Jéhovah la asara si e yeke na “kota ngia”

1-2. (a) Laso, azo mingi ayeke tongana nyen? (b) Nyen la e yeke bâ na yâ ti article so?

LASO, azo mingi ayeke tomba peko ti ngia. Me atâa ye kue so ala sara, ala yeke na ngia ape. Azo mingi ayeke na vundu mingi nga ala bâ so gigi ti ala ayeke ga nzoni lâ oko ape. Mara ti ye tongaso apeut nga ti si na awakua ti Jéhovah. E yeke na “lâ ti nda ni,” tongaso e peut ti wara angangu kpale so asara si e gi bê ti e mingi wala so asara e vundu.—2 Tim. 3:1.

² Na yâ ti article so, e yeke bâ aye so apeut ti sara si e perdre ngia ti e nga tongana nyen la e peut ti kiri ti wara ni. Me kozoni, zia e bâ Zo wa la apeut ti sara si e duti biani na ngia.

ZO SO APEUT TI SARA SI E DUTI BIANI NA NGIA

3. Aye so Jéhovah acréé afa na e nyen na ndö ti lo? (Bâ nga afoto.)

³ Jéhovah ayeke lakue na ngia. Lo ye ti tene e nga kue e duti na ngia. Ndani la lo sara gbâ ti aye so asara si e yeke na ngia. Na tapande, tongana e bâ gbâ ti acouleur so ayeke na ndö ti planète ti e, e bâ anyama so ayeke sara ngia nga tongana e te mbeni kobe so e ye ni mingi, a yeke nzere na e mingi. Nzapa aye e biani nga lo ye ti tene gigi anzere na e.

Kete doli: Image © Romi Gamit/Shutterstock; andeke so a iri ala manchot: Vladimir Seliverstov/500px via Getty Images; akete ngasa: Rita Kochmarjova/stock.adobe.com; adauphin use: georgeclerk/E+ via Getty Images

4. (a) Ngbanga ti nyen la Jéhovah ayeke lakue na ngia atâa so lo bâ azo ayeke bâ pasi? (b) Nyen la Jéhovah asara ti aidé e? (Psaume 16:11).

⁴ Atâa so Jéhovah ayeke “Nzapa so ayeke na ngia,” lo hinga nzoni vundu nga na pasi so ayeke na yâ ti dunia (1 Tim. 1:11). Me lo zia pëpe si akpale so azi mbage ti ngia ti lo. Lo hinga so pasi kue ayeke teti mbeni ngoi, lo wani lo hinga lawa la a yeke hunzi. Nga lo kanga bê lo yeke ku juska ngoi so lo yeke zi vundu nga na pasi biani biani. Na oko ngoi ni, Jéhovah ahinga akpale ti e nga lo ye ti mû maboko na e. Lo yeke aidé e tongana nyen? Mbeni ye so lo sara ni ayeke so lo aidé e ti duti na ngia. (Diko Psaume 16:11.) Bâ tongana nyen la lo sara si Molenge ti lo ayeke na ngia.

5-6. Ngbanga ti nyen la Jésus ayeke na ngia?

⁵ Na popo ti acréature ti Jéhovah kue, Jésus la ayeke na ngia mingi. Ngbanga ti nyen? Bâ araison ni use. (1) “Lo yeke image ti Nzapa so lê ayeke bâ lo pëpe” nga lo sara ye tâ gï tongana Babâ ti lo (aCol. 1:15; 1 Tim. 6:15). (2) Jésus apassé mingi ti ngoi ti lo na terê ti Babâ ti lo so ngia alondo na lo.

⁶ Jésus ayeke lakue na ngia ti sara ye kue so Babâ ti lo ahunda na lo ti sara (aProv. 8:​30, 31; Jean 8:29). Ndani la lo zia ngia mingi na bê ti Jéhovah.—Mat. 3:17.

7. Nyen la e peut ti sara ti duti biani na ngia?

⁷ E nga kue e peut ti duti biani na ngia tongana e ga nduru mingi na Jéhovah so ngia alondo na lo. Tongana e mû ngoi mingi ti manda ye na ndö ti Jéhovah nga ti mû tapande ti lo, e yeke duti na ngia mingi. E yeke duti nga na ngia tongana e sara ye so Nzapa aye nga e hinga so e zia ngia na bê ti loa (Ps. 33:12). Me ka tongana e bâ so na mbeni ngoi e yeke na ngia ape wala même e yeke ka na ngia ape? Eskê a ye ti fa so e zia ngia na bê ti Nzapa ape? Ên-ën! Jéhovah ahinga so na yâ ti dunia so, na ambeni ngoi vundu ayeke sara e mingi nga ambeni ye ason e ngangu (Ps. 103:14). Zia e bâ aye so apeut ti sara si e yeke na ngia ape nga tongana nyen la e peut ti kiri ti duti na ngia.

HANGE NA AYE SO APEUT TI NZI NGIA TI MO

8. Nyen la apeut ti si na e tongana e yeke na akpale?

⁸ Kozo ye ni: Akpale. Peut-être a sara ye na mo na lege ni ape ndali ti so mo yeke wakua ti Jéhovah. Peut-être mo yeke bâ pasi ndali ti mbeni kpale tongana ngu so asuku amû ndo wala ndali ti so terê ti mo ason, mo ga mbakoro wala mo yeke wayere. A yeke ngangu ape ti perdre ngia ti e tongana e yeke na yâ ti mara ti akpale so, mbilimbili tongana e peut ti sara ye oko ape. Bible atene so “vundu asara si bê ti zo anze kue.” (aProv. 15:13). Babis, mbeni ancien so aperdre ita ti lo ti koli nga na babâ na mama ti lo na yâ ti ngu osio, atene: “Mbi bâ so mbi yeke gï mbi oko nga zo ti aidé mbi ayeke dä ape. Na ambeni ngoi, vundu asara mbi mingi ndali ti so atâa so mbi ye ti passé ngoi mingi na babâ na mama ti mbi nga na ita ti mbi ti koli kozo si ala kui, mbi wara lege ti sara ni ape.” Akpale ti e apeut ti duti ngangu mingi na asara si e fatigué mingi na e découragé kue.

9. Nyen la apeut ti aidé e ti kiri ti wara ngia? (Jérémie 29:​4-7, 10).

⁹ Nyen la apeut ti aidé e ti kiri ti wara ngia? E peut ti kiri ti wara ngia tongana e yeda so ambeni ye ayeke dä so e peut ti changé ni ape nga e kiri singila ndali ti aye so e yeke na ni. Dunia so aye ti tene e bâ so aye kue adoit ti tambela gï na lege ni si e duti na ngia. Me a yeke tâ tënë ape. Na tapande, Jéhovah atene na aJuif so a gue na ala na Babylone ti sara kue ti tene gigi anzere na ala kâ. (Diko Jérémie 29:​4-7, 10.) Nyen la e peut ti manda dä? Gi ti bâ anzoni ye so mo yeke na ni nga wara ngia dä. Girisa ape so Jéhovah ayeke zia mo ape. Lo yeke aidé mo (Ps. 63:7; 146:5). Effie, so aparalysé na peko ti so lo sara accident, atene: “Jéhovah, azo ti sewa ti mbi nga na aita ti congrégation a-aidé mbi mingi. Tongaso, mbi bâ so mbi yeke bâ ye so aita asara ti aidé mbi tongana ye oko ape tongana mbi découragé. Mbi ye ti kiri singila na Jéhovah nga na akamarade ti mbi ndali ti so ala aidé mbi mingi.”

10. Ngbanga ti nyen la e peut ti duti na ngia même tongana e yeke na akpale?

¹⁰ Même tongana gigi ti e ayeke tongana ti so e ye ape wala tongana angangu kpale asi na e wala na sewa ti e, e peut ti ngbâ ti duti na ngiab (Ps. 126:5). Ngbanga ti nyen? Ngbanga ti so a yeke pëpe dutingo ti e la ayeke sara si e duti na ngia. Maria, so ayeke pionnier, atene: “Na ngoi so mo yeke na yâ ti kpale, ti ngbâ ti duti na ngia aye ti tene ape so mo fa pëpe ye so kpale ni asara na ndö ti mo. Me a ye ti fa so mo girisa azendo ti Jéhovah ape. Babâ ti e ayeke aidé e ti bata ngia ti e.” Girisa ape so atâa dutingo ti mo ayeke ngangu tongana nyen laso, a yeke ngbâ lakue lakue ape. Fafadeso, Jéhovah ayeke zi aye kue so asara si e bâ pasi nga e yeke na vundu.

11. Tapande ti Paul a-aidé mo tongana nyen?

¹¹ Na ambeni ngoi, e peut ti pensé so e yeke na akpale ndali ti so e nzere encore na lê ti Jéhovah ape. Tongana e pensé tongaso, e peut ti gbu li na ndö ti ambeni wakua ti Jéhovah so ayeke be-ta-zo so awara angangu kpale. Bâ tapande ti bazengele Paul. Jésus la asoro lo ti fa tâ tënë “na amara, agbia nga na amolenge ti Israël.” (Kus. 9:15). So pasa! Me, Paul ayeke lani na gbâ ti akpale (2 aCor. 11:​23-27). So na bango ni akpale ti Paul ayeke hunzi ape so aye ti fa so lo nzere na lê ti Jéhovah ape? Ên-ën! Ti vrai ni, gbungo ngangu ti lo afa so Jéhovah asara tufa na ndö ti lo (aRom. 5:​3-5). Gbu li fadeso na ndö ti dutingo ti mo. Mo kue mo ngbâ ti sara na Jéhovah be-ta-zo atâa so mo wara gbâ ti akpale. Tongaso, mo kue mo peut ti duti sûr so mo nzere na lê ti Jéhovah.

12. Tongana nyen la akua so e ye ti sara na Jéhovah si e sara ape apeut ti nzi ngia ti e?

¹² Use ye ni: Akua so e ye ti sara me e wara lege ti sara ape (aProv. 13:12). So e ye Jéhovah nga e ye ti kiri singila na lo apusu e ti gi ti sara ambeni ye na yâ ti kua ti lo. Me tongana aye so e gi ti sara alingbi na dutingo ti e ape, e peut ti découragé (aProv. 17:22). Holly, so ayeke pionnier, atene: “Mbi ye ti gue na Ekole ti awafango nzoni tënë ti Royaume, ti gue ti fa tënë na mbeni kodro nde wala ti aidé na construction ti Ramapo. Me aye achangé na yâ ti gigi ti mbi na mbi peut ti sara ni encore ape. Vundu ahon ndö ti mbi. Tongana mo ye ti sara ambeni ye me mo wara lege ti sara ni ape, bê ti mo apeut ti son.” Azo mingi apensé tongaso.

13. Ambeni ye wa la e peut ti gi ti sara atâa dutingo ti e ayeke tongana nyen?

¹³ Nyen la apeut ti aidé e ti kiri ti duti na ngia? Girisa ape so Jéhovah ahunda na e ape ti sara ye ahon ti so e peut ti sara. Lo bâ e na nene ni même tongana e peut pëpe ti sara ye so amba ti e asara. Jéhovah aye ti tene e sara ye alingbi na ngangu ti e nga e duti be-ta-zo (Mi. 6:8; 1 aCor. 4:2). Atënë ti bê ti e nga na apendere sarango ye ti e agbu bê ti lo mingi ahon akua so e sara. A yeke nzoni e gi pëpe ti sara ye ahon ti so e peut ti sara.c Tongaso, même tongana mo lingbi ape ti sara aye so mo ye ti sara ndali ti Jéhovah, pensé na aye so mo peut ti sara. Na tapande, mo peut ti aidé ti fa kua na amaseka wala mo peut ti kpengba aita so ayeke ambakoro. Mo peut ti leke ti gue ti bâ mbeni zo, wala ti iri lo na téléphone wala ti tokua na lo message ti kpengba lo. Tongana mo sara aye so mo peut ti sara, Jéhovah ayeke sara tufa na ndö ti mo na lege so lo yeke sara si mo duti na ngia. Girisa ape so na yâ ti angoi so ayeke ga na yâ ti fini dunia e yeke wara lege mingi ti sara na Jéhovah na alege so e peut même ti imaginé ape. A yeke ye so akpengba lani Holly. Lo tene: “Tongana mbi découragé, mbi yeke duti na mbi dabe ti mbi so mbi yeke ngbâ ande na fini lakue lakue. Na aide ti Jéhovah, mbi yeke wara ande lege ti sara ambeni ye so mbi zia na gbele mbi ti sara ndali ti lo na yâ ti fini dunia.”

14. Mbeni ye nde wa la apeut ti nzi ngia ti e?

¹⁴ Ota ye ni: Tongana gingo ti duti na ngia la ayeke kota ye na yâ ti fini ti e. Na ndö ti Internet, e peut ti bâ azo so, na bango ni, ala yeke na ngia mingi ndali ti so ala yeke na anzoni ye na ngoi kue. E peut ti komanse ti pensé so tongana e sara aye so e ye, e vo aye so e ye nga e voyagé na ando nde nde, e yeke duti biani na ngia. A yeke sioni ape ti sara aye so anzere na e. Jéhovah acréé e na mbeni fason ti tene apendere ye anzere na e. Ye oko, azo mingi abâ so ye so ala pensé ni la ayeke ga na ala ngia la anzi ngia ti ala. Eva, so ayeke pionnier, atene: “Tongana mo yeke pensé gï lakue ti tene terê ti mo anzere, ye ayeke lingbi mo lâ oko ape.” Tongana gingo ti duti na ngia la ayeke kota ye na yâ ti fini ti e, e yeke wara vundu.

15. Nyen la e peut ti manda na lege ti tapande ti Gbia Salomon?

¹⁵ E peut ti manda ye na lege ti ye so asi na Gbia Salomon na ndö ti vundu so zo ayeke wara tongana gingo ti wara ngia la ayeke kota ye na yâ ti gigi ti lo. Lo gi lani ti duti na ngia na lege so lo gi ti wara aye so lo sara nzara ni, na tapande, lo te anzoni kobe, lo mä apendere bia nga lo gi ti wara anzoni ye kue so nginza apeut ti vo ni na ngoi ti lo. Me lo wara lani ngia ape. Lo tene: “Lê ayeke bâ aye, me a yeke si pëpe; mê nga ayeke mä aye, me a yeke si pëpe.” (Zo-ti. 1:8; 2:​1-11). Ambeni zo apensé so tongana ala yeke na nginza nga ala sara ye kue so ala ye, ala yeke duti na ngia. Me a yeke mvene. Aye ni so apeut lâ oko ti sara si e duti biani na ngia ape.

16. Tongana nyen la mungo ye na zo apeut ti aidé e ti kiri ti wara ngia? (Bâ nga afoto.)

¹⁶ Nyen la apeut ti aidé e ti kiri ti duti na ngia? Jésus afa na e so “mungo ye na zo aga na ngia mingi ahon warango ye na tïtî zo.” (Kus. 20:35). Alekos so ayeke ancien atene: “Mbi gi ti sara akete kete ye ti aidé azo. Tongana mbi aidé ala, mbi yeke pensé ape na ndö ti aye so mbi ye, na mbi yeke na ngia.” Nyen la mo peut ti sara ti aidé azo? Tongana mo bâ so mbeni zo ayeke nzoni ape, gi ti kpengba lo. Peut-être mo peut ti leke akpale ti lo ape, me tongana mo mä lo nzoni nga mo zia terê ti mo na place ti lo, mo bâ mawa ti lo nga mo dabe ti lo so lo peut ti bi aye so ane lo na ndö ti Jéhovah, mo peut ti dë bê ti lo (Ps. 55:22; 68:19). Mo peut nga ti aidé lo ti hinga so Jéhovah ayeke zia lo ape (Ps. 37:28; És. 59:1). Mo peut nga même ti sara mbeni ye ti aidé lo, na tapande ti tö kobe na lo wala gï ti tene ala tambela ala bâ ndo. Mo peut ti hunda na lo ti tene ala gue ala fa tënë, ye so ayeke sara si lo yapu. Zia si Jéhovah asara kua na mo ti kpengba azo. Tongana e pensé mingi na azo ahon ti pensé na e wani, e yeke duti biani na ngia.—aProv. 11:25.

17. Tongana e ye biani ti duti na ngia, nyen la e doit ti sara? (Psaume 43:4).

¹⁷ E peut biani ti duti na ngia tongana e ngbâ ti ga nduru na Babâ ti e ti yayu. Bible atene na e so Jéhovah la ayeke sara si e duti na “kota ngia.” (Diko Psaume 43:4.) Ni la, même tongana e yeke na akpale, e bezoin ti gi bê ti e ape wala ti sara mbeto ape. Tongaso, zia e ngbâ lakue nduru na Jéhovah so ayeke sara si e duti na ngia lakue.—Ps. 144:15.