayeke mû maboko na akoli ti ala ti ngbâ ti sara kua ti ala.

10-11. Tongana e sambela ndali ti aita si e di iri ti ala ape, eskê a nzere na Jéhovah? Fa ndani so mo tene tongaso.

¹⁰ Tongana ti so e tene fade, mingi ni e yeke sambela ka ndali ti groupe ti aita. Na tapande, sân ti pensé na mbeni ita, e peut ti sambela Jéhovah ti aidé azo so a kanga ala wala ti dë bê ti azo so aperdre azo so ala ye ala. Mbeni ancien so iri ti lo ayeke Donald atene: “So gbâ ti aita ayeke na yâ ti angangu kpale, na ambeni ngoi sân ti di iri ti mbeni zo, e yeke sara mbeni sambela ndali ti aita kue so ayeke bâ pasi.”

¹¹ Eskê mara ti asambela tongaso anzere na Jéhovah? En. So e hinga ape ambilimbili ye so aita ti e kue abezoin ni, a yeke na lege ni ti tene e sara mbeni sambela ndali ti agroupe ti aita (Jean 17:20; aÉph. 6:18). Asambela tongaso afa so e “ndoye sewa ti e ti aita kue”.—1 Pi. 2:17.

TONGANA E YEKE SAMBELA NDALI TI AZO OKO OKO

12. Tongana e bâ ndo nzoni, tongana nyen la a peut ti aidé e ti tene ambeni mbilimbili tënë na yâ ti asambela ti e?

¹² Bâ ndo nzoni. Na ndö ti so e yeke sambela ndali ti agroupe ti aita, a yeke nga nzoni e sambela ndali ti zo oko oko na iri ti lo. Eskê mbeni zo na yâ ti congrégation ti mo ayeke na mbeni ngangu kobela? Eskê mbeni maseka na yâ ti congrégation ti mo adécouragé ndali ti so amba ti lo ti ekole ayeke pusu lo ti sara asioni ye? Eskê mbeni babâ wala mama na yâ ti congrégation ti mo ayeke sara ngangu ti bata molenge ti lo alingbi “na fango lege nga na wango ti gbotongo mê so alondo na Jéhovah”? (aÉph. 6:4). Tongana mo bâ ndo nzoni, mo yeke ye ala mingi nga mo yeke zia terê ti mo na place ti ala; ye so ayeke pusu mo ti sambela ndali ti ala.b—aRom. 12:15.

13. Tongana nyen la e peut ti sambela ndali ti aita so e hinga ala ape?

¹³ Sambela ndali ti zo oko oko na iri ti lo. E peut ti sara ni même ndali ti aita so e wara terê na ala lâ oko ape. Na tapande, gbu li na ndö ti aita so a kanga ala na Crimée, na Érytrée, na Russie nga na Singapour. Mo peut ti wara na ndö ti jw.org iri ti aita so a kanga ala.c Mbeni surveillant ti circonscription so iri ti lo ayeke Brian atene: “Tongana mbi sû iri ti mbeni ita so a kanga lo na mbi tene ni na kota go, a yeke duti ngangu na mbi ape ti di ni na ngoi so mbi yeke sambela.”

14-15. Tongana nyen la e peut ti hinga ambeni mbilimbili tënë ti tene na yâ ti asambela ti e?

¹⁴ Fa ambeni mbilimbili ye. Michael, so e sara tënë ti lo fade, atene: “Tongana mbi diko na ndö ti jw.org mbaï ti aita so a kanga ala, mbi yeke tara ti imaginé tongana mbi la mbi yeke na place ti ala, a yeke sara mbi tongana nyen? Mbi hinga so mbi yeke gi bê ti mbi ndali ti wali ti mbi nga mbi ye ti duti sûr so lo wara ye kue so lo bezoin ni. Tongaso, ye so a-aidé mbi ti hinga ambilimbili tënë ti tene na ngoi so mbi yeke sambela ndali ti aita so asara mariage so a kanga ala.”—aHéb. 13:​3, kete tënë na gbe ni.

¹⁵ Tongana e tara ti imaginé ye so aita so a kanga ala ayeke vivre ni lâ oko oko, a peut ti aidé e ti pensé na ambilimbili tënë so e peut ti tene na yâ ti sambela ti e. Na tapande, e peut ti sambela ti tene agarde asara nzoni bê na ala nga ti tene azo so ayeke na komandema azia lege na ala ti voro Jéhovah (1 Tim. 2:​1, 2). E peut ti sambela ti tene tapande ti aita so a kanga ala so ayeke be-ta-zo akpengba aita ti congrégation ti ala wala ti tene nzoni sarango ye ti ala apusu azo so ayeke aTémoin ape ti mä tënë so e yeke fa (1 Pi. 2:12). Ti vrai ni, e peut ti sambela nga tongaso ndali ti aita so ayeke gbu ngangu na yâ ti ambeni kpale nde. Tongana e yeke bâ ndo nzoni, e sambela ndali ti ita oko oko na iri ti lo nga e fa ambeni mbilimbili ye na yâ ti asambela ti e, e yeke fa so e “si singo na ndoye na mbage ti mba”.—1 aThes. 3:12.

NZONI BANGO NDO NA NDÖ TI ASAMBELA TI E

16. Tongana nyen la e peut ti ngbâ ti duti na nzoni bango ndo na ndö ti asambela ti e? (Matthieu 6:8).

¹⁶ Tongana ti so e tene fade, asambela ti e apeut ti sara si dutingo ti mbeni zo achangé. Me e bezoin ti duti na nzoni bango ndo. E doit ti girisa ape so, tongana e sambela e yeke fa pëpe na Jéhovah mbeni ye so ade lo hinga ape nga lo bezoin ape ti tene e mû na lo wango si lo leke na mbeni kpale. Jéhovah ahinga ye so awakua ti lo abezoin ni même kozo ti tene ala hinga wala ti tene e hinga. (Diko Matthieu 6:8.) Tongaso, ngbanga ti nyen la a yeke nzoni e sambela ndali ti amba ti e? Na ndö ti araison so a fa na yâ ti article so, tongana e sambela ndali ti amba ti e, e fa so e pensé na ala mingi. Ndoye ayeke pusu e ti sambela ndali ti mba. Nga a yeke nzere na Jéhovah ti bâ awakua ti lo asara ye na ndoye tongana lo.

17-18. E peut ti mû tapande wa ti haka na asambela so e sara ndali ti amba ti e?

¹⁷ Même tongana na bango ni asambela ti e apeut ti changé ye na yâ ti dutingo ti mbeni ita ape, a fa ndoye ti e na mbage ti aita nga Jéhovah ayeke bâ ni. Imaginé mbeni sewa so na yâ ni mbeni kete molenge ti koli nga na ti wali ayeke dä. Terê ti molenge-koli ni ason na lo yeke na ndö ti gbogbo. Molenge-wali ni avoro yanga na babâ ti lo, atene: “Pardon, ala aidé lo. Terê ti lo ason mingi!” Babâ ni akomanse ti sara mbeni ye awe, lo ye molenge ti lo nga lo yeke bâ lege ti lo nzoni. Me a yeke nzere na babâ ni mingi ti bâ molenge ti lo ti wali so ayeke pensé na ita ti lo nga so avoro yanga na lo ti aidé ita ti lo.

¹⁸ A yeke ye so Jéhovah awa e ti sara: ti pensé na mba nga ti sambela ndali ti mba. Tongana e sara tongaso, asambela ti e ayeke fa so e pensé gï na e wani ape me e pensé na amba ti e mingi na Jéhovah ayeke bâ ni (2 aThes. 1:3; aHéb. 6:10). Nga tongana ti so e bâ, asambela ti e apeut même ti changé ye so asi na mbeni zo. Tongaso, zia e sara kue ti girisa ape ti sambela ndali ti amba ti e.