1925​: A sara ngu ngbangbo oko awe

YE SO ALA KU NI ASI HIO APE

A-Wamandango Bible mingi apensé lani so sese ayeke ga Paradis na ngu 1925. Ngbanga ti nyen? Ita-koli Albert Schroeder, so ambeni ngoi na pekoni aga membre ti Bebungbi, atene: “E pensé lani so na ngu 1925 azo so a soro ala ti gue na yayu ayeke gue kâ, nga azo so ayeke be-ta-zo, na tapande Abraham, David nga na ambeni, ayeke zingo na kuâ nga ala yeke mû li ni na ndö ti sese.” Ni la, na ngoi so a si tongaso ape, ambeni ita adécouragé.—aProv. 13:12.

Atâa so aWamandango Bible mingi adécouragé, ala ngbâ ti fa tënë. Ala ga ti bâ so ti fa tënë ti Jéhovah na azo ayeke kota ye so ala doit ti sara. Zia e bâ tongana nyen la ala sara kua na radio ti fa tënë na azo mingi.

AITA ALEKE AMBENI DA TI RADIO

So radio WBBR aga na anzoni ye mingi, aWamandango Bible aleke mbeni ngangu da ti radio nduru na Chicago, na Illinois. Iri ti fini radio ni ayeke lani WORD. Ralph Leffler, so amû maboko na lekengo da ti radio ni, atene so na alakui so dê ayeke mingi, azo na ando mingi so ayo ayeke mä radio ni. Na tapande, mbeni sewa so ayeke na gbata ti Pilot Station, na Alaska, so ayo ahon kilomètre 5000 amä oko ti akozo kuasinga ni. Na peko ti so sewa ni amä kuasinga ni, ala tokua mbeni lettre na aita so asara kua na da ti radio ni ti kiri singila na ala ndali ti awango so akpengba ala.

Tour ti Ba Ndo ti lango 1 ti décembre, ngu 1925 afa ndani so azo mingi awara lege ti mä radio ni, atene: “WORD ayeke mbeni oko ti aradio so ayeke ngangu mingi na États-Unis. Azo apeut ti mä radio so na ando so ayeke na terê ti ngu na Est nga na Ouest ti États-Unis, na Cuba nga na nord ti Alaska so ayo mingi. Gbâ ti azo so ade amä tâ tënë lâ oko ape aye ti hinga ye mingi na ndö ni ndali ti so ala mä radio so.”

Na ngoi ni so, aWamandango Bible ayeke sara nga lani effort ti sara kua na radio ti fa nzoni tënë na Canada. Na ngu 1924, a leke da ti radio CHUC na Saskatoon, na Saskatchewan. A yeke lani mbeni oko ti akozo radio so a fa tënë ti Nzapa dä na Canada. Na ngu 1925, a bezoin lani mbeni ndo so akono ndali ti radio ni. Tongaso, Société Watch Tower avo da ti radio ni, aita azi studio ti radio ni ague na ni na yâ ti mbeni ngbene da ti théâtre na Saskatoon so a vo ni na a leke peko ni ndali ni.

Grâce na radio ni, gbâ ti azo so ayeke vivre na yâ ti akete gbata nga na yâ ti akete kodro na Saskatchewan amä nzoni tënë ti kozoni. Na tapande, na yâ ti mbeni kete gbata, mbeni wali so iri ti lo ayeke Graham asû mbeni lettre ti hunda ti tene a tokua na lo ambeti na peko ti so lo mä mbeni kuasinga. Ita George Naish atene so, so e bâ so lo bezoin ti tene a aidé lo hio, e tokua na lo avolume kue ti buku Études des Écritures. Hio, Graham akomanse ti fa tënë ti Royaume même na ando so ayo.

E MANDA MBENI KOTA TÂ TËNË

Mbeni article so ayeke kota mingi ayeke lani na yâ ti Tour ti Ba Ndo ti lango 1 ti mars, ngu 1925, li ni ayeke: “Dungo mara ni.” Ngbanga ti nyen la article so ayeke lani kota mingi? A-Wamandango Bible ahinga lani so Satan ayeke na komandema na ndö ti asioni yingo, abungbi ti vorongo nzapa ti wataka, agouvernement nga na abungbi ti dengo buze so ayeke na ndö ti sese. Aye so kue ayeke na yâ ti bungbi ti lo. Me na lege ti article so, “ngbâa be-ta-zo so ayeke sara ye na ndara” a-aidé aita ti comprendre so Jéhovah nga kue ayeke na mbeni bungbi so ayeke tâ nde mingi na bungbi ti Satan; bungbi ti Satan ayeke wato ti bungbi ti Jéhovah (Mat. 24:45). Na ndö ni, ngbâa ni afa nga so na peko ti ‘bira so alondo na yayu’ na ngu 1914, a tomba Satan na asioni yingo ti lo na yayu na fadeso ala yeke na ndö ti sese.—Apoc. 12:​7-9.

Ambeni Wamandango Bible ayeda lani pëpe na fini fango nda ti ye so. Tongaso, article ni atene: “Tongana ambeni zo so ayeke diko Tour ti Ba Ndo ayeda na tënë so ape, a yeke nzoni ala kanga bê, ala sara confiance na Jéhovah na ala ngbâ ti voro lo be-ta-zo.”

Me Tom Eyre, so ayeke lani mbeni colporteur (so laso a iri ala apionnier) na Grande-Bretagne, afa tënë ti bê ti aWamandango Bible mingi na ndö ti article so, lo tene: “Aita ayeke lani na ngia mingi ti mä fango nda ti Apocalypse 12. So e hinga lani so Royaume ti Nzapa akomanse ti komande na yayu awe, a nzere na e mingi ti fa nzoni tënë na azo. A sara si e ye même mingi ti fa tënë nga ti aidé azo ti bâ so Jéhovah ayeke sara apendere ye na yâ ti angoi so ayeke ga.”

E DOIT TI FA TËNË NA NDÖ TI JÉHOVAH NA AZO

Laso, aTémoin ti Jéhovah ahinga tënë so ayeke na Ésaïe 43:10 nzoni mingi. Versê ni atene: “Jéhovah atene: ‘Ala yeke atémoin ti mbi. Mo yeke wakua ti mbi so mbi soro mo.’” Me kozo na ngu 1925, a sara tënë ti versê so na yâ ti ambeti ti e mingi ape. Ye oko, ye ni achangé. Na ngu 1925, Tour ti Ba Ndo asara tënë na ndö ti Ésaïe 43:10 na 12 na yâ ti anuméro 11.

Na hunzingo ti nze ti août ngu 1925, aWamandango Bible asara mbeni kota bungbi na Indianapolis, na Indiana. Ita Joseph Rutherford asû lani mbeni tënë ti yamba na azo so aga. A imprimé tënë ni so na ndö ti mbeti-kapa ti kota bungbi ni. A tene: “E ga na kota bungbi so ti tene . . . Seigneur amû na e ngangu tongaso si na ngoi so e kiri, e duti na kota nzara ti duti atémoin ti lo.” Na yâ ti lango miombe kue ti kota bungbi ni, a wa azo kue so aga ti fa tënë ti Jéhovah na azo na ngoi kue so lege azi na ala.

Na samedi, lango 29 ti août, Ita Rutherford asara diskur so li ni ayeke “A tene na e ti sara mbeni ye.” Na yâ ti diskur ni, lo fa ndani so kua ti fango tënë ayeke kota ye mingi, lo tene: “Jéhovah atene na azo ti lo . . . : ‘Ala yeke atémoin ti mbi . . . na mbi yeke Nzapa.’ Na pekoni, lo mû yanga na ala na lege ti angangu tënë so, lo tene: ‘Ala kpo mbeni yongoro keke na nduzu si azo abâ ni.’ Na sese so, azo so apeut ti fa tënë na ndö ti Jéhovah na azo ayeke gï azo so yingo ti lo afa lege na ala ndali ti so ala yeke azo ti lo.”—És. 43:12; 62:10.

Na peko ti diskur ni, Ita Rutherford adiko mbeni mbeti so li ni ayeke “Tënë so amû beku na zo.” Azo kue so aga ayeda na tënë ti yâ ti mbeti ni so atene gï Royaume ti Nzapa oko la ayeke sara si “aye ti zo amaï, lo wara siriri, nzoni seni, fini ti lakue lakue, liberté nga lo duti na ngia teti lakue lakue.” Na pekoni, a kiri na peko ti atënë ni so na ayanga ti kodro mingi, a imprimé ni ti tene a fa na tënë. Wungo ni so a kangbi ni ayeke lani kutu 40 tongaso.

Ambeni ngu na pekoni la aWamandango Bible amû iri Témoin ti Jéhovah. Ye oko, ala komanse ti hinga so a yeke kota ye ti tene ala duti atémoin ti lo.

E KOMANSE TI SARA VIZITE NA AZO SO AYE TÂ TËNË

So wungo ti aWamandango Bible akomanse ti ga gbani na yâ ti dunia, a wa ala ti kiri ti bâ azo so asara nzara ti nzoni tënë. Na peko ti so a hunzi kapa ti kangbingo tract Tënë so amû beku na zo, Bulletina atene: “Kiri mo bâ azo so ayeda ti mû tract Tënë so amû beku na zo.”

A zia na yâ ti Bulletin ti janvier ngu 1925 tënë so mbeni Wamandango Bible ti gbata ti Plano, na Texas atene. Lo tene: “Li ti e akpe ti bâ so tongana e kiri e fa tënë na ando so e fa tënë dä kozo, azo amä e nzoni ahon ti ando so e fa tënë dä fini fini. Na yâ ti ngu bale-oko so ahon, e fa tënë na yâ ti mbeni kete gbata na yâ ti territoire ti e fani oku. . . . Ade ti ninga ape, Ita-wali Hendrix na mama ti mbi akiri afa tënë dä na ala zia abuku na azo mingi ahon ti kozo.”

Na Panama, mbeni colporteur atene: “Gbâ ti azo so atomba mbi na yanga-da ti ala achangé bango ndo ti ala na ngoi so mbi kiri fani use wala fani ota. Na ngu so ahon, mbi mû ngoi mingi ti kiri ti bâ azo so mbi fa tënë na ala kozo, na ambeni ye so asi anzere na mbi mingi.”

E BÂ NDO NA DEVANT

Na hunzingo ti ngu 1925, Ita Rutherford asû mbeti na acolporteur kue na lo fa akua so a sara na yâ ti ngu ni nga na ye so ala doit ti sara na yâ ti ngu so ayeke ga. Lo tene: “Na yâ ti ngu so, ala yeke na pasa ti dë bê ti azo mingi so ayeke na vundu. Kua so amû na ala ngia . . . Na yâ ti ngu so ayeke ga, lege ayeke zi ande na ala mingi ti fa tënë ti Nzapa na ti Royaume ti lo nga ti fa mbilimbili azo wa la ayeke awakua ti lo. . . . Zia e kue e yâa go ti e ti gonda Nzapa nga na Gbia ti e.”

Na hunzingo ti ngu 1925, aita aleke ti kono Béthel ti Brooklyn. Na ngu 1926, bungbi ti Jéhovah akomanse mbeni kota kua ti construction so ade a sara ni lâ oko ape.